افسانہ | ایردست آ چاگڑد
نوشت: زائم بلوچ
دی بلوچستان پوسٹ
ننا ایردست آ چاگڑد ئٹ غلامی نا زند تینا انتہا غا ئس۔ ہر نیمہ غا فوجی چیک پوسٹ آک ننے اندا غلامی نا شغان ءِ تِننگ کن آباد کننگاسُر۔ ننا اُرا تا زی آ فوجی تا ڈرون آک چرخ کریرا ہراڑان خلق مُچ خلیس ئنا گواچی ئس۔ مخلوق نا مِلی تیٹی خلیس انداخہ جہی ئس کہ اوفک شام ئنا تینا حویلی ٹی ہم پیشن مننگ کتورا ۔ فوجیک ہرا وخت خواہوسُر او اُرا تیا جلہو کریرا، مخلوق نا مال آتیان دزی کریرا، اوفتا چُنا تے بیدے اسہ قانود ئسے آن تینتو دریرا بند کریرا ننکہ کُل آن بھلا شغان اندا ئس کہ دا فوجیک کُل پیشن نا بروکو ئسر ہرافتہ نا نسل درست ئس نا بولی، نا قوم نئے کہ مذہب ولے اندا فوجیک ننا اُرا تیٹی بسورا ننا زالبول آتا پُچ آتے تار تار کریرا ہنارہ ۔ ننا جند ئنا ڈغارا ننکہ ہچس سلوک الو، نن تینا اُرا تیٹی اندن بند ئسون دنکہ قیدی اس قید ئٹ بند مرے ۔
زند ئنا اندا خرین آ دیک برجاہ ئسر، دیگر نا وخت آ ای ہڑدے تینا بانسری ءِ ارفیسہ خلق ئنا پاناد ئنا بُٹ آتئے ہناٹہ۔ ہمو دے ہم ای بانسری نا توار ئٹ ساز آتا سرگم تہ تہٹی دڑوک ئسوٹ کہ خلق ئنا نیمہ غان ترند ءُ توار ئس مَس ہرا یکدم کنے بانسری نا سُر آتیان پیشن کَشا۔ ای خلق ئنا نیمہ غا چَک ءِ ہڑساٹ تو چنا تہ گوازی جاہ نہ نیمہ غان بھلو دنز ئس ارفنگ ئس تینے۔ دا توار ئنا ترندی انداخہ زیات ئس کہ ہرانہ ژونگہ کنا خف تیٹی پناسُس ۔ دا توارے کنا مِلی ہچ ارفنگ الو ای اندا سوب آن بے جارات ئسوٹ ۔ ای حیران و ہبکہ بُٹ آ سلوک دسکان دنز ءِ اُرنگ ئسوٹ ۔ گڑاس ساعت آن گُڈ خلق ئٹ چیہانٹ و پرادس بش مس ۔ ای تینا ہوش ءِ تینتو کرسہ زوت ئس تینا بانسری ءِ ارفیٹ و خلق ئنا نیمہ غا مون کریٹ ، خلق آ سر مننگ تون اُراٹ کہ چنا تہ گوازی جا غا بِدر آ فوجیک تینا ڈرون آتیٹ حملہ کریسر ہراڑان کُل چناک چُنڈ چنڈ تموک ئسر ۔
بھاز ئنا جوْن آک درست متورہ، بھاز آتا سُوک ہڈ آتیان جتا ئسر۔ ہرکس تینا چنا ءِ پَٹنگ ئٹ اختہ ئس۔ دا چنا تیٹ اسٹ کنا ایلم ہم ئس کہ ہرادے نن بیرہ اونا بدن نا نشانی سے آن درست کرین ۔ دا ہمو ساعت ئس کہ دنو ساعت ای تینا زند ئٹی اسہ جاہ ئس ہم خنتوسُٹ۔ خلقی تہ چیہانٹ و پراد آک آسمان ءِ تل کننگ ئسر ننکہ ہچس سلوک الو۔ ہر اُرا ءِ دا خاخر تینا پلویڑ ئٹ الکُوسس ۔ خلق ئنا مارمد آن گڑاس بیداری کرین قبرستان نا نیمہ غا گور خُتنگ کن ہنان ۔ گِڑاس کفن نا بست و بند اکن ایلو خلق آتا نیمہ غا مون کریر ۔ گڑاس تہ پھل آتا جوْن تا ٹُکر تے مُچ کننگ آ لگار ۔ شام ئنا آذان وختی مسوسس ۔ روشنائی اندر ئس ۔ نن طوبے نا روشنائی آ قبرستان آ قبر آتے خُتنگ ئسون کہ ننا زی آ فوجی تہ مُسے ڈرون بسر سلیسر ۔
