کوئٹہ تون اوار تیوہ غا بلوچستان ئٹ اسہ وار پین موبائل فون انٹرنیٹ ءِ بند کننگانے ۔
موبائل انٹرنیٹ 30 اگست آن 6 ستمبر اسکان بند مرو ، پاکستان ٹیلی کمیونیکیشن اتھارٹی (پی ٹی اے) صوبائی نوٹفکیشن ہم شنگ کننگانے۔
محکمہ داخلہ نا ذرائع نا پاننگ ءِ کہ سیکیورٹی خلیس نا گواچی تیوہ غا صوبہ ٹی فون انٹرنیٹ بند کننگانے ۔
موبائل فون انٹرنیٹ بند مننگ آن مخلوق فریشان مننگ ءِ، آن لائن پوریا تون تفوک بندغ آک و خوانندہ غاک بھاز فریشان ءُ ۔
یاتی مرے کہ داکان مالو 6 اگست آ ہم تیوہ غا بلوچستان ئٹ موبائل فون انٹرنیٹ نا بند کننگ آن گڈ بلوچستان ہائی کورٹ 21 اگست آ کوئٹہ ٹی انٹرنیٹ کاریم 2 گھنٹہ ٹی یلہ کننگ نا فرمان تننگاسس۔ عدالتی حکم آن گڈ کوئٹہ و چمن نا بھاز آ علاقہ آتیٹ موبائل انٹرنیٹ یلہ کننگ برجاء مسس ۔
بلوچستان ہائی کورٹ ٹی پبلک ٹرانسپورٹ و انٹر نیٹ نا بند مننگ نا حوالہ ئٹ درخواست آ پیشی مس، چیف جسٹس روزی خان بڑیچ و جسٹس سردار احمد حلیمی آ تالان اِرا باسکی بینچ سماعت کریسس ۔
موبائل فون انٹر نیٹ کاریم نا بند مننگ نا برخلاف چیئرمین کنزیومر سوسائٹی خیر محمد قانودی درخواست جمع کریسس ۔
بلوچستان ہائی کورٹ نا حکم آتیا بلوچستان نا جتاء شار آتیٹ 15 دے آن گڈ موبائل ڈیٹا یلہ مننگ ءِ بناء کریسر ، پشین ، چمن و کوئٹہ آن بھاز آ علاقہ آتیٹ موبائل انٹرنیٹ یلہ کننگاسس ۔
واہم کیہی علاقہ آتیٹ انٹرنیٹ یلہ متویسس اندن انٹرنیٹ نزوری نا ہم گواچی مسس ۔
صوبائی وزارت داخلہ نا پارہ غان 6 اگست آ شینگ کروک نوٹیفکیشن ٹی پاننگاسس کہ صوبہ ٹی زوت ئٹ موبائل ڈیٹا کاریم نا بند کننگ نا حکم تننگانے ، ہرانا اطلاق 31 اگست اسکان مرو ۔