بلوچستان نا علاقہ  قلات نا شار و ایب کیب ئٹ سائبیرین تہو تا کوزہ، سائبیریا آن بروکا یخ و یخ تفوک تہو تا سوب آن  باسنی نا کچ تفنگ نا ٹِک تمانے،محکمہ مد قلات شار و ایب کیب ئٹ کم آن کم باسنی نا کچ – 4 ڈگری سینٹی گریڈ ریکارڈ کرینے، ترند یخ ئٹی بجلی نا مرغن لوڈشیڈنگ و سوئی گیس نا بند مننگ آن قلات شاریک یخ ئٹ لڑزینگ ٹی بیوس مسونو شار ئٹی ہشنگ نا پاٹ ودی مفرنگ آن شاریک ترند یخ آن بچنگ کن براہوئی گری دارو استعمال کننگ آ بیوس مسونو۔

یخ آن کاروباری زند زیمی مسونے، بازار و مارکیٹ آک سہب ئنا ارے آ ملنگ و ارے آ بند مننگ ءِ پورو بند و بجلی نا مرغن گھنٹہ آتے اسکان لوڈ شیڈنگ آن شاری تا سختیک زیات مننگ ءِ۔

اندن شار ٹی آسراتی مفرینگ نا سوب آن بھلو کچ ئسے اٹ مخلوق قلات آن باسن علاقہ آتا پارہ آ ہننگ ءِ، شار ویران مننگ ءِ، شاری تا پاننگ ءِ کہ قلات ٹی نہ سوئی گیس رسینگیک نہ بجلی تننگ ءُ و نہ ہشنگ کن پاٹ رسینگیک اندا سوب آن قلات نا شاریک تینا کاروبار و ارا تے ہلیسہ کراچی حب خضدار و اندرونی سند آ کارہ۔

پاکستان فوج نا شعبہ تعلقات عامہ (آئی ایس پی آر ) پنجگور ئٹ پاکستانی فورسز تیا جلہو ئٹ اسہ کارندہ ئسینا بیران مننگ نا پک ءِ کرینے۔

آئی ایس پی آر نا بیان نا رد ئٹ فورسز تیا جلہو ئٹ ڈیرہ اسماعیل خان آن تعلقداری تخوکا سپاہی خلیل احمد خان بیران مسونے۔

یاتی مرے تدوکا دے بلوچستان نا ضلع کیچ و پنجگور نا نیام تاہی علاقہ زامران گیشتگان و زیارت نا نیام تاہی علاقہ ئٹ سلاء بند بندغ آک پاکستانی فورسز تا قافلہ آ جلہو کریسر۔

جلہو ئٹ فورسز تے جانی نسخان تون مون تروئی تمانے۔ علاقائی حوال تا رد ئٹ جلہو آن گڈ فورسز تا بھلو کچ اسیٹی گاڑیک جاگہ غا سر مسونو۔

داسکان جلہو نا ذمہ واری ء کس ئس قبول کتنے۔

بلوچستان نا ضلع ہرنائی آن تعلقداری تخوکا ورناک ‘ہرنائی بچاو تحریک’ نا پارہ غان خواست آتا حق ئٹ کوئٹہ ہرنائی بھلا کسر آ برانز بناء کریر۔

‘ہرنائی بچاو تحریک’ نا پارہ غان خواست آتا حق ئٹ ہرنائی کوئٹہ سڑک آ برانز برجاء ءِ۔ تحریک نا باسک آک ہرنائی کوئٹہ کسر آ ٹیر ہشیسہ ہر وڑ نا اِن و بر کن بند کریر۔

‘ہرنائی بچاو تحریک’ نا پارہ غان تیوہ ضلع ٹی دیر، بجلی و ایلو بنماسی آسراتی تننگ تون اوار ایلو خواست آتا مننگ کن خواست کننگ ءُ۔

برانز کروک آک داڑن مست بلوچستان اسمبلی نا مونا تینا چنا تون اوار کفن بینوکو برانز ئس ھم کریسر۔

بلوچستان نا ضلع ہرنائی ٹی سلاء بند بندغ آتا جلہو آن کولا کانڑ ئٹ کاریم کروکا مسہ مزور بیران مسر۔

سم کاری نا ویل ہرنائی نا علاقہ شاہرگ ٹی مونا بس ہراڑے جلہو کروک آک زالاوان نا ہند آ امان اللہ ترین کولا کانڑ نا مزور تے ٹک کریر۔

