رسینگوک حوال تا رد ئٹ کوئٹہ، ملاکنڈ و ایب کیب ئٹ زمین جمب مس ہرنا سوب آن شاریک خلیس نا گواچی مسر۔

گیشتر حوال تا رد ئٹ کوئٹہ و ایب کیب ئٹ زمین جمب مس، پیما مرکز نا رد ئٹ دانا تروندی 4.5 ریکارڈ کننگانے، اندن مرکز جہندمی دے ٹکی اوغانستان نا علاقہ پاننگانے ہرانا کڑمبی 5.4 کلومیٹر ئس۔

زمین جمب درک کننگ تون اوار بندغ آک اُرا و دفتر تیان پیشن مسر، داسکان جانی ء نسخان نا حوال اف۔

دے ٹکی بھارت ئٹ طاغتور آ سمندری طوفان ‘یاس’ مَٹ آن جوڑ مروکا ہزار آتا اُرا تے بُھس کرے و کولکتہ نا بالی پٹءِ بند کننگ آ مجبور کرے۔ سمندری طوفان آن ساحلی علاقہ تیٹی بھاز نسخان رسینگا و دا اسہ ہفتہ اسیٹی بروکا ارٹمیکو سمندری طوفان ءِ۔ کوالخوا تا پاننگ ءِ کہ طوفان ‘یاس’ نا سوب آن 140 کلومیٹر اسہ گھنٹہ نا ترندی ئٹ گڑز وتہو اس اندن زیمی آ علاقہ تیان بندغ آتے لڈ و ہنپ کروئی تما۔

تدوکا ہفتہ طوفان ‘تاوئے’ بھارت نا دے کہی ساحل تون لگاسس، ہرانا سوب آن سدا تا بندغ آک بیران و ہزار آک لڈ و ہنپ کننگ کن بیوس مسوسسر۔ کوالخواک پاریر کہ طوفان نا دکّ ئٹ بروک آ علاقہ تیان دئے لکھ آن گیش بندغ لڈ و ہنپ کریر اندن ٹیلی ویژن آ شینک مروکا عکس ئٹ ریاست اڑیسہ ٹی ترندآ تہو و پِر خننگا، ودکان و اُراک تباہ ءُ حالیت اسیٹی خننگار۔

مد ئنا حوال تروک آ محکمہ نا کوالخوا تا پاننگ ئس کہ اڑیسہ و ہمسایہ ریاست دے کہی بنگال آن بھاز بھلو طوفان نا ڈک ہلنگ نا امکان آک اریر ہرانا اثر آک بنگلہ دیش اسکان خننگور ولے اودے طوفان آن خطرہ اف۔ دے کہی بنگال نا وزیر اعلیٰ ممتا بینرجی صحافی تے پارے کہ طوفان آن مٹ آن جوڑ مروکا اِرا ہزار اُرا و خلق آتے نسخان رسینگا۔

اسے پین ریاستی وزیر اس بنکم ہازرا پارے کہ ‘ای ہچو وخت اس دُن خنتوسٹ’۔ خلیج بنگال نا جزیرہ ساگر نا شیف علاقہ و سیل و سوات ڈِگھا نا علاقہ ٹی سمندر نا دیر تہٹی بس، ہراڑے پولیس اسٹیشن ءِ بھاز نسخان رسینگا۔ بنکم ہازرا پارے کہ پد مہ پد برز انگا لہر آک ساحلی پٹی ءِ بُھس کریر، ہر جاگہ ڈب ہلوک ءِ و خلق آتا حوالکاری بند مسونے۔

ریاست نا کولکتہ بالی پٹءِ چہارشنبہ نا شام اسکان جہاز آتیکن بند کننگا۔ یاتی مرے کہ ہر سال دا توہ ئٹ خلیج بنگال ئٹ طوفان اسہ معمولی ءُ ہیت ئسے ہرا بھازا وخت ساحل تون لگرہ ہراڑان بھارت و بنگلہ دیش نا ساحلی علاقہ تیٹی جانی و مالی نسخان مریک۔

