بلوچستان نیشنل پارٹی نا بنجائی راہشون نوابزادہ حاجی میر لشکری خان رئیسانی پارینے کہ ملک ئٹ جمہوریت و جمہوری بست و بند ہر وخت  سیکورٹی اسٹبلشمنٹ نا دوتا کیرنگ آن مس اندا سوب آن جمہوریت ملک ئٹ روتہ خلنگ کتئو۔

ہرگچین کاری آن مست سیکورٹی اسٹبلشمنٹ اسہ پوسکنو پن و اپوسکنو وڑ اسیٹ نن تا نن جتا غیر جمہوری و غیر سیاسی طاغت آتے مونا ہتیسہ سیاسی عمل ءِ توننگ نا کوشت کیک۔

او پارے کہ 2018 نا علس گچین کاری تیان مست ہرا وڑ بلوچستان نا سیاست ٹی نن تا نن سیکیورٹی اسٹبلشمنٹ اسہ پوسکن ودی مروک بوٹ پالش باپ پارٹی ءِ جوڑ کریسہ بلوچستان آ غیر جمہوری و غیر سیاسی بندغ آتے گڈو کرےہرانا بدل ءِ اینو بلوچستان نا مخلوق خننگے۔

او پین پارے کہ دا حکومت ہننگ آن گڈ بلوچستان آن باپ پارٹی نا وجود و پن مروف، و بروکا گچین کاری تیکن داسی آن اسٹیبلشمنٹ جتا قبائلی پینل آتیٹ وارس کچھی خراسان ، سراوان وجھالاوان نا پن آ جعلی الیکٹیبیز نا پینل ءِ ٹہیفنگ نا بناء کرینے۔

دا جعلی الیکٹیبیز آتا کٹنگ آن ایلو لڑ ئٹی وزیر اعلیٰ نا پن آ اسہ بُت اس تیار کننگو، و اوکان گڈ خلائی مخلوق نا کنڈان موکل تننگو کہ اودے سجدہ کبو نم تیوہ مخلوق نا جان خلاس کروک اندادے۔ اونا پین پاننگ ئس کہ ای مخلص سیاسی باسک آتیان خواست کیوہ کہ او جعلی و سلیکٹڈ الیکٹیبیز تا کسر ءِ توریسہ تینا وطن و تشخص ءِ ایسر مننگ آن بچفر، نئے تو تاریخ ننے بشخپرو۔

دا ہیت آتا درشانی ء اودشت گونڈین ٹی میر ہمایوں عزیز کرد نا کشت و کشاری فارم ئٹ صحافی تون انٹرویو نا وخت آ ہیت کریسہ پارے،دا وخت آمسکوئی وفاقی وزیر وبی این پی نا بنجائی راہشون میر ہمایوں عزیز کر د و ایلوفک ہم ساڑی ئسر۔

نوابزادہ میر حاجی لشکری رئیسانی پارے کہ اینو افسوز ئٹ پاروئی تمیک کہ دا سیکیورٹی اسٹبلشمنٹ نہ بیرہ ننا سیاسی ربیدگءِ ایسر کننگ نا کوشت کننگ ء ِبلکن ننا قبائلی بند و بست ٹی کاریم تخیسہ ننا آباو اجداد نا تاریخ ءِ خراب وڑ ئٹ ایسر کریسہ اسٹ ء ِسردار اسٹ ءِ نوابی نا دستار بندی کننگ،ہرا جُوانو ہیت اس  اف۔

او پارے کہ دا بندغ آک چنکو  مراعات اور ایم پی اے، ایم این اے و سنیٹرز بننگ کن ہرا صف بندی مننگے، تاریخ و بلوچ راج اوفتے  ہچ بشخپرو۔

او پین پارے کہ پاکستان 14 اگست 1947 آ جوڑ مس،ہمو دے تیان ہلیس اینو اسکان داملک اسہ فرنٹ لائن اسٹیٹ نا وڑ ئٹ جہانی سامراج نا مزدوری کننگ ءِ، ہر وخت جموری پارٹی تا جہد آتیان مچے بھاز جہموریت بریک، گڑا دا اوکان گڈ زو جموری کوچک و پارلیمنٹ آتا وڑ ئٹ سست کننگ نا کوشست کرفیرا۔

