کوئٹہ آن پاکستانی لشکر و ڈھکوک ادارہ غاک بلوچستان یونیورسٹی نا اسہ خوانندہ ئسے دزگیر کننگ آن پد نادرست ہند آ درینو۔
زوراکی ئٹ بیگواہ مروک زالبول نا چاہنداری غلام مصطفی نا مسڑ ماہ جبین نا پن ئٹ مسنے، ہرا ضلع واشک نا علاقہ بسیمہ نا ہندی ئسے۔ ماہ جبین بلوچستان یونیورسٹی ئٹ بی ایس لائبریری سائنس نا خوانندہ ئسے۔
حوالکار تا ردئٹ ماہ جبین ءِ استو سئے بجہ غا کوئٹہ آن فورسز آک دزگیر کریر و پدان اودے بیگواہ کریر۔ اونا خاہوت ءِ دائسکان اونا حالیت و ساڑی آ ہند ئنا بابت ہچو حوال اس رسینگتنے۔
کنا بیلی نا زیبا غا راسکوہ
نوشت: ھارس بلوچ
دی بلوچستان پوسٹ
اینو غان بیست و ہفت سال مُست اینو نا دے ہراتم کنا ڈیھ نا گچین آ شار چاغے نا زیبل آ مش راسکوہ (راست کوہ) ءِ ریاست ایٹمی آزموندہ نا گواچی کرے و تینا قہر ءِ بلوچ گلزمین و مخلوق نا زی آ شاغا۔ دا دے ءِ ریاست یوم تکبیر و بلوچ قوم یوم سیاہ نا پن ئٹ یات کیک، ریاست نا کنڈان بلوچ راج کن دا اسہ کلہو اس ئسوکہ کہ غلام آ راج ئنا مخلوق تون اونا خواجہ نا امرو سیالی ئسے۔
ایٹمی بمب ئنا آزموندہ کن پاکستان نا اٹامک انرجی کمیشن نا سروے کروکا ٹیم بلوچستان نا شار آتے پٹ و پول کرے، خضدار، آواران، تربت، خاران و چاغے نا علاقہ تا جاچ ءِ الکر گُڑا سروے کروکا ٹیم چاغے و خاران ءِ ایٹمی آزموندہ کن گچین کرے۔ راسکوہ نا مش نوشکے نا علاقہ مل کُچکی آن بنا مریک اُندن چاغی نا علاقہ دالبندین اسکان دو سد کلو میٹر نا بھلو مش ئسے۔ دا مش گرینائٹ نا مش ئسے۔ دا مش نا بالاد جاغہ اس مسہ ہزار میٹر و جاغہ اس ہفت سد میٹر ءِ۔
چاغے نا تحصیل دالبندین (ڈالجان) نا شار چھتر نا خُڑک ہمو مش آ (کوہ کمبران راسکوہ نا بشخ) کہ ایٹمی آزموندہ کن پاکستان نا اٹامک انرجی کمیشن نا سروے ٹیم ئنا نیمہ غان گچین کریسرک۔ 28 مئی 1998 ءِ دے ئنا 3:16 بجہ غا چاغے نا دلبند راسکوہ نا زیبا غا مش نا بشخ کوہ کمبران ئٹ اسہ وخت آ پنچ جوہری آزموندہ کننگا و پدا 30 مئی 1998 آ ولدا راسکوہ مش ئنا ماس خاران نا ریکستان ئٹ ششمیکو ایٹمی آزموندہ کریر۔
28 مئی 1998 آ راسکوہ چاغے ءِ کروکا اولیکو ایٹمی آزموندہ ءِ چاغی۔1 نا پن تسر، چاغی۔1 نا ایٹمی بمب ئٹ استعمال مروکا یورینیم افریقہ نا علاقہ نائجر و بلوچستان نا علاقہ ڈیرہ غازی خان آن ارفیسر۔ 30 مئی 1998 آ خاران ریکستان ءِ کروکا ارٹمیکو ایٹمی آزموندہ ءِ چاغی۔2 نا پن تسر۔ چاغی۔2 نا ایٹمی بمب ٹی بوسٹڈ فیشن پلوٹونیم ڈیوائسز استعمال مسوسس۔
