بیگانہ ڈیہہ ئٹ نادرست آ قبر
نوشت: سفر خان بلوچ | مٹ: سمعیہ بلوچ
دی بلوچستان پوسٹ
لمہ ای ہننگ اٹ،دا اونا ہمو ایسری لوز آک ئسر ہرا اونا لمہ نا خف ئٹی بسوسر،و او کاپی قلم و کتاب آتون اوار ہنا، اوکان گڈ اونا لمہ دا اتوار ءِ ہچ بنتو ہم، و بیرہ منہ ساعت ئنا تہٹی ہرا گڑاک مننگ ئسر کس اس دا گمان ءِ ہم کننگ کتوکا۔
اوڑتون اوار خوانندہ آک ہم دا تصور کننگ کتوسا کہ اوفک دادے ایسری وار خننگ ءُ و ہمو استاد ہرا وار وار آ دا پاننگ ئس نم مچ دا سبخ ءِ یات کریسہ تینا اُرا نا کاریم تے کریسہ کبو و پگہ خنون تینے، او ہم او وخت دا گمان کننگ کتوکا کہ اینو آن گڈ اودے دا ٹی کلاس ٹی ہچ خنوف، و اونا تیوہ آ کتاب آک و کاپیک منہ ساعت آن گڈ اسہ نادرست ءُ گاڑی اسیٹ اسہ کہوک آ جوْن ئنا وڑ تموک مرور و اسہ سر و سوج کروک ادارہ نا دفتر اسیٹ سال آتے اسکان تموک مرور و دروک آتے دا ہم سما مروف کہ اوفک دا کاپی و قلم ء ِانتئے ایسنو و ہمو کتاب ہرا اونا بروکا وخت ئنا ضامن ئس او ہم ہمو وڑ اسہ نادرست شار اسیٹ نادرست بندغ آتا نیام ئٹی بے چکار تموک مرور۔
کسہ بناء مریک داکان، اسٹ، ارٹ و مسٹ۔ مسہ کِک خلیسہ موٹر سائیکل ءِ اسٹارٹ کریسہ او وخت اونا جوڑ آتیا بیشخندہ اس تالان مریک و پد ئٹ تولیسہ اونا ایلم و اوکان مونا اونا چنکا ہیڑ ہننگ ئٹ، ہرا دا تصور کننگ کتوسا کہ بروکا پنچ ساعت ئٹی دافتون انت مریک و دا پنچ ساعت ئنا زند اکن فیصلہ پک مننگ ءُ اونا زند ئنا بھاز آ الّمی آ فیصلہ ءِ کننگ ءِ۔
ہرا روڈ آ او سفر کننگ ئس ہمو روڈ آ اوکان ہفت ساعت مست جَن ئسے نا گاڑیک ہننگ ئسر ہراٹی زالبول چنا و پیرانگا مچ دھول آ چاپ کننگ ئسر ، ہفت ساعت آن گڈ ہمو روڈ دا تصور کننگ کتوکا ای داکان منہ منٹ مست بندغ آتے خوشی کریسہ خناٹ و داسا ای تینٹ خونی اس جوڑ مننگ اٹ۔
اندن اسہ نادرست ءُ ٹرک و موٹر سائیکل نا ٹکر نا ڈک لگنگ آن کسہ بدل مس، تغ آک پنار، روشن ءُ زند ئسے نا است خواہی تخوک آ خن تیا ابدی کن تارمئی نا گواچی مسر ، سخت ڈک لگنگ و چپی،خف، باموس و باہ آن تلاپ نا وڑ چُروک آ دتر تیان ویران آ کسر دتر چُر مس۔
بس اسہ گاڑی اس ترندی ئٹ بریسہ اوفتا رہی آ بریک سلیک ہرا مسہ بندغ زو زو گاڑی آن دڑینگسہ اوفتے گاڑی ٹی تخیسہ اسپتال نا کنڈ راداہ مریرا۔
اسپتال ٹی ڈیٹول و اسٹرپٹ نا گند ئنا نیام ئٹی داسا فیصلہ مننگ ئس انداٹی اونا خڑک ئنا سیال آک ہم سر مسر آ، بس داسا ایمرجنسی وارڈ ٹی فیصلہ نا وخت اس، ایمرجنسی وارڈ آن ڈاکٹر پیشن مریک گڑا مچ اودے اریرا و اسہ نادرست ءُ بولی اسیٹ ڈاکٹر منہ لوز پائک، و تینا دفتر نا کنڈا کائک، مون نا بندغ آک دا پوہ متوسر کہ ڈاکٹر انت پارے، خڑک سلوک اسہ نادرست ءُ بندغ اس اوفتے پوہ کننگ نا کوشست کریسہ بھاز خواری ئٹ او تیان سٹی پٹی آ انگلش ٹی بیرہ دا پارے؛ Dr. Says your beloved is no more.