رسینگوک حوال تا رد ئٹ بلوچستان نا ضلع پشین نا کلی گا نگزئی ٹی برام مجلس ٹی سم کاری نا سوب آن  لمہ باوہ نا 12 سالہ اسٹ آ مار اس مرگ نا گواچی و اسٹ ٹپی مسونے۔

لیویز نا پاننگ ءِ کہ کلی گا نگزئی ٹی برام نا مجلس نا وخت آ  سم کاری نا سوب آن شانزندہ سال ئنا محمد اصغر جان مرگ نا گواچی مس، اندن  ایلو بندغ ٹپی مسونے۔ چنا نا جون و ٹپی ءِہسپتال آ سر کننگا ہراڑے المی کارروائی آن گڈ جون خاہوت نا دو ٹی تننگا،اندن  ٹپی آ نا دوا درمان برجاہ ء۔

اندن پاننگ ءِ کہ کہوک آ چنا لمہ باوہ نا اسٹ آچنا ئس اسوک،یاتی مرے داکان مست ہم برام نا مجلس آتیٹ سم کاری مسونے ہرافتیٹ بھاز آ بندغ آک مرگ نا گواچی یا ٹپی مسونو ولے دا  افسوز ناک ویل آتیان گڈ ہم ئٹ سم کاری نا توننگ کن اسہ وڑ ئنا ہم گام ارفینگ خننگپک۔

ننا ادب

نوشت: زرک میر | مٹ: عتیق آسکوہ بلوچ

دی بلوچستان پوسٹ

آو ادیب تون ہم پڈ اس مریک، او اسیکہ پڈ ولفک دوارہ ٹَک خلیک، اونا بدن ئٹ آ ہم اندنو بشخ ارے کہ او ستر پوشی کے، و اونا ہم زائیفہ و چُنا مریر، اوڑا دا طرہ ہم کہ ادیب ءِ سگریٹ دنز تروئی مریک و اگہ کس ادیب اس سگریٹ دنز تف او امرو ادیب ئس، ادیب نا باہ آن سگریٹ نا موڷ نا مُد ئٹ تالانی اندنے دُنکہ ملی نا کیٹلی آن باف بش مننگ۔ و دوارہ ہوٹل نا شغل جتا تینا جاگہ غا، اودے داڑکن کاریم اس تو کروئی تمک، و دُن کننگ اونا حق ہم ارے ولے کم از کم سرکاری نوکری آن او پد تورے تینے یا گڑا بخت والا ادیب سرکاری ملازم اس مف گڑا او سراط مستقیم آ بیدس تڈو ہلنگ آن ہننگ کیک نئے تو لغوشت کننگ نا گواچی مننگ کیک، او سڑک آ الاونسز کن ہم تولنگ کیک، اسہ پارہ غان او انداخس حساس مریک کہ او گلی تیٹ چُرو کن تولنگ آ ہم آ روادار اف ایلو پارہ غان او ہفتہ غاتے اسکان کسر تیا تولوک خلقت نا کسر ءِ تفوک مریک، دنو بھاز آ بے حساب بے ضابطگیک و تضاد آک مون آ بریرہ، ایلو پارہ غان تیوہ غا دفتر رشوت نا دود نا ردئٹ کائک گڑا ادیب صاحب امر داڑان مُر مننگ کیک و دوارہ دیمری نا رُم جتا، داڑکن اسٹ ایلو نا فائل تیٹ کوکڑو و سفارش پٹنگ نا نت دو خلنگ جتا۔