پولیس نا پاننگ ءِ کہ دا سہ شنبہ نا دے آ اڑیسہ نا ضلع جگت سنگھ پور نا ساحل آن خڑک کشتی چپی مننگ آن گڈ دئے بندغ ءِ بچفیر کریر۔ بھارت ئٹ کورونا نا خوفناک لہر نا سوب آن طوفان نا تیاری تیٹی سختی تون مون تروئی تمنگ ءِ۔ اڑیسہ کوالخوا تا پاننگ ئس کہ او مسہ ضلع تیٹی کورونا ٹیسٹنگ، ویکسی نیشن و اُرا اُرا تیٹی ہنیسہ ہیلتھ سرویک بند کننگار۔

رسینگوک حوال تا رد ئٹ پاکستان ٹی کورونا دین ئنا سوب آن پین 56 بندغ مرگ گواچی مسر۔ اندن فعال کیس آتا کچ کم مسونے، داڑان بیدس پاکستان ئٹ کورونا نا 2 ہزار آن زیات مثبت کیسز رپورٹ مسونو۔

گیشتر حوال تا رد ئٹ نیشنل کمانڈ اینڈ آپریشن سینٹر نا کنڈان شینک کروکا حساب نا رد ئٹ تدوکا 24 سائت ئنا نیام ئٹی 59 ہزار 076 کورونا ٹیسٹ کننگانے ہراڑان گڈ جمعی ٹیسٹ آتا کچ 12.943.62 مسونے۔

تدوکا 24 سائت ئنا نیام ئٹی تیوی پاکستان ئٹ پین 2 ہزار 724 مثبت کیس رپورٹ مسونو، اندا وڑ پاکستان ٹی کورونا نا پک مروکا ناجوڑ تا کچ 908.576 مسونے۔

اندن سرکاری حساب نا رد ئٹ داسکان سندھ ئٹی 3 لکھ 11 ہزار 766، پنجاب ٹی 3 لکھ 36 ہزار 315، خیبر پختونخواہ ٹی اسہ لکھ 30 ہزار 644، اسلام آباد ٹی 80 ہزار 662، بلوچستان ٹی 24 ہزار 733، آزاد کشمیر ٹی 18 ہزار 940 و گلگت بلتستان ٹی 5 ہزار 516 بندغ ٹی کورونا وائرس پک مسونے۔

سرکاری حساب نا رد ئٹ دا وخت تیوہ آ ملک ئٹ کورونا نا فعال ناجوڑ تا کچ 60 ہزار 268 ءِ، اندن کہ 4 ہزار آن زیات ناجوڑ تا حالیت بد ءِ۔

تدوکا 24 سائت ئنا نیام ئٹی تیوہ آ ملک ئٹ کورونا آن پین 65 بندغ مرگ نا گواچی مسونو، ہراڑان گڈ دا دین آن کہوک آ بندغ آتا کچ جمعی وڑ ئٹ 20 ہزار 405 مسونے۔

اندن این سی او سی نا رد ئٹ کورونا آن اسہ دے ئٹی4  ہزار686 ناجوڑ درواخ مسونو، ہراڑان گڈ درواخ مروکا ناجوڑ تا کچ 827.843 مسونے۔

بلوچستان نا ضلع کوہلو ٹی تیل و گیس پٹوکا کمپنی آ بمب تراک مسونے۔

گیشتر حوال تا رد ئٹ اینو سہب تون ڈیرہ بگٹی نا علاقہ کوہلو ٹی نادرست بندغ آک تیل و گیس پٹوکا کمپنی نا گاڑی ءِ بمب تراک ئٹ ٹک کریر۔

جلہو نا ذمہ واری بلوچ سلاء بند آجوئی خواہوک تنظیم بلوچ ریپبلکن گارڈز ارفینے۔ تنظیم نا ترجمان دوستین بلوچ نا  پاننگے کہ کوہلو و بارکھان نا نیامٹ ئٹ سرکاری کمپنی او جی ڈی سی ایل نا گاڑی ءِ ریموٹ کنٹرول بمب ئٹ ٹِک کرین ہراڑان کمپنی ءِ جانی نسخان ارفوئی تمانے۔

بلوچستان نا ضلع ئٹ ڈیرہ بگٹی ٹی کڈ کروک آ بمب نا تراک نا سوب آن ٹرک ئسے نسخان مسونے ولے ہچو جانی نسخان متنے۔