لیویز حوال تا رد ئٹ سم کاری نا ویل ئٹ کولا کانڑ ئٹی کاریم کروکا مسہ کانکن ہمو جاگہ غا بیران مسونو، ویل آن گڈ فورسز آک علاقہ ءِ گھیرا ٹی ہلنگ آن گڈ ڈوہدار تا پٹنگ ءِ بناء کرینو۔

لیویز حوال تا رد ئٹ مزور آتا چاہنداری داسکان متنے، جون آک ہسپتال آ دننگانو۔

بلوچی میوزک پروموٹر سوسائٹی نا پارہ غان بلوچستان اکیڈمی نا اواری ٹی ناکو سبزل سامگی نا اولیکو سال دے آ اسے مجلس ئس اڈ تننگا۔

مجلس نا اسٹیج نا ذمہ واری تے پنی آ شاعر اسحاق خاموش دوئی کرے۔
مجلس نا اولیکو بشخ ٹی بلوچی میوزک پروموٹر سوسائٹی نا کماش داؤد کلمتی، جنرل سیکرٹری گلزار گچکی، پنی آ بلوچ پٹ و پولکار فقیر شاد، بلوچستان اکیڈمی نا چیئرمین عبید شاد، قلمکار شگراللہ یوسف، پروفیسر بلوچ خان، قدیر لقمان، اسحاق خاموش ناکو سبزل نا ازم و اونا شخصیت نا ردئٹ تینا خیال آتا درشانی کریر۔

تینا خیال آتا درشانی کریسہ اوفک پاریر ناکو سبزل سامگی اسے عظیم ءُ فنکار ئس اس، اونا بھلنی نا شاہدی ءِ بلوچ سر زمین نا ہر بندغ ایتک، اونا توار بلوچ سرزمین و بلوچ نا نمائندہ ءِ۔

مونی پاریر کہ سبزل سامگی ءِ چنکی آن شئر پاننگ نا شوق اس، او دا فن ءِ کس آن ہیل کتو بلکن اسے خدا نا تروکا لائخی ئس اس۔ سبزل سامگی تینا فن ءِ یورپ تون اوار کہی عرب ملک آتیٹی نشان تس، بلوچ قوم اینو ام اندا بھلا فنکار آتا سوب آن جہان ٹی چائنگک۔ ہر دور تینا بھلا فنکار آتا سوب آن چائنگ مریک اندن مکران نا رسم و رواج، دود و ربیدہ ام ناکو سبزل سامگی نا فن ٹی نظر بریک۔

او مونی پاریر کہ ناکو سبزل سامگی ہچو استاد، اکیڈمی یا کلب سے آن میوزک ہیل کتو بلکن چنکی آن کُر خوائفنگ تون اوار اوار او شئر و زہیرونک پارسہ کریکہ اندن کیچ ٹی اسے مجلس اسیٹی او تینا فن ءِ نشان تس گڑا نواب مکران اوڑان متاثر مریسہ اودے داد تس، ہرا وخت آ او تینا فن نا درشانی کریکہ تو مردہ غا است آک ام زندہ مسورہ۔

مجلس ٹی اردو بولی نا پنی آ شاعر وحید نور، صحافی اکرم بلوچ، مستکوئی آ ڈائریکٹر ادارہ ثقافت عبداللہ بلوچ، پنی آ بندغ آک رؤف رؤفی، بلوچی میوزک پروموٹر سوسائٹی نا نائب صدر بجار بلوچ، شمس الحق کلمتی، عارف حکیم، ظاھر حسین، ظفر اکبر، اشرف محمود، ڈاکٹر غفور شاد، معروف صحافی بھرام بلوچ، نور محسن، اللہ بخش دشتی، تربت سول سوسائٹی نا کنوینر گلزار دوست، جمیل عمر،چیرمین نادر قدوس، نیشنل پارٹی نا ضلعی صدر مشکور انور ایڈوکیٹ، بی ایس او پجار نا بنجائی وائس چیئرمین بوھیر صالح، نیشنل پارٹی نا بنجائی کمیٹی نا باسک محمد جان دشتی، پروفیسر شمبے کریم، سر زاھر بلوچ، خلیل تگرانی، استاد صابر چاہسری، تربت پریس کلب نا کماش طارق مسعود، سیکرٹری مالیات مقبول ناصر، اسد بلوچ، بی این پی عوامی نا رہنما ظریف زدگ،شے مرید بلوچ، زاھد سلیمان، کندیل بلوچ، ہوتی خان، بلوچستان اکیڈمی نا پریس سیکرٹری عابد علیم تون اوار پین کہی پنی آ بندغ دا پروگرام ٹی بشخ ہلکر۔

