بلوچستان نا ضلع آواران نا علاقہ کولواہ گشانگ آن استو پاکستانی لشکر نا فوجی آپریشن نا وخت بیگواہ مروک ورنا ساجد ناصر نا بیدادی نا گواچی مروک جون اینو سہب ئنا مالار چیل نا ہند آن خننگا۔

ہندی حوالکار کار آتا رد ئٹ ساجد ءِ پاکستانی لشکر و ریاستی مخ تفی سلہہ بند ٹولی اونا اُرا غان دزگیر کریسس۔

کہوک ساجد ناصر مستری ساجد ناصر نا مار ئس، و او نا جشوک جون اینو سہب ئنا بیدادی مروک حالیت ئٹ خننگانے۔

یاتی مرے کہ اِرا دے مالو ہم اندا علاقہ ئٹ لیویز کارندہ یونس رسول ءِ فورسز آک اونا اُرا غان ارفیسر ہرانا جون ولدا دمب نا ہند آ بٹنگاسس۔ دا تدینی آن گڈ پاکستانی لشکر یونس رسول نا تعلق ءِ بلوچستان لبریشن فرنٹ (بی ایل ایف) تون تفنگ نا کوشست کرے واہم بی ایل ایف دا دعویٰ آتے تا ترندی ئٹ رد کرے۔

کرد مزاحمت: مَش تا چُپی یا بیانیہ نا یخ تفی؟

نوشت: برزکوہی
براہوئی مٹ: ہانی بلوچ

دی بلوچستان پوسٹ

پاننگ مریک کہ ہرا راج آتا دیہاڑ ئٹ توفک ارفنگ مریک، او یا تو سلطنت جوڑ مسُنو یا گڑا مزار۔ کرد آتا جنگ، دا روایت نا نیامٹ اڑینگوک اسَہ مُرغنو ہکل ئس ءِ، ہرا نہ سلطنت جوڑ مس و نہ مزار، بلکن اَسہ ” پُوسکنو معاہدہ” ئسیٹ کھڈ مسنے۔

پی کے کے ہرادے نن کیہی سال آن استعارہ پُہہ مسُن، داسہ تینٹ اَسہ چیدہ ئسے آن گُٹ خلاصی دوئی کننگ نا کوشست ئٹی ءِ، ہمو ہرا مَش تیا مَلوک خن تیتون خاچارہ، داسہ شار تا تغ تیٹ بند مسُنو۔ دا بیرہ سلاہ بٹنگ نا تُدینی اف، بلکن اسہ تیبہ ءُ فکر ئسے نا ” ڈی مبلائزیشن ” ئس ءِ، ہراٹی مَش، زالبول، پجار وانقلاب، کل ئے اسہ ” چاگڑدی معاہدہ ” ئسے نا دیوال نا شیف آ کھڈ کننگانے۔

مَنہ بندغ پارور کہ دا بےسوبی جمہوری ارتقاء ءِ، اَسہ بالغ سیاسی بصیرت ئس ءِ، ولے نہ، دا ارتقاء اف، نہ بصیرت۔ دا اَسہ اندُنو تنظیم ئسے نا نظریاتی پِننگ ءِ ہرا بھلُنی نا قیذ، بیانیہ تا بیوسی، و جہانی اسٹیبلشمنٹ نا ہنین آ زہر آن گدرینگسہ، داسہ اَسہ ” ماڈریٹ ” نا مُخ تَف ئٹی بدل مسُنے۔ کرد آتا سلاہ بند مزاحمت نا مُرغنا سال تیان پدا، دا پڑو تسُر کہ داسہ او ریاست نا تہٹی برابری، ثقافتی خودمختاری، و جمہوری اواری نا اصول تیا راضی ءُ۔ ہرا کسر ئے او” جمہوری بنجاہ” پارہ۔ او گواچن ئٹ اسہ تصور وطن آن نرنگ ئس ءِ ہرا وختس اوفتا جنگ ئنا بنجاہ اسکہ۔ ولے سوج دادے کہ اَسہ راج ئسے ہرا کِرن آ تیان تینے ریاست آن ڈن پُہہ مرسہ کرے، ہمو دا ریاست تون اوار دوارہ سیالی گھنڈنگ کن امر راضی مسک؟ دانا ورندی نہ بیرہ دمدرینگ ئٹ ءِ، نہ جذباتی ایمن نا خواہش ئٹ، بلکن دا کُڑمب آ شعوری عمل ئٹ ءِ ہراڑے مزاحمتی فکر ئے ریاستی حکمت عملی تیٹ، جہانی فریب کاری، و پیہوک فکری انتشار ئٹ اندُن آختہ کریر کہ راج تینا ٹیوار ئے پوسکنو معنی ئس تس۔