کنا خڑک ادیب برام آن ہم مُر تورے تینے نئے تو تینے رکھنگ نا تیوہ غا کوشست آتے دک اس لگنگ کیک کہ ہراتم چنا ءِ بڑز نہاد اسکول اسیٹی داخل کرفنگ مرے، زائیفہ کن گچین ءُ پُچ و میک اپ نا بست و بند جتا، داسہ ہر زائیفہ صفیہ مننگ کپک ولے صفیہ آ انت ضد کہ او ہم “منٹو صاحب” ءِ پاگل خانہ نا سیل و سوات کرفسہ گچینی تون ہنوک زائیفہ اس مننگ نا داد ءِ دوئی کریسس، گڑا چُنا زائیفہ و سرکاری نوکری ادیب اسیکن پول صراط مرور ہراکان سلامت گدرینگ ادیب اسیکن مننگ کپک۔ اسہ وڑئٹ ادیب نا دا سختی تیان گدرینگ و ذاتی چمشانک شاغنگ ہم بھاز الّمی ءِ ولے افسوز کہ ادیب اگہ دا تیوہ غاتے کے گڑا دوارہ تینا مخبری و پچار ءِ امر کننگ کیک او وخت او شریک جرم مریک و تیوی زند 164 (اعتراف جرم) کننگ کپک۔

نن بھاز وخت خننہ کہ ادیب اس دفتر اسیٹی تولوک چاہ نا کش خلیک، سما تمک کہ ادیب صاحب چُنا نا نوکری کن اسہ سرکاری دفتر ئسے آ پیری کننگے۔ اگہ ادیب تینٹ سرکاری ملازم ئسے گڑا تینا دیمروی، تنخواہ و پوسٹنگ نا پیری تیٹ اندن تمک کہ او حکومت وخت آ ہچو نغد کاری اس کننگ کپک و دوارہ تینا گریڈ آتے اُریسہ دانشوری کریسہ کیک، دا انداڑے ایسر مسکہ ہم ہیت اس ئس ننا ادیب دوارہ داخہ در سیاست زدہ مریک کہ او ریٹائرمنٹ آن گڈ ودکی خوائک یا دوارہ پارٹی اسیٹی اوار مننگ نا گمان کیک (اواری نا احوال مونی مرو) ننا رہی آ دُن آ درزن آ مثیال آک ءُ، اکادمی ادبیات آن ہلیس بلوچستان یونیورسٹی اسکان ہر جاغہ ننا ادیب مزاجاً سوختئی نا گواچی ءِ، تینے آن خر مریسہ تینے آن تشریحات و تشبیہات ٹہیفک، دن سمجھ ادیب نا سرکاری ملازم و دوارہ افسر مننگ اسہ المیہ اس مریک، و اگہ اورا اِرا انداخس کہ اونا برام مسونے (و تیوہ غاتا مسونے) و دوارہ چناک ہم دوست مریر گڑا ادیب نا سرگردان مننگ ہچو گوڑیفوک ءُ ہیت اس اف۔

یوٹوپیائی ریاست نا اگہ ہیت کننگہ گڑا اُست خواہی مریک کہ ادیب، فلسفی و سائنسدان آتے برام کپرنگ و سرکاری امور تیان مُر مننگ نا رمائشت مرے انتیکہ دا خواجہ غاک سرکاری امور ئٹ اخس تنخواہ ہموخس کاریم نا ردئٹ سلینگ کپسہ، اوفتے مفت ئنا شراب کنوئی تمک۔