ننا اُست آتیٹ لار زیات ئس، نن تینا ہوش ءِ اوفتون کتون تینا کاریم ءِ مستی دننگ کن ترندی کرین۔ خفتن نا وخت آک ئسر ، نن ہفت قبر خُتاسن کہ انداڑتون فوجی تہ پنچ لاری قبرستان آ بسر و ننے پلویڑ کریر۔ فوجیک بننگ تون ننے آ لَٹ آتیٹ تمار و جوان ننے خلکر۔ او اندا پاریر ہنار کہ شام ئنا تارمئی آن گُڈ کس ءِ پیشن مننگ نا موکل اَف دا ننا قانود ءِ۔ ننے خلق ئنا پیر و کماش آک دریر اُرا تیا او چنا تہ دفن کننگ ءِ سہب اکن ہلار۔ نن او شام مُچ سما تینا پھل آتا جوْن آتا رہی آ زونڈوک ئسون خلقٹ شام مُچ مودہ و پراد ئس ۔ ساف اسکان نیاڑی تہ گُٹ آک چَٹ ہناسُر ۔ ساف تمننگ تون نن بھازی ہنان قبرستان آ پیشیم اسکان کُل بیست و سئے قبر ءِ تیار کرین ۔ پیشیم نا نماز آن گُڈ جنازہ مس و نن بیست و سئے پھل آتون اوار تینا زند ئنا کُل خوشی و مراد آتے مِش تیٹی یک یک آ دفن کرین ۔ خلقیک مُچ پراد و مودہ کرسہ ولدا خلق ئنا نیمہ غا روان مسر و ہرکس تینا کونٹ ءِ جِک کننگ نا بست و بند ئٹ لگا ۔ ننا اُرا ٹی مودہ و پراد آک ئسر ، نن کُل اُراہیک اسٹ ایلو تون مون پہ مون مننگ کن تیار الئون ۔
اسہ نیمہ غان بے تُغی و ایلو نیمہ غان دمدری کنے چَٹ کریسس ۔ ای تینا جون ءِ سُبّک کننگ کن ساعت ئس تینا مِشن نا تہارا کوٹی نا نیمہ غا مون کریٹ ۔ سر مننگ تون ای تہارا کوٹی نا درگہ ءِ ملاٹ تو تہارا کوٹی نا روشندان آن روشنائی نا برانز اک برسہ کوٹی ٹی تخوک میز ئنا زی آ تمسہ ئسر کہ ہرانہ زی آ اسہ بانسری ، گڑاس گُلاب نا بارونو پَن و الجزائری قلمکار فرانزز فینن نا کتاب ( سامراج کی موت ) تخوک ئس ۔ دا ندارہ ءِ خننگ آن گُڈ کنا ہجوز ئٹ ئٹ ملاسی ئس بش مَس ۔ ای پین بے جارات مسوٹ ۔ ای نیم سماء غا بندغ تینا کاٹم ءِ سرجہ غا تخاٹ ولے کنا مِلی ہچ کنتو بتوکہ ۔ کنا جون دمدر ئس ہراٹی پین ہچ تاغت الئو ولے کنا مِلی ہچ ٹمبہ مننگ الئو ۔ ای بے جارات ئسوٹ اندن دنکہ زندان آتیٹی بند اسہ ورناس مرے ۔ ای تینا بے جارات آ جون ءِ بیرم آن ارفیسہ خلق ئنا نیمہ غا ہننگ نہ سَلہ الکُٹ تو کنا مِلی کنے آ اندن زوراک ئس کہ ہرا کنے مُچی آ ہننگ کن اِلتوکہ ۔ ای تینا ہجوز ئنا نلاسی ءِ ٹمبہ تننگ کن میز آ تخوک بانسری و کتاب ءِ ارفیٹ ءُ خلق ئنا قبلہ نیمہ غا بُٹ آتیکن سر الکُٹ ۔
خلق ئٹ چیہانٹ آتا کوکار ئس ، قضا دیگری نا وخت ئس ، آسمان خیسن تفیسس ۔ اندن خیسن دنکہ درو ڈغار چناہ تہ دتر تیان خیسن ئس ۔ بُٹ آتیا سر مننگ تون کنے شام ئنا آذان ہلک ۔ ای نماز خواننگ ان گُڈ بانسری ئٹ تینا تہہ نا دڑد و ارمان تے توار تننگ ءِ بناء کریٹ ۔ کنا جون مچٹ سبک مَس ، ای نیم سمائی نا حالیت ئٹ ہمو بُٹ آ تنگان ہناسُٹ ۔ ہراتم کنا خنک مَلنگار تو طوبے پاش کرسہ کنا چَٹ زی آ ئس ۔ ای ساعت ئس طوبے نا رژن ءِ اُرسہ اوڑتون ہمکلام مننگ نا کوشست کریٹ، ولے او کنتو تینا باہ ءِ ملتو۔ او بیرہ تینا پاروکا ہیت آتے تینا سیاہی تیٹی کشاسس دنکہ اسہ آرٹسٹ ئس اسہ بے توارو عکس اسیٹی بھلو تواری ءُ قصہ ئس بیان کہ ۔ ای طوبے نا رژن ئنا کمک ئٹ کتاب ءِ ملاٹ ءُ خواننگ ءِ بناء کریٹ ۔
