بلوچستان نا علاقہ بولان و کوئٹہ ٹی سُم کاری نا ویل آتیٹ اسہ بندغ اس بیران و اسٹ ٹپی مسونے۔

بلوچستان نا دارالحکومت کوئٹہ نا علاقہ چشمہ اچوزئی ٹی سلاء بند بندغ اسینا سُم کاری آن اسہ بندغ اس ٹپی مسونے۔

ایدھی نا حوال تا رد ئٹ کوئٹہ نا علاقہ چشمہ اچوزئی ٹی سلاء بند بندغ ئس سُم کاری کریسہ لعل محمد نا مار نثار احمد ءِ ٹپی کرینے، و ٹپی ہسپتال آ سرکننگانے، پین کارروائی متعلقہ بند و بست ادارہ کننگ ءِ۔

اندن پین حوال ئسے نا ردئٹ بلوچستان نا ضلع بولان کچھی نا تحصیل بھاگ ٹی سلاء بند بندغ آتا سُم کاری آن اسہ بندغ اس بیران مسونے۔

حوال تا رد ئٹ ضلع بولان کچھی نا علاقہ تحصیل بھاگ نا ایریا گوٹھ بڈا ٹی سلاء بند بندغ آتا سُم کاری آن نصراللہ بیران مسونے، سُم کاری ءِ مالو نا دوژمنی نا سوب پاننگسہ ءِ۔

“گودی”

مَشتیٹی ئے گدان گودی نا
میڷ تتو نے شوان گودینا
راج اونا اوڑ تون زیب دار
قصّہ ئے دا بیان گودی نا

غلہ غاتے پِڑا شُپِک او
کھونٹ سے مونہ غا ٹھپِک او
ہُر زَہے خل تیان جُپِک او
پُھرّ ئے نُسخل نُتان گودی نا

کاٹم ئے تینا او رندنگے
کِنئڑو تیل وا خلنگے
مون ہُروکٹ تینے ہُننگے
انت پاو بڑزے شان گودی نا

گودی نا کُٹ ئٹی مارسے
لولی تیک لیلڑے وارسے
مار کنا بخت و استارسے
نی مروس اُست خان گودی نا

شتکنگا قد ئتو کاٹھی تہ
گوئن ئنا گونجک ئس باٹی تہ
خاسُن ایت خسّی ئس شا ٹی تہ
لوتھ پُھر چِکّھہ غان گودی نا

چمّڑی تان ایتے کُنیو
بے مزّہ بائے سورمبو کیو
نیک دعا لُما جیجا نے تیو
خلقت ئے مہروان گودی نا

او کشیدہ کچی دوچ کیک
شِیتُلہ میڑِک او موچ کیک
شیر زال راج ئکن سوچ کیک
پین پِن ئٹ انت پان گودی نا

جھمراتا عجب موسُم ئے
رنگ رنگی خنوس بلسُم ئے
دامون ہیمون دشت خولم ئے
کُھٹِپک زُو نِکان گودی نا

انور بلسم

بلوچستان نا ادب و سیاست ئٹ بڑز پن تخوک میر گل خان نصیر نا زند آ تالان کتاب “میر گل خان ںصیر” شینک مس۔

دا کتاب اِرا سد نا کچ پنہ غاتیا تالان ءِ ہراٹی میر گل نصیر نا ودشت، اونا چُنک سنی، بنائی خواننگ، سیاست، صحافت، ادب و زند ئنا ایلو بشخ آتیا شابیتی اٹ چمشانک شاغنگانے۔ کتاب ڈاکٹر شاہ محمد مری نا “عشاق کے قافلے” نا بشخ ئسے و دادے عتیق آسکوہ بلوچ اُردو آن براہوئی مٹ کرینے۔

کتاب نا سرلوز آن پیراگراف اس پد پنہ غا تننگانے ہراٹی ڈاکٹر شاہ محمد مری پائک “ہرا وخت نُم تعصب و جذبات ءِ ہلیسہ گل خان نصیر نا زند ءِ خوانورے گڑا بلوچ مخلوق و خاص کر بلوچ ورناتے سجدہ سہونا پارورے کہ ہرافک جذبات ٹی وخت اس گل خان ءِ خراب پارینو۔ نُم اسہ پین نتیجہ سے آ سر مرورے کہ نن من حیث القوم دا ہیت آ رد اُن کہ نن کُل گل خان ءِ تنیا شاعر اس پہہ مرسہ عزت ایتنہ۔ اگہ نُم گل خان نا شاعری ءِ مُر کرسہ، اسہ کُنڈ آ تخسہ اُریرے گڑا سما تمو کہ گل خان تنیا ایوب خان و نواب کالاباغ تو ٹکّر التو بلکہ او تو ہمو سینئر لیڈر ءِ ہرا فرنگی سامراج تون مون پہ مون مس، خان قلات نا سر شمس شاہ نا ظلم و ستم تے سگّا، لیاقت علی خان نا ظلم نا مون آ مَش آن بار سلیس، ایوب آن پد بھٹو نا مَست آ پیل ءِ ہکّل تس۔ دا بندغ لس بلوچ نا کاٹم نا بڑزی کن تینا جند و تینا کُل آ خاہوت ءِ چٹ کرے…………میر لونگ خان شہید نا ایلم ءِ گل خان نصیرؔ۔