اسہ چس کروک تدینی اس بنفیوہ کہ نن قلات ئٹ تینا استاد پروفیسر ادیب صاحب نا بھاز منتوار اُن کہ او ننے ملاقات نا وخت تریسہ کریکہ، ولے زیات اونا دوتیٹ کتاب تون اوار فائل اس ہم خننگاکہ، سوب اریفنگ آ ٹرانسفر توننگ کن نت دو خلنگ نا پاریکہ و سوب پاریکہ کہ اگہ اونا داکان ٹرانسفر مس گڑا دا مجلس آتا انت مرو ہرافتے ہر نن ہڈ ایتنہ ہرا بناء بناء ٹی شام غریبان نا دروشم اٹ مسکہ و ایسر آ متکنا روم نا ہمو کلب نا دروشم ٹی بسکہ ہراڑے روم نا شہنشاں آگسٹس شراب ئٹ پالیفوک اِرغ، ہلار و انجیر تون نوش کریکہ و دوارہ پاریکہ او مملکت نا بابت جُوانو تغ خنو و او ہروخت تغ ئٹ سمندر نیامٹ ئٹ دژمن فوج ءِ غرق مروک خناکہ و ساحل آ داد ئٹ سلوک بے حجاب مسن تے خناکہ گڑا نیمہ تغ ءِ او تغ ئٹ دژمن فوج تے دیر دروک اُریسہ پورو کریکہ و دا تغ تا نیمہ پوروی مملکت نا ذمہ واری مسکہ، او وخت شہنشاہ نا خواب گاہ ٹی اندنو مسڑ ہتنگاکہ۔ ننا قلات نا پروفیسر ادیب ہم مملکت نا مفاد ئٹ پین ہند اس ہننگ آن بچنگ کن ٹرانسفر توننگ نا درخواست نوشتہ کریسہ سفارش پٹاکہ۔ داسہ ریٹائر مریسہ پنشن داد آتا فائل ءِ پیری ایتک ولے داسہ دا الّمی ارے کہ او اُرے اسکان اندنو مجلس برجاء تخیسہ کیک، قلات نا گوْش ئٹ ننتون شراب و اوٹی پالفنگ کن اِرغ اف، ہلار و انجیر ہم، پروفیسر صاحب تون اوار اوار ننے ہم شہنشاہ آگسٹس آنبار مخالف فوج و داد ئٹ مسن تا تغک بریرہ ولے افسوز کہ ننتون چھپی ءُ گڑاک کہ نن مخالف فوج ءِ دیر دروک خنپنہ بلکن اوفتے برجاء تینا پارہ غا بننگ آ خنینہ واہم گڈانی نا ساحل آ داد ئٹ مسن تے الّم خنینہ، داسہ پابو دننگا حالیت ئٹ ننے و ننا پروفیسر صاحب ءِ داد دیر ایتو؟

برجاء۔۔۔۔

رسینگوک حوال تا رد ئٹ لورالائی ٹی دُون ئٹی کاریم کننگ نا وخت آبرمہ نا بشخ دربلی نا شیف آ بننگ نا سوب آن اسہ بندغ اس مرگ نا گواچی مسونے۔

گیشتر حوال تا رد ئٹ لورالائی نا علاقہ کلی شبوزئی ٹی نواب خان پنی ء ُبندغ اس دُون ٹی کاریم کننگ نا وخت آ برمہ نا بشخ دربلی نا شیف آ بننگ نا سوب آن مرگ نا گواچی مسونے۔ اندن ریسکیو کولخواک جون ءِ  دو ٹی ہلینگ آن گڈ ہسپتال آ سر کریر، ہراڑے المی کاروائی آن گڈ جون خاہوت نا دو ٹی تننگا، پین کاروائی برجاہ ءِ۔

نائجیریا نا فوج نا چیف آف آرمی اسٹاف لیفٹینٹ جنرل ابراہیم عطاہیرو جہاز ویل ئٹ بیران مس۔

درملکی خبر ایجنسی نائجیریا نا ائیر فورس نا ترجمان نا بابت پاننگا کہ جمعہ نا دے جنرل عطاہیرو نا جہاز قطبی ریاست کدونا ئٹ تما۔ نائجیریا نا فوج نا چیف آف آرمی اسٹاف ءِ جنوری ٹی صدر محمدو بوہاری تخاسس۔ صدر محمدو بوہاری فوج ئنا اعلیٰ جنرل نا کہنگ آ بھاز افسوز نا درشانی ءِ کرینے و اودے ہیرو اس پارینے۔

نائیجرین فوج نا چیف آف آرمی اسٹاف نا تخنگ ملک ئٹ ودوکا پُرتشدد ویل آتےدو ٹی ہلنگ و شدت پسندی ء ِتوننگ کن سوگوْ ءُ گام آتیکن کننگاسس۔

حوال تا رد ئٹ پاکستان ٹی دا وقت قدرتی گئیسں نا ودی مننگ یومیہ3 ہزار 597 ملین مکعب فٹ ءِ، ہرا فروری 2017 نا تاریخ ئٹ تیوہ آتیان زیات4 ہزار 126 ایم ایم نا ایلف ڈی ریکارڈ کننگاسس۔

