براہوئی بولی نا پِنی آ شاعر عیسیٰ نادان نا شاعری نا اولیکو کتاب ‘یاد آتا سنگر’ شینک مس۔ کتاب ءِ صباء انسٹی ٹیوٹ آف ریسرچ اینڈ پبلیکیشنز نا پارہ غان شینک کننگانے۔
عیسیٰ نادان نا شئر آک داکان وختی توار نا دروشم ئٹ بریسہ کرینو۔ ہرافتے استاد میر احمد بلوچ پارینے و مخلوق دا شئر تے دوست تخانے۔
دو سد و بیست پنچ پنہ غا تالان ‘یاد آتا سنگر’ ئٹ نادانؔ نا سد آن زیات شئر ساڑی ءُ۔ کتاب ءِ شہید لالی نا پن آ کریسہ عیسی نادان نوشتہ کرینے کہ ‘دا کتاب پن ئٹ کنا راہشون سگارِ بلوچ، شہید بیگ محمد عرف لالی نا۔’
کتاب ئٹ ‘نادان و بولان: چُپی تیٹ تراشوک آ نظم’ نا سرحال تون بشیر زیب بلوچ و ‘دُر خیال آ نادان’ نا سرحال تون مرید بلوچ سرلوز نوشتہ کرینو۔ اندن ‘یاد آتا سنگر تیان’ نا سرحال تون عیسی نادان تینا خیال آتا درشانی ءِ کرینے۔