بلوچستان ضلع کیچ نا بھلا شار تربت و ایلو علاقہ آتیٹ ڈینگی و ملیریا نا ناجوڑی ہرکنڈ تالان مس۔ ہر علاقہ نا مخلوق زیمی مننگے، ہسپتال آتیٹ مریض تا مُچی برجاء۔
ڈپٹی کمشنر کیچ حسین جان بلوچ پارینے کہ تربت ئٹ ڈینی وائرس، کرونا و ملیریا نا ناجوڑی تا توننگ کن ہلہلئی بنماس آ گام ارفنگ اُن، شار ئٹ اسپرے مہم نا بناء کننگانے، محکمہ جانجوڑی و این آر ایس پی تون اوار مجلس خوائفسہ حالیت نا جاچ ہلون۔ دا خیال آتا درشانی ءِ او میڈیا تون خصوصی ہیت کریسہ کرے۔
ڈپٹی کمشنر پارے کہ چیف آفیسر تربت ءِ پنت تننگانے کہ شار نا جتا علاقہ آتیٹ اسپرے کرفہ و دانا بناء کننگانے دا وخت اسکان شار و یوسی گوگدان نا بھازا علاقہ آتیٹ اسپرے کننگانے۔
او پارے کہ کرونا وائرس آن رکھ کن خلقت خیالداری تینائی کے کہ تینٹ رکھوک مریر و تینا اُرا والاتے ہم دا خطرناک و ساہ ہلوک وائرس آن بچفر۔
او پارے ضلع کیچ ئٹ کرونا وائرس نا حالیت ءِ خوڑتی ئٹ اُریسہ اُن، ٹیچنگ ہسپتال تربت ئٹ کرونا آن رکھنگ نا ویکسین خلنگ نا عمل ترندی تون برجاء ءِ، ننتون ویکسین نا کمبوتی اف 3 ہزار ویکسین ننے رسینگانو، ٹیچنگ ہسپتال تون اوار ضلع نا تیوی ہسپتال آتیٹ ویکسین ساڑی ءِ و ہیلتھ سینٹرز آک ہم فعال ءُ، خلقت خڑک نا ہسپتال آتیا ہنیسہ ویکسین خلکر۔
او پارے ڈینگی وائرس نا برخلاف ننتون درمان نا کمبوتی نا اسہ بھلو ویل ئسے، داڑکن درمان خوائفینن امیت ءِ ننے زوت رسینگور واہم اخس کہ درمان ساڑی ارے اوفتیٹ مہم برجاء مرو۔