ای وختس الجزائری تہ غلامی نا قصہ غاتے کتاب ئنا اولی پن ءِ خواننگ ئسوٹ تو کنے اندن لگاکہ کہ بلکہ فینن اینو آن سد آ سال آتیان مُست دا کتاب ءِ نن بلوچ باتیک تیکن لکھانے۔ ہرا وڑ فینن الجزائری تا زی آ فرانسیسی استعمار آتا نفسیاتی قوضہ ءِ بیان کریکہ ٹِک ہمون ننا ڈغارا ہم ہمو چال آک ساڑی ئسر۔ اگہ چنکو فرق ئس اوفتہ او ننا نیام ئٹ ئس تو او بیرہ ڈغاری راستی تا ئس ۔ دا کتاب ءِ خواننگ آن کنا تہہ نا ملاسی ٹمبہ مننگ ئس، کنے اندن لگاکہ کہ دا کتاب کنے کنا راجی جیڑہ تہ بابت سرپدی ایتک ، ای طوبے نا رژن ئنا کمک ئٹ دا کتاب ءِ خوانسہ اسوٹ۔ کتاب ئنا نیمہ ئس ای الجزائری تا مزاحمت و راجی جدوجہد ئنا باب آ سر مننگ اسوٹ۔ ای ہمو نیاڑی تا جنزے آزادی ئٹ بشخ ہلنگ نا باب آتیا سر مننگ اسوٹ کہ ہرا نیاڑیک اسہ وخت ئس انداخہ نفسیاتی نزور کننگاسر کہ اوفک تینے سفید فام استعمار آتا مون آ بندغ تصور کتورا ۔
اوفک تینے قدرت نا نیمہ غان غلام ودی کننگ نا قول آ عمل تخارہ، ولے ہمو نیاڑیک ہراتم تینا نرخ ءِ پو مننگ ان گڈ جنزے آجوئی ئٹ تینا کڑدار ءِ ادا کریرا ۔ دا ہمو ساعت ئس کہ کنا مِلی ئٹ اولی وار مزاحمت نا خیال ودی مننگ ئس ۔ کنے اندن لگنگ ئس کہ نن تینا چنا تیکن خڑینک خلنگ نا جاگہ انتئے مزاحمت کپن ۔ نن فوجی تہ خلاف انتئے اسٹ مفن ۔ اسٹ اسٹ آ کہنگ ان جوان ءِ نن اسہ مسخت اسیکن مون بڑزی ئٹ کہن ۔ خیر ای دا خیال آتیان پیشن مرسہ کتاب ءِ مستی خواننگ بناء کریٹ ۔ ای الجزائری تا جدوجہدے پین گیشتر خواننگ اسوٹ ، کنا تہہ نا ملاسی ٹمبہ مرسہ ئس ہراڑان ای جارات خننگ اسوٹ ۔
ای دا کتاب ئنا تہٹی گُم و گار اسوٹ کہ مدان مدان کنا خن تیان کتاب آ نقش لوظ آک اندر مرسہ کریر ۔ ای کاٹم ءِ بُڑزا کریٹ تو کنتو مون پہ مون ہنکینی نا مَش نا ٹُل اتئے طوبے نا گروشک آک الئور ۔ ای کاٹم ءِ بُڑزا کرسہ آسمان نا نیمہ غا اُراٹ تو طوبے ءِ ماگم ہلسہ ئس ہرانہ رژن مدان مدان آ ایسر مرسہ ئس ۔ ای دم ئس دا ندارہ ءِ سیل کننگ ئسوٹ کہ خلق ئنا نیمہ غان توفک آتیٹ سُم خلنگ ئنا توار مس۔ ای گوڑینگ تون تینا کتاب و بانسری ءِ ارفسہ خلق ئنا نیمہ غا روان مسوٹ۔ خلق آ سر مننگ تون خناٹ کہ خلقیک کُل تینا اُرا تیان تینا بُن پیراہی آ توفک آتے کشیسہ اوفتا نل آتے آسمان آ تریسہ سُم خلسہ ءُ ۔ ای ہموڑا سلوک مارمد آن سوج کریٹ کہ “ خیرٹ خلقیک مون آسمان اکن توفک ترسہ سُم خلسہ ءُ؟“ تو اسٹ ورندی ترسہ پارے کہ دا ننا بن پیرہ ئی آ دود آک ءُ کہ ہراتم آسمان آ طوبے ءِ ماگم الکُنے تو اوفک ماگم ءِ مُر مڑنگ کن ترندو توار بش کرینو ، اندن داسہ ہم ماگم ءِ مڑنگ کن دا سُم کاری مرسہ ءِ ۔
ای سوج کرسہ مارمد آن پاریٹ کہ ننا بُن پیرہ غاک ڈغار ئنا زی آ ہم آفت آتے اِلتنو اوفتے ہم مِڑنگ کن ہر حال اسکان جہد کرینو ۔ ننا توفک آک درو ہرانگ ئسر کہ ہراتم بِدر آ فوجیک قبرستان آ ننے دتر چُر کریر ۔ ننا بیست و سئے پھل ءِ ٹول آن کِشکار۔۔ دا سوج آن پد ہچو ورندی ئس بتئو۔۔۔ مارمد کُل تینا کسر ءِ ارفیسہ پیر انگا تہ نیمہ غا پیشن مس۔۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