پاکستان ئٹ کورونا وائرس آن پین25 بندغ مرگ نا گواچی مسونو، ہراڑان گڈ کہوک آتا کچ22 ہزار 452 مسونے،اندن کورونا نا پک مروکا کیس آتا9 لکھ 64 ہزار 490 مسونے۔
نیشنل کمانڈ اینڈ آپریشن سینٹر نا پوسکونا حساب نا رد ئٹ تدوکا24 گھنٹہ نا نیام ئٹی 830 پوسکنو کیس رپورٹ مسونو، پنجاب ٹی 3 لکھ 47 ہزار 14، سندھ ئٹی 3 لکھ 41 ہزار 275۔
اندن خیبر پختونخوا ٹی اسہ لکھ 38 ہزار 616، بلوچستان ٹی 27 ہزار 445، گلگت بلتستان ٹی 6 ہزار 504، اسلام آباد ٹی 83 ہزار 48 اندن آزاد کشمیر ٹی 20 ہزار 588 کیس رپورٹ مسونو۔
نوجوان ایکشن کمیٹی بھلا گاڑی تا شار ئٹ تہٹی مننگ نا خلاف کاکڑی منڈی چوک آ روڈ ٹریفک ءِ بند کریسہ برانز کننگا۔ ایلو پارہ غان بندغ آ تے بھاز سختی تیتون مون تروئی تما۔
برانز کروک آتا خواست ءِ کہ بھلا گاڑیک شار نا تہٹی مفس بائی پاس آن گدرینگر۔
برانز کروک آتیان نوجوان ایکشن کمیٹی نا سید افضل شاہ گل، گل زمان ناصر و ایلوفک خواست کریر و پاریر کہ شار ئٹ بھلا گاڑیک و بھلا بھلا ٹرالرز تا گدرینگ نا سوب آن ٹریفک جام مریک ہراڑان بندغ تے ہننگ بننگ تون اوار نا جوڑ، اسکول و کالج نا خوانندہ تے بھاز سختی تون مون تروئی تمک۔
تیوہ آ پاکستان ئٹ اسہ وار واپس امریکی ڈالر نا نرخ ئٹی ودکی مسونے، امریکی کرنسی 158 رپئی کچ آن ایمون مسونے۔
سٹیٹ بینک آف پاکستان نا راجی حوالکاری ویب سائٹ ٹویٹر آ شینک کروکا حساب نا رد ئٹ تدوکا ہفتہ نا اولیکوکاروباری دے ئنا وخت آ انٹر بینک ٹی رپئی نا مقابلہ ٹی امریکی ڈالر پین31 پیسہ کبین مس و نرخ 157 رپئی87 پیسہ آن ودیسہ 158 رپئی 18 پیسہ مسونے۔
ایلو کنڈان سٹاک مارکیٹ ٹی ہم 257.06 پوائنٹس نا شیفی ریکارڈ کننگا ہراڑان گڈ انڈیکس 47429.12 پوائنٹس نا تلہ آ سر مریسہ بند مس۔
تدوکا ہفتہ نا چا اول اول کاروباری دے نا نیام ئٹی کاروبار ٹی 0.54 فیصد نا شیف بڑزی خننگا ا ندن 20 کروڑ 18 لکھ 23 ہزار 210 شیئرز نا ہل تس مس ہرانا سوب آن سرمایہ کار آتے 35 ارب رپئی نا خڑک نسخان ءِ سگوئی تما۔
بلوچستان نا علاقہ حب و کوئٹہ ٹی جتا ویل آتیٹ ارا بندغ ٹپی و ارٹ مرگ نا گواچی مسونو۔
حوال تا رد ئٹ حب ئٹ دکان اسیٹی سلنڈر نا ترخنگ آن تراک اس مس ہراڑان اسہ بندغ اس بیران مس۔
حب آن خڑک یوسف گوٹھ بس ٹرمینل تون اوار آ ویلڈنگ نا دکان ئٹ تراک آن ویلڈنگ نا کاریم کروک بیران مس اندن خڑک ساڑی اِرا بندغ ٹپی مسر۔ تراک ہموتم مس ہراتم اسہ گاڑی اسینا تیل نا ٹینکی نا ویلنڈنگ مریسہ ئس۔
ریسکیو حوال تا رد ئٹ جون و ٹپی آک ہسپتال آ دننگانو۔ پولیس نا رد ئٹ تراک گیس سلنڈر نا ترخنگ نا سوب آن مسونے۔
اندن پین حوال اسینا ردئٹ کوئٹہ میاں غنڈی نا مش آن مسہ دے متکنو جون اس خننگانے۔