عتیق آسکوہ بلوچ داکان مالو مُسہ کتاب اردو آن براہوئی اٹ مٹ کرینے ہرافتیٹ ڈاکٹر عنبرین مینگل نا “مشی آ بانز” و جہانی ادب آن افسانہ و نوشت آتیا تالان “ندارہ” اوار ءُ۔

کتاب نا آن لائن شینکاری دی بلوچستان پوسٹ پبلکیشنز نا پارہ غا کننگانے۔ داکان مالو دی بلوچستان پوسٹ مرید بلوچ نا براہوئی شاعری تیا تالان کتاب “رخصت اف” و بلوچی شاعر و نوشت آتیا تالان نثار صباء نا کتاب ” صباء ءِ گرنچ” ءِ شینک کننگانے۔ 

شال ئٹ راھشون ادبی دیوان بلوچستان نا سالانہ جنرل باڈی مجلس و گچین کاریک، آصف بلوچ مرکزی چئیرمین، اسرار شوہاز بلوچ سینئر وائس چیرمین و گل شیر بلوچ جنرل سیکٹری گچین مسور۔

راہشون ادبی دیوان بلوچستان نا مجلس ہس یونیورسٹی آف بلوچستان اٹ راھشون نا چیئرمین شکیب نذر نا کماشی ٹی اڈ ہلک۔ جنرل باڈی نا دا اجلاس ٹی راھشون ادبی دیوان نا باسک و عہدیدار آک بھلو گونشت اسیٹی بشخ ہلکُر۔

اجلاس نا اولی ایجنڈا ٹی مالو نا کابینہ نا کرد زیر بحث مسک و نظامت نا دود آتے راھشون نا جنرل سیکٹریری حمید عزیزآبادی ایسر کرے۔

اجلاس نا ارٹمیکو بشخ ئٹ تنظیم نا مرکزی گچین کاریک مسور۔ گچین کاری نا دا عمل ووٹ نا ذریعہ اٹ الیکش کمیشن نا چیئرمین علی بلوچ و ایلو باسک شکیب نذر بلوچ، حسن ناصر استا سرگڑدگی ٹی سرسوب مس۔ پڑو نا رد اٹ راھشون نا مرکزی چیئرمین آصف بلوچ، سینئر وائس چیرمین اسرار شوہاز بلوچ، جنرل سیکٹری گل شیر بلوچ، ڈپٹی جنرل سیکٹری بسمل بلوچ، فنانس سیکٹریری اشفاق داہم بلوچ و پریس سیکرٹری احسان بلوچ ئسک گچین مسور۔

اندن پوسکنا کابینہ نا سلاہ و سوج اٹ مشاورتی ایگزیکٹو باسک کن میریحیٰی بلوچ، علی بلوچ، حمید عزیز آبادی، نصیب ساگر و حسن ناصر بلوچ استے گچین کریر۔

اجلاس ئٹ باسک آک تران کرسا پاریر کہ راھشون اسہ سوچ و نظریہ اسے نا پن ءِ ہرا نظریہ اسہ راجی ءُ ادب اس مون آ اتنگ کن تینا لائخی تے مدام درشان کرو۔ اوفک دا ہم پاریر کہ براھوئی و ادب نا شونداری کن گام گیج کننگ کن تینا پٹ و پول و تخلقی صلاحیت آتے درشان کرون۔

بنجائی وزیر تعلیم شفقت محمود نا کماشی ٹی بین الصوبائی وزرا کانفرنس اڈ الک ہراٹی غٹ صوبہ غاتا وزیر تعلیم آک بشخ ہلکر۔ تیوی ملک نا خوانندہ جاہ آتیٹی کرونا وائرس نا ترندی ٹی تالان مننگ نا سوب آن 26 نومبر آن تیوی پاکستان نا غٹ خوانندہ جاہ آتے بند کننگ نا پڑو کننگا۔

یاتی مرے خوانندہ جاہ آتیٹی کرونا وائرس نا ناجوڑی 82% اسکان سر مسونے۔ دا فیصلہ نا ردئٹ اسکول، کالج آک، یونیورسٹیز و پرائیویٹ ادارہ آتے 26 نومبر آن 10 جنوری اسکان بند کننگ مریک۔

