راج ئنا کاٹم بڑز کروکا سر بلند
نوشت: مہران بلوچ
دی بلوچستان پوسٹ
اندن پارہ کہ ہر بندغ نا سرسہبی نا پد ئٹ اسہ بندغ ئسے نا دو مریک و ہر بندغ نا زند ئٹی اسہ اندن ءُ بندغ اس مریک کہ ہمو بندغ نا او کل گڑا مریک، کنا زند ئٹی ہم اسہ اندن ءُ بندغ اس ارے ہرا ہروخت کنے رد انگا کاریم تیان توریکا و تینا نت تیا بش مننگ ءِ ہیل تسونے۔
او اسہ اندن ءُ بندغ اس ئسک ہرا تینا ذاتی زند آن زیات تینا راج ئنا بابت سوچ خلکوکا، ہر وخت تینا راج و دا جنگ ئنا ہیت آتے کریکا او اسہ اندن ءُ بندغ اس ئسک کہ چنکی آن کوشست کریکا و ذہین ئس، ہر وخت اسکول ٹی تیوہ آتیان زیات امتحان ٹی اونا نمبر آک مسورا، تینا خواننگ آ بھاز کوشست کریکا، اسکول ئٹ تیوہ آ استاد آتا او دوست انگا شاگرد ئس، او ہر وخت اسکول آن واپس اُرا غا بسوکا تو اونا کلک آتیا اسٹار نا ٹک مسوکا، او ہر وخت تینا باوہ لمہ ءِ خوش تخننگ خوائسکہ، و اینو و تینا باوہ لمہ و اور راج ئنا کاٹم تے بڑز کرے و او غلامی نا زند ءِ منیتو، تینا ساہ ءِ تینا وطن کن ندر کرے، او اینو ننے آن بیرہ جسمانی وڑ ئٹ مُر مسونے و اونا سوچ اونا بہادری ہر وخت زندہ مرو، او عظیم انگا بندغ نا پن سر بلند بلوچ ءِ۔
ای اخس ہم نا بہادری نا رد ئٹ نوشت کیو کم ءِ، اگہ گڑاس کم مرے گڑا تینا دا چنکا ایلوم ءِ بشخس۔ سر بلند سینزدہ ستمبر اِرا ہزار ٹی پنجگور نا علاقہ پروم نا اسہ چُنکو علاقہ نعیم آباد ٹی ودی مس، او تینا باوہ لمہ نا اولیکو چنا ئس، کنا باوہ اونا پن ءِ سر بلند تخا و پارے کہ اسہ دے دا ننا تیوہ آتا کاٹم ءِ بڑز کرو، او کم سنی ٹی بھاز خواری کروک، ذہین، چالاخ و بھاز زیبا ئس، اندا سوب آن او تیوہ آتا نازدانہ ئس، کم سنی ٹی خواننگ نا بھاز شوق اس تا، اُرا ٹی ہر وخت خواناکہ و تینا زد آ او کم سنی ئٹ اسکول ٹی خواننگ ءِ بناء کرے، کلاس ٹی بھلا چنا تیان زیات لائخ ئس، وہ ہر وخت تینا خواننگ ٹی گٹ ئسوک۔
اندا نیام ئٹی ای ودی مسوسٹ، کنا لمہ کنے پارے ہرا وخت نی ودی مسوس گڑا سر بلند ہر وخت نیتون گوازی کریکا انتئے کہ اودے ایلو چنا تون گوازی کننگ دوست بتوکا، او مسیٹمیکو کلاس ٹی اس کہ کنا ہم وخت بسوسس اسکول ءِ ہننگ نا، گڑا کنا لمہ سر بلند ءِ پارے کہ اینو آن گڈ نا ایلم ہم اسکول آ برو نیتون اوار، گڑا او منیتو پارے کہ ای دادے دپرا انتئے کہ دادے خواننگ بفک و اسکول ٹی تیوہ آک کنے آ مخور، اوکان گڈ کنا لمہ زور اٹ کنے اوڑتون رادہ کرے، ہرا وخت نن اسکول ءِ سر مسون گڑا اسہ استاد اس سر بلند ءِ تورے و پارے کہ دا دیر ءِ نیتون اوار، او استاد ءِ سما ئسک کہ اونا ایلم ءِ واپس ہم او سوج کرے، گڑا سر بلند سوختئی ئٹ استاد ءِ ورندی تس پارے کہ ای دادے تپرا دیر ئسے، اوکان گڈ ای ہم خواننگ ٹی جوان مریسہ ئسوٹ و او ہم ہر دے کنے تینتون اوار اسکول آ دریکا۔