میڈیا رپورٹ نا رد ئٹ پاکستان نا مسہ بھلو گیسں فیلڈ آتیان 2017 آن گیس ئنا ودی مننگ ٹی کمی بسونے، قادر پور گیس فیلڈ آن فروری 2017 ٹی گیس نا ودی مننگ 337 ایم ایم سی این ڈی ریکارڈ کننگاسس435 فیصد کم مریسہ 19 ایم ایم سی ایس ڈی آ بسونے۔ کندھکوٹ گیس فیلڈ آن ودی مننگ 37 فیصد کم مریسہ 200 آن 130 ایم ایم نا این ڈی و سوئی گیسں فیلڈ آن 444 آن 348 ایم ایم سی ایلف ڈی مسونے۔

اندا وڑ ناشپا و مکوڑی ایسٹ گیس فیلڈ آتیان ودی مننگ 7 و 8 فیصد کم مریسہ 84 و 79 ایم ایم سی ایلف ڈی آ بسونے۔

گیشتر حوال تا رد ئٹ ٹاپ لائن سیکیورٹیز تا تجزیہ کار شنکر تالریجا پارے کہ ماڑی گیس فیلڈ آن گیس ودی مننگ ٹی 10 فیصد ودکی مسونے و دا641 آن 753 ایم ایم نا ایلف ڈی آ بسونے،اندن اوچھ آن ودی مننگ ٹی 3 فیصد ودکی مسونے وا دا 424 آن 436 ایم ایم نا ایلف ڈی مسونے۔

اوفک پین پارے کہ پاکستان ئٹ گیس نا واپس مچ کننگ جون 2020 ٹی 62 ہزار 11 بلین کیوبک فٹ بی سی ایفت ) نا مقابلہ ٹی 2 فیصد ودکی آن دسمبر 2020 اسکان 62 ہزار 964 پی سی ایفت مسوسس۔

اندن شنکر تالریجا نا پننگ ئس کہ دا ودکی ماڑی اچ آر ایل و ماڑی ڈیپ نا گئیں مچ کننگ ٹی بالترتیب 7 و 8 فيصد ودکی و5 پسکونو بقا، منگریو مامی کیلی جہندمی، توغ و عمیر نا اوار مننگ نا سوب آن مسونے۔

رسینگوک حوال تا رد ئٹ بلوچستان نا شار چمن ٹی مروکا بمب تراک نا مقدمہ سی ٹی ڈی تھانہ کوئٹہ ٹی نوشت کننگانے۔

تدوکا دے چمن نا علاقہ شہید ساجد مہمند روڈ آ جمعیت علماء اسلام نظریاتی نا مروکا مچی گام ٹی بمب تراک نا مقدمہ نمبر 35/202 ہفتہ آ پولیس نا ڈیوٹی آفیسر نا مدعیت ٹی سی ٹی ڈی تھانہ کوئٹہ ٹی نا درست دہشت گرد آتا بر خلاف نوشتہ کننگانے۔

گیشتر حوال تا رد ئٹ مقدمہ ٹی خون، گام خون ، ایکسپلوزیو ایکٹ، انسداد دہشت گردی ایکٹ نا دفعہ7 اوار کننگانے۔

یاتی مرے تدوکا دے کوئٹہ چمن ٹی فلسطین نا حق کن اسے مچیگام اس کشینگا، مچیگام نا ایسر مننگ تون اوار اسے تراک اس مس ہرانا سوب آن شش بندغ بیران مسر و جمعیت علماء اسلام نظریاتی نا بنجائی نائب صدر مولانا عبدالقادر لونی تون اوار بھاز بندغ آک ٹپی مسر۔

رسینگوک حوال تا رد ئٹ کراچی ڈیفنس کھڈا مارکیٹ ٹی سکیورٹی گارڈ نا سم کاری آن ارا بندغ ٹپی مسونو۔ پولیسں نا پاننگ ءِ سم کاری نا ویل ڈیفنس کھڈا مارکیٹ ٹی گاڑی پارک کننگ آ چنکو ہیت ئسے آ بناء مس اندا نیام ئٹ سکیورٹی گارڈ سوختہ مس سم کاری کرے۔

