کنا ڈیہہ ئنا شہید آک – مزدک بلوچ

کنا ڈیہہ ئنا شہید آک

نوشت: مزدک بلوچ

دی بلوچستان پوسٹ

کل آن مُست ای تینا وطن نا شہید آتے دروت ندر کیوہ۔ اندن کہ نم کل ءِ سماء مرو اینو نا دے 13 نومبر ءِ وطن نا ہمو شہید آتیکن دا دے ہڈ تننگانے، ہمو لال آ شہید آتیکن ہرا تینا زند ءِ تینا لمہ وطن کن ندر کریر۔ ہمو شہید آک راج ئنا مونا تینا عزت و شرف ءِ بڑز کریر و کل ئنا ہند بھاز بڑز ءِ ننا غٹ راج ئنا مونا۔ اوفتا کڑد نا زی آ نن انت نوشتہ کین، انت پان اخس کہ نوشتہ کین اخس کہ پانک واہم اوفتا ہمو اواری نا مونا کم مرو انتیکہ اوفتا کڑد، ہند و ہمو بھلا سوچ، و اوفتا بھاز مونا اننگ اوفتا عمل کننگ، اوفتا فکر و سوچ آتیا سر مننگ کن ننے ہم اوفتا وڑئٹ ہمو قربانی نا فلسفہ غا سفر کروئی تمک، اوفتا ہمو فلسفہ ءِ ننے تینا جند ئٹ ہتوئی تمک۔

قربان مننگ نا فلسفہ چٹ جتا ءُ فلسفہ اس مریک، او اسہ اندنو دڑد ئسے ہرادے ہر بندغ پہہ مفک، ہمو بندغ آک پہہ مریرہ ہرافتے راجی آ دڑد آک نظر بریرہ، ہرا بیوسی و بزگی ءِ ماریرہ، ہمو بندغ آک چٹ جتا مریرہ انتیکہ او تینا راج ءِ خنرہ، اُریرہ، محسوس کیرہ و تینا ہیت آتیا سلرہ و اوفتیا ساندہ عمل کیرہ۔ اوفتا چٹ جتا ءُ جاگہ ئسے، اوفتا چٹ جتا ءُ سوچ ءُ ہرافتا زی آ تینے قربان کیرہ۔ قربانی خواننگ ئٹ چٹ چنک خننگک، پاننگ ئٹ ہم دن بھلن لگپک ولے ہراتم کہ راج ئنا اسہ قربان مروکو سنگت اس قربان مریک تینا لمہ وطن نا زی آ گڑا ہمو قربانی بھاز بھلن مریک بھاز بھلن پاننگک، بھاز بھلن خننگک و اندا سوب آن دا عمل ئٹ بھاز بھلو زیبائی اس ارے۔

شہید آتا فکر، اوفتا سوچ، اوفتا مخلصی، اوفتا مون مُستی اننگ زندہ ءِ راج ئنا مونا، لمہ ڈغار نا مونا۔ اوفک تینا راج ئنا پجار، تینا ڈغار و تینا فکر ئتون چٹ مخلص مسنو۔ و ہراتم ای لال انگا شہید آتا زی آ نوشتہ کننگ نا کوشست کیوہ گڑا دیچہ کنے انت مریک ای نوشتہ کننگ کپرہ ہمو قربان مروک آتا زی آ ہرا قربانی نا ہمو مہر آن چٹ جُپار۔ ای اسہ نزور ءُ بندغ ئسے اُٹ، ای سوچوہ کہ ہمو پھل آتا زی آ کنے ہرا وڑ ئٹ نوشتہ کروئی ءِ ہمو وڑ ئٹ نوشتہ کننگ کپرہ انتیکہ اوفتا بھاز بھلو شرف و ہند ئسے۔ کنے بشخرے کنا راجی آ شہید آک نما کڑد بیان مفک۔