مکران سفا مٹ ءِ
نوشتکار: جعفر قمبرانی
دی بلوچستان پوسٹ
بساک نا چارمیکو کونسل سیشن تینے ٹی تینٹ اسہ ہیل کاری دیوان ہس اسک ہراٹی بروکا ہر سنگت بیرہ تنظیم کاری ہیل کتؤ بلکن مکران نا گلزمین و دانا باتی تا مہر ءِ کنیسہ پین کیہی گڑاتے ہم محسوس کرے۔ کن تون اوار ہرجس دا خواہشت کرے کہ ہمو سوگوی، دلیری و شعوری عمل آک کہ مکران اٹ ساڑی ءُ ہموفتے بلوچستان نا ایلو کُنج اتیٹی ہم مٹ مننگ نا گرج ءِ۔
مکران اگہ ایلو شار اتیان مٹ متؤکا گڑا کونسل سیشن وڑ انگا بھلا و اہمیت والا دیوان آک مکران ٹی ہڈ ہلنگ کتویسا۔ باور کیس اینو نا سیاسی حالیت اتا ترندی و بے جاراتی نا دا وخت اتیٹی داوڑ نا دیوان بیرہ مکران اٹ ممکن مسکہ۔ انتئے کہ مکران و اونا مخلوق مٹ ءِ و سیاسی شعور نا ایسری سیم حد اتیا سر ءِ۔ ہرافتے آ سر مننگ کن ننے بھاز گام گیچ نا گرج ئے۔
اسل بھاز!
ای مکران ءِ خناٹ دن چا بلوچستان نا اِرا بھلو گواچن ءُ دروشم ہمودا خناٹ۔
اولیکو دا کہ مکران بلوچستان نا ہمو ھند ءِ ہراڑے ہر جاگہ سیال سیاہ مار انبار چاڑزانوں کریسا مکران ءِ “خروٹی ءُ اڈّہ” ہس جوڑ کرینے۔ گمان ہندن کہ اسہ اسہ مِیل آ خروٹی آ اڈہ غاک اسر ہرافتیٹی لپڑزہ و خلیس آن پر انگا امبل آک جَپ کریسر۔ مکران سیخ اٹ خلوک ءِ۔ اورے ہنوکا ہر بندغ محسوس کننگ کیک کہ مکران گواچن اٹ کوزہ مروکو شار ئسے۔
ولے کلان بھلا ہیت دا کہ مکران نا مخلوق غلامی آن خُلوک افک بلکن غلامی نا احساس ودی کریسا دادے ایسر کننگ کن چھپ ہم زُنڈوک اف۔
ارٹمیکو دروشم ٹی مکران نا مخلوق نا رویہ بلوچستان نا بروکا وخت نا شاھدی تسکہ۔ مہمانداری، دلیری و است خواہی آن بیدس مکران اٹ سیاسی شعور نا مننگ کل آن بھلا ہیت ہس ہراکہ بندغ ئے خواش کیک و سیال ئے کڑتی ثی شاغک۔
کیچ گوادر و خاص کر ھیرونک نا مخلوق نا دلیری نا کچ دا اسک کہ ننا ساڑی گری نا وخت آ ہڑدے اسہ اِرا بلوچ ورنا تا جؤن خننگارہ ولے دن اسل متؤ کہ مخلوق بھیم انا گواچی مرے یا تینا سیاسی عمل اتیان چک و پد مرے۔۔۔اخا!
داکان بیدس، مکران اٹ سیاسی شعور نا سیم و حد آک داڑسکان اسر کہ سیال انا بولی مخلوق کن کِرینگ آن کم الؤ۔ لمئی بولی نا شونداری کن ہر بندغ ہر وخت تکڑہ اسک۔ داڑسکان کہ مکران میڈیکل کالج ٹی جہس نوشت خناٹ کہ “زالبول آنی آرام جاہ” و پین جہس خناٹ کہ “ورزش جاہ” دائے۔
ہندن بازار اٹ ہراتم دکان تا پن تے خناٹ کہ بلوچی بولی ٹی دکان تا پن تے تخنگ ہم بنا کرینو تو کنے لگا ای بلوچستان نا بروکا ہمو وخت اٹی ساڑی اٹ ہرانا مستاہی ئے ننے آن اینو نا ورنا تا جہد کاری و مہکم سلنگ ہلنگ ٹی ئے۔
بازار اٹ منہ دکان نا پن دا وڑ ہم اسر “ساچان سینگار جاہ” یا سائبان ٹاپ و سینگار جاہ” دائے۔
باور کیس دا پین ہچ ہس نئے ہمو ایلم تا سیاسی شعور ئے ہرا تینا بولی ئے داخس اہمیت ایتنگو۔
بیرہ دا اخا بلکن مکران نا پٹ میدان تیانبار انگا بھلا است والا سنگت آک براھوئی بولی ءِ ہم بلوچستان نا بولی سمجھیسا ہیل کریسا ءُ۔
مند آن سنگت ہس ہرادے ای تپرہ ہم کنا کتاب نا خواست ءِ دا سہب آن کیک کہ اودے لمئی بولی ‘براھوئی’ تون مہر ارے۔ یا کنا کتاب بلوچی بولی ٹی ہیت کروک آ سنگت ڈاکٹر شلی بلوچ، واجہ غنی پرواز، عصاء ظفر و گلزار دوست استے ٹیکی ٹی دوئی کرفنگ ہمو سیاسی عمل نا بشخ ئسے ہرا مکران اٹ مخلوق نا رغ رغ اٹ تالان ئے۔
پک انگا ہیت دا کہ بلوچستان نا کل شار تیان زیات سیاسی شعور نا رداٹ مستی گام خلوک آ ڈغار مکران اینو ہم مستی گام خلیسا ءِ۔
باور کیس مکران مٹ ءِ سفا مٹ۔ ننا پارہ نا مخلوق ہم بائدے مٹ مریسا مکران نا مہمانداری، است خواہی و سیاسی گام گیچ اتیا عمل کریسا مستی برے۔
گواچن دادے کہ مکران سیخ تیٹ خُلّوک ئے ولے ہبکہ افک، بھیم انا گواچی اف و اسہ وڑٹ گام گیچ کریسا مستی روان ئے۔
مکران نا سنگت آک کوزہ گیر نا دا چم ئت پہہ مسنو کہ او اویلو وار اتون بے وس آ راج انا بولی و رسم و دود اتے شیف شاغنگ نا کوشست کیک۔ او دا ہم پہہ ءُ کہ سیال ننا بے وسی آن فائدہ ارفیسا ورنا تے زایاں کننگ نا ہم کوشست کیک کہ اوفک غیر سیاسی و مزغ اک تے خصی مریر۔ دا تینے ٹی تینٹ اسہ بھاز بھلو سیاسی ءُ عمل ئسے کہ کوزہ مروک آ راج آک غیر سیاسی مریر۔ او مکران نا باتیک دا چم ئے ہم پہہ مریسا مزغ اتے خصی مننگ کن ہلیتنو۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