تحریک لبیک پاکستان نا بنجائی راہشون پیر اعجاز اشرف، مولانا خادم رضوی نا کذیت ءِ پک کریسہ پارے کہ او  مبارکی نا سوب آن ناجوڑ ئس و طبیعت نا خرابی آ ہم تدوکا دے تیٹ ناموس رسالت ریلی اٹ اوار مس۔

تدوکا یک شمبے آ ٹی ایل پی نا سد آ باسک آک خادم رضوی نا راہشونی ئٹ فرانس ئٹ بے شرف آ خاکہ آتا شینک کاری نا برخلاف لیاقت باغ راولپنڈی ئٹ برانز آ توسر، ہرافتا خواست ئس کہ فرانس نا سفیر ءِ پاکستان آن کشنگہ۔

دا وخت آ خادم رضوی نا بابت ہول پیری کرے کہ اودے برانز آ تولنگ آ دزگیر کننگانے، واہم تحریک لبیک پاکستان نا ذریعہ غاک پک کریر کہ خادم حسین رضوی پِن کروک “بابا جی” راولپنڈی ئٹ اسہ نادرست ہند ئسے ساڑی ءِ، ہرانا بابت اوفک تینٹ تپسہ۔

خادم حسین رضوی نا تعلقداری اٹک آن ئس، او 22 جون 1966 ئٹ “نکہ توت” ئٹ ودی مس۔

خادم حسین رضوی جہلم ودینہ آن مدارس دینیہ آن حفظ و تجوید نا تعلیم دوئی کرے و جامعہ نظامیہ رضویہ لاہور آ درس نظام ءِ ایسر کرے۔

بلوچستان نا مسہ جتا علاقہ کوئٹہ، سوراب و نوشکے ٹی سلاء بند جلہوک، جانی نسخان تا حوال ارے۔ جلہو تا ذمہ واری ءِ بلوچ آجوئی خواہوک تنظیمک ارفینو۔

احوال آتا رد ئٹ بلوچستان نا دارالحکومت کوئٹہ نا علاقہ زرغون گیس فیلڈ ءِ نادروست سلا بند بندغ آک جہلو ٹی ٹک کریر۔

زرغون گیس فیلڈ کوئٹہ شار آن 40 کلومیٹر نا فاصلہ آ ٹہیفنگوک ءِ۔ دا گیس فیلڈ سلیمان فولڈ و سندھ طاس نا نیام ئٹی پٹی و بولان بلاک نا علاقہ 120 مربع کلومیٹر آ تالان ءِ۔

جہلو نا ذمہ واری ءِ بی ایل اے منانے۔ بلوچ لبریشن آرمی نا ترجمان نادرست ہند ئسے آن بیان شینک کریسہ پارینے کہ بی ایل اے نا سرمچار آک زرغون گیس فیلڈ نا رکھ کروک کوزہ گیر پاکستانی فورسز پوسٹ ئسے جہلو ٹی ٹک کرینوم جہلو کِرکِڑ نا ہند آ کننگا، ہرا نا سوب آن فورسز نا اِرا کارندہ ہند آ بیران مسر اندن پوسٹ ءِ نسخان ہم مسونے۔

او پارے کہ بی ایل اے بلوچ سرزمین آ کوزہ کروک فوج و بلوچ مڈی آ لُٹ و پل کروک منصوبہ آتیا جہلو کریسہ کرو۔

درو سوراب نا علاقہ گدر ئٹ پاکستانی لشکر آ نادرست سلاء بند بندغاک جلہو کریر۔ جلہو نا وخت ہڑتومہ کنڈ آن اسٹ ایلو آ سم کاری مس۔

جلہو نا ذمہ واری ءِ ارفیسہ بلوچستان لبریشن فرنٹ نا ترجمان میجر گہرام بلوچ پارینے کہ ننا سرمچار آک جلہو ئٹ کوزہ گیر پاکستانی فورس فرنٹیئر کور نا چیک پوسٹ ٹک کرینو۔

گہرام بلوچ پارینے کہ بلوچستان نا آجوئی اسکان کوزہ گیر پاکستانی فورسز ءِ ہر ہند آ آسراتی ئٹ تولنگ کہ ہلوفن و بلوچستان نا کُنڈ کُنڈ ئٹ دوژمن آ جلہو کرون۔

