اسہ عہد اس ایسر مس – ٹی بی پی سرگپ
وائس فار بلوچ مسنگ پرسن نا وائس چیئرمین ماما قدیر بلوچ نا کذیت آن اسہ عہد اس ایسر مس۔ ماما قدیر و اونا سنگت آک پانزدہ سال مُست بلوچستان ئٹ سیاسی جہدکار آتا زوراکی نا بیگواہی و بیدس عدالت خون تا ریاستی پالیسی تا برخلاف پرامن جہد ءِ ادارہ جاتی دروشم اس تسر و بندغی حق آتا لتاڑ نا برخلاف اسہ مُرغنو و دیہاڑی جہد اس بنا کریر۔ ماما قدیر نا سگ آن پُر آ جہد سخت و خراب حالیت آتیٹ ہم زوراکی ئٹ بیگواہ بندغ آتا آجوئی نا امیت ءِ زندہ تخا و عملی مزاحمت ءِ ارٹمیکو زنک اسکان سر کرے، ہرا اینو اسہ سوگو ءُ تحریک ئسے نا دروشم ئٹ برجاء ءِ۔
ماما قدیر، فرزانہ مجید، نصراللہ و اوفتا ایلو سنگت آک ہراتم اِرا ہزار نو ئٹ وائس فار بلوچ مسنگ پرسن نا بنماس ءِ تخار ہموتم بلوچستان ئٹ ریاستی تادی بھاز زیات ئس۔ سیاسی جہدکار آتا زوراکی نا بیگواہی تا اسہ بھلو لڑ اس بنا مسوسس و ماما قدیر نا مار جلیل ریکی ہم ہمو زہمی مروک آتیٹ اوار ئس۔ زوراکی نا بیگواہی تیان پد بیدس عدالت خون و جشوک جون تا کسر تا کرّک، گیاوان آ علاقہ و جنگل آتیان رسینگنگ بنا مس، 24 نومبر 2011 آ ماما قدیر نا مار جلیل ریکی نا سُم تیٹ خُلوک آ جون کیچ نا علاقہ مند آن خننگا۔ مار ئنا شہیدی آن پد ماما قدیر جہد ءِ یلہ کننگ نا جاگہ غا ایلوفتا امیت جوڑ مننگ نا فیصلہ کرے و زوراکی ئٹ بیگواہ بندغ آتا آجوئی نا تحریک ءِ سوگو کننگ ئٹ بھلو کڑد اس سر تس۔
بلوچستان نا خراب حالیت آتیٹ ماما قدیر و زوراکی ئٹ بیگواہ بندغ آتا خاہوت آک ریاستی تڑی، تادی و ہڑاند آتیان پد ہم اِرا ہزار سینزدہ ئٹ کوئٹہ آن کراچی و پدا اسلام آباد اسکان اِرا ہزار کلو میٹر آ تالان اسہ تاریخی لانگ مارچ اس کریر۔ دا پرامن مزاحمت نا ذریعت ئٹ اوفک جہان ءِ بلوچستان نا بندغی حق آتا نیستی آن آگاہ کریر۔ انصاف دوئی کننگ کن لانگ مارچ، تولوک برانز و احتجاج نا دا لڑ کیہی سال تے اسکان برجاء مس۔ کوئٹہ پریس کلب نا مونا خلوک زوراکی ئٹ بیگواہ بندغ تا برانزی کیمپ بھاز وار خاخر تننگا، ماما قدیر ءِ کسفنگ نا تڑی تننگا، اونا اُرا غا جلہو کننگا و خڑک ئنا سیال آتے زوراکی ئٹ بیگواہی نا گواچی کننگا۔ ولے دا غٹ آن پد ہم ماما قدیر اسُل امیت ءِ پننگ کن الیتو و پیری و ناجوڑی آن پد ہم پانزدہ سال اسکان زوراکی ئٹ بیگواہ بندغ آتا آجوئی نا امیت ءِ زندہ تخا۔
ماما قدیر نا پرامن مزاحمت، مُرغن آ لانگ مارچ و برجا مزاجی بلوچ دیہاڑ ئٹ ساندہ یات تخنگو۔ او انصاف و بندغی حق آتا دوئی کننگ نا جہد ئٹ ایسری ساہ اسکان جک سلوک مس۔ اونا قربانی، حوصلہ و سگ آن پُر آ جہد شرف ئنا حقدار ءِ۔ اسہ تیوہ ءُ زنک اس ماما قدیر نا جہد ئنا سیخا ٹی بھلن مسنے و اینو او اندا مزاحمتی کسر آ روان ءِ۔ ماما قدیر نا کذیت آن بلوچستان ئٹ سیاسی مزاحمتی تحریک ئٹی اسہ ہورکی اس الم ودی مرو، واہم دا جہد ئنا علمبردار آک اونا مسخت ءِ پوسکنو طاغت و ارادہ اسیتون برجاء تخور۔