بلوچستان نا ضلع نوشکی ٹی گلنگور چیک پوسٹ آ لیویز 56 پاکستانی ہندی مخلوق ءِ دزگیر کرے، ہرا غیر قانودی وڑ ئٹ یورپ ہننگ خوارہ۔
اینو گلنگور چیک پوسٹ آ لیویز کاروائی کرے ہراٹی ٹرک ءت سفر کروکا 56 پاکستانی دزگیر کننگار ہرافتیٹ اسہ زالبول اس ہم اوار ءِ۔
دا شاریک غیر قانودی کسر تیان ایران و اوکان گڈ یورپ آ ہننگ خوارہ۔ بند و بستئ کوالخوا تا رد ئٹ دزگیر مروکا بندغ آتا بھازی صوبہ پنجاب آن تعلقدار ءِ۔
بلوچستان نا بھاز آ ضلع آتیٹ مد گرم و خشک مرو، بلوچستان ٹی بھلا باسنی سبی ٹی تما ہراڑے درجہ حرارت 46 ڈگری سینٹی گریڈ ریکارڈ کننگانے۔
کوئٹہ تون اوار بلوچستان نا بھاز آ علاقہ تیٹی محکمہ مد نا اینو سہب ئنا ریکارڈ مروکا درجہ حرارت نا رد ئٹ کوئٹہ نا درجہ حرارت 37 ڈگری سینٹی گریڈ ریکارڈ کننگانے۔ دالبندین و نوکنڈی 41، اوستہ محمد 42، خضدار 34، لسبیلہ 39، پنجگور 39، تربت 42، زیارت 23، قلات 31، اوڑمارہ، پسنی و جیونی ٹی 34، گوادر 36، اوتھل 37، ژوب، بارکھان ٹی 35 ڈگری سینٹی گریڈ ریکارڈ کننگانے۔
بلوچستان نا ضلع مستونگ نا علسقہ پڑنگ آباد ٹی دشت بابا اسکول ئٹ ڈیوٹی آن واپس بننگ نا وختا زالبول استاد آتا اسکول وین آ نادرست بندغ آتا سلاء بند جلہو ٹی چار استاد ٹپی مسونو ہرافک دوا درماں کن غوث بخش رئیسانی میموریل ہسپتال دننگار۔
دا جلہو ئٹ شائستہ، محمد اعظم بنگش نا زائیفہ ہند سریاب روڈ کلی تیر شال، شاہدہ بنت عبدالنبی رئیسانی ہند کلی تیری شال، سعدیہ، علی اکبر بنگلزئی نا زائیفہ ہند کسٹم غنجہ ڈھوری سریاب روڈ شال و شکیلہ، شاہ محمد ترین نا زائیفہ ہند کلی تیری سادات شال ٹپی ءُ۔
کیچ ٹی کورونا وائرس نا تالان مننگ نا کچ ئت ترندی ٹی ودکی، تدوکا اسہ ہفتہ نا نیام ئٹ کورونا نا تالان مننگ نا کچ 51 رکارڈ کننگا۔
بلوچستان نا ضلع کیچ ئٹ تدوکا اسہ ہفتہ نا نیام ئٹ جہانی دین کورونا وائرس نا کیس آتیٹ پد مہ پد رپورٹ آک مننگ ءُ۔ تدوکا دے ضلع ٹی کورونا نا 37 ٹیسٹ مسر، 21 بندغ ٹی کورونا وائرس پک کننگا۔
اندن تدوکا اسہ ہفتہ نا نیام ئٹ کیچ ٹی کورونا نا 133 ٹیسٹ مسر اوفتیان 68 بندغ ٹی وائرس نا پک کننگا و کیس تا کچ ئٹ 51 فیصد رکارڈ کننگا۔
کورونا آپریشن سیل محکمہ جانجوڑی بلوچستان نا شینک مروکا رپورٹ نا رد ئٹ بلوچستان ئٹ کوئٹہ آن گڈ کورونا نا کل آتیان زیات کیس آک کیچ آن رپورٹ کننگانو، داسکان کورونا نا 6 ہزار 209 ٹیسٹ مسونو، 1222 بندغ ٹی وائرس نا پک مسونے و جمعی وڑ ئٹ مثبت کیس آتا کچ 20 فیصد ءِ۔
پاکستان ٹی کورونا وائرس آن 27 بندغ مرگ نا گواچی مسونو، ہراڑان گڈ کہوک آتا کچ 21 ہزار 940 مسونے، پاکستان ٹی کورونا نا پک مروکا کیس آتا کچ 9 لکھ 47 ہزار 218 مسونے۔
نیشنل کمانڈ اینڈ آپریشن سینٹر نا پوسکنا حساب تا رد ئٹ تدوکا 24 گھنٹہ نا نیام ئٹی اسہ ہزار 282 پوسکنو کیس رپورٹ مسونو، پنجاب ٹی 3 لکھ 44 ہزار 799، سندھ ئٹی 3 لکھ 31 ہزار 94، خیبر پختونخوا ٹی اسہ لکھ 36 ہزار 819، کیس رپورٹ مسونو۔
