بلوچستان نا ضلع خاران ئٹ نصیر کبدانی لبزانکی دیوان خاران نا بروکا اِرا سال اکن گچین کاریک اڈ تننگار۔ ہرا گچین کاری کمیٹی نا باسک احمد مہر، زکریا عاجز و مومن مزار نا کماشی ٹی اڈ تننگار۔
مونی احوال آتا ردئٹ نصیر کبدانی لبزانکی دیوان خاران نا اِرا سال نا راہبندی وخت پورو مننگ آن پد بروکا اِرا سال کن پوسکنا گچین کاریک اڈ تننگار۔ دا گچین کاری تیٹی بلوچی بولی نا پنی آ شاعر قیوم سادگ صدر، نور الحق شاہ نائب صدر، مسرور شاد جنرل سیکرٹری، غنی حسرت ڈپٹی جنرل سیکرٹری، سفر خان راسکوئی شنگکار، لیاقت علی مال حساب دار و اسلم سید کلیت دار گچین کننگار۔
نصیر کبدانی لبزانکی دیوان خاران نا گچین کاریک ایسر
حب لیٹریری فورم و کیچ لٹریچر فیسٹول نا مُچیک بروکا تُوہ اٹ مرور
بلوچستان نا شار حب و ضلع کیچ ئٹ ادبی مُچی تا ہڈ تس نا پڑو کننگانے۔ دا مُچی تیٹ بھازا مجلس آتیتون اوار کتاب مُچی و جتا سرحال تیا سیمینار تیان بیدس ایلو مُچیک مرور۔
حب لیٹریری فورم پڑو کریسہ پارینے کہ حب لیٹریری فورم ہرا تدوکا سال تیان حب ئٹی خواننگ ءِ رواج تننگ کن کاریم کریسہ بسونے ہراتیٹ حب پبلک لائبریری ءِ ملنگ، علمی و ادبی مجلس و خواننگ نا ادارہ آتیٹ کتاب خواننگ ءِ مونی دننگ کن کتاب آتا ریویو سیشنز ہڈ تریسہ کرینے۔
دا لڑ ءِ پین مونی دریسہ ادارہ نا کنڈان 7 فروری 2021 یک شمبے نا دے گورنمنٹ بوائز ہائی اسکول حب ٹی اسہ دے ئی مُچی اس “ادبی بیٹھک و کتب میلہ“ نا سرحال آ ہڈ تننگو ہرانا مسخت حب ئٹی خواننگ و ادبی کاریم تے مونی دننگ ء، دا حب ئٹی تینا دروشم نا اولیکو مجلس مرو ہراٹی جتا سرحال تیا ہیت مرو و مچ بلوچستان آن پروفیسر، دانشور آک و جتا تپہ آتا چاہندارک بشخ ہلور۔
داڑان بیدس خوانندہ تے خواننگ نا رواج ءِ زیات کننگ کن کتاب مُچی ہم ہڈ تننگو ہراٹی جتا سر حال تیا اڑزان نرخ آ کتاب آک دوئی مننگ کرو۔
مُستی پاننگانے کہ آرٹس، راج، سیاست، ادب و تاریخ نا سر حال تیا پینل ڈسکشنز و ہیت و شرہ تون اوار ورناک و ہندی نوشتکار آتا است بڈی کن ”کتب پاشی“ نا ہم بند و بست کننگو، حب لیٹریری فورم علم دوست، ادب آن تعلق تخوک آک، شینکاری ادارہ و میڈیا پرسنز تون آوار خاص طلباء و طالبات آتیان خواست کینا کہ دا پروگرام ٹی اوار مریسہ دا مسخت ءِ سرسوب کننگ ٹی تینا حوق ءِ ادا کیر۔
اندن پڑو ئسے نا ردئٹ کیچ لٹریچر فیسٹول ہم ہفت فروری آ ڈنک ٹی مرو۔
کیچ لٹریچر فیسٹول کمیٹی کوالخواہ تا پڑو نا ردئٹ کیچ ئٹ علمی و ادبی و تعلیمی کاریم تے تالانی بشخنگ کن کیچ لٹریچر فیسٹول نا پن ئٹ اسہ دے ئی مُچی اس ہڈ تننگو۔
اوفتا پاننگے کہ اسہ دے ئی مُچی ئٹ کوئٹہ، کراچی، لاہور و ایلو علاقہ تیان چھاپ مروک کتاب آتے تخنگو ہراڑے اڑزان نرخ آتیا کتاب آک دوئی مننگ کرور اندن فیسٹول ئٹ مشاعرہ، سینڈ آرٹ، عکس آ نشان تس، و تاریخ تون اوار ایلو چاگردی سرحال تیا پینل ڈسکشن آک مرور۔
کیچ لٹریچر فیسٹول ہفت فروری یک شمبے نا دے سہب آن بیگہ اسکان کرکٹ گراونڈ ڈنک ٹی ہڈ تننگو۔