28 مئی و 30 مئی نا سہب اسہ تارمہ ءُ سہب اس ئسکہ۔ اسٹ اس ہم دا ہیت ءِ پام کتوسُس کہ زیبا غا راسکوہ ٹی ریاست نا کروکا ایٹمی آزموندہ غاتان ودی مروکا تابکاری نا زہم آک راسکوہ و اونا داپار ہیپار شار ءِ اخس و بھلو تباہی اسیٹی بدل کرینو۔ داسہ ام اندا ایٹمی آزموندہ غاتا سوب آن تیوہ بلوچستان ٹی کینسر، زردوئی، تھیلیسیمیا، ٹی بی و پین چندی ناجوڑیک تالان مسونو۔
سرکاری میڈیا راسکوہ ءِ غیرآباد ءُ علاقہ اس پاننگے، ولے راسکوہ نا چارمہ کنڈ (چھتر، چارسر، پدگ، سورین کرود، چار کوہان، کلگ، لوس) ٹی اسہ بھلو کچ اسیٹی مخلوق ئنا آبادی ئسے۔ ایٹمی آزموندہ غاتا سوب آن اینو اسکان ہمو جاغہ نا بندغ آک سادار آک و دیر ئنا چشمہ و قدرتی جنگلات آک دا کُل زہمی مسر۔
ہمو وخت ئنا پاکستانی وزیراعظم نواز شریف اسہ طاقتور ءُ حکمران اس چاننگاکہ و اختر مینگل ہم بلوچستان نا کٹھ پتلی حکومت نا وزیراعلی ئسکہ۔ اختر مینگل ایٹمی آزموندہ نا جاغہ (کوہ کمبران راسکوہ چاغی) اسکان نواز شریف نا گاڑی ئنا ڈرائیونگ ءِ کرے۔ پدا بلوچستان ٹی ایٹمی آزموندہ غان ماحول آ تموکا تابکاری نا زہم آتے سیاسی نعرہ بازی ئٹ ڈھکنگ نا کوشست کرے۔ پدا قوم ئنا تینے دوست خواہ جوڑ کننگ کہ کٹھ پتلی حکومت نا قربانی تس و بلوچ قوم ئنا سادہ غا مخلوق تون سیاسی چال بنا کرے۔
منظور بلوچ تینا شاعری اسیٹی پاہک کہ
اُست اوشکن داوڑ دُنکہ اوشنگا چاغی
غمتا خلوکن داوڑ دُنکہ خلنگا چاغی
ولے 28 مئی 1998 آن پد بلوچستان نا مخلوق و راسکوہ نا دنیا بدل مسک۔ ہمو دے راسکوہ نا صبر ئنا پیالہ پنا، اونا ہمت تینا دوتے بُڑز کرے، اونا سگ تینا گڈیکو دنگ آ ئسکہ، اونا ہر چیہانٹ آن اسہ پین چہانٹ اس ودی مسوکہ، ہرانا توار گٹ و تلار زیبا غا مش تا بڑزی ٹی لگسہ و پنسہ پین دڑدی و چیہانٹ وسی کریکہ۔ راسکوہ نا خن تیان بے کچ خڑینک وہاکہ اونا ہندا وہوک آ خڑینک آک اونا زیبا غا چہرہ ءِ ٹپی کریسر، اونا زیبا غا دروشم و رنگ مون ہڑسینگاسس۔ ای راسکوہ ءِ مالو دا وڑ ہچ خنتوسُٹ راسکوہ تو ہچ دا وڑ الو دیر پارے دا ہمو راسکوہ ءِ راسکوہ تینا رنگ ءِ بدل کرینے۔
کنے بشخس راسکوہ کنے نا دڑدی آ داستان سما الوکہ، ای بے سماء ئسوٹ، ای تنگان ئسوٹ، ای تینا دنیا ٹی سر ئسوٹ، اگہ سما کروسٹ تو بیست و ہفت سال مالو نا سبّر آ جون و بُڑز انگا بالاد دن پاٹ آنبار لاغر متوکہ نا زیبا غا رنگ و دورشم دن ہس آنبار مون ہڑسینگتوکہ۔ نی دن ٹپی متوسہ، نی دن ژند متوسہ، کنا سنگت آک اینو کینسر نا گواچی متورہ، ای دن میاری متوٹہ، کنا بیلی نا زیبا غا گلزمین دن ویران متوکہ۔ کنا راسکوہ نی کنے اینو بشخس۔۔ کنا راسکوہ نی کنے اینو بشخس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
راسکوہ توار کننگ ءِ
راسکوہ نا جیرت ءُ ہمت پاہک نن زندہ اُن