پین احوال ئسے نا ردئٹ داکان مالو ضلع نوشکی ئٹ ہم پاکستانی لشکر آ جلہو مس۔ دا جلہو نا ذمہ واری ءِ ہم بی ایل ایف ارفے۔

بی ایل ایف ترجمان بیان شینک کریسہ پارے کہ نوشکی ٹی اژدہ خول نا ہند آ فوجی چوکی آ اسنائپر رائفل ئٹ جہلو کریسہ اسہ کارندہ ئسے مرگ نا گواچی کرین۔

بلوچستان حکومت کرونا وائرس نا کیس آتیٹی گیشتری مننگ نا سوب آن سمارٹ لاک ڈاؤن نا فیصلہ کرینے۔ محکمہ داخلہ حکومت بلوچستان نا پارہ غان سمارٹ لاک ڈاؤن نا نوٹیفکیشن ءِ تالان کننگانے۔

یاتی مرے دا نوٹیفکیشن نا ردئٹ دا ام پاننگانے کہ دفتر، ٹرانسپورٹ، شاپنگ مال تون اوار السی جاگہ غاتیٹی ماسک بیننگ المی ءِ۔ ماسک بینپروک آتا برخلاف دفعہ 144 نا ردئٹ کاروائی مریک۔

سمارٹ لاک ڈاؤن نا ردئٹ بلوچستان ٹی سیل و سواد نا غٹ جاگہ غاک شام ئنا شش بجہ آن پد بند مریرہ۔ اندن شاپنگ مالز، مارکیٹ، برام جاگہ، بھلا بھلا ہوٹل آک نن نا 10 بجہ آن پد بند کننگ مریرہ۔

یاتی مرے کرونا وائرس نا ارٹمیکو لہر نا سوب آن خوانندہ جاہ آتے ام بند کننگ آ صلہ مننگے۔ اندن بلوچستان نا وزیر تعلیم سردار یار محمد رند گدرینگوک آ دے احوالکار آتون ہیت کرسٹ پارے کہ 1 دسمبر آن اسکول آتے بند کننگ نا فیصلہ کننگ اُن ولے گڈیکو فیصلہ 23 نومبر آ پاکستان نا بنجائی وزیر تعلیم نا سروک اٹ مروکا بین الصوبائی وزراء تعلیم دیوان ٹی مروئے۔

بلوچستان نا دارالحکومت کوئٹہ نا علاقہ سریاب روڈ آ شکست نا ویل ئٹ اسہ بندغ ئس بیران مس۔ حوال آتا رد ئٹ تدوکا دے کوئٹہ نا علاقہ سریاب روڈ کسٹم آن خڑک اسہ بندغ ئس بازگل ولد باچا گل روڈ شکست نا ویل ئٹی بیران مس ہرانا جون ءِ دوئی مننگ آن پد خاہوت آتا دو ٹی تسر۔

اندن بلوچستان نا علاقہ گلستان آن بیگواہ مروکا سینزدہ سال نا مار حاجی خدائے رحیم ہائی سکول ٹی کہوکا حالیت ئٹ خننگا۔

لیویز کوالخوا تا رد ئٹ گلستان آن بیگواہ مروکا سینزدہ سالہ مار ظہور احمد مار عزیز اللہ نا، حاجی خدائے رحیم ہائی اسکول ئٹ کہوک آ حالیت ئٹ خننگانے ہرانا جون دوئی کننگان پد ضابطہ نا کاروائی کین ہپستال آ دننگا، مُستی کاروائی متعلقہ لیویز کننگ ءِ۔

ایلو پارہ غان کوہلو بوہڑی سلنڈر تراک تدینی آن اسہ پین ٹپی اس ملتان نا برن سینٹر اٹ بیران مس، ہرا پاک اٹلین ماڈرن برن سینٹر ٹی دوا درمان مننگ ئس۔

بیران مروک نا چاہنداری غازی خان نا مار خلیل احمد نا پن ئٹ مسونے اندن سلنڈر تراک نا سوب آن داسکان 9 بندغ بیران مسونو۔

