امریکہ ٹی ارا سلاء بند بندغ نا سم کاری نا سوب آن کہی بندغ آک ٹپی مسر۔

درملکی حوال رسیفوک ادارہ تا رد ئٹ امریکہ نا ریاست ٹیکساس ٹی ارا سلاء بند بندغ نا اسٹ ایلو غا سم کاری نا سوب آن 14 بندغ ٹپی مسر۔

دا ویل نا حوال نا ملنگ تون اوار پولیس جاگہ غا سر مریسہ حالیت ءِ دو ٹی ہلک و اسہ جلہو کروک اسے دزگیر کرے اندن ٹپیک اسپتال آ دننگانو ہرافتیان ارا بندغ نا حالیت خلیس نا ہد اسکان پاننگک۔

پولیس نا رد ئٹ سم کاری نا ویل ہڑتوم آ بندغ تا ذاتی دژمنی نا سوب آن مونا بس، دزگیر آ جلہو کروک آن پٹ و پول برجاء ءِ اندن نروکا جلہو کروک نا دزگیر مننگ کن چھاپہ آک خلنگسہ ءِ۔

کوہلو ٹی گروک نا تمنگ آن جتا تدینی تیٹ مسہ بندغ مرگ نا گواچی مسونو۔

کوہلو نا علاقہ یونین کونسل سفید و نساو ٹی گروک نا تمنگ آن جتا تدینی تیٹ 9 سال نا چنا و زالبول تون اوار مسہ بندغ مرگ نا گواچی مسونو۔

تدینی تیٹ ارا بندغ ٹپی مسونو، ٹپیک ڈسٹرکٹ ہیڈ کوارٹر ہسپتال آ دننگانو۔

بلوچستان نا علاقہ قلات و کوئٹہ ٹی جتا ویل آتیٹ ارا بندغ مرگ نا گواچی مسونو۔

حوال تا رد ئٹ کوئٹہ نا علاقہ بستی پنچائیت ٹی عتیق ڈیویڈ پنی ءُ بندغ اس وتکشی کرے۔

پولیس جون ءِ دوئی کریسہ ہسپتال آ سر کرے، ہراڑے المی کاروائی آن گڈ جون خاہوت نا دو ٹی تننگا، داسکان  وتکشی نا سوب آک سما تمتنو پین  کاروائی برجاہ ءِ۔

اندن پین احوال ئسے نا رد ئٹ قلات ٹی ایلم ایلم ءِ سم کاری کریسہ کسفے، پولیس نا رد ئٹ ہفتہ نا سہب 7:30 نا وخت آ  قلات پولیس ءِ حوال  رسینگا کہ باب قلات نا کنڈا اسہ بندغ اس ٹپی حالیت ٹی تموک ءِ ہراڑا  ایس ایچ قلات و ایلو کارندہ غاک دمدستی ئٹ ہند آ سر مریسہ ٹپی ءِ سول ہسپتال قلات آ سر کریر۔

ہراڑے اونا چاہنداری راج محمد حسنی مغلزئی قلات آن تعلقدار حاجی خان نا مار محمد گل نا پن ئٹ مسونے، سما تما کہ اونا پٹو آ سم لگاسس، ٹپی آ بندغ ٹپی ہموڑے ساہ تس۔

ایس ایچ او قلات نا رد ئٹ سر و سوج کننگا سما تما کہ قلات آن تعلقدار راج محمد حسنی مغلزئی ءِ اونا حقی آ ایلم مار گل محمد مغلزئی و اوڑتون اوار پین ڈودار آک کسفینو۔

ہراڑا قلات پولیس دمدستی وڑ ئٹ جتا  جاگہ آتیا چھاپہ خلیسہ  کاروائی کریسہ ڈودار ایلم گل محمد ءِ دزگیر  کریسہ اسہ کلاشنکوف و کارتوس خنا، پین سر و سوج قلات پولیس کننگ ءِ۔