کرد راجی مزاحمت، خاص کر ترکی نا برخلاف پی کے کے نا بھلُنی ٹی، ہنوکا نیمہ کرن ئٹی، نیامکو دے ٹک (مشرق وسطی) نا کل آن منظم نظریاتی، و سوگو تحریک تیٹ ہُننگ مریک۔ دا تحریک ہموتم کاٹُم کشا ہراتم ترکی ٹی کرد ٹیوار ئے نہ بیرہ بےقانودی پاننگ مسکہ بلکن لوز مڈی، ثقافت و زمین آن ہم فرخ کننگا۔ پی کے کے ریاستی زوراکی نا دا ہورک آ جہہ(خلا) ئٹی تینے بیرہ اَسہ عسکری تنظیم ئس نہ، بلکن کرد چاگڑد نا تنظیم نو نا ادارہ تا وڑ ئٹ جوڑ کرے۔ دا تحریک عسکری، چاگڑدی، تعلیمی و نظریاتی تیبر (سطح) غا تیا کرد آتے اسہ اوارو چاہنداری ئس تننگ نا کوشست کرے و اوٹی بھلو کچ ئسیٹ سرسوب ہم مسک۔ ولے ہرا گِڑا اَسہ مرحلہ ئسے آ تاغت نا چیدہ جوڑ مرے، او ایلو مرحلہ غا زنجیر ہم جوڑ مننگ کیک۔ وخت ئتون اوار، ہراتم پی کے کے جہانی سیاست نا (دائرہ) ٹی اوار مسک، اودے تیہہ ئنا تنظیمی ثابت قدمی و ڈنی جغرافیائی زور ئنا نیامٹی چُپ ءُ شش و پنچ ئسے تون مون تروئی تما۔ اندا شش و پنچ ہمو زمین ئے راست کرے ہراڑے بےسوبی نا بج دسنگا۔ پی کے کے، نا ساڑی آ جہہ، ہراٹی او آجوئی آن پدی مرسہ ترکی نا آئینی نظام ئٹ اَسہ “پر ایمن شریکدار” ئس مننگ آ راضی مسُنے، بیرہ اَسہ سیاسی حکمت عملی ئس اف، بلکن اَسہ فکری گچینی ئس ءِ، ہرانا پدٹ کیہی تیبر تیا رد و بدل ساڑی ءِ۔ اولی سوب تو مُرغن آ جنگی دمدرینگی اسک ہرا ریاستی زوراکی، تہہ ئنا سوگوی تا مفننگ و تنظیمی دِتر تیان ودی مس۔ چِھل سال آن زیات سلاہ بند جہد اُلس ئنا ذہن آ بوجھ شاغا، نسل آتا وے پورو آ تغک ورثہ ٹی تننگار، و ایسر ئٹ جُنز ئنا سرکماش ئے دا سوچ کننگ آ بیوس کننگا کہ داکان زیات نہاد پُھر کننگ مننگ کیک؟

ایلو و کل آن نازرک عمل کروک اسک اوجلان نا دزگیری آن پدا تحریک نا اَسہ بندغ ئسے آ انحصار کننگ۔ ہمو سوچ ہرا تحریک ئے اوار کریسس، او داسہ جیل ئٹی تنیائی نا تجربہ تیان گدرینگسہ اَسہ اندونو دروشم ئس ہرفیسس ہرا مالو آن کیہی زیات مصلحت پسند، تجریدی و ” جہانی زبان و بیان ” آن خُڑک اسک۔ اوجلان نا نظریاتی خطوط، ہرا اَسہ زمانہ ٹی انقلابی فلسفہ تا دریا اسک، داسہ بندغی حق آک، جہی انتظامیہ، و ثقافتی برابری نا وڑو “قابل قبول” خواست آتیٹ مٹ مسک۔

مسٹمیکو فیصلہ کُن ٹِک ہمو جہانی تیبر اسک، ہراڑے جہان پی کے کے ئے شام ئٹ داعش نا برخلاف اَسہ تاغت ئس منّا، ولے دا منّنگ اوفتا جُنز ئنا نظریاتی ڈغار ئے لنگار کرے۔ مغربی تاغت آتا مُختفی اَسہ وختی اتحادی خواست ئس اسک، ولے او پی کے کے ئے اَسہ اندونو جہہ ئسے اِسکان ہیس، ہراکان آجوئی نا خواست ئنا نہاد، ” عمل کننگ نا لائخ” و ” مغرب نا اُست پسند” مننگ کن تروئی تما۔ اوفتے پاننگا کہ ریاست ئس جوڑ کننگ نا زد داسا مُتکن مسُنے، و پُوسکنا جہان ئٹ ” خودمختار تاغت آک” ہی سیاست نا پُوسکنا دروشم آک ءُ۔ پی کے کے دا ہیت ئے مَنا و اندا ہمو ساہت اسک کہ ہراتم جہد ئنا دائرہ اسہ راج ئسے اسکان محدود مرسہ مَنہ ضلعی کونسل تے اسکان سلیس۔