اندن بلوچستان ٹی 26 ہزار 529، گلگت بلتستان ٹی 5 ہزار 771، اسلام آباد ٹی 82 ہزار 313 اندن آزاد کشمیر ٹی 19 ہزار 893 کیس رپورٹ مسونو۔
اسلام آباد وفاقی بجٹ 22-2021 نا پڑو آن گڈ اسہ ہفتہ ٹی 17 جون اسکان پاکستان ئٹ کبینی نا کچ ئٹی 0.28 فیصد ودکی مسونے۔
21 گڑاتا نرخ آتیٹ ودکی و 9 گڑا نا نرخ آتیٹ کمی مس، نیشنل ایوریج نا رد ئٹ پاکستان ئٹ 20 کلو نت نا نرخ 1130 رپئی و جواننگا کوالٹی نا نت نا نرخ 1300 روپی اسکان سر مسونے اندن بورہ نا نرخ 95 رپئی، منہ شار تیٹ 98 روپی و بھلا شار تیٹ 105 روپی اسہ کلو ءِ، شماریات بیورو نا ہفتہ نا رپورٹ نا رد ئٹ کُکڑ 12.19 رپئی، توم 8.38 روپی، ٹماٹر 4.69 روپی، پٹاٹہ 1.12 رپئی، بھلا سو 3 رپئی، چنکا سو 4 رپئی، چاہ نا کوپ 11 پیسہ، صابون 75 پیسہ، سی دونیم کلو گرام و 5 کلو سی نا ڈبہ 3 رپئی، سی نا اسہ کلو پیکٹ 1 رپئی، تازہ پاڷ 1 رپئی و پٹرول نا 2.09 رپئی لیٹر کبین مس۔
اندا وخت ئٹ کیلا نا نرخ ئٹ 7.7 فیصد، دال مونگ 1.85 فیصد، ماش دال 1.26 فیصد، چلولے دال 1.19 فیصد، دال مسور 0.79 فیصد، سرسوں نا تیل نا نرخ 0.38 فیصد، بیدہ تا نرخ 0.36 فیصد، بورہ 0.18 فیصد و ایل پی جی نا نرخ ئٹ 0.29 فیصد نا کمی مسونے۔
حوال تا رد ئٹ پی ایس ایل ٹی گروپ بشخ آتا اینو ایسری ارا میچ گوازی کننگور، کوالیفائرز آتیکن کراچی کنگز نا کوئٹہ گلیڈی ایٹرز تون مقابلہ مرو اندن وننگ ٹریک آ ملتان سلطانز نا اسلام آباد یونائیٹڈ تون مونتس مرو۔
شیخ زید اسٹیڈیم ابوظہبی ٹی پی ایس ایل نا بیست و نہمیکو میچ ایونٹ آن پیشن کوئٹہ گلیڈی و مسکوئی چیمپئن کراچی کنگز تون شیڈول ءِ، ہڑتوما ٹیم آک شام ئنا شش بجہ میدان ٹی برور۔
کنگز تون ٹاپ فور ٹی بننگ نا دا مننگ کروک ایسری وار ءِ، کٹیسہ یعنی 10 پوائنٹس تون اوار ایلو بشخ آتیٹ انٹری نا امیت مرو تا، ایلو میچ یو اے ای ٹی سرپرائز انٹری شاغوکا ملتان سلطانز نا لڑ اسلام آباد یونائیٹڈ آن مرو۔
بلوچستان نا ضلع شیرانی ٹی طوفانی پر ڈیہہ ءِ بھس کرے، سدا تا مال و ساہدار آتا کہنگ آن بندغ آتے لکھ آتا نسخان تون مون تروئی تما۔
علاقئیک زیمی مروک آتا مالی کمک نا خواست ءِ کننگو۔
گیشتر حوال تا رد ئٹ ضلع شیرانی ئٹ تدوکا دے طوفانی پر کلی سرلکی و ایلوفتیٹ بھس کرینے، شیرانی نا علاقہ کلی سرلکی، حافظ بازگل، ملا شیر محمد، امین اللہ، مراد خان، لعل محمد، کلی لنڈیان نا سلیمان خان، گلزار، حسن خان و کلی استشی ٹی حافظ تیمور سخی جان، سید شاہ، حکیم، کلی خژوبی ٹی غلام، دوسمال محمد، حضرت خان، اختر شاہ، نظر محمد نا سد آتا مال و ساہدار تا کہنگ آن لکھ آ رپئی تا نسخان مسونے۔
پشتون قوم پرست جماعت پختونخوا ملی عوامی پارٹی نا سینیئر راہشون مسکوئی سینیٹر عثمان خان کاکڑ برین ہیمبرج آن گڈ تمیسہ ٹپی مس۔
پارٹی راہشون مسکوئی صوبائی وزیر عبدالرحیم زیارتوال نا رد ئٹ پنچ شنبہ نا دے عثمان کاکڑ کوئٹہ ٹی ئس کہ اونا دماغ نا رغ آک ترخار۔ برین ہیمبرج نا دا جلہو ٹی او تینے سنبھالنگ کننگ کتو و تمیسہ ٹپی مس۔ اونا کاٹم ٹپی مسونے.
