اسرائیلی سر وزیر نیتن یاہو دعویٰ کرینے کہ اسرائیلی فورسز آک حماس نا سلہہ بند کڑدہ نا ترجمان ابو عبیدہ ءِ ٹک کرینو، اسرائیلی وزیر دفاع اسرائیل کاتز پارے کہ ابو عبیدہ مرگ ئنا گواچی مسنے۔
جہانی حوال تروک ادارہ رائٹرز نا رپورٹ نا ردئٹ اسرائیلی سر وزیر نیتن یاہو دعویٰ کرینے کہ اسرائیلی فورسز آک ابو عبیدہ ءِ ٹک کرینو اندن اسرائیلی وزیر دفاع پارے کہ ابو عبیدہ مرگ ئنا گواچی مسنے۔
ابو عبیدہ، ہرا حذیفہ الخالوت نا پِن ئٹ ہم چائنگک، فلسطینی و اسرائیلی ہڑتوم آتیکن اسہ پنی ءُ بندغ ئسے۔ او حماس نا بڑزکو عسکری قیادت آن خڑک تکنگاکہ و کم و ود اِرا دہائی آن گروپ نا کلہو آتے سر کننگ نا زمہ واری سر تننگ ئس، ہرافتے بھازی او تینا دروشم ءِ رومال ئٹ ڈھکسہ ویڈیو بیان تا دروشم تا ذریعت ئٹ تسکہ۔
امریکہ اپریل 2024 ئٹ اودے رکھ آتا گواچی کریسس، دا دوبہ خلسہ کہ او القسام بریگیڈ نا ”سائبر انفلوئنس ڈپارٹمنٹ“ نا سروکی ءِ کننگ ءِ۔
تینا ایسری بیان ئٹ، ہرادے او جمعہ غا تس، ابو عبیدہ خبڑدار کریسس کہ غزہ شار آ ڈٹ بندی نا ردئٹ اسرائیلی جلہو بندی تا ساہ ءِ بھیم ئنا گواچی کرو۔
ایلو پارہ غان، قطر نا حوال تروک ادارہ الجزیرہ نا رپورٹ نا ردئٹ اسرائیل غزہ آ جلہو تے پین ترند کرینے و سہب آن دائسکان اسرائیلی فوج نا جلہو تیٹ 63 فلسطینی کسکنو۔
جانجوڑی حوالکار آک الجزیرہ ءِ پاریر کہ کہوک آتیٹ 15 بندغ کمک پٹنگ ئسر کہ اسرائیل نا جلہو تا گواچی مسر۔