دا وخت آ تیوی پاکستان ٹی کرونا وائرس نا ارٹمیکو لہر بھاز ترندی ٹی تالان مننگے۔ گدرینگوک آ 24 گھنٹہ ٹی 34 بندغ کرونا وائرس نا سوب آن بیران مسونو۔ اندن 2756 بندغ ٹی کرونا وائرس نا ناجوڑی پک مسونے۔

پاکستان حکومت نا پاننگ نا ردئٹ دا وختا تیوی پاکستان 7696 بندغ کرونا وائرس آن بیران مسونو۔ دا وختا 3 لکھ 76 ہزار 929 بندغ کرونا وائرس نا آماچ ءُ۔

بلوچستان نا علاقہ کوہلو ئٹ تدوکا دے تیٹ مروکا گیس سلنڈر نا تراک آن ٹپی اسہ پین چنا اس بیران مس ہراڑان گڈ بیران چُناتا جمعی کچ چانڑدہ غا سر مس۔

ٹپی چناتے کوہلو اٹ ہسپتال مفرنگ و دُننگا تدینی تیکن برن سینٹر نا مفرنگ آ پنجاب نا شار ملتان آ دننگاسس ہراڑے ٹپی چناک پاک اٹلین ماڈرن برن سینٹر ٹی داخل ئسر۔

گیس سلنڈڑ تراک کوہلو نا علاقہ بوہری ٹی اسہ برام ئسے نا مُچی نا وخت مس، ٹپی تیٹ چنا تیتون اوار 33 بندغ اوار ئسر و زیات کچ چُنا تا ئس۔

پولیس آفسر حق نواز نا پاننگ نا ردئٹ دا چناک چپس بہا کروک ئسے نا رہی آ مُچ ئسر ہراتم سلنڈر ترخا۔ ٹپی تیٹ چپس بہا کروک آک اوار ءُ۔

تدینی نا برخلاف درو کوہلو ٹی آل پارٹیز نا پارہ غان مُچی کننگا۔ ہراٹی حکومت نا پارہ غاک زیمی تا پارہ بے پامی آ ترند نغد کاری کننگا۔

برانزی مچی پریس کلب کوہلو آن کشنگا و شار ئنا جتا روڈ آتیان مریسہ ٹریک چوک آ مُچ مس۔ برانز اٹ ایمی چنا تے جانجوڑی نا آسراتی تننگ و اوفتا خاہوت آتے کمک کننگ نا خواست کننگا۔

وائس فار بلوچ مسنگ پرسنز نا پارہ غان اسے بیان اسیٹی پاننگانے کہ خاران آن بیگواہ مروکا علامہ اقبال اوپن یونیورسٹی نا خوانندہ ، نصیر کبدانی لبزانکی دیوان نا کماش ثناء بلوچ ءِ مون آ ہتیسہ کاؤنٹر ٹیررزم ڈیپارٹمنٹ (سی ٹی ڈی) نا دوٹی تننگانے۔

وائس فار بلوچ مسنگ پرسنز نا مونی پاننگ ءِ کہ اسے ہفتہ اس مست صوبائی حکومت ءِ ثناء بلوچ نا کیس تننگسس۔ اندن او حکومت آن خواست کرینے کہ بیگواہ کروکا خوانندہ ثناء بلوچ آ خلوک آ دوبہ غاتا بابت اسہ کمیٹی اس جوڑ کننگہ کہ معلومداری مرے کہ اوڑا خلوک آ دوبہ آتیٹی اخس راستی ارے۔

یاتی مرے بیگواہ غا خوانندہ ثناء بلوچ ء 11 مئی 2020 آ اونا جند ئنا علاقہ خاران آن بیگواہ کننگا ہرادے اینو شش توہ آن پد مونا ہتیسہ سی ٹی ڈی ءِ تننگانے۔

مست توکلی انسٹیٹیوٹ آف ریسرچ اینڈ پبلکیشنز نا پارہ کوئٹہ پریس کلب اٹ اسے مجلس اس اڈ تننگا۔ مجلس نا کماشی ءِ مست توکلی انسٹیٹیوٹ آف ریسرچ اینڈ پبلیکیشنز نا ڈپٹی ڈائریکٹر محمد عمران لہڑی کرے۔

مجلس ٹی جرنلسٹ و پٹ پولکار حنیف دلمراد، ڈاکٹر سلیم کرد، بلوچی اکیڈمی نا چیئرمین سنگت رفیق، مست توکلی انسٹیٹیوٹ آف ریسرچ اینڈ پبلیکیشنز نا پٹ و پول سیکرٹری عزیز اعجاز بلوچ تران کریر۔ بلوچی بولی نا شاعر و مست توکلی انسٹیٹیوٹ آف ریسرچ اینڈ پبلیکیشنز نا لٹریری سیکرٹری پزیر جی ایم اسٹیج سیکرٹری نا ذمہ واری تے دوئی کرے۔

