سوگو آ گواچنی – ٹی بی پی سرگپ
بلوچ یکجہتی کمیٹی نا راہشونک پنچ توہ تدینگ آن پد ہم زندانی ءُ و ریاستی ادارہ غاک اوفتے گیشتر بندی کننگ کن پوسکنو اٹکل کاریم ئٹ ہتسہ ءُ۔ سیاسی حالیت نا کیس آتا مننگ و شاہدی مفننگ آن پد ہم بلوچستان نا عدالت آک اِرا توہ ئٹی چارمیکو وار ءِ بلوچ راہشون تا ریمانڈ نا موکل تسنو و کراچی نا عدالت اسہ دروغ مقدمہ اسیٹی ماہ رنگ بلوچ نا دزگیری نا پرمان ہم تسنے تاکہ اودے دزگیر کریسہ کراچی جیل آ ہتنگ مرے۔ پشتون راہشون علی وزیر ءِ اِرا سال اسکان بندی کننگ کن ریاستی ادارہ غاک ہرا اٹکل آتے کاریم ئٹ ایسُر، داسہ ہمو اٹکل آک بلوچ یکجہتی کمیٹی نا راہشون تا برخلاف آزموندہ مریسہ ءُ۔
بلوچ راہشون تا خاہوت آک و بلوچ یکجہتی کمیٹی اوفتا آجوئی کن چِل و پنچ دے آن پاکستان نا بنجائی شار اسلام آباد ئٹ تولوک برانز کننگ ءِ۔ واہم حکومت دا ویل ئنا بھلنی ءِ مارنگ نا جاگہ غا بلوچستان نا سیاست آ چَٹی کروک متنازعہ بندغ آتیان پریس کانفرنس کرفسہ زوراکی نا بیگواہی تا گواچنی ءِ دروغ پاننگ نا کوشست کننگ ءِ۔ حالانکہ ہیومن رائٹس کمیشن آف پاکستان نا داسہ نا فیکٹ فائنڈنگ رپورٹ حکومتی دعویٰ تے رد کیک و بلوچستان نا گواچنی حالیت ءِ بھیم بش کروک گوندسہ درشان کیک کہ ”بلوچستان ئٹ اسہ بھاز بھیم بش کروک رجحان اس مونا بسنے: زوراکی نا بیگواہی تا لڑ دائسکان برجاء ءِ، جمہوری آزاتیک کم مریسہ ءُ، صوبائی آزاتی پین نزور مسنے، صحافت آ ترند رکھ خلوک ءِ، و قانود آن بڑز مننگ نا رجحان وس آن تیر مسنے۔ دا غٹ کاریمک بلوچستان ئٹ السی بیگانئی و سیاسی بے سوگوی ءِ گیشتر کڑمب کننگ ءُ۔“
بلوچستان ئٹ ریاستی تادی و زوراکی نا بیگواہی تا سوگو آ گواچنی ءِ بیانیہ تا ذریعت ئٹ دروغ کننگ نا کوشست زمینی گواچنی تے بدل کننگ کپک۔ سیاسی راہشون تے بندی کننگ آن پد ہم ریاستی زوراکی نا پالیسی تا برخلاف مزاحمتی توار آک بش مریسہ کرور۔