جہانی ادارہ جانجوڑی نا سر کماش پارینے کرونا دین ئنا ناجوڑی نا تالانی بیرہ ویکسین ئٹ توننگ مروف۔ جہانی میڈیا نا ردئٹ جہانی جانجوڑی ادارہ نا ڈائریکٹر جنرل ٹیدروس ادھانوم غیبریس چار شمبے نا دے تینا اسہ بیان اسیٹ پارینے کہ ویکسین کمکار المی مرو واہم خیالداری تا ہند ءِ ہلنگ کپک۔

اوفتا پاننگ ئس کہ المی اسہ ویکسین ئٹ دین ایسر مروف، بناء ٹی ویکسین پیر یا آباتی نا اسہ اندنو بندغ ئسے تننگو ہرادے دین آن زیات خلیس ارے۔

او پارینے کہ اومت ءِ کہ دا حکمت عملی آن کہوک آتیٹ کمی مرو و جانجوڑی بست و بند آ زور کم برو، ویکسین نا بننگ آن بیدس وائرس نا ٹیسٹنگ و زیمی آتو ہوالکار تخوک آتے رکھ کننگ نا وڑ ڈول ءِ برجاء تخوئی مرو۔

نیشنل پارٹی نا بنجائی راہشون محراب بلوچ، صوبائی ریجنل ڈپٹی سیکرٹری عرض بلوچ و ایلوفک پریس کانفرنس کرسہ پارینو کہ کوہلو گیس سلنڈر تدینی تاریخ نا افسوسناک تدینی ئسے ہراٹی اِرا درزن نا کچ کم سن چُنا پُتک ہلیسہ زند و مرک نا نیامٹی ءُ و اندن ہفت چُنا ٹپ آتا سوب دا کوڑی ءِ یلہ کریر، دا بھلا تدینی آ صوبائی و بجائی حکومت نا پارہ غان زیمی خاہوت تون ہچو کمک اس کننگتو ہراکہ افسوسناک ءِ۔

اوفک پاریر کہ بے لائخ حکومت آک داخس بیوس مسونو کہ دنو بھلو کچ ئسے آ بندغی جان تا نسخان آ، گچین وڑئٹ چُنا تا کہ ہرافک خوشی تون مجلس ئٹ ساڑی مسوسر، افسوسناک تدینی ٹی پُتک ہلیسہ ٹپی مسونو ولے بست و بندی کوالخوا تون اوار حکومت نا کاٹم ءِ بوڑ اس کنتو۔

اوفک پاریر تدینی آن گڈ نہ بیرہ حکومت ءِ جانجوڑی نا گچین آسراتی تروئی ئس بلکن زیمی خاہوت آتے دمدستی تون دا سخت آ ساہت آ اوفتون سلوئی ئس۔

نیشنل پارٹی نا راہشونک خواست کریر کہ تدینی آن زیمی خاہوت آتے گچین جانجوڑی آسراتی تننگہ و اوفتو مالی کمک کریسہ اوفتا سختی تے کم کننگہ نئے تو بنجائی و صوبائی حکومت تون اوار بست بندی کوالخوا تا بے لائخی و غیر ذمہ داری نا درشانی آ تیوی بلوچستان ئٹ برانز ارفون۔

بلوچستان نا علاقہ بوستان و دکی ٹی روڈ شکست و سُم کاری نا ویل آتیٹ اسہ بندغ اس بیران و اسٹ ٹپی مسونے۔

حوال تا رد ئٹ پشین نا علاقہ بوستان ٹی بس و گاڑی ڈک لگینگ نا سوب آن اسہ بندغ اس بیران مسونے اندن ایلو ٹپی مسونے۔

ایدھی حوال تا ردئٹ بیگہ تون پشین نا علاقہ بوستان نا خڑک کلی ناصران ٹی ڈائیو بس و گاڑی نا ڈک لگینگ نا سوب آن گاڑی نا ڈرائیور حاجی احمد نا مار گل احمد ہند آ مرگ نا گواچی مس و ایلو حاجی محمد انور نا مار زمان محمد ٹپی مسونے۔

حوال تا ردئٹ جون و ٹپی ہسپتال آ سرکننگانو پین کارروائی متعلقہ بند و بست ادارہ کننگ ءِ۔

