بلوچستان نا پنی آ شاعر مرید بلوچ نا شاعری نا کتاب “پد رند” شینک مس۔ دا مرید بلوچ نا ارٹمیکو کتاب ءِ، داکان مالو اونا کتاب “رخصت اف” شینک مسوسس۔
پد رند یک و نیم سد پِن آ تالان ءِ ہراٹی غزل تیتون اوار نظم ئنا صنف آتیا شاعریک اوار ءُ۔ کتاب نا کمپوزنگ و پروف ءِ عتیق آسکوہ بلوچ کرینے و سرتاک ءِ “زانت بلوچ” شون تسونے۔
مرید بلوچ تینا دا کتاب ءِ “جند ندر آتا” پِن آ کرینے۔ سرلوز ءِ درویش بلوچ نوشتہ کرینے ہراٹی مرید بلوچ نا شاعری آ چمشانک شاغنگانے اندن ارٹمیکو سر لوز ءِ “سردانہ” نا سرحال تون “خ م م” نوشتہ کرینے، سرادانہ نا گچینی دادے کہ نظم ئنا دروشم ئٹ نوشتہ ءِ۔
کتاب نا پد سرتاک آ عتیق آسکوہ بلوچ “جہد برجاء” نا سرحال تون مرید بلوچ نا درستی راستی ءِ مون آ ایسنے ہراٹی او پائک کہ “نوشت خیال آتا درشانی نا گچین آ سیبو ءِ، نوشت کتھارسس آن ہلیس کلہو نا سرکننگ، علم نا تالانی و تاریخ ءِ بروکا زنک آ سر کننگ نا تلہ ءِ۔ نوشتہ کننگ آسان آ کاریم ہم ارے و کل آتیان سخت ہم، آسان دن کہ ہرکس نوشتہ کننگ کیک ولے گچین دیر نوشتہ کیک؟ سوگوی دنا نوشت اٹ ارے، دا تیوی آتیان سخت آ کاریم ءِ۔
مرید ٹی دا لائخی ارے کہ تینا خیال آتا درشانی ءِ گچینی تون کیک۔ او تینا خیال آتا درشانی کن شاعری ءِ گچین کرینے یا بلکن دُن پاننگ رد مفرو شاعری اودے تینکن گچین کرے۔
بلوچستان نا شار نوشکے نا خلق مینگل ئٹ میر افضل خان مینگل نا اُراٹی 14 اگست 1984 آ ننا دا شاعر خن ملا۔ شاعری نا بناء کالج نا زمانہ آن کرے ولے بیست و پنچ سال آن گڈ اسلمی آ سیخا ٹی اوڑا شاعری وحی دڑا۔
مرید بلوچ میٹرک نا تعلیم ءِ ماڈل ہائی اسکول نوشکے آن دوئی کننگ آن گڈ ڈگری کالج کوئٹہ آن انٹرمیڈیٹ کرے و اوکان گڈ پشاور یونیورسٹی آن بی اے کرے۔
“پد رند” مرید بلوچ نا شاعری نا ارٹمیکو کتاب ءِ۔ داکان مالو۔ “رخصت اف” 2019 ئٹ شینک مس۔ “پد رند” و “رخصت اف” کنا خڑک ہمو سوج آتا ورندی ءُ کہ دیر گچین نوشتہ کیک و دیر کن۔ اُست خواہی ءِ کہ وطن نا مرید آتیٹ ودکی مریسہ کے و جہد برجاء مرے۔