ابرم نا مٹی لگوکا خاخر پاہک نن زندہ اُن
راسکوہ نا چیہانٹ پراد کیک پاہک ببو داسہ
راسکوہ نا خل خل پاہک نن زندہ اُن
راسکوہ نا ہر اُشنگوکا خل توار کننگ ءِ
راسکوہ نا ہمت پاہک دا جہد ئتون نن زندہ اُن
راسکوہ ایتک ننے مزاحمت نا پنت ءِ
راسکوہ نا بڑزی پاہک نن زندہ اُن
راسکوہ ئٹ انوئی ءِ دشمن نا مون آ سلوئی ءِ
راسکوہ نا دا آسروک گیرام کپن نن زندہ اُن
حانی بلوچ
بلوچ ورنا تا زوراکی ئٹ بیگواہی برجاء ءِ، پاکستانی لشکر کراچی، پسنی و تربت آن چار بندغ دزگیر کریسہ بیگواہ کرینے۔
پاکستانی لشکر کراچی نا علاقہ ہزارہ گوٹھ ئٹ چھاپہ خلیسہ اسہ ورنا ئسے دزگیر کننگ آن پد نادرست ہند آ درینے۔
بیگواہ کننگوک بندغ نا چاہنداری ذکریا اسماعیل نا پن ئٹ مسنے، ہرا زوتیٹ کراچی یونیورسٹی آن قانود نا تعلیم ایسر کرینے۔
حوالکار تا ردئٹ ذکریا ءِ اونا کوٹی آن دزگیر کننگا۔ ہراڑان پد اونا ہند ئنا بابت ہچو حوال اف۔
اندا وخت آ کراچی نا علاقہ گل محمد لائن ئٹ ہم فورسز آک استو لشکرکشی کریر ہراٹی بھلو کش اسیٹ رینجرز کارندہ غاک ہم بشخ ہلنگ ءُ۔ ہندی حوالکار تا پاننگ ءِ کہ فورسز آک علاقہ ءِ پلویڑ کریسہ ہر اُرا ءِ پَٹار۔
ایلو پارہ غان بلوچستان نا دریابی علاقہ پسنی نا علاقہ ریکپشت آن تعلق تخوک اِرا ورنا شوکت رحمت و گوہر بخش ءِ پاکستانی لشکر دزگیر کریسہ زوراکی ئٹ بیگواہ کرینے۔
ہڑتوم آ ورناک حجام ءُ و اسہ دکان اسیٹی اوار کاریم کیرہ۔
اندن ضلع کیچ نا بنجاہی شار تربت آن ہم اسہ پین تدینی ئسے نا حوال رسینگانے۔ ہراڑے بلوچ نیشنل موومنٹ (بی این ایم) نا بنجاہی فنانس سیکریٹری ناصر بلوچ نا ُارا غا پاکستانی لشکر چھاپہ خلیسہ اونا ایلم نا مار عدنان ولد لیاقت ءِ دزگیر کریسہ نادرست ہند آ درینے۔
حوالکار تا ردئٹ چھاپہ نا وخت آ فورسز آک اُرا ءِ پٹار و چنا نیازی تیا بیدادی کریر۔
بلوچستان ئٹ زوراکی نا بیگواہی تا تدینی تیٹ ودکی مریسہ ءِ۔ ہراڑا بندغی حق آتا تنظیم آک چرجوئی ئٹ خلیس نا درشانی کریسہ بسنو، ولے حالیت آک جُوانی نا جاگہ غا گیشتر خراب مریسہ ءُ۔
بلوچستان نا بنجاہی شار کوئٹہ، خضدار و مستونگ آن پاکستانی لشکر نا دو آن چار بندغ زوراکی ئٹ بیگواہ و مُسٹ آجو کننگانو۔
بلوچستان نا بنجاہی شار کوئٹہ ئٹ پاکستانی لشکر اسہ اُرا ئسے آ چھاپہ خلیسہ اِرا ایلم دزگیر کننگ آن پد زوراکی ئٹ بیگواہ کرینے۔
شابیتی حوال تا ردئٹ 24 مئی 2025 آ ننکان کم و ود 2 بجہ نا وخت آ کاؤنٹر ٹیررازم ڈیپارٹمنٹ (سی ٹی ڈی) کلی مینگل آباد نا اسہ اُرا ئسے آ چھاپہ خلیسہ اسحاق و عبدالرزاق ءِ دزگیر کرینے۔ ہڑتوم آ ورناک ایلم ءُ ہرافتیان اسٹ ڈرائیور ئسے و ایلو خوانندہ ئسے۔