عثمان کاکڑ دمدستی تون کوئٹہ نا علاقہ پشین سٹاپ نا اسپتال و ولدا کوئٹہ نا پنی نیورو سرجن ڈاکٹر نقیب اللہ نا کلینک آ دننگا ہراڑے ڈاکٹر نقیب اللہ، ڈاکٹر راز محمد کاکڑ، ڈاکٹر امان اللہ کاکڑ، ڈاکٹر فیض ترین و ڈاکٹر مناف ترین آنبرنگا ڈاکٹر تا ٹیم اودے آپریشن کریر۔
پارٹی راہشون نا رد ئٹ آپریشن آن گڈ عثمان کاکڑ سٹی انٹرنیشنل اسپتال آ دننگا ہراڑے اودے وینٹی لیٹر تے ٹی تخانو۔
عبدالرحیم زیارتوال پارے کہ پارٹی نا سینیئر راہشون نا حالیت خلیس نا ہد اسکان ءِ، او کومہ ٹی ءِ و آپریشن آن گڈ بیرہ اسہ وار نت آتے سریفینے۔
بلوچستان نا ضلع قلعہ سیف اللہ آن تعلقداری تخوکا عثمان خان کاکڑ پشتونخواملی عوامی پارٹی نا بنجائی سیکرٹری و صوبائی صدر ءِ۔ او عملی سیاست نا بناء ءِ مسہ دہائی مست پختونخوا میپ ئٹ اوار مننگ آن کرے و ہمو وخت آن انداڑے سلوک ءِ۔
محمود خان اچکزئی آن گڈ عثمان کاکڑ پشتونخوا میپ نا کل آن جواننگا راہشون پاننگک۔
عثمان کاکڑ 1987 ٹی کوئٹہ نا لاء کالج آن وکالت نا ڈگری ءِ دوئی کرینے۔ زمانہ طالب علمی ٹی ہم او پختونخوا میپ نا خوانندہ تنظیم پشتونخوا سٹوڈنٹس آرگنائزیشن تو اوار ئس۔
عثمان کاکڑ 2015 آن مارچ 2021 اسکان سینیٹ آف پاکستان نا باسک ئس۔ 2018 ٹی مسلم لیگ ن و ایلو جماعت آتا اتحاد آتون سینیٹ نا ڈپٹی چیئرمین نا جاغہ ہلنگ کن گچین کاری ٹی سلیس و سرسہب متو۔
پشتون تحفظ موومنٹ نا حامی عثمان کاکڑ ءِ سینیٹ ٹی ملٹری اسٹیبشلمنٹ نا سخت ناقد نا وڑ ئٹ پن دوئی ءِ۔
اسلام آباد ہائیر ایجوکیشن کمیشن ( ایچ ای سی) نا کنڈان کروکا اسہ بنائی چمشانک اسییٹی پاش مسونے کہ پاکستان ٹی بھاز آ یونیورسٹیک آن لائن تعلیم ہلنگ کن اہلیت تخپسہ اندن 205 یونیورسٹی آن بیرہ 40 ٹی آن لائن تعلیم نا جوان بند و بست ساڑی ء۔
ورلڈ بینک نا اسہ رپورٹ ئسے نا رد ئٹ پاکستان نا یونیورسٹیک تینا فیکلٹی باسک آتے، خوانندہ آک و عملہ ءِ کووڈ19 آن بچفینگ کن آن لائن خواننگ نا ڈول ءِ ارفینگ کن بیوس ءِ، بدلی مروکا قانود نا رد ئٹ حکومت جہانی مالی بینک آن خواست کرینے کہ او پاکستان ٹی بڑز تعلیم نا دیمروی کن اسہ پوسکنو ڈول اس مونا ہتے ہرا خاص وڑئٹ بحران و یونیورسٹی لاک ڈاؤن نا حالیت ئٹ تیوہ آتیکن ہیل کننگ نا عمل ءِ برجاہ تخینگ آ پامداری مرے، ہرادے کووڈ 19 بحران نا وخت مسوسس۔
پاکستان ٹی بڑز ءِ تعلیم نا دیمروی نا بابت پوسکنا تنظیم نا اسہ پیپر اسٹ پاننگا کہ دا منصوبہ آتا رد ئٹ40 کروڑ ڈالر نا عزم ٹی داسکان 6 کروڑ 50 لکھ ڈالر نا نرخ ئٹ تننگانو، دا پیپر ٹی تینا مخصد ءِ دوئی کننگ نا کنڈ دیمروی ءِ است جم پاننگانے، ہرا زرگزارنی نا اسٹرٹجیک شعبہ آتا سر و سوجی لائخی، تعلیم ءِ جوان کننگ و بڑز تعلیم نا شعبہ ٹی گورننس ءِ سوگو کننگ نا امنا کننگ ءُ، پیپر نا رد ئٹ تنظیم منصوبہ آتیٹ کورونا تون تعلقدار فنڈز آتیٹ تقریبا 3 کروڑ 30 لکھ ڈالر نا نرخ ہم اوار ءِ۔