پولیس نا رد ئٹ نیو سریاب پولیس ءِ تدوکا دے حوال رسینگاسس کہ میاں غنڈی نا مش آن خڑک چنا اسینا جون تموک ءِ۔ پولیس جاگہ غا سر مریسہ جون ءِ دوئی کریسہ اسپتال آ سر کرے ہراڑے ڈاکٹر نا رد ئٹ جون مسہ دے متکن ءُ ئسے ہرا مش آن تمنگ نا سوب آن مرگ نا گواچی مسونے۔ المی کاروائی آن گڈ جون چاہنداری کن مردہ خانہ ٹی تخنگا۔
حوال تا رد ئٹ تیوہ آ پاکستان ئٹ 11جولائی آن پر ئنا گمان ءِ، جہانی چائندار تا پاننگ ءِ کہ پاکستان و بھارت ٹی پر تا بناء 11 جولائی آن مننگ کیک، پاکستان و بھارت ٹی جمعی وڑ ئٹ ترند پرک گمانی ءِ۔
اندن چاہنداری تا رد ئٹ خلیج بنگال ٹی آندرا پردیش یا اوریسہ ٹی11 جولائی آن مچے زیات مننگ کیک، دا ہم پاننگ ءِکہ بھارت و پاکستان ئٹ جولائی ٹی منکن وڑ ئٹ پر تا گمان ارے۔
عید خڑک مننگ تون سبزی تا نرخ آتیٹ ودکی مننگ ء، دکاندار سرکاری نرخ نامے نا جاگہ آ تینا اوست ء نرخ الینگ ء پیماز نا سرکاری نرخ 45 رپئی کلو ء، دکاندار آک 60 رپئی کلو ٹی سودا کننگ ء۔
اندا وڑ لوبیا 75 رپئی اسہ کلو نا جاگہ آ 200 رپئی کلو ٹی سودا کننگ ء، سنٹ425 نا جاگہ آ 600 رپئی اسہ کلو مارکیٹ ٹی رسینگک، کبین سبزی تے الوک آتا پاننگ ء کہ ہر سال نا وڑ دا سال ہم عید خڑک مننگ تون سبزیک کبین کننگانو۔
شاری تا پاننگ ء بند و بست نرخ نامہ تو خلکنو ولے داسکان عمل کرفینگ اف، بند و بست دکاندار آتا تینا اوست آن تیخوک نرخ اتا زیا ہچ ء ایکشن الینگ اف ہراڑا دکاندار آتا پاننگ ء کہ ننے سبزیک کبین رسینگرا گڑا اڑزان امر سودا۔
بلوچستان نا علاقہ بیلہ،و کوئٹہ ٹی روڈ شکست نا جتا ویل آتیٹ4بندغ ٹپی و اسٹ مرگ نا گواچی مسونے۔
حوال تا رد ئٹ بلوچستان نا علاقہ بیلہ ٹی آر سی بھلا روڈ آ ارا بندغ بھاز ٹپی ریسکیو 1122 ٹپی آتے دوا درمان کرفے،گیشتر حوال تا رد ئٹ یک شمبے ناصوب کوئٹہ کراچی مین آر سی ڈی بھلا روڈ آ پولیس چیک پوسٹ شیاره ٹیارہ بیلہ نا ہند آ ٹرالر ویل ئنا گواچی مس۔
ہرنا سوب آن ارا بندغ بھاز ٹپی مسونے آن لائن ء رسینگوک حوال تا رد ئٹ ویل تروند ہننگ نا سوب آن مسونے،تروند ہنوک ٹرالر و ٹیک کننگ نا وخت آ روڈ آن شیف تماسس، ریسکیو 1122 ٹیارہ سینٹر ٹی آڑتوما ٹپی آک دوا درمان کننگ آن گڈ سول اسپتال بیلہ آ سر کننگار۔
اندن پین حوال ئسے نا رد ئٹ کوئٹہ نا علاقہ دے کہی بائی پاس آ ٹریلر نا ڈک لگینگ آن موٹر سائیکل آ سوار آتا بندغ مرگ نا گواچی و اسٹ ٹپی مسونے۔
گیشتر حوال تا رد ئٹ تدوکا دے کوئٹہ نا علاقہ دے کہی بائیپاس آ ٹریلر نا ڈک لگینگ آن موٹر سائیکل آ سوار ارا بندغ فتح محمد نیاز محمد مرگ نا گواچی مسونو،اندن علاؤالدین ٹپی مسونے،جونک و ٹپی آ ہسپتال آ سر کننگانو،پین کاروائی تعلقدار بند و بست کننگ ء۔
گیشتر حوال تا رد ئٹ تحصیل مند ہرا بلوچستان نا خاص کاروباری آ شار و بنجائی وزیر زبیدہ جلال صوبائی وزیر الحاج اکبر آسکانی، میر عبدالرؤف رند ئنا باوا پیرائی آ علاقہ ءِ۔