خاہوت نا پاننگ ءِ کہ دزگیری آن پد ہڑتوم آ ورنا تا ہچو حوال اس اف، و کوالخواہ تا پارہ غان اوفتا دزگیری نا پک و اسہ ڈول نا حوال اس ہم تننگتنے۔
ایلو پارہ غان بلوچ اسٹوڈنٹس آرگنائزیشن (بی ایس او) خضدار زون نا کماش ماجد بلوچ ءِ درے ننکان اونا اُرا غان پاکستانی لشکر دزگیر کرینے، ہراڑان پد اونا ہچو حوال اس اف۔
اندا وڑ بلوچستان نا ضلع مستونگ نا علاقہ کلی دتو ٹی پاکستانی لشکر نا دو آن اسہ بندغ اس زوراکی ئٹ بیگواہ کننگانے۔
ہندی حوالکار تا ردئٹ اینو سہب ئنا کم و ود 5 نا وخت آ فرنٹیئر کور و کاؤنٹر ٹیررازم ڈیپارٹمنٹ محمد زمان نا مار عابد حسین ءِ اونا اُرا غان دزگیر کریسہ نادرست ہند آ دریر۔ ہرانا برخلاف خاہوت و ہندی بندغ آک برانز کریسہ کوئٹہ غان کراچی آ ہنوک بنجاہی کسر ءِ ہر وڑ نا ہن و بر اکن بند کرینو۔
برانز کروک آک مستونگ نا علاقہ غلام محمد چوک آ رحمان ہوٹل آن خڑک تولوک برانز کریسہ کسر ءِ بند کرینو۔
برانز کروک آتا خواست ءِ کہ عابد حسین تون اوار غٹ بیگواہ بندغ آتے آجو کننگہ۔
برانزیک مخلوق آن خواست کرینو کہ اوفک ریاستی تادی نا برخلاف توار بڑز کیر۔ دا بیرہ عابد حسین نا ہیت اف بلکن ہر بندغ نا دڑد ءِ کہ ہرا زوراکی ئٹ بیگواہی نا گواچی ءُ۔
اندن مستونگ نا علاقہ اسپلنجی آن بیگواہ کننگوک غلام مصطفیٰ قلندرانی و نثار احمد، اندن درینگڑھ آن بابو علی محمد آجو مریسہ اُرا تے تینا سر مسنو۔
خیال ئٹ مرے بلوچستان ئٹ زوراکی ئٹ بیگواہ بندغ آتا معاملہ ترند حالیت اس دوئی کرینے، ہرا سلنگ نا جاگہ غا دے پہ دے آن ودیسہ ءِ ہراڑا بندغی حق آتا تنظیم آک مالو ہم کیہی وار خُلیس نا درشانی کرینو۔
شہید غنی عرف بلال جان سنگت تو مہر مابت نا چیدہ ءِ
نوشتہ کار: بارگ بلوچ
دی بلوچستان پوسٹ
شہید غنی بلوچ عرف بلال جان تو کنا اولی اوڑدئی ہمو تُم مس ہراتم نن اسہ جاگہ ٹریننگ ہیل کنینگ اسُّن ازدے نن وتاخ نا سنگت آک ٹریننگ کرین واپسی ٹی وتاخ آ بسُّن تینا وتاخی کاریم تے کرین تولوک اسُّن منہ سنگت بسُّر بلوچی دود ئٹ سلام دعا مس سنگت آک چاہ ہم کُنگُر تو او سنگت آتے تو منہ سنگت پوسکُنو اس۔ تو ہمو پوسکنا سنگت آتے تو ای شہید غنی بلوچ عرف بلال جان ئے خناٹ۔ او پوسکُنا سنگت آتے شہید فدائی سنگت محمد بخش عرف خالد جان وتاخ آ ہیسک۔ فدائی خالد آسک سفری اسُر، دا سنگت آتے ہیسُر پدا ہِنار تو شہید بلال جان ننتو ٹرینگ سینٹر آ سلیس۔ ٹریننگ بِنا کرے تو منہ وخت ٹریننگ کرے ننتو شہید بلال بدن ٹی پزور اس ولے ٹریننگ ٹی ننے آن کُل آن سخت تیز اس۔
سخت زو ٹریننگ ہیل کرے پدا شہید بلال ئے تنظیم پین کاریم ئسیٹ پین تِین رادہ کرے۔
