بلوچستان نا ضلع ڈیرہ بگٹی، خاص وڑئٹ سوئی شار و اونا خڑک ئنا علاقہ تیان زوراکی نا بیگواہی تا پوسکنو کیہی کیس رپورٹ مسنو، ہراڑے پاکستانی لشکر و کاؤنٹر ٹیررازم ڈیپارٹمنٹ (سی ٹی ڈی) نا پارہ غان شاری تے دزگیر کننگ آن پد بیگواہ کننگ نا لڑ ترند مسنے۔
رسینگوک حوال تا ردئٹ سوئی شار آن پین مُسہ بندغ ءِ زوراکی ئٹ بیگواہ کننگانے، ہرافتا چاہنداری محوت بگٹی نا مار نبی بخش، بنا بگٹی نا مار نبی بخش عرف لایوں و نیک محمد بگٹی نا مار اسامہ عرف نادو نا پِن تیٹ مسنے۔ دا ہر مُسہ بندغ بگٹی قبیلہ نا ٹک حبیبانی آن تعلقداری تخرہ۔ حوالکار تا ردئٹ تدوکا مُسہ دے ئٹی دا ٹک آن تعلقداری تخوک پنچ ورنا زوراکی ئٹ بیگواہ کننگانو اندن جمعی وڑئٹ سوئی شار آن ہشت بندغ ءِ بیگواہی نا گواچی کننگانے۔
اندا وخت آ سوئی نا علاقہ پٹ فیڈر آن فرنٹیئر کور (ایف سی) نا کارندہ غاک بند علی بگٹی نا مار گلمیر ءِ دزگیر کننگ آن پد نادرست ہند آ دریر، ہرانا بابت دائسکان ہچو معلومداری تننگتنے۔
گیشتر دا کہ 7 اپریل نا سہب اکن سوئی نا محمد کالونی آن سی ٹی ڈی کارندہ غاک رحیم بخش بگٹی نا مار کریم ءِ زوراکی ئٹ بیگواہ کریر، اندن 9 اپریل 2026 آ نظر علی بگٹی نا مار صدیق ءِ ہم سی ٹی ڈی دزگیر کننگ آن پد بیگواہ کرے، ہرا دائسکان یلہ کننگتنے۔
رپورٹ آتا ردئٹ ضلع ڈیرہ بگٹی ٹی پاکستانی لشکر نا پارہ غان بھلو کچ اسیٹ کریک ڈاؤن برجاء ءِ، ہراٹی اسہ 65 سالی پیر ءُ زالبول اس ہم زوراکی ئٹ بیگواہی نا گواچی کننگانے۔ پِن کروک زالبول، ہرا شاہل ممدازی بگٹی نا زائفہ ءِ، ءِ پرکوہ کالونی آن ایف سی کارندہ غاک دزگیر کرینو۔
اندا کاروائی نا وخت آ پین نو بندغ ءِ سی ٹی ڈی بگٹی ٹاؤن آن زوراکی ئٹ بیگواہ کرینے ہرافتیٹ اکرم خان بگٹی نا مار ارباز، لیمو خان بگٹی نا مار قاسم علی، حیات بگٹی نا مار جبار خان، حیات بگٹی نا مار متین، بلال بگٹی نا مار سجاد، نور دین بگٹی نا مار امین، داد محمد بگٹی نا مار رہزان، رحیم بخش بگٹی نا مار دین محمد و ملوک بگٹی نا مار دوست علی اوار ءُ۔
حوالکار تا پاننگ ءِ کہ برجاء غا کریک ڈاؤن گمانی وڑئٹ علاقہ ٹی تیل و گیس پٹنگ نا ڈٹ بندی تا سوب آن مننگسہ ءِ، ہراڑکن گمانی لشکر کشی نا تیاری تے ہم ترند کننگانے۔
بندغی حق آتا کڑدہ غاک بلوچستان ئٹ زوراکی نا بیگواہی تا ودوکا تدینی تیا خُلیس نا درشانی کریسہ دافتے بنداوی بندغی حق آتا ترند لتاڑ گوندانو و خواست کرینو کہ دا لڑ دمدستی بند کننگہ۔