دالبندین و تمپ ٹی سم کاری، 2 بندغ بیران، اسٹ ٹپی
بلوچستان نا ضلع دالبندین و تمپ ٹی سم کاری نا ویل آتیٹ ارا بندغ مرگ نا گوچی و اسٹ ٹپی مسونے۔
حوال تا رد ئٹ دالبندین نا علقہ ڈنو نا خڑک سم کاری نا سوب آن اسہ بندغ اس مرگ نا گواچی و اسٹ بھاز ٹپی مسونے، جوْن و ٹپی آ بندغ پرنس فہد ہسپتال آ سر کننگانو، اندن مرگ نا گواچی مروکا بندغ نا چاہنداری عبدالمنان نوتیزئی نا پن ئٹ مسونے ۔
پین حوال ئسے نا رد ئٹ تمپ نا علاقہ نظر آباد ٹی موٹر سائیکل آ سوار نادرست سلاء بند بندغ آتا سم کاری نا سوب آن برکت پنی ءُ بندغ اس بیران مسونے۔
ہڑتوما ویل آتا سوب آک دائسکان سما تمتنو۔
تربت: سم کاری آن ارا بندغ ٹپی، ذمہ واری ء بی ایل ایف ارفے
بلوچستان لبریشن فرنٹ نا ترجمان میجر گہرام بلوچ نا درست جاگہ ئسے آن بیان اس شینک کریسہ پارے کہ سرمچار آک ضلع کیچ نا بنجائی شار تربت، سنگانی سر ٹی ریاستی ڈیتھ اسکواڈ نا کارندہ ء جہلو ٹی ٹک کریر۔
ترجمان پارے کہ سنگانی سر ٹی بورڈ ء بْن ٹی اسہ دکان ئسے نا مونا تولوک داؤد قدیر آ سم کاری کننگا ہراڑان او بھاز ٹپی مسونے، داڑان گڈ خڑک ساڑی اسہ لس ء بندغ اس ہم مچے ٹپی مسونے، ہرانا ننے افسوز ء، نن لس مخلوق ء یات تینا کہ او سرکاری کارندہ آتیان مر مریر دا کارندہ آک جتا کنڈ آتیٹ سلاء بند مریسہ چرینگرہ و علاقائی مخلوق ء سما ء کہ او ریاستی کارندہ ء، اندا سوب آن اوفتیان مری تخیر، دا وڑ لس مخلوق تینا بندغ آتا نسخان آن بچنگ کیک۔
بیان ٹی پاننگا کہ داؤد قدیر پاکستانی ملٹری انٹیلیجنس (ایم آئی) نا کارندہ ئسے، او بلوچ آتا مخبری، خون، برمتہ و بیگواء کننگ ٹی پاکستانی فوج تون اوار تریسہ کرینے، دا نیٹ ورک نا تیوہ آ کارندہ آتا ننے سما ء و تیوہ آتے ٹک کرون۔
میجر گہرام بلوچ مسی پارے کہ کوزہ گیر فورسز نا کمکار ریاستی ڈیتھ اسکواڈ آتے نن خاص ٹک کرون ، داڑتون اوار لس مخلوق آن ہم خواست کینا کہ او دژمن پاکستانی فورسز آن مر مریر سرمچار آک اوفتے ہر وخت ٹک کننگ کیرا۔
یاتی مرے داکان مست 27جنوری آ پاکستانی فورسز ٹک کننگاسس ہرانا ذمہ واری ء بی ایل اے ارفیسس۔
ترجمان نا پاننگ ئس بلوچ لبریشن آرمی نا سرمچار آک کیچ نا علاقہ بلیدہ ٹی گردانک نا ہند آ کوزہ گیر پاکستانی فوج نا اسہ گاڑی ء آئی ای ڈی ئٹ ٹک کرینو، تراک ٹی گردانک واٹر سپلائی آن پاکستانی فوجی چیک پوسٹ کن دیر دروک آ فوج نا اسہ دیر نا ٹینکر ئس بھس مسونے، ہرانا سوب آن دژمن ء جانی و مالی نسخان مسونے۔
او نا پِن ءِ لُمّہ ءِ وطن | شاعر: باسط مہر
او نا پِن ءِ لُمّہ ءِ وطن
دا ڈیھ ئنا او گواڑخ ءِ
اونا پِن ءِ لُمہ وطن
او پُھل ءِ چمبیلی ئنا
او نازبُو او نرگس ءِ
بِلسُم نا رنگاک اوڑ تُنو
عطر و زباداک اوڑ تونو
او فکر ئنا خوشبو ئسے
تالان ءِ ہر دامان ہٹی
بولان ہٹی شاشان ہٹی
مکران ہٹی ماران ہٹی
تینا وطن خاران ہٹی
مُچا بلوچستان ہٹی
دا ڈیھ ئنا او گواڑخ ءِ
او نا پن ءِ لُمہ وطن۔۔۔۔!!