ہر سنگت داڑے اسہ نقلابی فکر سوچ ئسے تون ءِ، ہر سنگت لمہ باوئی ءُ مہر تیک اُست اسُل پاپک سنگت ئس جتا مرے لیکن شہید بلال ئے تنظیم پین کاریم ئسے ئٹ زو درے۔ ای پاریٹ کاش کہ دا وڑ ئنا سنگت آک بندغ آن جتا مفس دا سنگت آتا جتائی کُبین ءِ۔ منہ تُو شہید بلال ننے آن جِتا مس۔
آپریشن ہیروف نا سنگت آک تیار مسُر تینا کاریم آ ہِنار پدا بسُر اوفتتون شہید بلال واپسی بسّس تو شہید بلال ئے نن خنان خوش مسون۔ گُڑا او منہ دے ننتو مس شہید بلال پدا ننے آن جِتا مس منہ وخت مس سنگت آک ہرکس تینا گشت آ ہنار، ہر سنگت تینا گشت تون اس ازدے نن رینج آن خُڑک مسُّن تو سینزدہ نومبر نا دے ہم اس۔ بولان نا چرک ئٹی شہید آتا دتر نا ہنینا گند اس، بولان نا مشک ناز ئٹ فخر کریرہ اودے آ وطن نا بوچ بوچ درخت آک خوشی آن گل اسُّر کہ شہید آتا دے ءِ خاک ناز ئٹی اس اینو کنا فرزند آتا دے ءِ اینو وطن نا وارث شہید آتا دے ءِ۔
تو گُڑا منہ سنگت ئے راہی کرین رینج آ ڈیہہ ئنا حوال ئے ہلِّنگ کن تو نن ناز اٹی اسُّن اینو شہید آتا دے ءِ اینو ورنا تا دے ءِ اینو ننا سنگت آتا دے ءِ خوشی آن گل او بال اسُّن پدا اسہ سنگت ئس واپس بس پارے شہید بلال ننے آن جِتا مس۔ تو نن اسہ کُنڈ آ ناز ئٹی اسُّن ایلو کُنڈ آ شہید بلال نا جتائی ننے مونجا کرے انتئے کہ شہید بلال اندُنو سنگت ئس اس ہرا نا جتائی باز سخت ءِ انتئے کہ او باز مہروانوس اس باز مہر تِروکو سنگت ئس اس۔ او مہر و مابت نا خواجہ اس۔ نن سنگت آن ہریفین کہ بلال جان امر شہید مسُنے تو قصہ کرے دُن دُن سنگت آک جنگ ئس کرینو دژمن تون مون پہ مون جنگ ئٹی سنگت شہید مسنے۔
شہید بلال نا لہجہ نرم اس، شہید بلال بے کچ سگ ئنا خواجہ اس، گیشتر مخِسہ ہیت کریکہ۔ شہید ہر کاریم ئے مخلصی ئٹ کریکہ، ہر کاریم تو خواری کشاکہ شہید بلال اسہ دین دارو سنگت ئس ہم اس۔ پنج وخت نماز خواناکہ نن ہراتم نماز خوانانہ تو شہید بلال ننے نماز جماعت تِسکہ۔ شہید بلال ایلمی ءُ مہر تِسّکہ سنگت آتے۔
اسے دے منہ سنگت تولوک اسُّن توفک ساف کرین شہید بلال ہم اس تو ننا مہر ئنا کچاری برجاء اس۔ تو اسہ سنگت ئس پارے کہ بندغ تینا پلین ئٹ دژمن تون جنگ کے گُڑا شہید مرے اگہ پاکستان شوم تینا آپریشن ئٹی بس شہید کرینے تو دژمن نا فائدہ مریک دژمن ئے فائدہ تروئی اف۔ تو شہید بلال اسہ نرم ءُ توار ئسے ٹی سنگت ئے مخِسہ ورندی تِس پارے کے یار نن دعا کینہ دژمن آ نن کان یا او برے مون پہ مون مرین جنگ کین تو تہ، تینا ایڑ لمہ غا تا بیر ئے ہلین ننا ایڑ لمہ غاتے روڈ آتے آ خوار کرینے اوفتا چنا تے بیگواہ کرینے یا نن تینا استاد اسلم نا قربانی تے زایا کنینگ اِلپن اوفتا بیر ئے دژمن آن ہلین۔