بلوچ راج ئے دا کسر آ سلسسہ بیرہ دا سوج کروئی اف کہ کرد آک انت گوہار یا دوئی کریر، بلکن دا پُہہ مروئی ءِ کہ نن انت گوئنگ کینہ۔ اندا بلوچ جُنز آجوئی، ہرا دا وخت تینا مزاحمت نا مسٹمیکو و کل آن ترند آ سَندھ ئٹی ءِ، اودے گچین کروئی ءِ کہ نظریاتی سوگوی, عسکری گھامگیج، و اُلس ئنا مُختفی نا دا مُسہ کُنڈی (مثلث) ئٹ تینا جاگہ ئے امر گچین کے؟ دا سوج دادے کہ داٹی بلوچ کن ہیل کننگ کن انت ارے؟ کنا نظر ئٹ، بلوچ آتے داسہ تینا بیانیہ ئے لوز آتیٹ نہ، فیصلہ غا تیٹ تراشوئی ءِ۔ ننے ہر ہمو حکمت عملی آن پرہیز کروئی مروئے ہرا دژمن نا حکمت عملی تیتون مِلیک۔ مذاکرات نا میز، جہانی تاغت آتا سفارت، یا جمہوری اواری کون آ کسرک بیرہ ہموتم بھرم ہتنگ کیرہ، ہراتم اوفتا بنیاد اَسہ ناقابل رَد مروکو گُواچن ئسے آ مرے، بلوچ اَسہ راج ئسے، و راج آتا بقا بیرہ برابری ٹی اف، حاکمیت ئٹی ہم مریک۔ پی کے کے اندا ٹِک ئے ایلا، بلوچ تحریک ئے اندا نختہ ئے سینہ تون تفوک تخوئی ءِ۔ انتئے کہ حاکمیت آن بیدس برابری نا ہچو ضمانت ئس اف۔

ننے تینا تنظیمی ڈھانچہ ئے اسہ اندونو وڑ ئسیٹ مونا ہتوئی مروئے کہ اگہ پھگہ ننا قیادت ئے دژمن زنجیر تیٹ بندی کے، گُڑا تحریک بیرہ زندہ مف بلکن فکری حوالہ ئٹ سوگو مرے۔ ننے ہر ہمو بیانیہ آن پد مروئی ءِ ہرا قربانی ئے ایمن نا کرنسی پُہہ مریک۔ ننے دا شعور ودی کروئی مروئے کہ جہان نا ہچو تنظیم ئس ہمو وخت ا٘سکان ناقابل شکست مریک ہراتم اِسکان اونا فکری بنجاہ اونا زمینی عمل تیان سرپند مرے۔
پی کے کے اندا سرپندی ئے اِلا، و اندا ساہت اوفتا دیہاڑی پچھتاوہ نا ٹک ئنا بناء کروئے۔

بلوچ آتے کرد آتا بےسوبی آن دا ہیل کروئی ءِ کہ دژمن بیرہ توپ و توفک ئٹ نہ،فکری مہارت ئٹ ہم جلہو کیک۔ ہراتم او نے دا پائے کہ آجوئی اَسہ مُتکنو سوچ ئس ءِ، گڑا نی اودے پاس کہ نن پوسکنو جہان ئسے نا متکنو غلام جوڑ مروفن۔ ہراتم او نے دا سلاح تے کہ ٹیوار ئے ثقافت نا تہٹی رکھ کبو، گڑا نے اودے پاروئی ءِ کہ ٹیوار بیدس اختیار آن بیرہ اَسہ دود ئس رہینگیک۔

کرد آتا ایسر اسہ دیہاڑ ئسے نا پَنہ ءِ، ہرادے بلوچ آتے خَوڑتی ئٹ خوانوئی مروئے۔ ننے دا پَنہ تا کُنڈ آ تیا تینا جُنز ئنا مستقبل پٹوئی ءِ، ہمو لئین آ تیٹ ہرافتیٹ او لکھنگ متنے، ولے ہرا خوانوکا نا شعور ئٹ توار ءِ۔ ننے معلوم مروئی ءِ کہ نن دیر اُن، ارانگ ہِننگ اُن، و اَرا نہاد آ۔ اندا شعور ننے ہمو کسر ئے تروئے ہراڑا نہ بےسوبی مرو، نہ شکست، بیرہ سفر مرو، و سفر ہمو ہرا آجوئی آن بیدس ہچو کسر ئسے آ توپک۔

داڑے اہم سوج بش مریک کہ داسہ بلوچ آتا موقف پی کے کے یا کرد راجی سوج آ انت مروئی مرے؟ نن کرد آتا دیہاڑی قربانی تا شاہد اُن، اوفتا جنگ ہرادے او بھاز دلیری و قربانی تتون اوار کریر، اونا نن شرف ئے کینہ۔ ولے شرف و پیروی اِرا جتاؤ گِڑا ءُ۔

کرد آتا دا فیصلہ اوفتا تینا اسک، اوفتا زمین، اوفتا دژمن، اوفتا حالیت آک جتا اسُر۔ نن اوفتیان ہیل کننگ کینہ کہ اَراتم شیف مننگ خطرناک مریک، اَراتم جنگ ئنا پڑ آن بیانیہ میدان آن زیات خطرہ ئی مریک۔ ولے ننے تینا کسر ئے، اوفتا گھام تا رد آتیا آخہ، تینا دِتر تیٹ جوڑ کرون۔ بلوچ راج دہنو مزل ئس پٹنگ اف ہرادے اقوام متحدہ نا نشخ آ اَسہ کنڈ ئسے آ جاگہ دوئی مرے، بلکن او آجوئی خواہک ہرا اوفتا شہید آتا تُغ تا تعبیر مننگ کیک۔