لیویز نا رد ئٹ سہہ شمبے آ ڈیرہ بگٹی نا علاقہ پھیلاوغ رکھنی روڈ ئنا رہی آ کڈ کروک آ بمب ءِ ٹرک اس لغت تس ہرانا سوب آن ٹرک ءِ نسخان مس ولے ہچو جانی نسخان متنے۔

اوکان گڈ لیویز و سیکورٹی فورسز ویل ئنا ہند آ سر مننگ تون داپار ایپار ءِ ہلیسہ شاہدی مچ کننگ ءِ بناء کریر، پین کاروائی برجاہ ءِ۔

اندن پین حوال ئسے نا رد ئٹ کوئٹہ نا ایب کیب نا علاقہ ہزارہ ٹاؤن ٹی جنگ کننگ نا سوب آن اسہ بندغ اس ٹپی مس۔

ریسکیو حوال تا رد ئٹ ہزارہ ٹاؤن ٹی جنگ ئنا وخت آ مرزا حسین نا مار علی داد پنی ءُ بندغ اس ٹپی مس، ہرا دمدستی وڑ ئٹ بی ایم سی کوئٹہ آ سر کننگا  ہراڑے اونا دوا درمان برجاہ ءِ، ویل ئنا رد ئٹ پین سر و سوج پولیس کننگ ءِ۔

بلوچستان نا دارالحکومت کوئٹہ ٹی پیراملٹری فورس ایف سی نا موٹر سائیکل گشتی ٹیم آ بم تراک نا  جلہو اس مس۔

ریسکیو حوال تا رد ئٹ کوئٹہ نا علاقہ قمبرانی روڈ آ بشیر چوک آن خڑک تراک مسونے۔ تراک ئٹ فورسز کارندہ غاتون اوار 5 بندغ ٹپی مسونو۔

تراک ئنا حوال رسینگ تون اوار کمکار ٹیم و قانود نافذ کروکا ادارہ غاک دمدستی تون جاگہ غا سر مسر، ہراڑے قانود نافذ کروکا ادارہ غاک علاقہ ءِ گھیرہ ٹی ہلکر۔ پولیس نا رپورٹ آتا رد ئٹ دا تراک سڑک نا رہی آ تخوک تراک کروکا مواد آتا ترخنگ آن مس۔

جلہو نا ذمہ واری ءِ بلوچ سلاء بند آجوئی خواہوک گَل بلوچستان لبریشن فرنٹ ارفینے۔ ترجمان میجر گہرام بیان شینک کریسہ پارینے کہ تراک ئٹ فورسز کارندہ تے ٹِک کننگا ہراڑان اِرٹ مرگ نا گواچی مسر و اِرٹ ٹپی مسونو۔

 بلوچستان نیشنل پارٹی نا بنجائی راہشون نوابزادہ حاجی میر لشکری خان رئیسانی پارینے کہ ملک ئٹ جمہوریت و جمہوری بست و بند ہر وخت  سیکورٹی اسٹبلشمنٹ نا دوتا کیرنگ آن مس اندا سوب آن جمہوریت ملک ئٹ روتہ خلنگ کتئو۔

ہرگچین کاری آن مست سیکورٹی اسٹبلشمنٹ اسہ پوسکنو پن و اپوسکنو وڑ اسیٹ نن تا نن جتا غیر جمہوری و غیر سیاسی طاغت آتے مونا ہتیسہ سیاسی عمل ءِ توننگ نا کوشت کیک۔

او پارے کہ 2018 نا علس گچین کاری تیان مست ہرا وڑ بلوچستان نا سیاست ٹی نن تا نن سیکیورٹی اسٹبلشمنٹ اسہ پوسکن ودی مروک بوٹ پالش باپ پارٹی ءِ جوڑ کریسہ بلوچستان آ غیر جمہوری و غیر سیاسی بندغ آتے گڈو کرےہرانا بدل ءِ اینو بلوچستان نا مخلوق خننگے۔

او پین پارے کہ دا حکومت ہننگ آن گڈ بلوچستان آن باپ پارٹی نا وجود و پن مروف، و بروکا گچین کاری تیکن داسی آن اسٹیبلشمنٹ جتا قبائلی پینل آتیٹ وارس کچھی خراسان ، سراوان وجھالاوان نا پن آ جعلی الیکٹیبیز نا پینل ءِ ٹہیفنگ نا بناء کرینے۔