شہید بلال اسہ دلیرو سپاہیس اس۔ جنگی ہُنر اس توتہ ٹیکنیکل سنگتس ئس اسک سخت لائخو سنگتس اس شہید بلال ننا بروکا نسل آتا چیدہ ءِ۔
شہید بلال نا جوزہ ہمت ننا حوصلہ ءِ۔ شہید بلال نا فکر و یات آک نن کن خوڑدہ ءُ شہید بلال کونا سنگت آتا کڑد ننا لوز آتا آہری اف بس شہید نا منہ یات اسُر ہرافتے ای ہم کن درشان کریٹ۔
لمّہ وطن بلوچستان اسہ وخت ئسے آن بہادرو فرزند ودی کرینے خاص وڑ ئٹ شال۔ ننا شال ئنا ورناک بے کچ دلیر ءُ، نن ہُرِن دُن کہ شہید مجید اول، او ہرا ظالم آ ذلفقار بھٹو نا برخلاف فدائی جُلہو کرے اندُن بہادرو پین مجید ئس ودی مس شہید مجید ثانی شہید مجید اول نا ایلم مجید ثانی ہم دژمن ئے باز جاگہ غا جوانو دھک خلکونے شکست تِسونے۔ یا نن مثال ئے ہلین دُن سریابی آ ورناک دُن شہید کاشف جان ءِ یا شہید نادر جان ءِ بہادرو سپاہی مسونو اندُن دافتیٹی اوار شہید بلال جان اوارے حوصلہ بہادری مہر و مابت شہید بلال آ ایسر مریک۔
دا ہمو ورنا کو ہرا تے خوشو زند ارے اُرا ارے ایڑ لمہ باوہ ایلم سیال عزیز ارے ولے دا کُل خوشی عئید آتے اِلیسہ ورناک بریرہ ساہ ئے تینا ندر کیرہ دافتا قربانیک بروکا نسل ئے آجوئی نا دروشم ئٹ مِلّور دا ننا اُمیت ءِ، دا سنگت آتا امیت ءِ، شہید آتا امیت ءِ، دا لمّہ وطن بلوچستان نا امیت ءِ کہ دا ورنا تا قربانیک اسُل زیان مفسہ انشاءاللّٰہ۔ شہید بلال کونا ورنا تا دتر نا پُڑی آجوئی نا مزل ئے خڑک کرِسہ ءِ دژمن ئے خِجل شرمندہ کرِسہ ءِ۔
شہید بلال کونا سنگت آک ڈیہہ ئنا فرزند آک ناز شان ئٹی گٹ ئنا زگرنگو دتر تیرہ اوفتا فکر جوزہ سخت پینگُن ءِ۔ اوفتا فکر دژمن نا تنخواہ خور آ فوجی پُلِنگ کپّک دا شہید آتا فکر داسا ننا نُما کوپہ غاٹے دا شہید آتا توفک داسا ننا زمہ واری ءِ شہید آتا فکر و جوزہ و دھرتی نا کنڈ کنڈ آ سر کین دا ننا نُما فرض ءِ دا گُڑا دا فرض ئے ننے ہر حال ئات ادا کروئی ءِ اسلمی فرزند آک ڈیہہ ئنا گواڑخ آتے دتر ئٹ رُدیفینو اسلمی فرزند آک جنگ بارود بمب آتا توار ئٹی بھلن مسُنو فکر جوزہ تو
بِسُّن مسسُنو ۔۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک
کراچی نا بلوچ علاقہ لیاری ئٹ پاکستانی رینجرز نا بھلو کچ اس اُرا تیا چھاپہ خلنگ و ہندی مخلوق ءِ دزگیر کننگ کن علاقہ ئٹ استو پُترینگ نا کوشست کرینے۔
دا وخت آ ہندیک، ہرافتیٹی زالبولک اوار ئسر، مزاحمت کریسہ رینجرز آتے علاقہ غان کشار۔
تدینی نا برخلاف شاری تا پاری غان برانز کننگ نا کوشست کننگا گڑا رینجرز آک پین فورس خواہفیر و علاقہ ئٹ اندن ہندی تے برانز کننگ آن توننگانے۔