چلتن خلیکک لیلڑی
نازیفک اود ءِ شیعر تیٹی
شُوآن ئنا لِیکو تیٹی
مش تیٹی بس پِنک توار
گوربام دیگر سُہب و شام
لُمہ وطن نا پن مُدام
دا ڈیھ ئنا او گواڑخ ءِ
او نا پن ءِ لُمہ وطن۔۔۔!!
دا نن تہار ءَ شام ئٹی
اِستار ئسے طُوبے ئسے
اونا ئسہ بس جلوہ غان
ماگم نا مسُر خنک شیف
او ڈس ءِ تِسک سُہب ئنا۔۔!
او روشناؤ دے ئسے
مَش تا شم آن داپار ام
مَش تا شم آن ایپار ام
جَل تا روانی دیر ئنا
نازیفسہ دُن پاریسہ
یاقوت ئسے !
مرجان ئسے !
او تو اَسِٹو لال ئسے۔۔!!
او بے بہاؤ خوار ئسے
او نا بدل دُنیا ٹی اف!!
تِس جُہد ہمت حوصلہ
ملٌ آتے تینا ڈیھ ئنا
پارے اَسٹ ءِ نظریہ
پارے اسٹ ءِ نا کسر
او بیرہ آجوئی ءِ بس۔۔!!
او سائے دلدستا تِخا
لُمہ وطن نا خاطر آن۔۔۔!!
ہر شیرہ زال آ دروشم ئٹ!!
ہر اُستٹی او زندہ ءِ
ہر دور ہٹی او زندہ ءِ
او کستہ نے او کسپکک
ہر دروشم ئٹ او زندہ ءِ !!
ہر موسم ئٹ او زندہ ءِ
دا ڈیھ ئنا او گواڑخ ءِ
او نا پن ءِ لُمہ وطن !!
او نا پن ءِ لُمہ وطن۔ !!
باسط مہر
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
بلوچ راہشون کریمہ بلوچ ءِ ہندی کننگا، زالبولک دُروت ندر کریر
کینیڈا ٹی تینا باہوٹی مروک بلوچ سیاسی راہشون کریمہ بلوچ ءِ اونا باوہ پیرئی آ علاقہ تمپ ٹی ایسری ہندی کننگا، تمپ تون اوار تیوہ آ کیچ ئٹ کرفیو خلوک مس، اندن موبائل نیٹورک آک اِرا دے آن بند مسر۔
کریمہ بلوچ نا نماز جنازہ ٹی زالبول تیتون بندغ آتا بھلو کچ اس اوار ئس۔ ایلو علاقہ تیان مخلوق نا تمپ آ ہن و بر آ فورسز نا کنڈان رکھ خلوس ئس۔
کریمہ تدوکا سال دسمبر ٹی کینیڈا ٹی بیران مس و ٹورنٹو پولیس اونا بیرانی نا پد ئٹ ڈو ئنا گمان ءِ منیتوئسس داسکان اونا خاہوت و بلوچ سیاسی و چاگردی مخلوق مننگ افس و سر و سوج نا خواست کننگ ءُ۔
کریمہ بلوچ ءِ ہندی کننگ آن گڈ زالبول تا بھلو کچ اس اونا قبر آ مُچ مس و اوڑا بی ایس او نا بیرک ءِ شاغسہ دروت ندر کریر۔
دا وخت ضلع کیچ نا بھاز آ علاقہ آتیٹ فورسز نا کارندہ آک بھلو کچ اسیٹ بھلا روڈ آتا و ایلو کسر تیا سلیفنگاسر ہرا مخلوق ءِ ہن و بر کن موکل تیتوس۔
تدوکا دے بھازا ویڈیوک چاگردی حوالکاری میڈیا آ تالان مسر ہرافتیٹ بندغ آتا پن کروک علاقہ ٹی ہننگ کن فورسز نا کنڈان توننگا۔
ایلو پارہ غان ضلع کیچ ٹی موبائل نیٹورک تدوکا دے ئنا ئسے بند مسونے، اندن علاقئی حوال تا رد ئٹ کیچ کرفیو نا ندادہ نشان تننگ ئس۔
کولخواک مخلوق نا ہن و بر آ رکھ، موبائل نیٹورک نا بند مننگ نا رد ئٹ ہچ پاتنو، داسکان پن کروک گام تیا حکومت نغد کاری تو مون تننگ ءِ۔
ضلع پنجگور و خاران ٹی کریمہ بلوچ نا مُر جنازہ خواننگا، تدوکا دے کراچی ٹی ہم اونا مُر نماز جنازہ خواننگاسس اندن کوئٹہ ٹی شہدائے بلوچستان قبرستان نیو کاہان، خضدار و ایلو علاقہ آتیٹ دا رد ئٹ پڑو شینک کننگانے۔
