حوال تا رد ئٹ بھارت ٹی زمیندار آک ملک ئٹی پٹرول و ڈیزل نا ودوکا نرخ آتا بر خلاف برانزی ریلی کشانو، مودی حکومت نا بر خلاف بھاز نعری کننگا۔

بزغر آک بھارتی پنجاب نا شار سمرالا ٹی ٹریکٹر ریلی کشانو، زمیندار  سیوت نا لیڈر بلبیر سنگھ ریلی نا  راہشونی ءِ کریسہ پارے کہ مودی سرکار قانود ءِ واپس ہلے و ڈیزل و پٹرول نا نرخ آتے دمدستی وڑ ئٹ کم کیر ناکہ ملک ئٹ خوراک نا کم بوتی ودی مرو، ریلی ٹی اوار بندغ آک  زمیندار بزغر سیوت زندہ باد نا نعرہ ہم خلکنو۔

یاتی مرے کہ مودی حکومت نا کنے قانود نا اصلاحات نا بر خلاف زمیندار تیوہ آ بھارت ءِ بند کروک تخا، بھارتی وزیراعظم تیوہ آ  بد آ چمبازی تیا بیدس زمیندار تحریک ءِ چپ کرفنگ کہ بلکن پولیس نا وڑ ئٹ ظلم آتا سوب رائے عامہ حکومت نا خلاف مسر، اندن سوداگر آتون اوار ایلو چاگردی تپہ زمیندار تحریک تون اوار مننگ نا پڑو کرینے۔

جمعہ نا دے خضدار انجینئرنگ اینڈ ٹیکنالوجی یونیورسٹی ٹی شون ادبی دیوان خضدار ہنکین نا پارہ غان اسے شاعری مجلس اس اڈ تننگا۔

مجلس نا بناء کلام پاک نا تلاوت آن مس ہرانا شرف ءِ شون ادبی دیوان نا ورنا غا شاعر عبدالرحمان آزل دوئی کرے۔

مجلس نا کماشی ءِ شاعر انور بلسم کرے، او اندن دا مجلس ئٹ مہمان خاص پیشن آن بروکا پروفیسر سراج ساگر و اعزازی مہمان تیٹی طیب جان سرپرہ، ایاز جان و عبدالسلام ناز اسک ئسر۔

دا مجلس ئٹ پر فکر آ ورناغا شاعراک ساڑی ئسر اوکان گُڈ شون ادبی دیوان نا سنگت آک تینا شئر و شاعری تے بنفیر ہرافتا پنک ارسلان بلوچ، وحید انجم، عبدالحکیم بلوچ ْعبدالحلیم، مرزا بلوچ، سمیع بلوچ، محمد جان درویش، عقیل بلوچ،
حفظ الرحمٰن بلوچ، عبدا الرحمن ازل، شیخ سراج، انور بلسم۔

مجلس نا گُڈ سر ئٹ دیوان نا مہمانک تینا خیالاتا درشانی ءِ کرسہ پاریر کہ خضدار نا پِڑ آ شون ادبی دیوان نا خذمت آک کل ئنا مونا پاش ءُ کہ ورنا غا خوانندہ غاک تینا لُمئی دُوی تیکن اخس خذمت کننگ ءُ او بلوچی مرے یا براہوئی او بیرہ مشاعرہ آخہ بلکن نثر نا زی آ کاریم کیر تاکہ بروکا زنک ءِاسہ پُختہ ءُ ٹھیکی اس دو برے۔

گُڈ سر ٹی شون ادبی دیوان نا جنرل سیکریٹری شیخ سراج غُٹ شاعر و ادب دوست و مہمان تا منتواری ء اردسہ مجلس ءِ ایسر کرے۔

چار غم دا وار الکُٹ
آن تینکہ یار الکُٹ

ای کفن سودا کریٹا
پُچ چٹ بے کار الکُٹ

الکُنٹ سنگت منٹ یار
بے ضمیر او مار الکُٹ

غیر کپک سنگتی اچ
مُفتٹی ای زار الکُٹ

خلق ء تینا داسہ الاٹ
پین جوانو شار الکُٹ

ای گنوک آتا دیارٹ
ہائے ہائے سار الکُٹ

بن کنے خف تو اے سنگت
باغی او کڑدار الکُٹ

خوش مزاج او شاعری کن
شاعر ءِ (ایثار) الکُٹ

روشنی کن یار ذیدی
طوبے او استار الکُٹ

ذید ذیدی

زمانہ طالب علم آن کاریم کروک آ راج دوست راہشون و پشتونخوا ملی عوامی پارٹی نا خاص انگا راہشون  عثمان خان کاکڑ اسہ ویل اسٹ ٹپی مننگ نا سوب آن منہ دے کوئٹہ و اوکان گڈ کراچی نا ہسپتال ٹی دوا درمان مننگ آن گڈ کذیت کرے۔

 اونا کذیت کننگ نا پک مننگ ءِ پشتونخوا ملی عوامی پارٹی نا راہشون رضا محمد رضا و یوسف کاکڑ چار شمبے نا دے کراچی ٹی باسک آتون ہیت کریسہ کریر۔

عثمان کاکڑ 17 جون آ تینا اُرا ٹی تمیسہ ٹپی مسوسس و اونا کاٹم ٹپ مسوسس، ہراڑان گڈ اودے کوئٹہ نا اسہ نجی ہسپتال ئسے آ سرکننگا، ہراڑے  اونا کاٹم نا آپریشن ہم مس، اوکان گڈ او 19 جون آ کوئٹہ آن کراچی نا آغا خان ہسپتال سر کننگاسس، ہراڑے او مسہ دے اسکا  زند و مرک ئنا نیامٹی مننگ آن گڈ اینو کذیت کرے۔