دا مجلس ٹی تران کروکاک پاریر کہ بلوچستان ٹی 1920 آن جوڑ مروکا جتا جتا سیاسی تنظیم آتا سیاسی کڑدار، قوم پرستی نا بنیات و اغراض و مسخت و قلات ریاست ٹی لیز، خطہ آتا بحالی، یوسف عزیز مگسی نا سیاسی کڑد، جیکب آباد و حیدر آباد ٹی اڈ تروکا مجلس آک، بلوچ نیشنلزم آ سیاسی اثرات کن قلات ریاست ٹی خانیٹ نا کڑدار و عالمگریت نا بنیات آ مروکا بدلیک بلوچ سیاست آ بھاز بھلو اثر اس تخانو۔

مجلس ٹی سیاسی شخصیت آتا عملی کڑد، و اوفتا صحافتی کڑد آ ییت و گپ کریر۔ سد سالہ تاریخ ٹی بلوچ ادب نا اثرات و زیر زمین کاریم آتا جاچ الننگا۔ برطانیہ نا کوزہ ٹی مروکا حکومت و اونا لُٹ و پل پالیسی تا بلوچستان آ اثرات و سیاسی ایجنٹ آتون اوار وائسرائے نا کڑد آ ام ہیت و گپ کریر۔ داٹی ون یونٹ اسکیم، نیپ نا حکومت و حیدر آباد سازش کیس آ بندی مروکا بلوچ سیاسی لیڈر آتا کڑد و اوفتا قربانی تے ہیت و گپ کریر۔

مرکزی ڈپٹی ڈائریکٹر مجلس آن تران کرسہ پارے اینو دا مجلس اٹ ساڑی جتا جتا قوم پرست سیاسی، ادبی و خوانندہ تنظیم آتیان تعلق تخوکا ورنا و کماش آک دا باور کریفیر کہ بلوچ نا بولی، تقافت، تہذیب و تاریخ ءِ سوگو کننگ بلوچ سیوت اٹ گام خلیک۔ بلوچ قوم نا گل آتے ہزار سیاسی اختلاف مرے ولے تینا قومی شناخت و وجود نا جہد اٹ کل اسٹ اون۔ مست توکلی انسٹیٹوٹ اندا سوچ ءِ دوئی کرسہ مستی گام ارفینے کہ بلوچستان نا مچا قوم نا شونداری و سوگوئی کن جوڑ مروکا ادارہ غاتا کمک اٹ بلوچستان نا پنی آ زانتکار، دانشور و سیاسی لیڈر آتا قومی خدمت و سوچ ءِ مدام سوگو کننگ کن پٹ و پول کرسہ اوتا کڑدار و فکر ءِ بلوچستان نا کُنڈ کُنڈ ٹی تالان کرسہ ہر بلوچ آ سرکین۔

مستی تران کرسہ پارے مست توکلی ہر ہمو بلوچ نا ادارہ ءِ ہراکے بلوچ قوم نا ڈغار، بولی، ربیدگ، تہذیب و تاریخ ءِ شون تننگ و سوگو کننگ کن عملی کاریم کننگ ءِ و قوم دوستی نا فکر نا پابند ءِ۔ امیت تخیوہ کہ تینا قومی وجود ءِ مدام برجا تخننگ کن ہر بلوچ قومی سوچ تون اوار مرو، نن سیوت اٹ تینا قوم ءِ شون ایتنا۔

بلوچستان نا ضلع گوادر ئٹ کسٹم آک کاروائی کریسہ مسہ کبین نرخ باز برآمد کریر۔

کسٹم کوالخوا تا رد ئٹ کسٹم آک لکھا روپی تا نرخ ئنا مسہ کبین بانز جیونی آن ایران آ اسمگل مننگ ئسر، کسٹم وختی کاروائی کریسہ چک آتے کوزہ ٹی ہلک۔

کوالخوا تا رد ئٹ محکمہ جنگل گوادر ڈپٹی کنزرویٹر یار محمد دشتی نا سربراہی ٹی کسٹم کوالخوا تا ساڑی مننگ آن لکھا روپی نرخ ئنا چک آتے آزاد کریر۔

یات مرے کہ 18 نومبر ءِ کوئٹہ نا ایئرپورٹ روڈ آ کسٹم کوالخواک کاروائی کریسہ دبئی آن بروکا فلائٹ نا کمک ئٹ بروکا مسافر لال شاہ آن اِرا کبین ءُ بانز برآمد کریسر۔