کریمہ بلوچ نا جوْن بلوچستان آ سر، پگہ جہی کننگو
حوال تا رد ئٹ کریمہ بلوچ نا جون اینو بلوچستان آ اتنگانے، مخلوق کیچ نا بنجاہی شار تربت ٹی مچ ءِ۔
گیشتر حوال تا رد ئٹ داکان مست جوْن کراچی بالی پٹ آ توننگاسس، کریمہ بلوچ ءِ اونا باوہ پیرئی آ علاقہ تمپ ٹی ایسری ہندی کننگو۔
داکان مُست کریمہ بلوچ نا خاہوت نا پاننگ ئس کہ کریمہ بلوچ ءِ ایسری ہندی کننگ اونا باوہ پیرئی آ علاقہ تمپ ٹی 25 جنوری دو شمبے نا دے ویگہ نا وخت کننگو، اوفتا مُستی پاننگ ئس کہ کریمہ بلوچ نا جوْن کینیڈا آن کراچی اترینگا، ہراکا اونا اُرا والاک جوْن ءِ بلوچستان آ درور۔
پین حوال ئسے نا رد ئٹ ضلع کیچ نا موبائل سروس بند کننگانے۔ موبائل سروس اینو سہب آن بند ءِ ہرانا سوب آن کاریمی آ بندغ آتون اوار لس مخلوق سختی تا گواچی ءِ۔
کولخواک موبائل سروس نا بند مننگ نا رد ئٹ ہچ پاتنو دائسکان، بھاز آ مخلوق نا پاننگ ءِ کریمہ بلوچ نا جوْن ءِ ہتنگ و ہندی کننگ نا سوب آن سروس ءِ بند کننگانے۔
پنی آ بلوچ زالبول راہشون و بلوچ اسٹوڈنٹس آرگنائزیشن آزاد نا مسکوئی چیئرپرسن کریمہ بلوچ ہرا تدوکا سال دسمبر نا بیس تاریخ آ کینیڈا نا شار ٹورنٹو آن بیگوا مسوسس و ایلو دے اسہ دیر ئسے آن اونا جوْن خننگا۔ دانا ردئٹ بلوچستان تون اوار تیوہ جہان ئٹبرانز و مچیک کننگار۔
تدوکا دے راجی حوالکاری نا سائٹ آ بلوچ یکجہتی کمیٹی نا کنڈان دا رد ئٹ کپمپئین کننگا ہرا پاکستان ٹی ٹاپ ٹرینڈ آ بس۔
کریمہ بلوچ نا گمانی آ خوْن ءِ بلوچ راج دوست مخلوق و بھازا بندغی حق ئنا ادارہ آک ریاستی خوْن اس پارینو، کریمہ بلوچ نا اَرغ و بلوچ نیشنل موومنٹ نا راہشون حمل حیدر ہم کینیڈین پولیس نا سر و سوج آ بے جاراتی نا درشانی کرینے۔
بلوچستان ئٹ دیگ دان تیا رکھ – ٹی بی پی تیدری
بلوچستان ئٹ دیگ دان تیا رکھ
دی بلوچستان پوسٹ تیدری
شہداد شمبے زئی
زامران ضلع کیچ مکران بلوچستان نا اسہ سب تحصیل ئسے، ہرا ضلع کیچ نا جہندمی دے کہی بلوچستان (سیستان و بلوچستان) نا سیم سری ضلع شھر ستان سروانا نا قطب ئٹ ءِ۔
زامران دے کہی (ایرانی) بلوچستان نا علاقہ بم پشت نا قطب و ھُنگ نا دے ٹک، اندن ضلع کیچ نا تحصیل مند و تمپ نا جہندمی و بلیدہ نا جہندمی دے کہی ٹی ءِ۔ گزی کور ہرا گیشکور تون اوار مریک، زامران اونا دے کہی و ضلع پنجگور نا علاقہ پروم نا قطبی دے کہی ئٹی ءِ۔ دا قطب دے کہی مشی لٹ ءِ زامران پاننگک۔
زامران بست و بندی ردئٹ مُسہ بشخ کروک ءِ:
1۔ سب تحصیل زامران: ہرا چار یونین کونسل بادئی، ناگ، سیاہ گیسی و دربلی آ تالان ءِ۔
2۔ برُز زامران: ہراٹی زراگین، بُگان، ارچنان کاپار، گیشتر دان چُر، ھیجی تون اوار پین بھازا خلق آک اوار ءُ ہرا بست و بندی ردئٹ تحصیل تمپ نا بشخ ءُ۔