اندن بجلی و ایلو آسراتی تیان بے بشخ ءِ، ہراڑان لس مخلوق و زرعی خواستگار آک بھاز سختی تا گواچی ءُ۔
حوال تا رد ئٹ کوئٹہ چمن ریل نا بند مننگ آن ہزار مسافر آک سختی تا گواچی مروئی تمو، رپورٹ نا رد ئٹ محکمہ ریلوے نا کنڈان حکومت بلوچستان نا درخواست آ بوستان آن کوئٹہ و کولپور کن ٹورسٹ شٹل سروس بناء کننگ آن ہر ہفتہ ٹی ارا دے کوئٹہ آن چمن آ ہنوک آ مسافر ٹرین ٹی چمن مسافر ٹرین ہنپرو۔
ہرانا سوب آن مسافر آک پریشان مسر، ہزار آ مسافر آک کوئٹہ آن چمن و واپس چمن آن کوئٹہ اسکان سفر کیرا ولے شٹر سروس آن داسا ٹرین ہفتہ ٹی ارا وار ہنوف ہرانا سوب آن بندغ آک ویگن، یا گاڑی تیٹ سفر کرور لس حلقہ آک مسافر آک پاریر کہ اول آن ٹرانسپورٹر مسافر آتے ارا دو ئٹ لٹ پل کننگ ءُ۔
اندن داسا ریلوے نا ستا و اڑزان انگا سفر ئس گڑا حکومت بلوچستان نا کنڈان ٹورسٹ شٹل ٹرین سروس نا پن آ مخلوق ءِ سفر آن بے بشخ کریسہ ٹرانسپورٹر آتا دو ئٹ لٹ و پل کننگ ءِ۔
او پین پارے کہ بلکن حکومت مسافر ارا ویل آتے نظر ئٹ الیسہ گام ارفے و دن ءُ گام ارفپ ہرافتان لس مخلوق ءِ آسراتی تا جاگہ سختی تا گواچی مروئی تمے، به بختی تو دادے کہ حکومت نا کنڈان چلیفوکا ٹورسٹ شٹل ٹرین ہم خالی ہنانے۔
بلوچ اسٹوڈنٹس ایکشن کمیٹی نا پارہ گورنمنٹ پولی ٹیکنیک کالج ٹی بلوچ زانت کار، پروفیسر عزیز بگٹی نا یات اٹ اسے مجلس اس اڈ تننگا۔
مجلس اٹ بلوچ ادب تون تعلق دار آ بندغ آتون بلوچ ورنا تا بھلو کچ اس بشخ ہلک۔
دا مجلس اِرا بشخ ٹی ئس، اولیکو بشخ ٹی زانت کار آک پروفیسر عزیز بگٹی نا زند و اونا کڑد نا حوالہ ٹی گپ و تران کریر۔ ارٹمیکو بشخ پینل ڈسکشن نا اس ہراٹی زانت کار آک جتا جتا سوج آتا ورندی تے تریسہ کریر۔
اولیکو بشخ ٹی بلوچستان یونیورسٹی پولیٹیکل سائنس ڈیپارٹمنٹ نا کماش پروفیسر ممتاز بلوچ، پروفیسر ڈاکٹر منظور بلوچ، پروفیسر عزیز بگٹی نا مار زبرین بلوچ تینا خیال آتا درشانی کریر۔ اندن ارٹمیکو بشخ پینل ڈسکشن ٹی بلوچستان یونیورسٹی بلوچی ڈیپارٹمنٹ نا پروفیسر حامد بلوچ و ایڈکیٹ عمران بلوچ ئسر اوفتون اواری علی جان مقصود کرے۔
تران کروکاک پاریر کہ داٹی ہچو شک اس اف کہ پروفیسر عزیز بگٹی اسے خوانندہ اسینا حیثیت اٹ دا چاگرد ٹی بھاز بھلو بندغ اس ئس۔
عزیز بگٹی نا حق ہمو وختا پورو مریک کہ نن دننگا مجلس آتے اڈ تریسہ اودے مدامی یات کین دن اف کہ اسے مجلس سے آن پد اودے گیرام کین۔
او مونی پاریر کہ عزیز بگٹی مچا زند بلوچ خاص کر بلوچ ورنا تے ادب، بلوچ تاریخ آن سرپدی تس اندا سوب اس کہ او تیوی زند خواننگ و کتاب لکھنگ اٹ گدریفے۔ بلوچ ورناک خوارہ کہ او عزیز بگٹی زندہ تخر گڑا او کتاب تون سنگتی کیر، بلوچ تاریخ و ادب ءِ خوانر و سرپد مریر۔
اندن بلوچ اسٹوڈنٹس ایکشن کمیٹی نا پارہ غان بلوچستان کتاب کاروان نا اسے بک اسٹال اس ام خلننگا ہراٹی وڑ وڑ نا کتاب ملننگ ئس۔