دا جعلی الیکٹیبیز آتا کٹنگ آن ایلو لڑ ئٹی وزیر اعلیٰ نا پن آ اسہ بُت اس تیار کننگو، و اوکان گڈ خلائی مخلوق نا کنڈان موکل تننگو کہ اودے سجدہ کبو نم تیوہ مخلوق نا جان خلاس کروک اندادے۔ اونا پین پاننگ ئس کہ ای مخلص سیاسی باسک آتیان خواست کیوہ کہ او جعلی و سلیکٹڈ الیکٹیبیز تا کسر ءِ توریسہ تینا وطن و تشخص ءِ ایسر مننگ آن بچفر، نئے تو تاریخ ننے بشخپرو۔

دا ہیت آتا درشانی ء اودشت گونڈین ٹی میر ہمایوں عزیز کرد نا کشت و کشاری فارم ئٹ صحافی تون انٹرویو نا وخت آ ہیت کریسہ پارے،دا وخت آمسکوئی وفاقی وزیر وبی این پی نا بنجائی راہشون میر ہمایوں عزیز کر د و ایلوفک ہم ساڑی ئسر۔

نوابزادہ میر حاجی لشکری رئیسانی پارے کہ اینو افسوز ئٹ پاروئی تمیک کہ دا سیکیورٹی اسٹبلشمنٹ نہ بیرہ ننا سیاسی ربیدگءِ ایسر کننگ نا کوشت کننگ ء ِبلکن ننا قبائلی بند و بست ٹی کاریم تخیسہ ننا آباو اجداد نا تاریخ ءِ خراب وڑ ئٹ ایسر کریسہ اسٹ ء ِسردار اسٹ ءِ نوابی نا دستار بندی کننگ،ہرا جُوانو ہیت اس  اف۔

او پارے کہ دا بندغ آک چنکو  مراعات اور ایم پی اے، ایم این اے و سنیٹرز بننگ کن ہرا صف بندی مننگے، تاریخ و بلوچ راج اوفتے  ہچ بشخپرو۔

او پین پارے کہ پاکستان 14 اگست 1947 آ جوڑ مس،ہمو دے تیان ہلیس اینو اسکان داملک اسہ فرنٹ لائن اسٹیٹ نا وڑ ئٹ جہانی سامراج نا مزدوری کننگ ءِ، ہر وخت جموری پارٹی تا جہد آتیان مچے بھاز جہموریت بریک، گڑا دا اوکان گڈ زو جموری کوچک و پارلیمنٹ آتا وڑ ئٹ سست کننگ نا کوشست کرفیرا۔

رسینگوک حوال تا رد ئٹ بلوچستان نا ضلع پشین نا کلی گا نگزئی ٹی برام مجلس ٹی سم کاری نا سوب آن  لمہ باوہ نا 12 سالہ اسٹ آ مار اس مرگ نا گواچی و اسٹ ٹپی مسونے۔

لیویز نا پاننگ ءِ کہ کلی گا نگزئی ٹی برام نا مجلس نا وخت آ  سم کاری نا سوب آن شانزندہ سال ئنا محمد اصغر جان مرگ نا گواچی مس، اندن  ایلو بندغ ٹپی مسونے۔ چنا نا جون و ٹپی ءِہسپتال آ سر کننگا ہراڑے المی کارروائی آن گڈ جون خاہوت نا دو ٹی تننگا،اندن  ٹپی آ نا دوا درمان برجاہ ء۔

اندن پاننگ ءِ کہ کہوک آ چنا لمہ باوہ نا اسٹ آچنا ئس اسوک،یاتی مرے داکان مست ہم برام نا مجلس آتیٹ سم کاری مسونے ہرافتیٹ بھاز آ بندغ آک مرگ نا گواچی یا ٹپی مسونو ولے دا  افسوز ناک ویل آتیان گڈ ہم ئٹ سم کاری نا توننگ کن اسہ وڑ ئنا ہم گام ارفینگ خننگپک۔