3۔ بگان زامران: ہرانا اسہ چنکو بشخ اس بست و بندی ردئٹ دے کہی بلوچستان نا بشخ ئسے۔
زامران بلوچستان نا اسہ تاریخی و ایب کیب نا ردئٹ گچین علاقہ ئسے۔ دا بڑز مش، تاریخی قلعہ، زیبا غا وادی، چشمہ، شک و تلار تا ڈیہہ ئسے، ہرا ہتم ئٹ اُوننگ کرزوک ءُ ندارہ کشک۔ دا جاگہ نا مُد باسنی تیٹ درجہ حرارت 45° آن گدرینگک و چلہ ئٹ درجہ حرارت یخ تفنگ نا ٹک آن °5- سر مریک۔ اندا سوب ءِ کہ داڑے مچ و سوف اسہ باغ اٹ خننگک مریرہ۔ زامران ئٹ مچ و سوف آن بیدس انار، انگور، امرود، امب، مالٹا و بھاز آ وڑ نا میوہ تیان بیدس غلہ، برنج نا ہم کشت کشار کننگک اندن مش ئنا انجیر قدرتی خننگک و مالداری ہم دا جاگہ نا گچین آ روزگار ءِ۔
پِر نا کمبوتی نا سوب تدوک سال آتیان زامران ئٹ اسہ پارہ غا کشت و کشار نا پِڑ بد حالیت اٹ زیمی مسونے، ایلو پارہ غا قدرتی خرسی نا کمبوتی ربیدگی مالداری ءِ بھاز زیمی کرینے۔ حکومت نا پارہ غان ہم داڑے روزگار نا آسراتیک بھاز کم ودی کننگانو، اندا سوب گزران کن زامران و ایب کیب نا مخلوق ایران آن تیل ہتیسہ بلوچستان ئٹ بہا کننگ نا کاروبار تون تفوک ءُ۔ زیات مروک بے روزگاری نا سوب آن دُنو علاقہ ہم ساڑی ارے ہراڑے تیوی خلق دا کاروبار تون تفوک ءِ۔ اگہ سوب ئسے آن کاروبار ئٹ ہڑاند اس تمہ گڑا بین ئنا گواچی مریرہ۔
تدوکا سال دسمبر ئٹ بلوچستان حکومت بنجائی حکومت نا پرمان آ اسہ نوٹیفکیشن اس شینک کریسس کہ ایرانی تیل نا کاروبار آ رکھ خلنگانے، دا نوٹیفکیشن آن گڈ امیر بلوچستان نا غریب آ خلقت تینا اُرا تیٹ نیسی نا ندارہ ءِ خنیسہ نوٹیفکیشن ءِ بلوچستان نا زرگزرانی خوْن پارے۔
نن دا ہیت ئنا پٹ و پول کن پیشن مسون کہ ایرانی تیل نا کاروبار تون تفوک مخلوق دا نوٹیفکیشن نا بابت انت پائک؟ نن بھاز آ بندغ تے خنان ولے خلیس نا سوب کس تینا چاہنداری ءِ پاش کریسہ ہیت کننگ آ امنائی کننگ اَلو۔
“اوفک تینکن کرتار پور ٹہیفرہ و ننکن آہنی واڑ خلیرہ، دوارہ پارہ بلوچ ایلمک گنوک ءُ، ہیت ءِ بنپسہ، ہراتم نی ننے آن ننا باخو ءِ پلیسہ، ہر چار گام ننا بے شرفی ءِ کیسہ گڑا بلوچ ایلم الّمی گنوک مرو۔” دا زامران آن تعلقدار دلمراد ( فرضی پِن) ہرا تیل نا کاروبار تون تفوک ءِ، او اصل چاہنداری ءِ پاش کپرنگ نا شڑط آ ننتون ہیت کننگ آ امنا مس۔
دا کسہ بیرہ دلمراد زامرانی نا اف بلکن بلیدہ زامران نا ہر ہمو بندغ نا ءِ، ہرانا کُن خوْر ایرانی تیل نا ہتنگ نا کاروبار تون ءِ۔
دلمراد زامرانی زوت نا نوٹیفکیشن آن زیات ایران سیم آن تربت شار اسکان بریسہ فورسز نا چیک پوسٹ آتیا مخلوق نا بے شرفی آ ہیت کریسہ تینا اُست آ تخوک بڈ ءِ سبک کننگ ءِ گچین سرپد مریسہ پائک۔
