قلات ضلع نا انتظامیہ فوجی سروک آتا پاننگ آ پارود، شور و گزگ ئنا علاقہ تیٹ ہندی مخلوق ءِ ۲۸ ستمبر ۲۰۲۶ اسکان ہمپ و لڈ کننگ نا ہدایت تسونے۔
دا رد ئٹ اسسٹنٹ کمشنر قلات و خالق آباد نا پارہ غان نوٹس شینک مریسہ پاننگانے کہ ایمنی نا جیڑہ تا سوب آن دا علاقہ تیٹ ہندی مخلوق بڑزا تروک آ تاریخ اسکان علاقہ غان پورہ پیشن مرے۔
نوٹس ئٹی کل خڑک ئنا بندغ آتے ضلع انتظامیہ نا حکم ئنا زی آ عمل کننگ و تینا رکھ ءِ کننگ نا خواست کننگانے۔ خڑک ئنا انتظامی و کانود اتوک آ کل ادارہ تے ہم دا بابت ئٹ نوٹس تننگانے۔
یات سلے کہ ستمبر نا بنا ٹی ہم وزیر اعلی بلوچستان شور پارود نا مشی علاقہ تیان اسہ ہزار بندغ نا ہمپ و لڈ نا بابت ہیت کریسس۔
دا ہم کہ دا وخت بوچستان نا جتا جتا انگا علاقہ غاک بے پاننگ آن لشکر کشی نا زد ئٹی ءُ۔ پاکستانی لشکر نا پارہ غان کیہی علاقہ تیٹ بالی کاروائی و ڈرون جلہو آتیٹ لس مخلوق آن کیہی بندغ آک کسکنو و ٹپی مسنو، مخلوق نا مال مڈی تے ہم نسخان رسینگانے۔