شاریک دوبہ خلکنو کہ ہڑدے فورسز آک علاقہ ئٹ پُترینگسہ ورنا تے دزگیر کننگ آن گڈ بیگواہ کیرہ پدا دروغ ءُ کیس خلیسہ دزگیری ءِ تا پاش کیرہ و داسا دا ہڑدے ناس جوڑ مریسہ ءِ۔
فورسز کارندہ غاک بھلو کچ اسے ئٹ سول بس و گاڑی تیٹ شار ئٹ سر مسونو۔ بھلا کسر تے تیوہ بند کننگا، ہندی بندغ آتے بیدادی تیتون مون تروئی تما۔
بلوچستان نا ضلع کیچ نا بنجاہی شار تربت ئٹ پاکستانی فورسز آتا قافلہ سر مسونے، دا قافلہ ئٹ کیہی بس آک ئسر اندن اوفتون سیکورٹی کن ہم گاڑیک ساڑی ئسر۔
قافلہ نا بننگ نا وخت آ فورسز شار ئنا جتا انگا کسر و بھلا کسر تے تیوہ بند کرے اندن بھلا کسر تیا ساڑی ہندی بندغ آتے بیدادی نا گواچی کننگ و گاڑی تا شیشہ آتے پرغنگ نا تدینی رپورٹ مسونے۔
پاکستانی فوج کارندہ غاتا سر پُر کن بس آتے کاریم ئٹ ہتیک ہرافتے تربت، نوشکی و خضدار ئٹ جلہو آتون مون تروئی تمانے۔ درو خضدار ئٹ پاکستان فوج ئنا اسہ بس ئسے خضدار زیروپوائنٹ نا ہند آ ٹک کننگا۔
پاکستان فوج دعویٰ کرے کہ تراک ئٹ اسکول بس ءِ ٹک کننگانے واہم آزاد حوالکار آتا پارہ غان دانا پٹ و پول مننگ کتنے، تراک ئٹ گواچی مروک بس و بیران مروک آتا بابت ئٹ جتا جتا ءُ بیان مون آ بریسہ ءُ۔
سیاسی حلقہ آتا پاننگ ءِ کہ بلوچستان ئٹ پاکستانی فوج تینے بے رکھ مننگ مارِنگ ءِ ہرا نا سوب درو تربت ئٹ لس شاری تیا بیدادی تا تدینیک مون آ بسونو۔
راستی نا خون – ٹی بی پی سرگپ
بلوچستان جہان نا ہمو ڈیہہ تیٹ اوار ءِ ہراڑے جہانی صحافی تا بننگ آ بیدس پڑو رکھ خلوک ءِ، و اگہ ہندی صحافیک ریاستی بیانیہ تالان کننگ آن نمن مریر گڑا اوفتے زوراکی ئٹ بیگواہ و بیدس عدالت خون کون آ ترند نتیجہ تیتون مون تروئی تمک۔ ریاستی تادی نا راستی ءِ جہان اسکان سر کننگ نا سوب آن دا وخت اسکان بلوچستان ئٹ چِل و دو صحافی کسفنگانو۔
ایمنسٹی انٹرنیشنل بلوچستان ءِ ”صحافی تا قبرستان“ گوندانے، اندن 2014 ئٹ رپورٹرز وِدآؤٹ بارڈرز (RSF) قلات ڈویژن نا بھلا ہند خضدار ءِ جہان نا ہمو دہ شار تیٹ اوار کرے ہراڑے صحافت کل آتیان بھیم بش کروک پیشہ اس جوڑ مسنے۔ پاکستان جمعی وڑئٹ صحافی تیکن اسہ بھیم بش کروک ڈیہہ اس الم ارے، ولے بلوچستان اوفتیکن بھلو وخت ئسے آن مرگ ئنا میدان جوڑ مسنے۔ داڑے ریاستی ظلم آتے پاش کننگ ہر وخت صحافی تا ساہ ئنا دژمن جوڑ مریک۔
پاکستان نا بنجاہی صحافتی ادارہ ریاستی زور شاغنگ نا سوب آن بلوچستان نا جنگ زدہ ڈیہہ، بندغی حق آتا لتاڑ، و زوراکی نا بیگواہی کون آ سرحال آتے کوریج تفک۔ بلوچستان نا بابت اسہ کنڈ ئنا و جشوک آ بیانیہ جہان نا مونا ہتنگک تاکہ ریاستی ادارہ غاک بلوچ راجی تحریک ءِ پیشن نا چم ئسے نا نتیجہ پاریسہ اونا سیاسی حیثیت ءِ نسخان تننگ کیر۔