دے کہی بلوچستان تون دے ٹکی بلوچستان نا سیم سری علاقہ جالگی، سرکیزی و ابدوئی تیوی بلوچستان آن لکھ آ بندغ تا کُن خور نا بنجا ءِ۔ ہزار آتا کچ ئٹ مخلوق داڑے بینگن، ملاس و نن تا تغ ءِ ندر کریسہ ایران آن منہ گیلن ڈیزل و پیٹرول نا امیت تون تولوک مریرہ کہ ایکان ایرانی گجر نا سُم تیان بچیسہ کس سیم آ سر مرے، دوارہ دلمراد کونا ہزار آ بندغک ہرا داڑے جالگی و ایلو سیم سر ہند آتیا تیل بہا ٹی ہلیسہ بلوچستان نا شار اسیٹی بہا کریسہ تینا اُرا نا دیگ دان ءِ لگفرہ۔
دلمراد پائک کہ “چار نن نا بے تغی، بینگنی، ملاسی، یخ آن گڈ ہراتم ننے تیل رسینگک و نن پدریس نا دروشم ئٹ سفر کن مُخ ءِ تفینہ گڑا جالگی ئٹ ننے ایف سی ( فرنٹیئر کور ہرا پاکستانی لشکر نا ادارہ ئسے) چیک پوسٹ آ اسہ نن وختس زیات توننگ آن گڈ پنچ ہزار رشوت ہلیسہ رادہ کنگک، جالگی آن منہ کلومیٹر مُر پیرپراھگ آ اسیکہ وا ہمو وردی ئٹ سلاء بند آک مون آ بریرہ، پنچ گھنٹہ اسکان توریسہ چاہنداری نا سوج آن گڈ اِرا ہزار روپئی رشوت اٹ ہیت ٹہینگک۔”
دلمراد تینا ربیدگی بلوچی رومال ئٹ پیشانی آن مِش تے ساف کریسہ تینا ہیت ءِ برجاء تخیسہ پائک کہ “دوارہ ناگ نا علاقہ ئٹ ایف سی چیک پوسٹ آ ننے بد حالیت آ بے شرفی تون مون تروئی تمک۔ داڑے ارشد پن کروک ھُدّک پنی صوبیدار نا ڈیوٹی ءِ، ہرانا تعلقداری پنجاب آن ءِ، او نہ بیرہ ننے بلکن مسافر گاڑی تے ہم گھنٹہ آتے اسکان توریسہ زالبول تا ہم بے شرفی ءِ کیک و مُر خڑک نا خلقی مخلوق ہرا خوشی و غم نا دے تیٹ داکان ایڑے سفر کننگ آ مریرہ، اوفتے ہم ہننگ بننگ آ دا بے بندغی آ رویہ تون مون تروئی تمک۔ وارس ہننگ کن ہلنگک گڑا وارس چیک پوسٹ آن واپس کریسہ اسٹ ایلو نا خوشی و غم ئٹ اوار مننگ کن ہلنگپک۔”
دلمراد زامرانی تینا دروشم آ سوختئی و بے وسی ءِ ڈھکنگ نا کوشست ئٹ خن تے ڈغار آ خلیسہ تینا ہیت ءِ برجاء تخیسہ پائک “داڑے منہ گھنٹہ کرینگ کُننگ آن گڈ ارشد صوبیدار ءِ چائے پاڑی (رشوت) تریسہ نن دوارہ تربت کن پیشن مرینہ۔ اوکان گڈ درَاچکی ناگ آ اسیکہ وا ایف سی والاک مون آ پیری خلنگ آ مریرہ، وا ہمو کرینگ نا لڑ بناء کیک و چائے پاڑی (رشوت) تننگ آن گڈ جان چُٹک۔ دئے منٹ گدرینگپک کہ باہوٹ بازار گلِّی ئٹ اسہ پین چیک پوسٹ اسیتون مون ترائی تمک، دا جاگہ نا خُلکن است آ صوبیدار ننے آن پیسہ ہلپک و نہ کرینگ ایتک بلکن بلوچ ایلم پاریسہ ننے آن اسٹ اسٹ آ سوج کیک کہ دہشت گرد ( بلوچ مزاحمت کار) آتے خنانرے؟ اوفتا بابت معلومداری ایتبو، اوفتا مخبری کبو، و دُنو بھاز سوج کننگک و داکان نن درغ نا خوش ءُ دروشم اسیتون پیشن مرینہ۔ بیست منٹ آن گڈ الندور کراس آ جنگی یونیفارم ئٹ سلوک کارندہ آتون مون تمک۔ گھنٹہ آتا ودار، وا ہمو سوج آک، ہمو ورندیک، اسیکہ وا چائے پاڑی نا زر و ہمو سخت آ پند برجاء مریک۔”
