شہید امیر الملک بلوچ نا منہ یات
نوشت: بہار بلوچ | مٹ: شہزاد بلوچ
دی بلوچستان پوسٹ
اسہ دے اس تینا سنگت آتون تولوک ئسوٹہ، کنا موباٸل آ اسہ نمبر ٸسے آن کال بس، ای کال ءِ ارفتوٹ، چار پنچ کال بس پدا میسج بس، میسج ٸٹ “سنگت نی حال کر” نوشتوک ئس۔ ای پاریٹ “جی نی دیر؟” ورندی رسینگا ای جمال۔ جمال بنسا ای بش مسوٹ ایلو ساٸیڈ مرسا کال کریٹ۔ امیر پارے سنگت امرس انت حالے نا؟ جی خیرے شکرے جوانن، نی بنف تینا سنگت۔ امیر ورندی ٸٹ پارے نن بیدار اُن بادشاہ”، امیر پارے”سنگت ننا غریباتا کال ءِ ارفپیرے۔” ای مخسا پاریٹ “جی سنگت نا نمبر سیو الو نن تو بشخس۔”
حال حوال آن گُڈ امیر جان کنے پارے۔ جی نیتون منہ کاریم ارے، نی بننگ کیسہ؟ جی آو الّم سنگت، ایلو ہاں یکہ بریس، جوان سنگت۔ ای منہ دے گُڈ امیر آ ہناٹ۔
امیر تون منہ سنگت ئسر۔ امیر تون اوڑدئی کنے بھاز خوشی مس، امیر بھاز مخاکہ ایلو ٹوک ٹکا کریکہ، ای و امیر جان توسُن چا کُننگ ئسون تو امیر جان کنے حال حوال کرے، پدا مذاق نا موڑ اٹ بس مذاق کرے۔ ای امیر آن سوج کریٹ امیر جان نی چمن نا پُھل ئسے اُس، داڑے جنگل اٹ انت کننگ اُس؟ امیر جان مخسا پارے “گر ای شار اٹ مسوٹہ، اُراغان بازار نا پارہ غا روان مسوٹا تو پنجابی فوج کنے تورسا اسیکہ کنے آن سوج کریکہ ہرانگ آن بننگ اُس؟ پن نا دیر ءِ ؟ ہرانگ ہننگ اُس؟ انت کاریم کیسہ؟ امیر جان اسل چُپ مس۔
ای اریفیٹ گُڑا نی انت پاسہ پنجابی فوجی تے؟ امیر جان مخسا توفک ءِ ارفیسا پارے “مَش تان بننگ اُٹ، پن توفک آن پیشتموکا سُم پارو، نے خلنگ کن بسونُٹ، سرپند مسوس؟
ای امیر آن سوج کریٹ “نی چڑہ مخسہ، اندا وڑ چُپ مریسہ یا بیرہ اینو کنتون اوار اندن اُس، نا ایلم بے گواہ ءِ، نا بھاز سیالک بے گواہ ءُ، ہرا دژمن تون اوار جیل ئٹی بند ءُ، نا سیالک شہید کننگانو، نا سنگت آتے اندن بے گواہ یا شہید کرینو ولے نا دروشم آ دنو ہچو فریشانی اس اف؟
امیر بشخندہ مرسا پارے “سنگت دا کُل جُہدے آجوئی نا بشخءُ، کنے تینا ایلم، سیال یا سنگت آتا بے گواہ یا شہید مننگ آ فخر ءِ، بلوچ راجی آجوئی کن لس بلوچ آ فرض ءِ کہ دا جنگ ئنا بشخ جوڑ مریر، ننے تولنگ اٹ آجوئی ملپرو۔
ای سوج کریٹ امیر جان بی ایل اے و یو بی اے نا ویل نا باروٹ انت پاسہ؟” امیر پارے “جی اختلافات ارے بی ایل اے و یو بی اے نا نیام اٹ، دا انشاللہ بھاز زوت ایسر مرور۔
ای سوج کریٹ “امیر جان نا منہ سیال ءِ بی ایل اے خلکسک؟” امیر جان پارے “جی او منہ غدار ئسر ہموتے کسفینو” ای سوج کریٹ “امیر جان نما سیال آتے کسفیر وا ام نی ہچ پاتویس؟ امیر مخِسا پارے “ایلم بلوچ راج ئٹی غداری کس اس ام کرے تو سرمچار آتے حق ءِ کہ اوتے کسفر او دیر اس کہ مرے۔”
ای سوج کریٹ “امیر جان دا اِرا سُم نا کوپہ ٹی تفوک ءُ انت اکن؟” امیر پارے “سنگت دا سوب آن کہ دژمن تون مقابلہ مرے ایلو ہراتم ننا سُمک ایسر مسر تو دژمن ءِ دزگیری تننگ آن جوان ءِ کہ نن تینے تینٹ ایسری سُم ءِ خلین۔”
ای چُپ مسوٹ، پدا امیر جان پارے صحافی صاحب سوال آک ایسر مسر؟ نن ہڑتوماک بشخندہ مسون پدا ای پاریٹ جی آخہ منہ سوال ارے۔ جوان گُڑا سوج کر۔ ای پدا پاریٹ امیر جان نی تینا پُژہ غاتے انت خلیسہ؟ او تُرندی اٹ مَخِسا پارے “یار نی کنا پُژہ غاتا پدٹ اُس انت اکن؟ ای سُہب ئنا سے اُوننگ اُٹ، نا خنک کنا پُژہ غاتیا ءُ۔”
نن ہڑتوماک بھاز مخنگ ئسون، ای مخسہ سوج کریٹ “ماشاللہ بھاز جوان ءُ” پدا امیر جان علاقہ نا، سنگت آتا، دژمن تا کُل ئنا اریفنگ ئسکہ۔ ای امیر آ اسہ سنگت ئسے نا سوج کریٹ، امیر جان پارے او انداڑکن ءِ ولے مچٹ مُر ءِ، پدا بسون تو ملوس سہی۔
ای پاریٹ ٹیک ءِ، ای نیتون ملنگ کن زوت بروٹ۔ کنے دا سما الوکہ کہ کنا و امیر جان نا دا ایسری اوڑدئی مرو، ہرا وخت ای واپس بسوٹ تو امیر جان کسر اسکان بس، ای امیر نا دروشُم ءِ اُراٹ، امیر جان بشخندہ ئسکہ، ہرا وخت ای امیر آن رخصت الکُٹ تو کنا اُست پاننگ الوکہ واپسی کن، اُست کشاکہ کہ امیر جان تون ہمراہ مریو، امیر جان تینتون اوار ارفیو کاو، منہ دے امیر جان نا ہیتاک، مخنگ، دروشُم کنتون اوار مریر۔
اسہ دے اس کنا اسہ سنگت ئسے نا برام ئسکہ۔ ای منہ سنگت تون تولوک ئسوٹہ۔ اسہ سنگت اس پارے کے درو قلات اٹ اسہ بھاز دتر چُر ءُ آپریشن اس مسونے، اسہ سرمچار ئسے نا شہید مننگ نا حوال ءِ، ای سنگت آتیان شہید مروکا سرمچار نا پن ءِ سوج کریٹ تو سنگت پارے “امیر الملک”، تو کن کِن زمین آسمان اسٹ مسر۔ ای پین سنگت ئسے آن سوج کریٹ او ام پارے کہ بی ایل اے بیان تسونے کہ قلات آپریشن اٹ پھلین امیر الملک عرف جمال شہید مسونے۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
