بلوچ یکجہتی کمیٹی نا پارہ غان بلوچستان ئٹ زوراکی نا بیگواہی، دروغ نا مونتس، پارٹی راہشون و باسک آتا دزگیری و ریاستی تادی تا برخلاف برانزی تحریک نا لڑ برجاء ءِ۔
تنظیم نا پڑو آن پد اینو خاران و حب چوکی نا دریابی علاقہ گڈانی ٹی بھلو کچ اسیٹ برانزیک کسر تیا پیشتمار و ایمنی ئٹ برانز ریکارڈ کریر۔
بی وائی سی نا پڑو نا ردئٹ دا برانز آک بلوچستان ئٹ زوراکی نا بیگواہی، دروغ نا مونتس و بلوچ سیاسی جہدکار آتا دزگیری تون اوار بندغی حق آتا لتاڑنگ نا برخلاف اسہ ردعمل ئسے نا دروشم ئٹ مریسہ ءُ۔
پڑو ئٹ پاننگانے کہ ماہ رنگ بلوچ، بیبو بلوچ، گلزادی، بیبرگ و شاہ جی صبغت اللہ نا دزگیری آن پد عدالتی انصاف ئٹ اُرے کننگ و حکومتی بے حسی مخلوق نا سوختئی ٹی پین ودکی کرینے۔
خاران ئٹ اینو نا برانز مُچی نواب اکبر بگٹی اسٹیڈیم آن کشنگا ہرا شار نا جتا کسر تیان گدارینگسہ ایسر مس، برانز ئٹ زالبول، چنا و پیر انگا تیتون اوار شاریک بھلو کچ اسیٹ اوار مسر ہرافک دو تیٹ پلے کارڈ و بینر ارفیسر ہرافتیا زوراکی نا بیگواہی تا ایسری و بیگواہ بندغ تا آجوئی نا خواست آک نوشتہ ئسر۔
اندا وڑ بی وائی سی لسبیلہ ریجن نا ردئٹ حب چوکی نا دریابی ہند گڈانی ٹی اسہ پرامن برانز مُچی اس کننگا ہراڑے ہندی بندغ آک تران کریسہ بی وائی سی نا باسک آک ریاستی تادی نا مذمت ءِ کریر و مخلوق ءِ توار بڑز کننگ نا پاریر۔
تنظیم نا ردئٹ دا برانز آک بی وائی سی نا ہمو شابیت آ برانزی مہم نا بشخ ءُ ہرانا مسخت بلوچستان ئٹ برجاء ریاستی ظلم آتیتون اوار زوراکی نا بیگواہی و بیدس عدالت گام تا برخلاف السی شعور پاش کننگ ءِ، داکان مالو مستونگ، پنجگور، تربت و حب چوکی ئٹ اندا وڑ نا برانز مُچی مسنے۔
دا وخت آ بی وائی سی درشان کرینے کہ اونا پرامن برانزی تحریک ہموتم اسکان برجاء مرو ہراتم اسکان زوراکی ئٹ بیگواہ بندغ آک یلہ کننگتنو، دزگیر آ راہشون تے انصاف تننگتنے و بلوچستان ئٹ ریاستی ادارہ تا زیاتی تا ایسر متنے۔