ایران نا سیکیورٹی فورسز و کردستان فری لائف پارٹی ( پی اے جے کے) نا جنگجو تا نیام ئٹ ساڑی آ دے تیٹ مروک جھڑپ و سم کاری تدینی تیان گڈ، پی جے اے کے تینا چار باسک ئنا مرگ ئنا گواچی مننگ ءِ پک کرینے۔
تنظیم نا پارہ غان شینک مروک بیان ئٹ پاننگانے کہ مرگ ئنا گواچی مروک آتیٹ اِرا نرینہ و اِرا زالبول اوار ءُ۔
بیان ئٹ پین دعویٰ کننگا کہ جھڑپ نا وخت پاسداران انقلاب نا کیہی باسک مرگ ئنا گواچی و ٹپی مسنو۔
داڑان مالو پاسدارانِ انقلاب آن خڑک سرپند مروک احوالکار آک منہ جون و سِلہہ تا عکس تریسہ دعویٰ کریسس کہ پی جے اے کے نا شش بندغ خلنگانو۔
کردستان فری لائف پارٹی نا عسکری ونگ نا پاننگ ءِ کہ نن دا جلہو نا ورندی ءِ ترون۔
اینگان سرکاری میڈیا اینو سہب ئنا رپورٹ کرینے کہ دوشمبے نا بیگہ، 29 جون آ صوبہ کرمانشاہ نا شار ئٹ اسہ اُرا ئسے نا مون آ سم کاری نا تدینی ئٹ پاسدارانِ انقلاب نا اِرا باسک مرگ ئنا گواچی مسنو۔
کرمانشاہ ئٹ پاسداران انقلاب نا شعبہ تعلقات عامہ اسہ چنک بیان اسیٹی پارے کہ دا تدینی ئٹ تنظیم نا اِرا باسک ٹپی مسنو۔
تینا بیان ئٹ پاسداران انقلاب دا جلہو ءِ “دہشت گردی نا کاروائی” اس پارینے۔