بس ننے اَسہ اندونو لہجہ ئس تینائی کروئی ءِ کہ ہرا نا عاجز مرے، نہ تکبر والو ئس مرے، ولے داخس گچین مرے کہ دژمن ئے بنِسہ خنجر نا وڑ لگے، و سنگت ئے بنِسہ موہرونک خننگے۔ نن نہ چپ مرون، نہ ہکل کرون۔ ننا لہجہ ہمو مروئے ہرا اَسہ راجی لشکر نا رائفل نا پدٹ، و اسہ راج ئسے نا گؤر ئٹ توار کیک۔

بلوچ ئے دا ساف پاروئی مرو کہ نن کرد آتا ہنوکا قربانی تا مَنوک اُن، ولے اوفتا اندا سیاسی زاویہ آن فکری و عملی مُری تخِنہ۔ دا مُری دژمنی ئس اف، ننا خودداری ءِ، ننے ہمو جُنز مروئی اف ہرا جہانی تیبر آ پن کھٹنگ کن تینا بیرک بیریفے۔ بلکن ہمو تحریک مروئی ءِ ہرا ٹپ آتیان عبارت مرے، ولے اصول آتیا سلوک مرے۔ کرد آتا ایسر ننا خن تا مون آٹے۔ ننے دا گچین کروئی ءِ کہ ننا مزل اوفتا ایسر آن جتا مرے۔

ننے دا پاننگ ٹی ہچ شش و پنچ نا گواچی مروئی اف کہ بلوچ راجی جُنز داسہ ہم اَسہ ناقابل مفاہمت مکمل آجوئی نا جہد ئس ءِ۔ نن ہر ہمو مشورہ آن تینے پد تورون ہرا آجوئی ئے کس “مقامی خود اختیاری” یا جمہوری اصلاحات“ نا پڑدہ ٹی کھڈ کننگ نا کوشست کرے۔ ننے دا ہیل کروئی ءِ کہ ہراتم دژمن ریاست مذاکرات نا میز خلیک، گڑا اونا شیف آ مُدام سلاہ ڈھکوک مریک۔

پی کے کے نا بےسوبی بلوچ آ تیکن نغد کاری نا موقع ئس اف، بلکن اَسہ سبخ ئس ءِ، دا سبخ کہ اگہ مُہبر بندی مرے، اگہ بیانیہ جہانی تاغت آتا رد ئٹ جوڑ مرے، اگہ قربانی ئے سیاسی ہاٹی (ساکھ) مٹ کے، گُڑا آجوئی تُغ ئس جوڑ مریک۔ بلوچ آتے تینا کسر ئے تینٹ گچین کروئی مرو۔ ہمو کسر ہرا دژمن نا تعریف، مُختف آتا مصلحت، یا جہانی ” مَننگ(قبولیت)” آن نہ بلکن راجی وجود، دیہاڑی چائند و غیر مفاہمتی عزم آن پیشتمک۔

مرغن ءُ پند اس آجوئی کن

خود نوشت: نیلسن منڈیلا
جاچ: جعفر قمبرانی

(ارٹمیکو بشخ)

جوہانسبرگ اٹی پُترینگِنگ آن گڈ نیلسن ءِ ہندن گمان مس کہ اونا زند داسا موت اسکان اسہ گم و گار و نادرست ءُ بندغ اسے آنبار تدینگسا ایسر مرو۔

ہمو تم اسکان تو نیلسن نا تینا باوہ ہم الؤ کہ اودے سامبوس، لمہ تے کیہی میل مُر ‘قُنو’ نا شار اٹی تموک بے وسی نا زند تدیفنگ آ بے وس ئسک و نیلسن تینا مون جوہانسبرگ نا گلی کوچہ غاتیٹی باخو کن ارغ نا رولو کننگ ئسک۔

راست پارہ کہ بندغ نا کل آن بھلا مڈی اونا خواریک ءُ، اونا ہمو ڈُکھ آک ءُ ہرا اودے اسہ عام آن خاص و ہچ آن ہر گڑا جوڑ کیرہ۔ نیلسن نا خواری تا دیک بنا کریسر۔ اودے گمان ہم الؤ کہ او ہم وختس کنا راج انا شاعر آنبار پارو کہ:
“ہنار خواری تا دیک منظور
ہتم نا دے کو۔۔۔

نیلسن نوشت کیک کہ ہراتم ای جوہانسبرگ اٹی درستی راستی و آلی بالی مسوٹ، کنا خنک ملنگار کہ داڑے تو جہان مچ بدل ءِ۔ جوہانسبرگ اٹی اسکول کالج و پین علمی ادارہ غاتہ کمبوتی الؤ وا ایکان دہاڑی کن کاریم ملنگ ہم بھلو ویل اس الؤ ولے دا کل آسودہیک بیرہ سیرہ ہمو بندغ تیکن ئسر ہرافتا سِل اس پیہن ءُ ئس، یا اوفتا سِل مؤن و اوفتا خنک پیہن بڈی ئسر کہ تینا جند انا مؤن سلی تا غداری کریرہ۔ یانی اوفتا ڈیہہ اٹی نسل پرستی کچ آن زیات ئسک و ‘مؤن سلی’ آتیتون انسان اخا بلکن سہدار تا وڑٹ مون تسرہ۔