دلمراد آن ہراتم نن سوج کرین کہ داخس بے شرفی آن گڈ ہم او انتکن دا کاروبار تون ءِ گرا ونا پاننگ ئس کہ “نن زامران آن پیشن مرینہ، تیل ہلیسہ واپس تربت ئٹ پیہنہ، دا نیامٹ بھازا دیک لگرہ، تیوہ غا خواریک و سختیک تینا جاگہ غا، نن تیوہ غا کسر اسہ پارہ غان کرینگ و بے شرفی نا گواچی مریسہ کینہ و ایلو پارہ غان نیمہ غان زیات کٹیا غان زیات رشوت ئٹ فوج ءِ ایتنہ۔ دا تیوہ غاتے نن دا سوب سگنہ کہ اُراٹی ننا چُناک بین آن کسپس، نن بیوس اُن، دا کاروبار آن بیدس ننتون پین روزگار اف۔ ولے دا تیوہ غاک کم ئسر کہ داسہ دا روزگار نا اسٹ آ سیبو ءِ ہم ننے آن پُلنگیسہ ءِ۔ داڑان جوان ئس کہ ننے بس اسہ وار ئتون کسفنگہ۔”
دلمراد پائک کہ دا کاروبار نا ایسری نا سوب بلوچستان نا مخلوق زرگزرانی بھُس کاری نا گواچی مرو، او اختر مینگل و داکٹر مالک آن خواست کیک کہ نم ننا جان ءِ ایف سی نا کرینگ آتیان خلاس کرفنگ کتورے ولے خدا نا پن آ دا کاروبار ءِ بند کننگ کن ہلپبو۔
دلمراد ایسر آ چِڑیسہ پارے کہ “بلیدہ زامران نا ہفتاد ہشتاد ہزار آباتی کن چار آن پنچ بھلو ایف سی کیمپ و 28 آن زیات چیک پوسٹ ساڑی ءُ، دافتیٹ مخلوق نا بے شرفی و صاحب آتا (فوجی افسر) آتا کٹیا آن بیدس پین ہچ مفک۔ بلوچستان اوفتیکن خیسن نا بیدہ تروک آ چُک ءِ و نن دانا وارث آک بین آن کہنگ اُن۔”
حکومت نا پارہ غان نہ بیرہ تیل نا کاروبار آ رکھ خلنگانے بلکن دے کہی و دے ٹکی بلوچستان نا ہمو متنازعہ غاک سیم ءِ واڑ کننگ نا کاریم ہم بناء کننگانے، و دا تیوہ غا کسر نا خواری و سختی تیان گڈ سیم سر آ واڑ خلنگ ئٹ فورسز دلمراد کوْن آ بیوپار آتے توریسہ اوفتیان زوراکی ئٹ مزورکاری ہلنگ ءِ۔ واڑ نا پلر ءِ ٹہیفنگ کن دہاڑی نا مزور نہ بلکن تیل دروک بلوچ مزورکار تے توریسہ مزورکاری کرفنگک و اوفتا گاڑی تا تیل تے دڑفسہ بجری و مِش ہم اوفتا گاڑی تیٹ لوڈ کریسہ اوفتیان کاریم ہلنگک۔
یاتی مرے بلوچ قوم پرست، بلوچستان ءِ پاکستان و ایران ئٹ ونڈ کروک دا متنازعہ سیم ہرادے گولڈ سمتھ لائن ہم پارہ، ءِ منپسہ۔
ہراتم دلمراد آن نن سوج کرین کہ دا سیم سری واڑ ءِ خلنگ آن گڈ تیل نا کاروبار آن بیدس زند آ انت زیم تمو؟ گڑا او پارے “دے کہی و دے ٹکی بلوچستان ئٹ، گچین وڑئٹ زامران و پروم تون اوار آ علاقہ غاک، دے کہی و دے ٹکی بلوچستان نا علاقہ شمسر، باسد، تھدیم، دربلی، کٹگاں، گربن، میتہ، سنگ، ڈمبانی، تحتانی گتان، کسوئی، سیاہ گیسی، ملوئی، تلان سر، گربن، سرکیزے، ہتک، ناگ، خان کلگ بادئی، پوگنزان، سادیم ، اسپیتین گر ئٹ اسٹ ایلو نا سیالک ءُ۔ کَرن آتیان بیدس سر و سوج آن اسٹ ایلو نا رہی آ ہننگ بننگ ءِ، نن اسٹ ایلو نا خوشی و غم ئٹ اوار مرینہ۔ داسہ زامران ءِ ہم واڑ ئٹ جتا کننگسہ ءِ۔ داڑان اسہ پارہ غا ننا تینا سیال آتیان مُری مرو و نن اسٹ ایلو نا خوشی و غم تا مچی تیٹ اوار مننگ کپرون، ایلو پارہ غان ننا زرگزرانی بدحالی نا دور بناء مرو۔ نن پدماندہ تو ارین، داسہ بلکن اسہ ترندو بین ئسے نا حالیت کن ننے داسی آن تیار کروئی تمو و نن داڑکن ہچس کننگ کپنہ واہم خواست کننگ کینہ کس دا بندغی المیہ ءِ تونگ کن کڑد ایسری ایتے۔”
بلوچستان مالو آن بھاز آ ویل آتا پلویڑ ئٹی ءِ، داسہ امر کہ رکھنگ نا پن آ بلوچستان نا جتا علاقہ آتیٹ واڑ خلنگ نا کاریم بناء کننگانے، دا عمل آن پک بے جاراتی و بے یخینی حالیت اسیٹی ودکی مرو، و دا دعویٰ تے شابیتی رسینگو کہ بلوچستان ءِ اسہ کالونی ئسے نا حیثیت ئٹ اوننگک۔
شاہرگ ٹی فورسز آ بمب جہلو، بی ایل اے ذمہ واری ءِ ارفے
بلوچستان نا ضلع ہرنائی ئٹ شاہرگ نا ہند آ اینو شار آن خڑک پاکستانی فورسز آ بمب جلہو مس، بمب جلہو ہموتم مس ہرا وخت روڈ آن فورسز نا گاڑی گدرینگ ئسر ہرانا دک اٹ اسہ گاڑی اس بس۔
تراک آن گاڑی ءِ نسخان رسینگا، تراک نا سوب جانی نسخان تا بابت کوالخواک ہچ پاتنو۔
بلوچ سلاء بند تنظیم بلوچ لبریشن آرمی جلہو نا ذمہ واری ءِ ارفے۔ بلوچ لبریشن آرمی نا ترجمان جیئند بلوچ بیان اس شینک کریسہ پارے کہ بی ایل اے نا سرمچار آک اینو ہرنائی نا علاقہ شاہرگ ٹی پاکستانی فوج ئنا اسہ گاڑی ءِ بارود نا تراک ٹی ٹک کریسہ دژمن فوج نا اسہ کارندہ اس مرگ نا گواچی و اندن بھاز آتے ٹپی کرینو۔
اونا مستی پارے کہ بی ایل اے نا سرمچار آک دژمن نا گاڑی ءِ ہمو وخت ٹک کریر ہرا وخت او قافلہ نا دروشم ئٹ ہننگ ئسر، دا جہلو ٹی دژمن نا اسہ فوجی ٹرک بُھس کننگا۔
جیئند بلوچ نا پاننگ ئس کہ دژمن فوج آ ننا دا جہلو نا مسخت بلوچستان نا پورو آجوئی ءِ و خودمختار دروشم نا واپسی و کوزہ گیر فوج نا بلوچ سرزمین آن کشنگ اسکان ءِ، مسخت نا دوئی کننگ اسکان بی ایل اے نا جہلوک ترندی تون اوار برجاہ مرور۔
یاتی مرے تدوکا دے بلوچ ریپبلکن آرمی نا ترجمان بیبگر بلوچ میڈیا ٹی شینک کروک اسہ بیان اسیٹ پارے ننا سرمچار آک تدوکا نن تمپ نا علاقہ کوہاڑ ٹی سم کاری کریسہ ریاستی ڈیتھ اسکواڈ نا اسہ کارندہ عارف ءِ مرگ نا گواچی کریر، عارف بھاز آ سال آتیان جمیل پنی آ ریاستی کارندہ نا سرکماشی ٹی تمپ نا ایب کیب ٹی دُزی ٹی اوار مننگ تون اوار لس آباتی نا برخلاف فوجی آپریشن آتیٹ فوج تون اوار ئس۔ فوجی کارندہ آتا کنڈان عارف ء علاقہ ٹی بھتہ خوری و بدمعاشی نو پورو موکل تننگا ہرا علاقہ نا چپ انگا مخلوق نا زند ء حرام کریسس۔
بیبگر پین پارے کہ نن لس مخلوق آن اسہ وار پد خواست کینا کہ او ریاستی کارندہ آتا خڑک ہنپس نن اوفتے ہر جاگہ ٹک کننگا کینا۔