مجلس نا گڈ سر ٹی بلوچی بولی نا پنی گلوکار استاد عارف جان بلوچ، استاد شوکت مراد، شاہ جان داؤدی، صابر چاہ سری، روشن مراد و آسمی بلوچ تینا فن نا درشانی کریر۔

عطاء شاد ڈگری کالج تربت لٹریری سوسائٹی نا پارہ غان “عطا شاد نا زند و ازم “ نا ردئٹ اسے پروگرام اس عطا شاد ڈگری کالج تربت ٹی اڈ تننگا۔

بلوچی بولی نا پنی آ شاعر و بلوچی نا استاد اللہ بخش اسٹیج نا ذمہ واری تے دوئی کرے۔ کالج نا استاد و خوانندہ غاک بھوگ شوگی شاعری ام کریر۔ اندن اسے ٹیبلو اسیٹی صوفیانہ کلام و بھوگ شوگی نا خاکہ اس ام نشان تسر۔ مجلس ٹی کالج پرنسپل، استاد و خوانندہ غاک عطا شاد نا شاعری و اونا راجی خذمت آتیا ہیت کریر۔

عطاء شاد نا زی آ مکالمہ خوانوک آک عبید اللہ جوسکی، سالم رحیم، گلاب احمد، شعیب شاداب، بلوچ خان، امیر بخش کریم و رفیق عاجز اوار ئسر۔

او عطا شاد نا زند و ازم نا بارہ ٹی تینا خیال آتا درشانی کریسہ پاریر کہ عطا شاد اردو و بلوچی بولی نا اسے بھاز بھلو شاعر اس گدرینگانے۔ بلوچی بولی نا دا زیبا انگا لب و لہجہ نا شاعر تینا تخلیق ٹی کمال نا شاعر اس مسونے ہرانا شاعری اسے جاگہ اسے سرحال ٹی پورو بفک بلکن داٹی بھاز شابیتی ارے ۔

مونی پاریر کہ عطا شاد تینا شاعری ٹی مہر و مابت و انقلاب ءِ اسے جاہ کرینے۔

کالج لٹریری سوسائٹی نا چیئرمین پروفیسر ندیم اکرم تینا خیال آتا درشانی کریسہ پارے کہ ہرا وخت آ کالج نا لٹریری سوسائٹی نا چئیرمین کن کنے گچین کریر تو ای دادے تینکن اسے بختاوری اس پوہ مسوٹ کہ کنے اسے ادبی ءُ تنظیم اسینا کماش کچین کننگانے۔ اوڑان پد ای انداخس پین خواری کریٹ، ای ءُ کنا ٹیم اسے جاہ مریسہ فورم نا ادبی کاریم تے مونی دننگ نا کوشست کرین۔ اینو نن داوڑ نا مجلس اس اڈ تسون اندن کوشست مروئے کہ مونی اندن مجلس اڈ ایتن۔

پرنسپل عطا شاد ڈگری کالج تربت تینا ہیت و گپ آتیٹی کالج نا لٹریری سوسائٹی نا جوزہ و اونا کاریم آتے شاباشی تریسہ پارے کہ اندننگا کاریم آتیان بروکا زنک ٹی ادبی ذوق ودی مریک۔ دا خَلی آ سر زمین نا مش تیٹی بھاز گڑاک ڈھکوک ءُ اگہ مچے پین خواری کننگے دا گڑاک خیسن امبار صاف مریسہ گروشک ایترہ۔

او مونی پارے کہ ننا گواچنی ویل وسائل اف بلکن جواننگا سوچ و اسٹ ایلو تون کمک نا کمبوتی ءِ۔ اگہ دا کالج نا مونی دننگ کن حکومتی ادارہ غاک کالج کوالخوا تون کمک کیر تو دا کالج اسے پنی ءُ ادارہ اس جوڑ مریک۔

مجلس نا گڈ سر اٹ کالج پرنسپل نا پارہ غان پروگرام ٹی بشخ ہلوکا خوانندہ غاتے داد تننگا و مقالمہ خوانوک آتے بلوچ چادر ٹیکی کننگا۔