بلوچستان نا ضلع خضدار آن سلاء بند بندغاک براہوئی بولی نا پنی آ شاعر تابش وسیم ءِ برمتہ کریسہ بیگواہ کریر۔

حوال تا رد ئٹ درے ننکان خضدار ئٹ ہسپتال آن نادرست سلاء بند بندغاک شریف نا مار وسیم ءِ برمتہ کریر ہراڑان گڈ اونا بابت ہچو حوال اس اف۔

تابش وسیم براہوئی بولی نا پوسکنا گچین آ شاعر تیٹ حساب مریک۔ او بھازا ادبی و چاگڑدی مجلس آتا موبری ءِ کریسہ کرینے۔

تابش وسیم نا زوراکی نا بیگواہی آ براہوئی ادبی تنظیم و ادیب آک بے جاراتی نا درشانہ کننگو۔ اوفک تابش وسیم نا یلہ کپرنگ آ برانز ارفنگ نا درشانی کننگو۔

یاتی مرے داکان مالو ہم براہوئی و بلوچی بولی نا شاعر و ادیب آتے زوراکی تون بیگواہ کننگ نا تدینیک مسونو۔ منہ وخت مالو بلوچستان یونیورسٹی ٹی براہوئی ڈیپارنمنٹ نا چیئرمین و پی ایچ ڈی سند دوئی کروک ڈاکٹر لیاقت سنی ءِ ہم نادرست بندغ آک زوراکی تون بیگواہ کریر۔

لیاقت سنی نا بیگواہ کننگ آ شابیت ءُ پڑ ئسے آ برانز مس ہراڑان گڈ اودے یلہ کننگا۔

بلوچستان نا بنجائی شار کوئٹہ آن اسہ بندغ ئسے نا جون خننگانے۔

گیشتر حوال تا رد ئٹ جون کوئٹہ نا علاقہ انسکمب روڈ آن خننگانے۔

چیھپا حوال تا رد ئٹ جون چاہنداری کن اسپتال آ سر کننگانے، داسکان جون نا چاہنداری مننگ کتنے۔

یاتی مرے بلوچستان نا جتا علاقہ آتیٹ اندن بندغ آتا جونک خننگانو، ہرافتا چاہنداری مننگ ممکن متنے، اندن بھاز آ جاگہ آتیا ڈی این اے آن بیدس جون تے بے بندغ پاریسہ بند و بست ئنا کنڈان دفن کیرا۔

بندغی حق ئنا ادارہ تون اوار  بلوچ سیاسی مخلوق آتا گمان نا رد ئٹ جونک بیگواہ بندغ آتا مننگ کیرا ہرافتے جوشک کریسہ بٹیرہ، ہرانا سوب آن بندغ نا چاہنداری کننگ ممکن مفک۔

سہیل بلوچ آرگنائزر، طیب بلوچ ڈپٹی آرگنائزر تخنگا، بلوچ اسٹوڈنٹس کمیٹی نوشکی زون زیر نگرانی مرکزی ڈپٹی سیکرٹری جنرل خالد بلوچ ٹہفنگا۔

زونل آرگنائزنگ باڈی ٹی مرکزی سرکیولر، عالمی و علاقائی سیاسی حالیت و تنظیمی ٹک آتیا جوان گپ تران آن گڈ بروکا وخت نا کاریم آتا ٹِک ٹی آرگنائزنگ باڈی شون تننگا ہراٹی سہیل بلوچ آرگنائزر اندن طیب بلوچ ڈپٹی آرگنائزر مسر۔

مرکزی ڈپٹی سیکرٹری جنرل خالد بلوچ پارے کہ بلوچستان ئٹ اسکول پڑ ئنا خوانوکا بست و بند بھاز بد مسونے، ہراڑے اسہ نیمہ بد آ تعلیم پوسکن آ ذہن آتا ودشت نا کسر تے کم کیک گڑا ہمو خواننگ نا کمک ئٹ زمینی حق آتیان چھپ پالیسی تا گڈو کننگ نا کوشست آک متکنا خوانوکا بست و بند نا بد حالیتی ءِ شابیتی بشخانو۔