دے ڈب ہلنگ تون دے ئنا وجود ساعت اسیکن تارمئی تا دوٹی برمتہ مریک ولے پدا ہم بندغ آک ٹِک تروکا دے اکن اومیت کریسہ بھاز تغ خنیرہ ولے او دے اوڑکن ٹک تروکا دے و ڈب ہلوک آ دے نا بے سوب جوڑ مسوسر،تارمئی آ نن ئٹی منہ بندغ زو زو قبر خُتنگ بناء کریر ۔ بِدر آ شار ئٹی بِدر آ بندغ آتا نیام ئٹی بِدر آ قبر و اوٹی خاچنگ کن تیار اسہ بیگانہ بندغ اس ہرا بھاز تغ خنا سس ہرا بھاز است خواہی جوڑ کریسس تیوہ آک چپی نا گواچی مسر۔
ہرا قبر ٹی او کڈ ئس اونا مغرب نا کنڈا اسہ پیر ءُ بندغ اس کڈ ئس ہرا اسہ وخت اس اِرا معاشی طاغت آتا جنگ ٹی خلنگا سس ہرا دائسکان پوہ متو کہ ای انتئے خلینگانٹ،دے ٹک نا کنڈان اسہ چنکو چنا اس کڈ کروک ءِ ہرا اسہ دے اسہ ڈبہ ئسے گوازی نا گڑاس سرپد مریسہ گوازی ککن ارفے ہرا خاخری ءُ سلاء اس پک مریسہ ترخاسس، چنا نا دو، نک و لخ جوْن آن جتا مسوسسر، و اونا چار ٹکر کڈ کننگاسر،جہندمی پارہ غا اسہ ورنا ءُ مار اس کڈ کروک ءِ، ہرا اسہ فوجی آفیسر ئسے نا ڈرائیور اس ئس، اسہ دے اس خواجہ نا گاڑی ءِ بمب ئٹ ٹک کننگاسس خوش بخت آ خواجہ گاڑی ٹی ساڑی الو، بد بختی ٹی گاڑی ڈرائیور تون ئس و او بے سوب مرگ نا گواچی مس، قطب نا کنڈا اسہ نیاڑی اس کڈ کروک ء ِ و سما اف اونا مرگ ہرا وڑ مسونے وتیوہ آ قبرستان ٹی بھاز آ بندغ آتا مرگ اندا وڑ مسونے۔
تیوہ آ گڑا تیان بیدس است سریفوکا ہیت دادے کہ ہرا دا قبرستان ٹی او کڈ ءِ ہمو مچ بندغ آک اسہ بولی اس کیرا،اوفتا مذہبی رعاج و ایلو رواج آک ہم اسہ وڑ ءُ، و او یکا انگا بندغ ءِ ہرا نا زند کننگ نا وڑ و ڈول، بولی او بندغ آتیان جتا ءِ و تیوہ آتیان بھلا ہیت ہرا ڈیہہ آ او کڈ کروک ءِ او ڈیہہ ہم اونا جند ئنا اف۔
او تینے بِدر آ بندغ آتا نیام ئٹی جتا خنیسہ انداخہ در خلیس ٹی ءِ کہ ہر روشن آ گڑا ءِ بند کننگ نا جستجو کیک۔
ولے بے ساہ!
اونا خنک مُر خلاء ٹی اسہ گڑاس ءِ پٹینگ ءُ، اسہ توار اس مرے ہرا دے او پوہ مرے۔
ولے اسہ موْنو کوٹی، تربت اس۔
دانا تیوہ آ وجود ءِ زمزیر تیٹ تفوک و تینا پٹنگ کن جاگہ اس پیش تماسس و، تغ آتا زمزیر آک اونا خلکن و نازک آ بدن آ تینا نشان تے ہلار ۔
اونا بے داغ آ وجود ءِ داغ دار کننگ ئس۔
دڑد ئسے، بھاز بھلو دڑڈ۔
گڑاس توار اوار مننگ ءِ دا تیوہ آ ماحول ٹی بد آ توار تا توار توار زیات مریسہ ءِ۔
مخلوق گار پریاد کننگ ئس، تغ آتا پننگ آ اوفتیٹ اوار اسہ توار اس اونا ہم ئس۔
اوکان گڈ او تینا توار ٹی تینا پن ءِ بننگ آ ہبکہ مس۔
و پد سلیس، اسہ پورہ مفروک ءُ تغ ئس۔۔۔۔۔۔۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