اندن پین حوال ئسے نا ردئٹ دکی ٹی سُم کاری آن اسہ بندغ اس ٹپی مس۔

بلوچستان نا ضلع دکی ٹی تدوکا دے چنکو ہیت ئسے آ سُم کاری آن 16 سالہ ورنا اس بھاز ٹپی مس، ویل ئٹی خروٹ آباد آن تعلقدار عبدالمتین نا مار سردار ٹپی مسونے۔

ٹپی ءِ بد حالیت ئٹ ہسپتال آ سر کننگا، ویل کشت و کشار آتیٹ کاریم نا وختا چنکو ہیت ئسے نا سوب آن مسونے۔ ٹپی دوا درمان کننگ آن گُڈ پین دراخی کن کوئٹہ آ رادہ کننگانے۔

بلوچستان نا دارالحکومت کوئٹہ ٹی سیڷ ئنا اولیکو پِر آن گڈ یخ زیات مس، اندن گیس و بجلی نا لوڈشیڈنگ آن مخلوق نا زند پین سختی تا گواچی مس۔

گیشتر حوال تا رد ئٹ مُد ئنا حوال تروک محکمہ نا کنڈان کوئٹہ و زیات اضلاع تیٹ مُد بارن اندن ایلو علاقہ ٹیی مُد یخ، تنَک لڑڈ مننگ نا گمان نا درشانی کرینے۔

محکمہ مُد نا رد ئٹ کوئٹہ ٹی درجہ حرارت کم آن کم 6 ڈگری سینٹی گریڈ، قلات ٹی کم آن کم 3 ڈگری سینٹی گریڈ، گوادر ٹی 14 ڈگری سینٹی گریڈ، سبی ٹی کم آن کم 12 ڈگری سینٹی گریڈ، نوکنڈی ٹی کم آن کم 14 ڈگری سینٹی گریڈ ریکارڈ کننگانے۔

اندن کوئٹہ ٹی تئو ٹی نمبی نا کچ 88 فیصد، گوادر ٹی 64 فیصد، سبی ٹی 65 نوکنڈی ٹی تئو ٹی نمبی نا کچ 25 فیصد ریکارڈ کننگانے۔

ایلو کنڈان گیس مفرنگ نا سوب آن مخلوق نا سختی تیٹ ودکی مسونے، بھاز یخ مننگ و گیس ئنا لوڈشیڈنگ نا سوب آن مخلوق خاص وڑ ئٹ زالبول آتے اُرانا کاریم تیٹی بھاز سختی مننگ ءِ، آم مخلوق صوبائی حکومت آن خواست کرینو کہ او کوئٹہ شار ئٹ گیس تننگ کن دمدستی وڑ ئٹ گام افے۔

احوال: نجیب سائر

کردگاپ اٹ یکشمبے نا دے ہوتک ادبی دیوان نا پارہ غان محفل مشاعرہ اس اڈ تننگا۔ مجلس نا بندات بیگہ نا چار بجہ غا کمیونٹی ہال کردگاپ ٹی مس۔

کلام پاک نا تلاوت رینک فاروق دوئی کرے۔ مجلس نا کماشی ہوتک ادبی دیوان نا کماش میر غلام مصطفی غالب ئس، مہمان خاص یوسف نسیم، اعزازی مہمان ظہور صدیقی، حاجی حیدر آتش، حاجی عزیز احمد سرپرہ ئسر۔ غلام فاروق سرپرہ اسٹیج نا ذمہ واری تے دوئی کرے۔

افتخار تناوش، ملک کریم بخش، ساجد ساجدی، بابل صبا، ٹکری عبدالباسط ابابکی، صابر صدیقی، شمس شمسی، جبار زیب، حسرت بلوچ، عادل رشید، بشیر شاد، حاجی حیدر آتش، ظہور صدیقی، یوسف نسیم و میر غلام مصطفیٰ غالب تون پین چندی شاعر آک تینا شئر تے بنفیر۔

مجلس نا گڈ سر ٹی براہوئی بولی نا پنی آ شاعر ظہور صدیقی نا کتاب “پر آن پد “ نا مون پاشی ام کننگا۔ محفل مشاعرہ ٹی بنفوکا شاعر آتا گڑاس شاعری دا رنگ ٹی ئسر:

