بلوچ زالبول آتا مٹ مروکا کڑدار، سلہہ بند تحریک نا پوسکنا باب – ٹی بی پی سرگپ
22 ستمبر 2026 آ تربت ئٹی پاکستانی لشکر آ اسہ جلہو ئسے نا حوال مونا بس، ہراڑان پد بلوچستان لبریشن فرنٹ دا کاروائی نا ذمہ واری ءِ ارفسا کریمہ آرمڈ اسالٹ ڈویژن (KAAD) پنی ءُ اسہ پوسکنو زالبول سلہہ بند کڑدہ ئسے نا جوڑ مننگ نا پڑو کرے۔ دا تدینی ٹی اسہ اہم پالو اس دا ہم ارے کہ بی ایل ایف بیرہ اسہ کاروائی ئسے نا ذمہ واری ءِ ارفتو بلکہ اوڑتون اوار اسہ پوسکنو تنظیمی شاخ ئسے مونا ہیس۔ بلوچ زالبول آک مالو ہم جتا دروشم تیٹ بلوچ سلہہ بند تحریک ئٹ ساڑی مسنو دا اندا خاطران اسہ پوسکنو پیش رفت ئسے کہ اولیکو وار سلہہ بند تنظیم نا زالبول تا باقاعدہ اسہ جتا ءُ سلہہ بند تلہ اس مونا بسنے۔
بلوچ سیاست ئٹ زالبول تا ساڑی گری ءِ بیرہ سلہہ بند تنظیم تا دیہاڑ تون گنڈنگ ہم خیال ءِ محدود کیک۔ بلوچستان نا زالبول آک بھلو وخت ئسے آن زوراکی ئٹ بیگواہ بندغ، زوراکی نا بیگواہی، بیدس عدالت خون و سیاسی حق آتا معاملہ تیا برانز و چاگڑدی تحریک آتیٹ کڑد سر تسنو اندن بلوچ سلہہ بند تحریک ئٹ زالبول آتا ساڑی گری نا کل آتیان پاش انگا ساہت اپریل 2022 ئٹ مونا بس، ہراتم کراچی یونیورسٹی نا کنفیوشس انسٹی ٹیوٹ آن خڑک جند ندری جلہو ئٹ شاری بلوچ کنفیوشس انسٹی ٹیوٹ نا کارندہ تے ٹک کرے۔ دا تدینی اندا خاطران ہم لس اف انتئے کہ اوکان مُست بلوچ سلہہ بند تحریک نا عسکری خیال بنداوی وڑئٹ نرینہ جنگول آتیتون تفوک مسوسس۔ شاری بلوچ دا خیال ءِ پرغا۔
زالبول آتا سلہہ بند تحریک ئٹ اواری نا اصل اہمیت بلکہ سلہہ ارفوک زالبول آتا کچ ئٹ اف بلکہ ہمو سوج ئٹی ءِ کہ زالبول نا سیاسی کڑدار نا حد آک بلوچ چاگڑد ئٹ اراڑسکان مٹ مرسا ءُ۔ دا مٹی بیرہ سلہہ بند تحریک اسکان محدود اف، بلکہ دانا زہم آک سیاسی تحریک، ورنا انگا نسل، ریاستی پالیسی و چاگڑدی رویہ تے اسکان سر مننگ کیرہ۔
بلوچ سلہہ بند تحریک ئٹ زالبول آتا ساڑی گری دا خیال ءِ چیلنج کرے کہ دا تحریک ئٹ سلہہ بند کاروائیک بنداوی وڑئٹ نرینہ تے اسکان ءُ، بلوچستان ئٹ زالبول آتا مٹ مروکا سیاسی ہند بیرہ اسہ تنظیم ئسے نا پوسکنا پڑو یا منہ پاش ءُ تدینی تا کسہ اف، بلکہ اسہ شابیت ءُ چاگڑدی مٹی اسیتون تفوک ءِ۔ بلوچستان نا ویل داسہ بیرہ ریاست و سلہہ بند تنظیم آتا نیام ئٹ عسکری محاذ اسکان محدود متو، بلکہ او چاگڑد نا تہٹی سیاسی پجار، ورنا انگا نسل، و اشتماعی شعور نا سوج آتے ہم پاش کرینے۔ سلہہ بند تحریک ئٹ زالبول آتا اواری اندا باب ئنا بشخ ئسے۔