افسانہ
خیسن تا ڈس
نوشت: یوسف عجب
دی بلوچستان پوسٹ
جُگی والا ہوٹل آتا مون آ دخل نا خُڑک آ پَرچ آ تُولوک آ دا چار بندغ تینا دنیا ٹی ڈُب ئسُرہ۔ پِڑی نا واپارک، ڈیورآک، ایلو خلق آتیان بَروک آ مخلوق نا بھلو کچ اس چَا کُننگ کِن مہردل نا ہوٹل آ بسکہ۔ مہردل ءِ تعلیم تو الو ولے گِراک آتے تونِنگ نا عِلم کچ آن زیات ئسکہ۔ سرکاری نوکر آتیان بیدس لَس بندغ اِسکان اونا گِراک ئسُرہ، اگہ گواچنی ہُراسہ تو سرحال آتا بارو اٹ اونا دا جُگی والا ہوٹل ہڑدے نا اخبار آن کم اَلو، جہس اگہ دَرمُلکی، مُلکی یا خلقی سیاست نا سرحال آ ہیت مننگ اٹی ئَسکہ، تو ایلو نیمہ غا موسم، گوازی، تعلیم، ادب و شونداری نا سرحال آک شرہ جوڑ ئَسُرہ۔ ولے ہیت داڑے ایسر متوکہ انتیہ کہ خزانہ پَٹوک آ ٹولی ہم ہنداڑے ہڑدے بسکہ۔ ممتاز، خیرجان، نادر و شریف کیہی سال آتیان خزانہ پَٹارہ، سراوان و جھالاوان نا ہر علاقہ نا بارو اٹ معلوم داری اوفتتون گَنج ئَس۔
خزانہ پَٹوک آ دا ٹولی بھلو وخت اسے آن مہردل نا ہوٹل آ توسکہ۔ تُو تا تُو چا وُ ارغ وام تِننگ نا ریسہ ہم برجا ئَس۔ ولے مجال ءِ کہ تینا خاص اِنگا گراک آتیان اُست اٹی کے یا اوفتے ناراض کے۔۔۔ اسہ ٹوک ٹکار تون دا ٹولی آن پیسہ غاتے کشاکہ۔ مہردل اینو ہم بوگ شوگ نا تب اٹی ئَسکہ۔ دَخل نا خُڑک آ تولوک دا چار سنگت آن مُمتاز نا خُڑک آ مَرسا آسکاری اٹ پارے کہ داوار اگہ گڑاس دو بس تو ننے اُست آن دَپیرے۔ ممتاز ہم بشخندہ اسے تون ورندی ترسا پارے کہ گنج مریک گنج۔ دا وار اومیت زیات ارے۔
شریف، مہردل و ممتاز ءِ دا ہیت و گپ آ خنا تو مہردل بشخندہ کرے ولے شریف اونا دا بِشخندہ ءِ ڈری سرپند مرسا مون ءِ مُٹ کرے۔
مہردل اونا دا مون مُٹی ءِ خَنا تو پارے، ’’سنگت دُن سوختہ مَفہ دا تو اسہ پَاش ءُ گواچنی اسے کہ ننا ڈغار نا تَل تَل خِیسن و پِیہن اٹی پَشینک ءِ، بس پٹوک ءُ خن و کشوک ءُ دو مرے۔‘‘ مہردل سَاسپان اٹی پاڷ شاغسا تینا ہیت ءِ برجا تخا پارے کہ ننا ڈغار تیٹی گنج ءِ بس جوان ڈس تروک اس مرے۔
شریف ولدا مہردل آ توار کرے کہ جوان ءُ ڈس تروک اس دُو بسنے۔ دا وار او نہ کہ مُلا اسے نہ کہ پین بندغ اسے، ننے ڈیٹیکٹر اَس دو بَسنے۔ دا وار ننے خزانہ اَلمی دو بَریک۔
’’او وا انت بھلاسے؟‘‘مہردل سوج کرے۔
شریف ورندی تس کہ چُنکو مشین اسے ہراکہ خیسن پٹنگ اٹی کمک کیک۔
’’گُڑا تو پیشگی مبارک مرے نمے۔‘‘ مہردل ہُور کروک آ پاڷ انا چا تے خاخرآن شیف کرسا پارے: ’’بس خدا تِسُنے نُمے، پِیر پشیوان مَف۔ خیال کیرے سنگت آک کہ دَاوار دُو خالی بَرورے۔‘‘ مہردل ولدا آسکاری اٹ پارے۔
شریف ہم خزانہ پٹننگ اٹی عمر ءِ تینا تَدیفیسس ولے داسکان ءِ نہ اودے سرسہبی نا ڈس ملاسس نہ کہ خِیسُن نا ڈِک اس۔
شریف اُست اٹی دُعا کننگ اٹی ئَس کہ زِند اٹی اسہ وار گِڑاس دُو برے تَانکہ مہردل کون انگا بندغ آتا با تو بَند مرے۔
شریف سما اف کہ انتیہ دن زو است اٹی کریکہ یا کہ داسہ سار چائی بیماری اسے نا گواچی ئس۔۔۔؟ اینو او بیرہ شام تمنگ کن ہُروک ئس۔۔۔
روشن آ دے خفتن اٹی بدل مس۔ سیاہ کو نا مش تا مہونی دا نن ءِ پین مہون کَننگ اٹی سرسہب مننگ اٹی الو، چُپی ہَر جَہہ تینا دَام ءِ تینا وس انا کچ تالان کننگ اٹی ئَس۔ ہر چار سنگت تینا بیلچہ، ٹیکَم، کُدینہ، ٹارچ و ڈیٹیکٹر تون اوار سیاہ کوہ نا مَش اَنا خڑک مِلکی ءُ ڈَغار اسے ٹی مہالو آن سُجِفوک آ جاگہ غا سلوک ئَسُر۔