افتخار تناوش
اے بلوچستان کنا، نے آ جان قربان کنا
کُوک، فریاد اِیڑک خلیرہ
اڑدے غمک پلویڑ کیرہ
بِن تناوش پُھلاک پارہ
کپو سیناک اُست بٹیرہ

ملک کریم بخش
کین ہزار گناہ تو جرم افک
اسے غلطی کن پین ء کسفینُن
سما اف دن دیچہ امر مسون
دا وڑو ڈول ء دیرن ارفینُن

ساجد ساجدی
الو خبر اچانک کل شارکرے حملہ
نن شار تن اختہ مسن کہ یار کرے حملہ
کاٹم ء کرین بڑزا تینا حق ء کن ساجدی نن
ننے آ کہ ننا جند ئنا سردار کرے حملہ

بابل صبا
ستمک دا استے دنیا نا خننگر
غم اف مہراک مولا نا خننگر
غریبی نا اثر اف انتہ سے دا
چناک پنچ سال نا پنجاہ نا خننگر

ٹکری عبدالباسط ابابکی
مرک تلوار نی اسپر
وطن نا نی اریس رہبر
ننا مظلوم شپاد خل تہٹ
دتر چور نکوتا جل تہٹ

صابر صدیقی
عشق ئنا درد ء خنا کس صدیقی
گڑا عاشق آ تا عاشقی ارمان ئسے

شمس شمسی
خل ننے ٹولی ٹی خاچف
موت نا جولی ٹی خاچف
نا چُنا لولی ٹی خاچے
نی ننے گولی ٹی خاچف

جبار زیب
خدایا نی دُن او کمال اس تفیس
تینا عقل ئن بڑزو خیال اس تفیس

حسرت بلوچ
قوم ئنا خیر خواہ شاعر اگر فسادی مس
رہبرِِ قوم نشہ و ہوس نا عادی مس
کچک نا جنگ یا چکاتے آ لگا میلہ
ظلم و زیاتی ٹی چناتو اگہ بے دادی مس
گڑا نی چاس کہ داتا ضمیر خاچوک ء
دننگا قوم ئنا بروکا نسل کل پوک ء

عادل رشید
دادے نی استعمال کر ڈولٹ
علم اسہ بے بہا او ٹیکی سے
کسے جوان او کسر نشان ایتہ
بشخیسہ کر نی داد ء نیکی سے

بشیر شاد
دا دور ٹی زارے تینا کسس تروک کس اف
بشیر سادہ نی سر خلیسہ کہ شہد ئسے کن

حاجی حیدر آتش
فیشن کل آ دنیا کیک
میک اپ اخس ورنا کیک
ہشتاد سال نا بلی ء
اصلی ء یا نقلی ء
ڈگری تو بس ڈگری ء

ظہور صدیقی
ستم تینے آ او ہر وار کیرہ
پدا وا ظالم اس دستار کیرہ

یوسف نسیم
پہین او است اس اراڑے ملک اک
ای الیوہ راج آ کے درکار ئسے
تہہ ئنا بے بندغی روشن مرے
پیشن آن ہر اسٹ اِستار ئسے

میر غلام مصطفیٰ غالب
لوظاتے ٹی لکھوکا اثر پٹیوہ
دا بارُنا جانٹ دتر پٹیوہ

جان جوڑی محکمہ نا کرونا وائرس آپریشن سیل نا پارہ رپورٹ ٹی پاننگانے بلوچستان ٹی گدرینگوک آ دے 65 پین کرونا نا کیس رپورٹ مسونو  اسے نا جوڑ اس بیران مسونے ہرانا سوب آن کرونا کیس آتیٹی ودکی مننگے۔

اندن ہفتہ نا دے خوانندہ جاہ آتیان ام 11 کیس رپورٹ مسونے۔ رپورٹ نا ردئٹ بلوچستان ٹی دا وخت اسکان 16393 ناجوڑ آتیان 15817 جوڑ مسونو۔

اندن ہفتہ نا دے بلوچستان نا خوانندہ جاء آتیٹی 228 خوانندہ ءِ ٹیسٹ کننگ آن پد 11 بندغ ٹی کرونا نا کیس پک مسونے۔