صحافی تا کوئٹہ نا دورہ، بلوچستان نا ندارہ اخس درشان؟ – ٹی بی پی سرگپ
تدوکا ہفتہ اسلام آباد آن پاکستان نا بھاز آ صحافی تے پاکستانی لشکر نا سروکی ٹی کوئٹہ نا دورہ کرفنگا۔ دا دورہ نا وخت آ اوفتے بلوچستان نا برجا غا حالیت آتا بابت پاکستانی لشکر نا بڑزکو کالخواہ و بلوچستان نا متنازع وزیر اعلی نا پارہ غان بریفنگ تننگا۔ دا وخت آ ریاستی کالخواک بلوچستان نا ویل ءِ، برجا غا سلہہ بند مزاحمت و حکومت نا پالیسی تا بابت تینا مؤقف ءِ اوفتا مونا تخار۔ ریاستی کالخواہ تا پارہ غان دا مؤقف مونا بس کہ بلوچستان نا ویل ئنا ایسری طاغت نا کاریم ئٹ ہتنگ ئٹی اف بلکہ ہیت و گپ، و سیاسی عمل ٹی ءِ۔ بریفنگ نا وخت آ دا ہم دعویٰ کننگا کہ خدو بلوچستان ئٹ ہزار آ بندغ آتیتون حوال و اوڑدئیک کننگار، اندن برجا سال ہم بھلو کچ ئسے آ بندغ آتیتون حوال کننگانے۔ دا دعویٰ ہم مونا بس کہ ڈاکٹر ماہ رنگ بلوچ ءِ گپ و تران نا عمل ئٹ اوار مننگ نا دعوت تننگاسس، ولے او دا عمل ئٹ اوار مننگ آن نمن کریسس۔ ایلو پارہ غان، ڈاکٹر ماہ رنگ بلوچ نا ایڑ نادیہ بلوچ نا پارہ غان دا دعویٰ نا رد کننگ ہم مونا بسنے۔ اندا بریفنگ ئٹی بلوچستان ئٹ برجا سلہہ بند راج دوست تحریک نا بابت اسہ مرغن وخت ئسے نا ڈٹ بندی یا کم و ود دہ سال نا روڈ میپ نا ذکر ہم کننگا، ہرانا مسخت ریاستی کالخواہ تا ردئٹ دا سلہہ بند تحریک ءِ وس ئٹ کننگ یا اونا ایسر کننگ ءِ۔
داڑے اسہ بُنداوی سوج اس گپ و تران نا مفہوم نا ہم ارے۔ انت گپ و تران جتا بندغ آتیتون اوڑدئی کننگ، جرگہ اڈ تننگ یا منہ ٹولی تون گپ و تران کننگ نا پِن ءِ؟ اگہ پاکستان گواچن ئٹ گپ و تران ءِ ویل ئنا ایسری تکک گڑا گپ و تران نا حد و سیم آک، شڑط آک، فریق آک و ایجنڈاک انت مرور؟ انت گپ و تران بیرہ ہمو بندغ آتیتون کننگو ہرا ریاست تون گپ و تران کن تیار ءُ، یا ہمو سیاسی طاغت آتے اسکان ہِننگ نا کوشست کننگو ہرافتے پاکستان تون بھاز تضاد ارے؟ انت اوفتا ایجنڈا تے منّنگ مرو؟
داڑے اسہ پین ہم اہم ءُ سوج اس ودی مریک۔ ریاستی مؤقف نا ردئٹ سلہہ بند تحریک چنکو کچ ئسے نا بندغ آتے اسکان ءِ گڑا اونا مونتس کن اسہ دہائی ئسے آ تالان حکمت عملی نا گرج انتئے مننگ ءِ؟ دا سوج دا خاطران ہم اہم ءِ کہ ریاست نا کنڈ آن اسہ پارہ غان سلہہ بند تحریک ءِ محدود گوندرہ، اندن ایلو پارہ غان اوڑکن مرغن وخت ئنا ڈٹ بندی نا ہیت کننگک۔ پاش وڑئٹ دا ہڑتوم آ بیانیہ غاتیٹ تضاد ارے۔
بلوچستان ئٹ میڈیا تیوہ بلیک آؤٹ ءِ، دا ڈول ئٹ صحافی تا محدود و ریاستی سروکی ٹی مروکا دورہ غان بلوچستان نا تیوہ ندارہ کشی مسخت اف، بلکہ صحافی تے اسہ خاص ءُ بیانیہ ئسے آن سرپند کننگ مسخت ءِ۔ بلوچستان نا آخبت اسہ پریس کانفرنس، اسہ جرگہ، اسہ سیاسی جماعت، اسہ شخصیت یا اسہ بیانیہ ئسے آن جوڑ مروف۔ بلوچستان نا آخبت بند کوٹی اسیٹی تولسا کننگوک فیصلہ آن ہم ہم گچین کننگ مفک۔ دا ڈغار نا آخبت نا گواچن آ حق اونا مخلوق تون ءِ، انتئے کہ ہرا فیصلہ غاک اوفتا زند، پجار، مڈی، سیاسی حق و بروکا زنک آتا آخبت آ زہم شاغرہ، اوفتیٹی کل آتیان بُنداوی حق ہم اوفتا ءِ۔