ننا ادب

نوشت: زرک میر | مٹ: عتیق آسکوہ بلوچ

دی بلوچستان پوسٹ

آو ادیب تون ہم پڈ اس مریک، او اسیکہ پڈ ولفک دوارہ ٹَک خلیک، اونا بدن ئٹ آ ہم اندنو بشخ ارے کہ او ستر پوشی کے، و اونا ہم زائیفہ و چُنا مریر، اوڑا دا طرہ ہم کہ ادیب ءِ سگریٹ دنز تروئی مریک و اگہ کس ادیب اس سگریٹ دنز تف او امرو ادیب ئس، ادیب نا باہ آن سگریٹ نا موڷ نا مُد ئٹ تالانی اندنے دُنکہ ملی نا کیٹلی آن باف بش مننگ۔ و دوارہ ہوٹل نا شغل جتا تینا جاگہ غا، اودے داڑکن کاریم اس تو کروئی تمک، و دُن کننگ اونا حق ہم ارے ولے کم از کم سرکاری نوکری آن او پد تورے تینے یا گڑا بخت والا ادیب سرکاری ملازم اس مف گڑا او سراط مستقیم آ بیدس تڈو ہلنگ آن ہننگ کیک نئے تو لغوشت کننگ نا گواچی مننگ کیک، او سڑک آ الاونسز کن ہم تولنگ کیک، اسہ پارہ غان او انداخس حساس مریک کہ او گلی تیٹ چُرو کن تولنگ آ ہم آ روادار اف ایلو پارہ غان او ہفتہ غاتے اسکان کسر تیا تولوک خلقت نا کسر ءِ تفوک مریک، دنو بھاز آ بے حساب بے ضابطگیک و تضاد آک مون آ بریرہ، ایلو پارہ غان تیوہ غا دفتر رشوت نا دود نا ردئٹ کائک گڑا ادیب صاحب امر داڑان مُر مننگ کیک و دوارہ دیمری نا رُم جتا، داڑکن اسٹ ایلو نا فائل تیٹ کوکڑو و سفارش پٹنگ نا نت دو خلنگ جتا۔

کنا خڑک ادیب برام آن ہم مُر تورے تینے نئے تو تینے رکھنگ نا تیوہ غا کوشست آتے دک اس لگنگ کیک کہ ہراتم چنا ءِ بڑز نہاد اسکول اسیٹی داخل کرفنگ مرے، زائیفہ کن گچین ءُ پُچ و میک اپ نا بست و بند جتا، داسہ ہر زائیفہ صفیہ مننگ کپک ولے صفیہ آ انت ضد کہ او ہم “منٹو صاحب” ءِ پاگل خانہ نا سیل و سوات کرفسہ گچینی تون ہنوک زائیفہ اس مننگ نا داد ءِ دوئی کریسس، گڑا چُنا زائیفہ و سرکاری نوکری ادیب اسیکن پول صراط مرور ہراکان سلامت گدرینگ ادیب اسیکن مننگ کپک۔ اسہ وڑئٹ ادیب نا دا سختی تیان گدرینگ و ذاتی چمشانک شاغنگ ہم بھاز الّمی ءِ ولے افسوز کہ ادیب اگہ دا تیوہ غاتے کے گڑا دوارہ تینا مخبری و پچار ءِ امر کننگ کیک او وخت او شریک جرم مریک و تیوی زند 164 (اعتراف جرم) کننگ کپک۔

