مستونگ ئٹ گیس پریشر نا کمبوتی نا بر خلاف ہندی آ بندغ آک کوئٹہ کراچی نا کسر، جنگل کراس نا ہند آ برانز کریسہ بند کریر۔

برانز کروک آتا پاننگ ءِ کہ گیس پریشر ئٹ اگہ کمبوتیک مُر متور گڑا سوئی سدرن گیس نا دفتر ءِ گھیرا کرون۔

برانز ئٹ زالبول و چنا تا بھلو کچ اس اوار مسر، داسکان مستونگ آن تعلق تخوکا نمائندہ غاک گیس پریشر ئٹ کمبوتی نا بر خلاف مروکا برانز ئٹ مالو ہم خننگتور و نئے برانز ئٹ اوار مسر۔

برانز نا سوب آن کسر آ چنکا بھلا گاڑی تا قطار آک لگار و مسافر آتے سختی تون مون تروئی تما۔ بھاز یخ ئٹی گیس پریشر ئٹ کمبوتی نا برخلاف خلق ئنا ہندیک کسر آ برانز کریسہ ٹریفک ءِ بند کریر۔

برانز کروک آتا پاننگ ءِ کہ ساڑی آ حکومت مخلوق ءِ آسراتی تننگ ئٹ بے سہب مسونے، گیس کوالخواہ تا دعوی تیان چھپ یخ ئنا ودکی تون اوار گیس پریشر کم مسونے و شاری تے سختی تون مون تروئی تمانے۔

حوال تا رد ئٹ کورونا وائرس آن 19 بندغ مرگ نا گواچی مسونو، ہراڑان گڈ کہوک آتا کچ 28 ہزار 496 مسونے، پاکستان ٹی کورونا نا پک مروکا کیس آتا کچ 12 لکھ 75 ہزار 158 مسونے۔

نیشنل کمانڈ اینڈ آپریشن سینٹر نا پوسکنا حساب نا رد ئٹ تدوکا دے بیست و چار گھنٹہ نا نیام ئٹی 580 پوسکنو کیس رپورٹ مسونو، پنجاب ٹی 4 لکھ 40 ہزار 678، سندھ ئٹی 4 لکھ 70 ہزار 978، خیبر پختونخوا ٹی اسہ لکھ 78 ہزار 319، کیسز رپورٹ مسونو۔

اندن بلوچستان ٹی 33 ہزار 280، گلگت بلتستان ٹی 10 ہزار 392، اسلام آباد ٹی اسہ لکھ 7 ہزار 22 آزاد کشمیر ٹی 34 ہزار 489 کیس رپورٹ مسونو، تیوہ آ پاکستان ئٹ داسکان 2 کروڑ 96 لکھ 6 ہزار 900 بندغ نا ٹیسٹ کننگانے۔

تدوکا دے 24 گھنٹہ نا نیام ئٹی 43 ہزار 901 پوسکنو ٹیسٹ کننگانے، داسکان 12 لکھ 24 ہزار 85 ناجوڑی درواخ مسونو اندن اسہ ہزار 247 ناجوڑی نا حالیت خلیس ٹی ءِ۔

پاکستان ٹی کورونا آن اسہ دے ئٹی19 بندغ مرگ نا گواچی مسونو ہراڑان گڈ کہوک آتا کچ 28 ہزار 496 مسونے، پنجاب ٹی 12 ہزار 936، سندھ ئٹی7 ہزار 579، خیبرپختونخوا ٹی 5 ہزار 757، اسلام آباد ٹی 941، بلوچستان ئٹ 356، گلگت بلتستان ٹی 186 و آزاد کشمیر ٹی 741 ناجوڑی مرگ نا گواچی مسونو۔

گدرینگوک آ دے چمن پاکستان اوغانستان سیم ءِ ارٹمیکو وار ملنگ نا رِد ئٹ پاکستانی و اوغان کوالخواہ تا نیام ٹی اوڑدئی مس ہراٹی فیصلہ کننگا کہ چمن سیم آن جہی آ بندغ و جہی سفری کاغذ آتا بنیات آ سیم سر ءِ ایپار کننگ نا موْکل مرو۔

قندھار نا شناختی کارڈ تخوکا، چمن و کوئٹہ نا پاکستانی رہینگوک شناختی کارڈ تخوک آک آتے ہننگ و بننگ نا موکل مرو۔

داڑان ابید کاروبار نا مون آ اڑانگ شوغوکا ویل آتے ایسر کننگ کن امنائی مس۔ دو شنمبے نا دے بھاز آ بندغ آتا سیم سر آ گٹ آ بندغ آک کسر نا ملنگ آن پد تینا علاقہ غاتے راہی مسر اندن مال دروک گاڑیک، ٹرک و کنٹینر آتا بھاز بھلو کچ اس اوغانستان آن پاکستان آ بسر۔