لکھک کہ ننا ملک اٹ گُڑا نے آسودہی دو کننگ، خواننگ یا باخو اس اِرغ نا ہلنگ کن پیہن سِلی اس مروئی تماکا یا تو پیہن خنی اس۔ ایہن گُڑا مؤن سلی آ بندغ آک سٹی ہر جاغا ہننگ آن منع ئسر، اوفتا اسکول کالج و دائے جتا جتا ئسر داڑسکان کہ اولسی آ ٹَٹی (لیٹرین) تیٹی ہم مؤن سلی آتا ٹٹیک جتا ئسر و پیہن سلی آتا جتا۔ ہرا اسہ مؤن سلی آ ردیکہ پیہن سلی ءُ سے نا اُرا، لیٹرین یا جاگہ ٹی پترینگوس اونا زیہا کیس مسکہ و پیشی پاشی اسکان ہیت سر مسکہ۔

نوشت کیک کہ دا تعصب وڑ نا رویہ غاتیان کنا است اٹ تینا مخلوق کن بے وسی نا احساس اس ودی مس۔ واہم ای شعور نا سیم و حد آتیان اینگ ئسٹ کہ کنے پیہن سلی آک دائسکان بھلو ارے لگارہ۔ پیہن سلی آتا خننگ یا اوفتیان کسس کنتون ہیت کروس تو ای تینے کل آن بختاور تکیسا دانگ اینگ ہُراٹا کہ دیر کنے دا بختاوری آ خنا۔۔۔ روہی لالا نا زند داڑسکان نن کل اکن سبخ اسے کہ تانکہ بندغ اسے ٹی شعور ودی متنے، او تینے، تینا قوم انا چوچہ پاچہ ءِ و تینا راجی دود ربیدہ غاتے ہچ سمجھپک۔ اودے لگک نن مِش اُن، ہِس اُن، انت اس ارے ہمو پیشن نا کوزہ گیر یا زوراک آک ءُ۔

ولے دن الؤ۔
جاندمی افریکہ نا آبادی نا کل آن بھلا کچ مؤن سلی آک ئسر ہراکہ ہشتاد 80 درسد مسرہ، پیہن سلی آک بیرہ غا بیست 20 درسد ئسر۔ سوچ بیرہ ترجیحات آتا ئسک و غلامی و بوتاری والا ئسک۔ نہ تو مؤن سلی آتا تینا گلزمین و کل آن ودیک اوفتا تینا بندغ آتا کچ ئسک۔ مال مڈی و خیسن پیہن اوفتا ئسر بس ہمو احساس ودی متوسس کہ ‘دیر ءِ آجو دیر غلام ءِ۔’

نیلسن زِند انا دے تے دِکا تننگ کن ازگار آتا کمپنی تیٹی کوشست کننگ بنا کرے وا تینا سنگت ‘جسٹس’ نا کمک اٹ جاغہ اس دو اڑیفے ولے بھاز زوت اودے ہمو مُزوری آن دو سلوئی تما کہ اوڑے مؤن سلی آتے مزوری کننگ کن اسہ این او سی اسے نا بکار مسکہ ہراکہ نیلسن آستون الؤکہ۔ نیلسن و جسٹس اِرا مُسہ جاگہ کوشست کریسا دُروہ اٹ دہاڑی ہلکرہ وا منا وخت اٹی پدی بے دخل کننگارہ کہ اوفتا سِل مؤن اسک وا ڈغار نا خداک اوفتا بخت اٹی آسودہی نوشت کتویسر۔

باور کیس کہ غلام آ قوم آتیکن زمین و آزمانی آ خداک آسودہی نوشت اسل کپسہ تانکہ دا قوم آک تینا بخت ءِ تینٹ نوشت کننگ نا کوشست کتنو۔ غلام قوم ءِ آجو مننگ کن تینا جند انا قلم، کاغذ و لُغت اس دوئی کروئی تمک تانکہ تینا بخت ءِ نوشتہ کے۔

نیلسن منڈیلا شیر اسے نا چوری ئسک و دائسکان تینا باوہ پیرئی آ سیم و حد آتے گیرام کریسس کہ او مزور اس اف بلکن خواجہ اسے۔

ہندا خواری و زاری تیٹی نیلسن کمپنی تیٹی مزوری کریسا داکان تینا ‘بی اے’ نا ڈگری ءِ ایسر کننگ نا رندٹ ہم لگا ہرادے کہ او نیام کسر آ ہلاسس داڑے بسوسس۔ نیلسن ءِ منا سال خواری تیٹی لگا، پدی او قانون نا شعبہ ٹی تینا بی اے ءِ ایسر کرے گڑا داسا اودے پین جاگہ مزوری اخا بلکن وکیل و دائے سے نا چیمبر ٹی کاریم دوئی کننگ نا موقع دو بس۔

داسا او کل پیہن سِلی آ خوانندہ تا نیام اٹی تینے بخت والو اس تکنگ ئسک دے اس اودے سما تما کہ اوڑے ہم مؤن سلی اتا چاء کنوک آ کوپ آک جتا ئسر، اوفتے پیہن سلی آتا کڑسی آ تولنگ یا اودے دو خلنگ کن ہم بے عزت مروئی تماکہ۔ یانی ہر ہر وڑٹ اوفتے دا احساس تننگاکہ کہ نم انسان نا چنا اخا بلکن اسہ مؤن ءُ غلیز ءُ سہدار اسے نا چناک اُرے۔