پشتونخواملی عوامی پارٹی نا راہشون رضا محمد رضا  و رحیم زیارتوال کارکن آتون راجی حوالکاری میڈیا آ تالان اسہ ویڈیو اسیٹ دا ہیت ئنا درشانی ءِ کریر کہ اوڑا جہلو مسونے ہرانا او سر و سوج کرور ۔

یاتی مرے کہ عثمان کاکڑ  سینیٹ ئٹی تینا ایسری ہیت ءِ کریسہ پاریس’منے و کنا اُرا والا تے تڑی رسینگ ءِ۔’

حوال تا رد ئٹ ایران نا سرکاری ٹی وی پارینے کہ ملک نا اسٹ آ جوہری توانائی ہند ساڑی وخت اکن بند مرو، دن اولیکو وار مسونے کہ ایران جہندمی ساحلی شار ئٹی ساڑی  جوہری پلانٹ نا ہلہلئی وڑ ئٹ بند مننگ نا حوال تسونے۔

دا پلانٹ سن 2011 ٹی روس نا کمک آن ملینگاسس، ایران نا سرکاری ٹی وی رپورٹ پارینے کہ ملک نا اسٹ آ نیوکلیئر پاور پلانٹ ہلہلئی وڑ ئٹ  بند کننگانے۔

حوال تروک ادارہ ‘ایسوسی ایٹڈ پریس’ نا رپورٹ نا رد ئٹ  سرکاری الیکٹرک کمپنی توانیر نا اسہ عہدیدار غلام علی رخشانی مہر  یک شمبہ آ  شینک مروکا اسہ پروگرام اسیٹ پارے کہ بوشہر پلانٹ نا بند مننگ نا بناء ہفتہ آ مسوسس، ہرا پین مسہ  چار دے اسکا  بند مننگ کیک۔

او پارے دا بند مننگ آ وضاحت تننگ آن بغیر پارے کہ دانا سوب آن بجلی نا تننگ پد تمنگ کیک۔

داڑان مست توانیر اسہ بیان اسٹ پاریسس کہ بوشہر نیوکلیئر پاور پلانٹ نا واپسی نا کاریم برجاہ ء ِ۔

بلوچستان نا ضلع نوشکی ٹی گلنگور چیک پوسٹ آ لیویز 56 پاکستانی ہندی مخلوق ءِ دزگیر کرے، ہرا غیر قانودی وڑ ئٹ یورپ ہننگ خوارہ۔

اینو گلنگور چیک پوسٹ آ لیویز کاروائی کرے ہراٹی ٹرک ءت سفر کروکا 56 پاکستانی دزگیر کننگار ہرافتیٹ اسہ زالبول اس  ہم اوار ءِ۔

دا شاریک غیر قانودی کسر تیان ایران و اوکان گڈ یورپ آ ہننگ خوارہ۔ بند و بستئ کوالخوا تا رد ئٹ دزگیر مروکا بندغ آتا بھازی صوبہ پنجاب آن تعلقدار ءِ۔

بلوچستان نا ضلع مستونگ نا علسقہ پڑنگ آباد ٹی دشت بابا اسکول ئٹ ڈیوٹی آن واپس بننگ نا وختا زالبول استاد آتا اسکول وین آ نادرست بندغ آتا سلاء بند جلہو ٹی چار استاد ٹپی مسونو ہرافک دوا درماں کن غوث بخش رئیسانی میموریل ہسپتال دننگار۔

دا جلہو ئٹ شائستہ، محمد اعظم بنگش نا زائیفہ ہند سریاب روڈ کلی تیر شال، شاہدہ بنت عبدالنبی رئیسانی ہند کلی تیری شال، سعدیہ، علی اکبر بنگلزئی نا زائیفہ ہند کسٹم غنجہ ڈھوری سریاب روڈ شال و شکیلہ، شاہ محمد ترین نا زائیفہ ہند کلی تیری سادات شال ٹپی ءُ۔

کیچ ٹی کورونا وائرس نا تالان مننگ نا کچ ئت ترندی ٹی ودکی، تدوکا اسہ ہفتہ نا نیام ئٹ کورونا نا تالان مننگ نا کچ 51 رکارڈ کننگا۔

بلوچستان نا ضلع کیچ ئٹ تدوکا اسہ ہفتہ نا نیام ئٹ جہانی دین کورونا وائرس نا کیس آتیٹ پد مہ پد رپورٹ  آک مننگ ءُ۔ تدوکا دے ضلع ٹی کورونا نا 37 ٹیسٹ مسر، 21 بندغ ٹی کورونا وائرس پک کننگا۔

اندن تدوکا اسہ ہفتہ نا نیام ئٹ کیچ ٹی کورونا نا 133 ٹیسٹ مسر اوفتیان 68 بندغ ٹی وائرس نا پک کننگا و کیس تا کچ ئٹ 51 فیصد رکارڈ کننگا۔

کورونا آپریشن سیل محکمہ جانجوڑی بلوچستان نا شینک مروکا رپورٹ نا رد ئٹ بلوچستان ئٹ کوئٹہ آن گڈ کورونا نا کل آتیان زیات کیس آک کیچ آن رپورٹ کننگانو، داسکان کورونا نا 6 ہزار 209 ٹیسٹ مسونو، 1222 بندغ ٹی وائرس نا پک مسونے و جمعی وڑ ئٹ مثبت کیس آتا کچ 20 فیصد ءِ۔