یاتی مرے پنچ اکتوبر آن پاکستان اوغانستان سیم ءِ کاروبار کن و ہننگ بننگ کن بند کننگاسس۔

حوال تا رد ئٹ پاکستان ٹی جہانی دین کورونا وائرس آن پین 10 بندغ مرگ نا گواچی مسونو اندن جمعی وڑ ئٹ کہوک آتا کچ 28 ہزار 466 مسونے۔

نیشنل کانڈ اینڈ آپریشن سینٹر ( این سی او سی نا کنڈان شینک کروکا حساب نا رد ئٹ تدوکا بیست و چار گھنٹہ نا نیام ئٹی تیوہ آ پاکستان ئٹ پین 457 کورونا کیسز رپورٹ مسونو، پاکستان ئٹ کورونا کیس آتا جمعی کچ 12 لکھ 74 ہزار 17 مسونے۔

اندن این سی او سی نا رد ئٹ تدوکا دے بیست و چار گھنٹہ نا نیام ئٹی تیوہ آ پاکستان ئٹ 39 ہزار 296 کورونا ٹیسٹ کننگانے و مثبت کیس آتا کچ 16 -1 فیصد ءِ، اندن سندھ ئٹ کورونا نا کیس آتا کچ 4 لکھ 70 ہزار 421 ،خیبر پختونخوا ٹی اسہ لکھ 78 ہزار 135، پنجاب ٹی 4 لکھ 40 ہزار 378، اسلام آباد ٹی اسہ لکھ 6 ہزار 945 کیس مسونو۔

اندن بلوچستان ئٹ 33 ہزار 267، آزادکشمیر ٹی 34 ہزار 481 و گلگت بلتستان ٹی 10 ہزار 390 کیس رپورٹ مسونے۔

بیست و چار گھنٹہ نا نیام کورونا نا تیوہ آتیان زیات مرگ پنجاب ٹی مسونے ہراڑے 12 ہزار 924 بندغ مرگ نا گواچی مسونو اندن سندھ ئٹی 7 ہزار 569، خیبر پختونخواہ ٹی 5 ہزار 751، اسلام آباد 940، گلگت بلتستان 186، بلوچستان ٹی 356 و آزاد کشمیر ٹی 740 بندغ مرگ نا گواچی مسونو۔

کوئٹہ پریس کلب نا مون آ بیگواہ غا شاہ میر بلوچ و مرتضیٰ بلوچ نا بیگواہی نا برخلاف اسے برانزی مچی اس اڈ تننگا. دا برانزی مچی ٹی پی ایس ایف آزاد نا آغا زبیر شاہ، بی ایس او نا بنجائی باسک ناصر بلوچ، بی این پی نا بنجائی باسک شمائلہ اسماعیل، وائس فار بلوچ مسنگ پرسنز نا چیئرمین نصر اللہ بلوچ، نیشنل ڈیموکریٹک پارٹی نا بنجائی آرگنائزر ایڈوکیٹ شاہ زیب، بلوچ اسٹوڈنٹس ایکشن کمیٹی نا بنجائی سیکرٹری جنرل آصف بلوچ و ایلوک تینا خیال آتا درشانی کریر.

برانزی مچی ٹی تینا خیال آتا درشانی ءِ کریسہ پاریر کہ ملکی آئین و قانود دا گڑا نا موْکل ایتک کہ اسے بندغ اس سیاست کے و تینا خوندی حق آ تیکن توار ارفے ولے افسوس نا ہیت کہ بلوچستان ٹی دا گڑا تیکن توار ارفنگ یا تینا خوندی آ حق آتیکن سیاست اسے ڈو اس جوڑ کننگانے.

او مونی پاریر اینو بلوچ اسٹوڈنٹس ایکشن کمیٹی نا چئیرپرسن ڈاکٹر صبیحہ بلوچ ام اندا ریاستی ظلم و زوراکی نا آماچ ءِ. ریاست ڈاکٹر صبیحہ بلوچ ءِ بے توار کننگ کن، اودے سیاست آن پد بٹننگ کن چار توہ مست اونا ایلم شاہ میر بلوچ و مرتضیٰ بلوچ ءِ زوراکی تون خضدار انجیئرنگ یونیورسٹی آن بیگواہ کرینے. ہرا اینو اسکان یلہ کننگتنو.

مونی تینا خیال آتا درشانی کریسہ پاریر کہ نن ریاست، ریاستی ادارہ و ریاستی عدالت آن خواست کینہ او ڈاکٹر صبیحہ بلوچ نا ایلم و ایلو غٹ بیگواہ تے یلہ کرفہ اگہ او ڈودار ءُ اوفتے تینا عدالت آ ہتے سزا ایتے.

1 of 4