شریف ڈیٹیکٹر دُوٹی وداری ئس کہ سنگت آک ہراتم اودے موکل ایتر کہ او دا مشین نا کمک اٹ خَزانہ نا پَٹنگ ءِ بنا کے۔ اونا ایلو سنگت آک ہم اینو مَچے پین اِشتافی خَنِنگارہ۔ جَٹ اَسے آن پَد ممتاز، شریف آ توار کرے کہ او بَش مرے و ڈیٹیکٹر ءِ ڈغار نا باٹغ اٹ چریفیسا کے۔
شریف، تینا کاریم نا بناءِ کرے۔۔۔ جٹ اس جوان دَانگ اینگ چَرینگسا کَرے ولے ڈیٹیکٹر نا تَوار اَلو۔ نَادر و خیرجان ہم چُپ تُولوک دا ندارہ ءِ ہُننگ اٹی ئَسُرہ۔ خیرجان ہڑوپ ءِ پرغسا شریف و ممتاز آ توار کرے چَاوہ کہ نُمے اٹ متو۔۔۔ داسہ ننا وارءِ۔ دا بِننگ تون او وَرندی تِس کہ بَبو نُم ہم کوشِست اس کَبو۔
’’ہُربو تے کہ دا خراب تو اف؟‘‘ نادر سوج کرے۔
’’نہ بابا اُسل جوان ءِ‘‘ شریف توار کرے۔
نادر ڈیٹیکٹر ءِ دوٹی ہرفے، ہمو خُڑک اٹ چریفنگ نا بناءِ کرے۔ خیرجان اوڑتون ہمگام ئَس۔ ایلو سنگت آک خن تے اوفتے ٹی سخت کَریسر کہ یَکدم اسہ چُنکو ڈِپ اَسے آ سر مننگ تون مشین پِیپ پِیپ کَننگ ءِ بنا کرے۔۔۔۔ شریف تینا جاگہ غان سِٹا۔ ہَندادے۔۔۔ ہَندادے کَرسا خیر جان و نادر نا خُڑک آ سر مس۔
ڈیٹیکٹر ءِ ولدا ہمو چنکا ڈِپ اَنا دَاپار ایپار چریفیر، اونا توار دا ٹُولی نا اومیت آتے پین سوگو کَرے۔ اسہ ایلوڑتون اوفتا سفا انگا نیت نیٹ کہ اوفتا ارمان تے پُورو کَنِنگ نا دَرگہ غا سر کَرے۔۔۔ اوفتا یقین پِین پُختہ مَس۔ خُوشی آن بِشخِندہ جوڑ تیا تا چاپ خَلنگ اٹی ئَس۔ شریف بیلچہ و ٹیکَم ءِ خواہفے۔ سَنگت آتے ہمو چُنکا ڈِپ ءِ خُتنگ نا موکل تِس۔ خزانہ نا اومیت آ ختنگوک آ ڈِپ بھاز سَخت الو۔۔۔ ڈَغار اٹی بیلچہ وَہنگ اٹی ئَسکہ۔ مِشک ہم یلہ یلہ ئَسُرہ۔ خید و خوشی نا اَواری نا سَوب آن دا بندغ آتا خَنک شِروخ تِسرہ۔ شریف ءِ مِہردل نا ہِیت یات بننگ اٹی ئَس: ’’ننا ڈغار نا تَل تَل خِیسن و پِیہن اٹی پَشینک ءِ، بس پٹوک ءُ خن و کشوک ءُ دُو مرے‘‘۔
مَنہ بیلچہ خلِنگ آن پد مِش تیٹی بیلچہ نا کَٹکارہ کُل اَنا ہوش ءِ پریفے۔۔۔ ہندن لگا کس پاہے بیلچہ گڑاسے پرغا۔۔۔ شریف یکدم سنگت آتیا توار کرے، ’’سَلبو۔۔۔! بیلچہ نا مِش تے ایلو مِش تیٹی اوار کپیرے۔‘‘
کل انا تا مونک مَلِنگار۔ شریف تینٹ ٹارچ انا روشناءی ٹی بیلچہ نا مِش تے پِشخارا۔ او خَنار کہ بیلچہ نا مِش تیٹی ہڈ اسے نا ارا چُنکو بُرٹ ئَسُرہ۔
ولے بھاز زُو اوفتا خُوشی اَودیم مَس ہراتم کہ اوفک کھڈ آن کَشُوک آ گُڈیکو بیلچہ نا جاگہ غا پُوچی نا ہڈ اس خَنار۔ پدا کَڈ انا مِش تے دُو اَٹ دَانگ اینگ کَننگ ءِ بنا کریر تو اسہ مَری بُر چَوٹ نا جوڑہ اسے تون اوار پُچ آتیٹی جون اسے نا بیرہ ہڈ آک خَننگارہ۔ ہمو مِش تیٹی شِناختی کارڈ نا کُمک اَٹ سَما تما کہ دا جون اوفتا شار اٹی ہندی ماسٹر شیرجان نا مار شیردل نا ئَس ہرا اِرا سال مست بیگواہ مسوسُس۔۔۔ ہَر چار سنگت غُلغُلو آ خن تتون ہَبکہ سلوک ئَسُر۔۔۔! ولے اوفتے دا سما الو کہ ڈیٹیکٹر نا توار ڈغار نا تَل اٹی ڈکوک آ کانڑ انا سوب آن ہم ئَس۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