داکان نیلسن ءِ اسہ اِرا سنگت، رادیبے و والٹر سیسولوں، دو بسر ہرافتا نیلسن نا زند اٹی بھلو کڑد اس مس۔ خاص وڑٹ والٹر نیلسن تون تول بش کریسا افریکن نیشنل کانگریس نا بابت نیلسن تون تران کریکہ، کانگریس نا مسخت آتے، پیہن سلی تا دژمنی و جاندمی افریکہ ٹی مؤن سلی تا بے وسی تے بیان کریکہ۔ والٹر نا سنگتی، تول بش و پیہن سلی آتا غلامی کروک انگا رویہ غاک ایسری کہ نیلسن نا خن تے ملار۔ نیلسن ہم پہہ مس کہ نن غلام اُن و ننے نوکری، پیسہ، تعلیمی ادارہ و باخو ارغ آن زیات آجوئی نا گُرج ءِ۔ اودے سما تما کہ گرج دا اف کہ نن پیسہ نا رندٹ دودینگن، بلکن گرج دادے کہ نن غلامی آن آجو مرین۔

نوشت کیک کہ داسا گڑا کنکے اسہ سرسہب و کیرئر و نوکری و بھلو کچ اس تنخا نا کنا بھلا مزّل الؤر۔ داسا نیلسن افریکن نیشنل کانگریس (ANC) نا باقائدہ دیوان تیٹی ہناکا، سنگت آتیتون توسکا و تینا وڑٹ تینا سوچ فکر نظریہ ءِ پختہ کریسا ہناکہ۔

گوڑیفوکا ہیت دادے کہ ننے تینا راجی فکر و ویل آتا ایسری، غلامی نا ایسری و وطن کن تو تینا ککڑ اس ہم است مفک، ولے دعویٰ تو نن ہندن بھلو کینہ کہ تلار توپ تا۔ نیلسن ٹی پین ہچڑہ اس خاص ءُ الؤ بس اونا سوگؤ آ فکر و اونا قربانیک اودے جہانی پڑ آ اسہ بھلو راہشون اس جوڑ کریر۔ نیلسن نا فکر سوگؤ و جند تے قربانی نا جوزہ غان شُپ ئسک۔

ہندا فکر ئسک کہ نیلسن تینا اولیکو زائیفہ ‘اویلین میس’ ءِ ہنداڑے جوہانسبرگ اٹی برام کرے و پدی بیرہ ہندا سوب آن مُسٹ تس تا کہ اویلین ءِ نیلسن نا سیاسی فکر و آجوئی نا سوچ اتون خاص ءُ خڑکی مننگ کتؤ ہراکہ نیلسن نا رِداٹ اونا فکر انا نیام اٹی اسہ ہڑاند اس مننگ کریکہ۔ دا سوب ہم ئسک کہ نیلسن تینا فکر انا سوب آن پیہن سلی تا مون اٹی دوست مفروک ءُ بندغ اس ئسک ہرادے ہمو راج اٹی بھلو کچ اسیٹی پیسہ کٹنگ نا موقع تننگ متؤکہ، وا ہندا بزّگی، بے پیسئی اونا زائیفہ ءِ دوست بتؤکہ ہرانا بھلا سوب نیلسن نا فکر ئسک۔ ہندا سوب آن نیلسن تینا اُرائی زند ءِ ویل آتا گواچی کرے و تینا اولیکو زائیفہ ءِ مسٹ تریسا تینا جہد ءِ برجا تخا۔

(برجا ءِ)

بلوچ یکجہتی کمیٹی پارینے کہ نن جاندمی وزیرستان ئٹ لس شاری تا اُرا تیا مروک آ ڈرون جلہو، چناتا بھیم بش کروک آ لس خون و پشتون زنک ایسری نا ترندی ئٹ مذمت ءِ کینہ۔ پشتون ڈغار تدوک کیہی دہائی تیان زوراکی، بیدادی و فوجی زوراکی نا گواچی ءِ۔ نن دادے اسہ ہم نیمون یا شکبر درشانی آن بیدس اسہ پاش و سوگوْ پشتون زنک ایسری اس سرپند مرینہ۔

مستی پارینے کہ ہرا وڑ ریاست بلوچستان ئٹ بلوچ راج ئنا برخلاف سوگوْ زنک ایسری نا پالیسی آ عمل آٹے، اندا وڑ آ پشتون ڈغار ئٹ ہم زوراکی و بیدادی نا لڑ برجاء ءِ۔

بی وائی سی نا پاننگ ءِ کہ اینو نئے بیرہ بلوچ و پشتون راج آک بلکن تیوہ ڈیہہ نا مظلوم راج آک گندہ انگا ریاستی زوراکی، سیاسی راہشون آتا زوراکی ئٹ دزگیری، عدالت آن چپ خون و پنی آ آپریشن آتا سوب برجاء فوجی زوراکی تون مون تریسہ ءُ۔ لس آبادی تیا مارٹر گولہ خلنگ و ڈرون جلہو ہڑدے نا کاروائی جوڑ مسونے، ہرا بندغی حق آتا پاش لتاڑنگ ءِ۔