او ہفت سال ئنا اس ئسک کہ پنجگور آ ہنا خواننگ کن، واپس ہر سال بیرہ چھٹی تیا بسوکا، او وخت نن ہڑتوماک بھاز گوازی کرینا، ہر جاغہ اوار اوار ہنانہ، ہرا وخت او واپس ہناکہ گڑ ای بھاز یکئی محسوس کریٹہ، ہر سال ہتم نا مُد ئٹی نن مش تیا ہنانہ گڑا ای ہر وخت اوڑکن پیٹوک، بیر پین ہم اندن ءُ بلوچی خوراک مچ کریٹا اوڑکن و رادہ کریٹا، گڑا او بھاز خوش مسوکا، او ہم کنکن ہموکا بھاز گڑا رادہ کریکہ، اندا وخت آتیٹ نن بھازخوش ئسون۔
واپس 2016 ٹی پاکستان فوج پروم ٹی بس بھاز آ بندغ آتے دزگیر کریسہ درے، ننا اُرا ٹی ہم چھاپہ خلک، کنا باوہ ءِ ہم او دننگ نا کوشست کریسس ولے خوش بختی ئٹ بچاسس، 2016 آن گڈ ننا خواننگ تیوہ آ گڑاک خراب مسر، نن اوڑے پین تولینگ کتونا گڑا 2017 ٹی نن اوکان پیشتمان، ننا خواننگ کل بند مسر، اسہ سال اندن گدرینگا، واپس 2018 ٹی سر بلند ہم بس انتئے کہ اونا خواننگ ہم بند مسوسس دا ظالم آتا سوب آن، 2018 آن اول کنا ایلم بلوچ جہد ئٹی اوار مننگ نا ارادہ کریسس، گڑا او 2018 آن بلوچ جہد کار(سرمچار آتون) اوار مننگ مس، ہراڑے اونا اوڑدئی اسہ عظیم ءُ بندغ اس “جنرل اسلم بلوچ” تون مریک، او جنرل اسلم بلوچ تون اوڑدئی آن گڈ بھاز خوش ئس، اندا نیام ئٹی او تینا خواننگ ءِ بناء ہم کریسس و چنا تے خوانیفیکا، او بھاز خوش ئس۔
سر بلند ہر وخت کنے پنت تسوکا، دا جہد ئنا بابت پوہ کریکا، و ہر وخت استاد اسلم نا بابت ہیت کریکہ، کنا ایلم کنا تیوہ آ خواست آتے پورو کریکا لمہ نا جاگہ آ کنے لمہ آتون ملیفے، ہیڑ ئنا جاگہ آ کنے اہیڑ تون ملیفے، ایلم نا جاگہ آ کنے ایلم تون ملیفے، کنے اسہ وخت ہم اسہ گڑا سینا مفرینگ محسوس تیتو، او کنے تینا نت تینا بش مننگ ہیل تس، او ہر وخت پاریکا کہ ای مَش تنا ہننگ جنگ کننگ خواوہ، ہر وخت بیرہ اندا پریکا کہ جنگ آن بیدس پین ہچ کسر اف۔
واپس اگست 2021 نا اسہ دے او کنے میسج کرے و پارے کہ ای مش تیا بسونٹ تینا سنگت آتو اوار اٹ، ہمو دے او بھاز خوش لگاکہ او بھاز اُرے اسکا کنتون ہیت کرے و ایسری ٹی او پارے “خدا خافظ نہ یکجاہ آں” اوکان گڈ نن ہڑتوما تا ہیت متو، واپس 20 اگست 2021 آ شام ئنا وخت ای اونا جندندری نا حوال ءِ بنگٹ، کنے یخین بتوک گڑا تینا سنگت آتیان اریفیٹ تیوہ آک پاریر او جند ندری کرینے، اولیکو لوز ہرا کنا زبان آ بس او اس اڑے قربان پرتئو۔
نی ننےآن بیرہ جسمانی وڑ ئٹ مُر مسونس نا سوچ ہر وخت زندہ مرو و نا بہادری نا بابت تیوہ آ جہان ہیت کرو و ننا بلوچ راج فخر کرو نا زی آ ہرا وڑ نی شہید ریحان بلوچ نا توفنگ ءِ ارفیسہ تینا ساہ ءِ ندر کریس، گڑا نن ہم دا توفنگ ءِ ہچ وخت زنگ خلینگ کہ ہلوفن۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