نن بھاز وخت خننہ کہ ادیب اس دفتر اسیٹی تولوک چاہ نا کش خلیک، سما تمک کہ ادیب صاحب چُنا نا نوکری کن اسہ سرکاری دفتر ئسے آ پیری کننگے۔ اگہ ادیب تینٹ سرکاری ملازم ئسے گڑا تینا دیمروی، تنخواہ و پوسٹنگ نا پیری تیٹ اندن تمک کہ او حکومت وخت آ ہچو نغد کاری اس کننگ کپک و دوارہ تینا گریڈ آتے اُریسہ دانشوری کریسہ کیک، دا انداڑے ایسر مسکہ ہم ہیت اس ئس ننا ادیب دوارہ داخہ در سیاست زدہ مریک کہ او ریٹائرمنٹ آن گڈ ودکی خوائک یا دوارہ پارٹی اسیٹی اوار مننگ نا گمان کیک (اواری نا احوال مونی مرو) ننا رہی آ دُن آ درزن آ مثیال آک ءُ، اکادمی ادبیات آن ہلیس بلوچستان یونیورسٹی اسکان ہر جاغہ ننا ادیب مزاجاً سوختئی نا گواچی ءِ، تینے آن خر مریسہ تینے آن تشریحات و تشبیہات ٹہیفک، دن سمجھ ادیب نا سرکاری ملازم و دوارہ افسر مننگ اسہ المیہ اس مریک، و اگہ اورا اِرا انداخس کہ اونا برام مسونے (و تیوہ غاتا مسونے) و دوارہ چناک ہم دوست مریر گڑا ادیب نا سرگردان مننگ ہچو گوڑیفوک ءُ ہیت اس اف۔

یوٹوپیائی ریاست نا اگہ ہیت کننگہ گڑا اُست خواہی مریک کہ ادیب، فلسفی و سائنسدان آتے برام کپرنگ و سرکاری امور تیان مُر مننگ نا رمائشت مرے انتیکہ دا خواجہ غاک سرکاری امور ئٹ اخس تنخواہ ہموخس کاریم نا ردئٹ سلینگ کپسہ، اوفتے مفت ئنا شراب کنوئی تمک۔

اسہ چس کروک تدینی اس بنفیوہ کہ نن قلات ئٹ تینا استاد پروفیسر ادیب صاحب نا بھاز منتوار اُن کہ او ننے ملاقات نا وخت تریسہ کریکہ، ولے زیات اونا دوتیٹ کتاب تون اوار فائل اس ہم خننگاکہ، سوب اریفنگ آ ٹرانسفر توننگ کن نت دو خلنگ نا پاریکہ و سوب پاریکہ کہ اگہ اونا داکان ٹرانسفر مس گڑا دا مجلس آتا انت مرو ہرافتے ہر نن ہڈ ایتنہ ہرا بناء بناء ٹی شام غریبان نا دروشم اٹ مسکہ و ایسر آ متکنا روم نا ہمو کلب نا دروشم ٹی بسکہ ہراڑے روم نا شہنشاں آگسٹس شراب ئٹ پالیفوک اِرغ، ہلار و انجیر تون نوش کریکہ و دوارہ پاریکہ او مملکت نا بابت جُوانو تغ خنو و او ہروخت تغ ئٹ سمندر نیامٹ ئٹ دژمن فوج ءِ غرق مروک خناکہ و ساحل آ داد ئٹ سلوک بے حجاب مسن تے خناکہ گڑا نیمہ تغ ءِ او تغ ئٹ دژمن فوج تے دیر دروک اُریسہ پورو کریکہ و دا تغ تا نیمہ پوروی مملکت نا ذمہ واری مسکہ، او وخت شہنشاہ نا خواب گاہ ٹی اندنو مسڑ ہتنگاکہ۔ ننا قلات نا پروفیسر ادیب ہم مملکت نا مفاد ئٹ پین ہند اس ہننگ آن بچنگ کن ٹرانسفر توننگ نا درخواست نوشتہ کریسہ سفارش پٹاکہ۔ داسہ ریٹائر مریسہ پنشن داد آتا فائل ءِ پیری ایتک ولے داسہ دا الّمی ارے کہ او اُرے اسکان اندنو مجلس برجاء تخیسہ کیک، قلات نا گوْش ئٹ ننتون شراب و اوٹی پالفنگ کن اِرغ اف، ہلار و انجیر ہم، پروفیسر صاحب تون اوار اوار ننے ہم شہنشاہ آگسٹس آنبار مخالف فوج و داد ئٹ مسن تا تغک بریرہ ولے افسوز کہ ننتون چھپی ءُ گڑاک کہ نن مخالف فوج ءِ دیر دروک خنپنہ بلکن اوفتے برجاء تینا پارہ غا بننگ آ خنینہ واہم گڈانی نا ساحل آ داد ئٹ مسن تے الّم خنینہ، داسہ پابو دننگا حالیت ئٹ ننے و ننا پروفیسر صاحب ءِ داد دیر ایتو؟

برجاء۔۔۔۔