بیان ئٹ پاننگانے کہ نن دا سرپند مرینہ کہ ریاستی زوراکی نا برخلاف تیوہ مظلوم راج آک اسٹ مریسہ جہد کیر۔ اندا اواری نا مزاحمت و لس طاغت آک دا ظالمانہ بست و بند ءِ شکست تننگ کیک۔

بلوچ یکجہتی کمیٹی نا پارہ غان بلوچستان ئٹ زوراکی نا بیگواہی، دروغ نا مونتس، پارٹی راہشون و باسک آتا دزگیری و ریاستی تادی تا برخلاف برانزی تحریک نا لڑ برجاء ءِ۔

تنظیم نا پڑو آن پد اینو خاران و حب چوکی نا دریابی علاقہ گڈانی ٹی بھلو کچ اسیٹ برانزیک کسر تیا پیشتمار و ایمنی ئٹ برانز ریکارڈ کریر۔

بی وائی سی نا پڑو نا ردئٹ دا برانز آک بلوچستان ئٹ زوراکی نا بیگواہی، دروغ نا مونتس و بلوچ سیاسی جہدکار آتا دزگیری تون اوار بندغی حق آتا لتاڑنگ نا برخلاف اسہ ردعمل ئسے نا دروشم ئٹ مریسہ ءُ۔

پڑو ئٹ پاننگانے کہ ماہ رنگ بلوچ، بیبو بلوچ، گلزادی، بیبرگ و شاہ جی صبغت اللہ نا دزگیری آن پد عدالتی انصاف ئٹ اُرے کننگ و حکومتی بے حسی مخلوق نا سوختئی ٹی پین ودکی کرینے۔

خاران ئٹ اینو نا برانز مُچی نواب اکبر بگٹی اسٹیڈیم آن کشنگا ہرا شار نا جتا کسر تیان گدارینگسہ ایسر مس، برانز ئٹ زالبول، چنا و پیر انگا تیتون اوار شاریک بھلو کچ اسیٹ اوار مسر ہرافک دو تیٹ پلے کارڈ و بینر ارفیسر ہرافتیا زوراکی نا بیگواہی تا ایسری و بیگواہ بندغ تا آجوئی نا خواست آک نوشتہ ئسر۔

اندا وڑ بی وائی سی لسبیلہ ریجن نا ردئٹ حب چوکی نا دریابی ہند گڈانی ٹی اسہ پرامن برانز مُچی اس کننگا ہراڑے ہندی بندغ آک تران کریسہ بی وائی سی نا باسک آک ریاستی تادی نا مذمت ءِ کریر و مخلوق ءِ توار بڑز کننگ نا پاریر۔

تنظیم نا ردئٹ دا برانز آک بی وائی سی نا ہمو شابیت آ برانزی مہم نا بشخ ءُ ہرانا مسخت بلوچستان ئٹ برجاء ریاستی ظلم آتیتون اوار زوراکی نا بیگواہی و بیدس عدالت گام تا برخلاف السی شعور پاش کننگ ءِ، داکان مالو مستونگ، پنجگور، تربت و حب چوکی ئٹ اندا وڑ نا برانز مُچی مسنے۔

دا وخت آ بی وائی سی درشان کرینے کہ اونا پرامن برانزی تحریک ہموتم اسکان برجاء مرو ہراتم اسکان زوراکی ئٹ بیگواہ بندغ آک یلہ کننگتنو، دزگیر آ راہشون تے انصاف تننگتنے و بلوچستان ئٹ ریاستی ادارہ تا زیاتی تا ایسر متنے۔

بلوچستان نا ضلع مستونگ ئٹ پاکستانی لشکر و محکمہ انسداد دہشتگری (سی ٹی ڈی) پنی آ وکیل ایڈووکیٹ چیف عطاء اللہ بلوچ نا اُراغا چھاپہ خلیسہ اودے دزگیر کرے۔

حوالکار آتا رد ئٹ کاروائی استو نن ئٹ مستونگ نا علاقہ کلی شادی خان ئٹ کننگا، ہراڑے سی ٹی ڈی و فورسز نا کارندہ غاک نن ئنا 1 بجہ غان 3 بجہ اسکان اُرا گھیڑ ئٹ ہلکسر۔ دا نیام ئٹ اُرا نا کل بندغ آتیا بیدادی کننگا و ایڈووکیٹ چیف عطاء اللہ بلوچ ءِ تینتو دریر۔

تدینی آن پد بار ایسوسی ایشن مستونگ اسہ ہلہلہی مجلس ئسے نا خواست کننگانے ہراٹی مستی نا لائحہ عمل آ پام تننگو ۔

بار ایسوسی ایشن بلوچستان بار کونسل و ایلو بار باڈیز آن خواست کرینے کہ ایڈووکیٹ عطاء اللہ بلوچ نا دمدستی یلہ کننگ کن موثر ءُ گام ارفنگے۔

بار سروک آتا پاننگ ءِ کہ وکیل برادری نا برخلاف دنو گام نئے بیرہ قانود نا برخلافی ءِ بلکن دا داڑان عدالتی بست و بند و بندغی حق آتا پامالی نا خلیس ءِ۔

سلہہ بند بندغ آک لیویز چیک پوسٹ ءِ نال ئنا ہند آ ٹک کریر ۔

شابیتی احوال آتا ردئٹ بلوچستان نا ضلع خضدار نا تحصیل نال ٹی سی پیک کسر آ مروک صمند لیویز چیک پوسٹ ءِ نادرست سلہہ بند بندغ آک جلہو کریسہ ہموڑے ساڑی کارندہ آتے کسفیر۔