اوفک بلوچستان ئٹ حکومت نا خوانوکا ایمرجنسی نا برانز ءِ متکنا حکومت آتا وڑ سیاسی لوڑ گوڑ پاریسہ پاریر کہ سال آتیان بلوچستان ئٹ خواننگ نا پن ئٹ تخوکا فنڈ آک رد آ پالیسی تیا خڑچ مسونو۔

دا رد ئٹ اوفتا پاننگ اس کہ اگہ نن بلوچستان حکومت نا پارہ غان خواننگ نا شابیتی بشخنگ کن کروکا کوشست آتے ارن گڑا دا خننگک کہ ہر سال “ہر چنا اسکول ئٹ” نا وڑ انگا برانز آتا تالانی نا جاگہ لس مخلوق نا سرکاری دفتر آتا مونا مریک ہرانا سوب آن کروڑ آتا رپئی تا نرخ آتیان کمپین آک چلینگرہ ولے کاریم تفسہ۔

اسہ نیمہ اسکول پڑ آتا خواننگ نزور کاریم کروکا آتا گواچی ءِ گڑا ہمو بلوچستان ئٹ تیوہ فعال اسہ ہم کالج نا پدرند خلنگ سخت ءِ۔ خوانندہ غاتا بھلو کچ اس کالج آتیٹی داخل اریر ولے استاد آتا کمبوتی نا سوب آن تعلیم دوئی کننگ افس۔ خواننگ نا ویل آتا رد ئٹ تنظیمی پروگرام آتا ذکر ءِ کریسہ پارے کہ بلوچ علاقہ تا خوانوکا ویل تا ایسری نا جدوجہد کن تنظیم نا پارہ غان “بلوچ لیٹریسی کمپین” نا پن آن سوگوْ ءُ کمپین اس چلیفنگ نا پڑو مسونے۔ ہراٹی بشخ آتیٹ اسکول و کالج تا ویل تے پاش کننگ نا کوشست کننگو۔

اوفک ورنا تیٹی جتا وڑ نا منفی آ رحجانات آتا تالان کننگ آ خلیس نا درشانی ءِ کریسہ پارے منفی رحجانات آتا شابیتی بشخنگ ورنا تا چاگڑدی معملہ تیان بیگانہ تخنگ نا کوشست ءِ ہرانا توننگ علمی و سیاسی مُد نا تالان مننگ آن مننگ کیک ہراڑ کن سوگوْ ءُ کوشست آتا خواست ارے۔

اوفتا پاننگ اس بلوچ اسٹوڈنٹس ایکشن کمیٹی بلوچ خوانندہ غاتا سوگوْ ءُ تنظیم ئسے، خوانندہ غاتے چاگڑدی معاملہ تا ردئٹ زموار کننگ و بلوچ علاقہ تیٹی کتاب ربیدگ ءِ برزا دننگ کن تنظیم نا کوشست آک برجاء ءُ۔

اجلاس نا گڈیکو ٹِک بروکا وخت نا کاریم ئٹ زونل آرگنائزنگ باڈی ٹہفنگا ہراٹی سہیل بلوچ آرگنائزر، طیب بلوچ ڈپٹی آرگنائزر اندن ثانی بلوچ و یحییٰ بلوچ آرگنائزنگ کمیٹی نا باسک مسر۔ بنجائی ڈپٹی سیکرٹری جنرل پوسکنا ٹہیفوکا کابینہ آن سوغند ہلک اندن پوسکن ٹہیفوک آ کابینہ تنظیمی پروگرام ءِ نوشکی نا تیوہ خوانوکا ادارہ تے اسکان رسیفنگ نا درشانی کرے۔