بلوچستان ئٹ آجوئی نا جنگ اِرا دہائی آن زیات وخت آن برجاء ءِ۔ برجاء سال تیٹ بلوچ مزاحمت کار تا کاروائی تیٹ ہرا ترندی و حکمت عملی اوار مسنے، ہمونا ردعمل ٹی ریاست ہم انسداد نا پالیسی تے گیشتر ترند کرینے۔ ہرافتا سوب آن بلوچستان نا کیہی ضلع تیٹ مخلوق پاش ریاستی تادی نا شیف آ زند گدریفنگ آ بیوس ءِ۔ دن انگا وخت آ صحافت نا اولیکو ذمہ واری اندا مروئی ءِ کہ اوفک دا ظلم آتے پاش کیر، ولے بد بختی آن پاکستان نا میڈیا ادارہ غاک راستکی نا جاگہ غا ریاستی بیانیہ ءِ تالان کریسہ تینٹ ہم ظلم ئنا بشخ جوڑ مسنو۔
بلوچستان نا ضلع خضدار زیرو پوائنٹ آن خڑک پاکستانی لشکر نا بس آ تراک، بھلو کچ ئسے آ کہنگ آتا حوال رسینگانے۔ ہندی حوالکار آتا ردئٹ کینٹ آن پیشتموک قافلہ ٹی اوار فوجی کارندہ تا بس ٹک کننگانے۔
پن کروک تراک نا بابت ئٹ پاکستانی لشکر نا حوالکاری تلہ (آئی ایس پی آر) نا رد ئٹ دا جلہو گمانی وڑ ئٹ اسہ سوگو دہشت گرد کاروائی اس ئس۔ آئی ایس پی آر نا رد ئٹ دا جلہو ئٹ مُسہ چنا تون اوار پنچ بندغ بیران و کیہیک ٹپی مسونو۔
آئی ایس پی آر نا پاننگ ءِ کہ دا جلہو نا پد ئٹ غیر ملکی تا دو اوار ءِ، ہرافتا بابت ئٹ ادارہ نا دوبہ ءِ کہ او بھارتی ریاستی ادارہ آتا بچ تننگ آ بد ایمنی تالان کننگ نا کوشست ءِ کریسہ ءُ۔
فوجی ترجمان نا پاننگ ءِ کہ “میدان جنگ ئٹ بے سہبی آن گڈ بھارت بلوچستان و خیبر پختونخوا ئٹ بدامنی تالان کننگ کن تینا ایجنٹ آتے ایکٹو کرینے.”
آئی ایس پی آر نا رد ئٹ ، دا جلہو ءِ “ریاستی سطح غا دہشت گرد” پاننگانے و پاننگانے کہ دا جلہو نا زمہ وار آک غیر بندغ آتے انصاف نا تلہ غا ہتنگو۔
تدینی آن گڈ سیکیورٹی فورسز علاقہ ءِ گھیڑ ئٹ ہلیسہ پٹ و پول ءِ بنا کرینے۔ ٹپی تے خڑک ئنا اسپتال آ سر کننگانے، ہراڑے کیہی تا حالیت بھاز خراب پاننگسہ ءِ۔
دائسکان کس اس دا جلہو نا زمہ واری ءِ ارفتنے۔
ایلو پارہ غان حوال رسینگانے کہ تراک آن گڈ علاقہ ئٹ ہیلی کاپٹر آتا بال خننگانے۔ حوالکار آتا رد ئٹ تراک آن گڈ سیکیورٹی فورسز علاقہ ءِ گھیڑ ئٹ ہلیسہ سرچ آپریشن ءِ بناء کرینے۔
ٹپی تے دمدستی اسپتال آ سر کننگانے، واہم اسپتال ئٹ لس شاری و میڈیا نا پُترینگ آ پابندی خلنگانے۔
پاکستانی لشکر و ڈپٹی کمشنر نا دعویٰ ءِ کہ تراک اسکول نا چنا تا بس آ مسونے واہم کیہی غیر حقیقی حوال آک پیری کریسہ ءُ ہرافتیٹی دعویٰ کننگسہ ءُ کہ فوجی ادارہ آک مخلوق ءِ رد شاغنگ نا کوشست کریسہ ءُ و ٹپی فوجی کارندہ غاتے چنک سن چنا تا وڑ ئٹ پاش کریسہ ءُ۔
واہم دا حوال آتا دائسکان اسہ ہم آزات و سوگو سوب اسیٹ پٹ و پول مننگ کتنے۔