خضدار بست و بند نا ردئٹ جلہو ٹی چھار کارندہ بیران مسونو ہرافتیٹ مقبول ، خدابخش ، اعجاز احمد ، محمد علی پنی کارندہ آک اوار ءُ ۔

پولیس ہند آ ہنیسہ کارندہ آتا جون آتے اسپتال آ درینے، واہم تدینی نا بابت ئٹ گیشتر شابیتی احوال فراوان کننگتنے ۔

تحریک طالبان پاکستان جلہو نا زمہ واری ءِ ارفینے ۔

سلہہ بند بندغ آک لیویز کارندہ آتے بندی کننگ آن گڈ سرکاری سلہ غاتے دوئی کریر۔

سلہہ بند بندغ آک بلوچستان نا ضلع خضدار نا تحصیل نال ئٹ ہڑنبو مش ئنا ٹل آ جوڑوک لیویز فورس نا چیک پوسٹ آ جلہو کریسہ لیویز کارندہ آتے بندی کننگ آن گڈ اوڑے ساڑی سرکاری سِلہ تے دوئی کریر۔

سلہہ بند بندغ آک بندی کروک پولیس والا تے ولدا یلہ کرے۔

ساڑی آ دے تیٹ بلوچستان نا جتا انگا علاقہ آتیٹ پولیس، ایف سی، لیویز تون اوار ایلو فورسز کارندہ آتا جلہو و اوفتا سِلہ تے کوزہ کننگ نا کیہی تدینیک مون آ بسنو ہراڑے دا حالیت آتا ڈائریکٹر جنرل بلوچستان لیویز فورس نا کارندہ آتے پنت تسوسس کہ او چوکی تیا جلہو کروک و سِلہ تے کوزہ کروک سلہہ بند تنظیم آتون مون ایتر، ایلو دروشم تیٹ ہرا کارندہ غاک سلہہ بند بندغ آتے تینا سِلا تے تسور اوفتے نوکری آن کشنگو۔

دا وخت اسکان بلوچستان نا جتا انگا علاقہ آتیٹ کیہی لیویز کارندہ دا وڑ ئنا تدینی تا سوب تینا نوکری تیان کشنگانو۔

بلوچستان نا جتا انگا علاقہ آتیٹ لیویز چوکی تیا چھاپہ و سرکاری گڑاتا کوزہ مننگ نا تدینیک زیات مریسہ ءُ داڑان مالو بلوچستان نا کیہی علاقہ آتیٹ لیویز تھانہ آتیا کوزہ کننگ آن گڈ کوالخواک کیہی کارندہ آتے نوکری آن کشاسر۔

دا تدینی تا ذمہ واری ءِ زیات بلوچ آجوئی دوست سلہہ بند تنظیم آک ارفیسہ کرینو واہم دا تنظیم آتا پاننگ ءِ کہ اوفک لیویز کارندہ آتے بلوچ مننگ نا سوب ہچو نسخان اس تفسہ۔

بلوچستان نا دارالحکومت کوئٹہ ئٹ چار شمبے نا دے سریاب روڈ آ منیر مینگل روڈ آن خڑک اسہ ترند تراک و سم کاری نا تدینی مون آ بس، ہراٹی بنائی احوال آتا رد ئٹ اسہ بندغ اس بیران و دہ بندغ ٹپی مسنو۔

تراک ہمو وخت مس سریاب آن صوبائی اسمبلی نا باسک (ایم پی اے) علی مدد جتک نا قیادت ئٹی “جشنِ فتح ریلی” کشیسہ ئس۔

پولیس کالخواہ تا رد ئٹ نادرست بندغ آک منیر مینگل روڈ آ برانز نا خڑک چغلی بمب خسار و سم کاری مس۔ جلہو آن دمدستی گڈ فورسز علاقہ ءِ تینا پلویڑ ئٹ ہلک، اندن ٹپی تے دمدستی وڑ ئٹ سول اسپتال کوئٹہ سر کننگا۔

سول اسپتال کوئٹہ نا شعبہ تدینی و ٹراما سینٹر ئٹ ٹپی تے بنائی جان جوڑی کمک کننگا۔ اندا وخت اسہ ٹپی بندغ اس علاج نا وخت آ کسک۔

ڈاکٹر وسیم بیگ، میڈیا آرڈینیٹر محکمہ صحت بلوچستان نا پارہ غان رسینگوک احوال آتا رد ئٹ ٹپی مروک آتیٹی قربان علی ولد رحیم علی، عبد الرزاق ولد خداے بخش، محمد عاصم ولد محمد اسماعیل، محمد عمر ولد داد محمد، عبدالمنان ولد عبدالغفار، سید نقیب اللہ ولد سید عبدالمنان، عمران ولد سکندر، محمد ساجد ولد نعمت، مہر اللّٰہ و اسہ نادرست بندغ اس اوار ءُ۔ اندن علاج نا وخت محبوب علی ولد اکرم کسک۔

جلہو نا ذمہ واری ءِ دائسکان کس اس ارفتنے۔