نظم آفتاب یوسف نا پنا

دا رنگ ئے گُل گُلاب ئنا
دا رنگ ئے آفتاب ئنا

دا رنگ ہزار رنگ تِس
دا رنگ زباد تو جنگ تِس
دا رنگ ئے سُہب ئنا کُلہو
دا رنگ زند مُچ سلو
دا رنگ نپاد پٹ ڈغار
دا رنگ تیک آبشار

دا رنگ ئے مَش تہ آب ئنا
دا رنگ ئے آفتاب ئنا

دا رنگ ئٹی ہزار رنگ
دا اف بیرہ چار رنگ
دا رنگ ئے مڑد ئنا نشان
دا رنگ بریک نا گُمان
دا رنگ تہوئے بلسُمی
دا رنگ تروئے زندگی

دا پنہ ئے کتاب ئنا
دا رنگ ئے آفتاب ئنا

دا رنگ مَش تہ باٹہ غان
دا رنگ ئن توبہ ءِ امان
دا رنگ فتح نہ بیرم ئے
دا رنگ امیر نہ کاٹُم ئے
دا رنگ ضیاء نہ فلسفہ
دا اسلمی آ حوصلہ

دا رنگ اف سراب ئنا
دا رنگ ئے آفتاب ئنا

دا شہزل آتا ساہ نہ رنگ
دا رنگ اف فنا نہ رنگ
دا رنگ ءِ چیدہ ئے وطن
دا رنگ ئے تیک گُلبدن
دا رنگ دیدہ ئے کنا
دا رنگ روح ءُ جُہن ساہ

دا رنگ ئے ماہتاب ئنا
دا رنگ ئے آفتاب ئنا

حفیظ شہزاد

حوال تا رد ئٹ پاکستان ئٹ کورونا وائرس آن 58 بندغ مرگ نا گواچی مسونو، ہراڑان گڈ کہوک آتا کچ21 ہزار 323 مسونے، پاکستان ٹی کورونا نا پک مروکا کیس آتا کچ 9 لکھ 33 ہزار 630 مسونے۔

نیشنل کمانڈ اینڈ آپریشن سینٹر نا پوسکنا حساب نا رد ئٹ تدوکا 24 گھنٹہ نا نیام ئٹی اسہ ہزار 490 پوسکنو کیس رپورٹ مسونو، پنجاب ٹی 3 لکھ 42 ہزار 498، سندھ ئٹی 3 لکھ 23 ہزار 828، خیبر پختونخوا ٹی اسہ لکھ 34ہزار 558، بلوچستان ٹی 25 ہزار 819، گلگت بلتستان ٹی 5 ہزار 642، اسلام آباد ٹی 81 ہزار 766 اندن آزاد کشمیر ٹی 19 ہزار 519 کیس رپورٹ مسونو۔

پاکستان ئٹ داسکان اسہ کروڑ 35 لکھ 72 ہزار 884 بندغ آتا ٹیسٹ کننگانے، تدوکا 24 گھنٹہ نا نیام ئٹی 49 ہزار 285 پوسکنو ٹیسٹ کننگانے، داسکان 8 لکھ 64 ہزار 931 ناجوڑی  درواخ مسونو اندن 3 ہزار 205 ناجوڑی بدحالت ئٹی ءِ۔

پاکستان ٹی کورونا آن اسہ دے ئٹی 58 بندغ مرگ نا گواچی مسونو ہراڑان گڈ وائرس آن کہوک آتا کچ 21 ہزار 323 مسونے۔

پنجاب ٹی 10 ہزار 314، سندھ ئٹی 5 ہزار 136، خیبر پختونخوا ٹی 4 ہزار 158، اسلام آباد ٹی 765، اندن بلوچستان ٹی 289، گلگت بلتستان ٹی 107 و آزاد کشمیر ٹی 554 ناجوڑ مرگ نا گواچی مسونو۔