ڈٹ بند آ ہدف – ٹی بی پی سرگپ
بلوچستان نا ضلع چاغی نا تحصیل نوکنڈی ئٹ فرنٹیئر کور نا بریگیڈ ہیڈ کوارٹرز آتیا 30 نومبر نا ننکان اسہ جند ندری جلہو اس مس، ہرا کم و ود سی و شش گھنٹہ اسکان برجاء مس۔ دا کاروائی نا ذمہ واری ءِ بلوچستان لبریشن فرنٹ ارفے، ہرانا ردئٹ جلہو ءِ اونا ”فدائی بٹالین“ سدو آپریشنل بٹالین کریسس، ہرانا ہدف سیندک و ریکوڈک ڈٹ بندی تیتون تفوک انجینئر و پیشن ملکی بندغ آتا کمپاؤنڈ ئس۔
چاغی تزویراتی و اقتصادی دروشم ئٹ اہم ءُ ضلع اس تکنگک، انتیکہ اوٹی ریکوڈک و سیندک کون آ بھلا معدنیاتی ڈٹ بندیک اریر، ہرافتیٹی چین و کینیڈا نا کمپنیک سرمایہ کاری کننگ ءُ۔ امریکہ و سعودی عرب ہم دا ڈٹ بندی تیٹ اُست خواہی پاش کریسر، ولے دا حالیت نا جلہو تیان پد خُلیس ودنگ ءِ کہ جہانی سرمایہ کار آک خطہ نا بے باور آ حالیت ءِ تینا سرمایہ کن بھیم تکور۔
چاغی ٹی معاشی کاریم تا سوب آن ترند سکیورٹی نا بست و بند آک اریر، و رکھوک تکنگوک آ علاقہ نوکنڈی ٹی دا تینا حالیت نا اولیکو جند ندری جلہو ءِ۔ بلوچ لبریشن آرمی نا مجید بریگیڈ مالو آن پاکستان کن رکھ و معاشی ردئٹ چیلنج اس جوڑ مسنے، و بلوچستان لبریشن فرنٹ نا سدو آپریشنل بٹالین نا فعال مننگ آن جلہو تا ترندی ٹی ودکی نا گمان رد کننگ مفک۔
بلوچستان لبریشن فرنٹ نا دا جلہو آن پاش ءِ کہ تنظیم تینا ڈٹ بندی تیٹ بدلی ہتنگ ءِ و میدانِ جنگ ئنا حالیت نا ردئٹ تینے ہتنگ نا کوشست ئٹ اختہ ءِ۔ دا پیش رفت پاکستان، چین و بیرک گولڈ کون آ سرمایہ کار آتیکن سختی ودی کننگ کیک، انتیکہ جلہو تا کچ اہم و نازرک ہند آتے اسکان تالان خننگک۔
سدو آپریشنل بٹالین نا ردئٹ نوکنڈی ٹی بریگیڈ ہیڈ کوارٹر آتے ٹک کریسہ او دا کلہو ءِ تننگ خوائرہ کہ بلوچ ادارہ تا منشاء آن بیدس پیشن نا سرمایہ کاریک رکھوک افس، و سلہہ بند ٹولیک ترند سکیورٹی زون آتا تہٹی ہم تزویراتی و اقتصادی ہدف آتے ٹک کننگ نا لائخی تخرہ۔