پولیس نا پاننگ ءِ کہ ڈبل کیبن گاڑی ٹی سوار انگا بندغ موٹر سائیکل سوار آتے مُر کننگ کہ ہارن تس اوکان گڈ گاڑی آن سکیورٹی گارڈ دڑینگا بس و موٹرسائیکل سوار بندغ تون  خراب وڑ ئٹ ہیت کننگ ء بناء کرے۔

اوکان گڈ سکیورٹی گارڈ سم کاری کرے ہرانا سوب آن اسہ سم اس موٹر سائیکل سوار اصغر و پنڈوخ زالبول ئسے ہم لگا، ویل آن گڈگاڑی ٹی سوار بندغ گارڈ تون اوار نرا۔

گیشتر حوال تا رد ئٹ بندغ آک گارڈ ء ِتوریر،ویل ئنا حوال رسینگتون پولیسں ہند آ سر مننگ تون سکیورٹی گارڈ ذیشان ءِ تھانہ آ درے اندن ٹپی زالبول و نرینا ءِ ہم دوا درمان کننگ کن جناح اسپتال آ راداہ کننگا۔

رسینگوک حوال تا رد ئٹ کورونا وائرس آن پاکستان ئٹ  پین88 بندغ مرگ نا گواچی مسونو ہراڑان گڈ کہوک آتا کچ 20 ہزار 177 مسونے۔پاکستان ٹی کورونا نا پک مروکا کیس آتا کچ8 لکھ 97 ہزار 468 مسونے۔

نیشنل کمانڈ اینڈ آپریشن سینٹر پاننگ ء ِپسکونا اساب نا رد ئٹ تدوکا 24 سائت ئنا نیام ئٹی 4 ہزار 7 پسکونوکیسز رپورٹ مسونو۔

اندن پنجاب ٹی 3 لکھ 33 ہزار 57، سندھ ئٹی 3 لکھ 6 ہزار 707، خیبر پختونخوا ٹی اسہ لکھ 29 ہزار 13، بلوچستان ئٹ 24 ہزار 413، گلگت بلتستان ٹی 5 ہزار 471، اسلام آباد ٹی 80 ہزار 156 آ ندن آزاد کشمیر ٹی 18 ہزار 651 کیسز رپورٹ مسونے۔

گیشتر حوال تا رد ئٹ پاکستان ٹی اینو آن ویکسی نیشن نا پوسکنا لڑ بناء کننگانے، این سی او سی نا رد ئٹ 30 سال آن زیات عمر نا بندغ آتا ویکسی نیشن بناء کننگانے۔ اندن 30 سال آن زیات عمر نا بندغ آک تینے رجسٹر کیر، تینا شناختی کارڈ نمبر 1166 آ ایس ایم ایس کیر۔

حوال تا رد ئٹ کوئٹہ تون اوار تیوہ آ بلوچستان ئٹ روچہ و عئید آن گڈہم ککڑ نا نرخ ئٹی کمی مننگ کتو، 500 آن 600 رپئی کلو اسکا سو سودا مننگ ءِہرانا سوب آن مخلوق بھاز پریشانی تا گواچی ءِ۔

کوئٹہ نا شاریک ہیٹ ئنا سو کبین مننگ آن ککڑ نا سو ہلکورا، عئید آن مست نرخ آتیٹ ودکی تو ئس ولے عئید آن گڈ ہم نرخ آک کم مننگ کتوس، 510 رپئی ٹی سودا مروکا ککڑ داسا 550  رپئی کلو و مُر علاقہ آتیٹ 600 رپئی ٹی سودا مننگے  ہراکہ شاری تیا کبینی نا اسہ پین بارم ئسے، مخلوق ودوکا کبینی آن بھاز پریشان ءِ۔

شاری تا پاننگ ءِ کہ ہر گڑا کبین آن کبین مریسہ ءِ، و دا کبینی ٹی دا طوفان ءِ کنٹرول کننگ کس ئنا وس ئٹی اف۔ ککڑ نا سودا کروک آتا پاننگے  کہ مال ایلو جاگہ آتیٹ کبین بریک ہرا نرج آتیٹ کبینی نا سوب ءِ۔