بلوچ اسٹوڈنٹس ایکشن کمیٹی نا مسکوئی آ وائس چیئرمین فیروز بلوچ اسہ سال ءُ 10 توہ آن پد یلہ کننگا۔

فیروز بلوچ آئی ٹی یونیورسٹی آن انجینئرنگ کریسہ بلوچستان یونیورسٹی ٹی ایم اے بلوچی کننگ اس ہرادے تینا سیال جمیل بلوچ تون اوار 29 مئی 2019 آ پنجگور آ ہننگ نا وخت آ قلات نا علاقہ آن زبردستی بیگواہ کننگا ہرا اینو یلہ مریسہ تینا اُراغا رسینگا۔

یاتی مرے بیگواہ بلوچ آتیکن اوفتا خاہوت آک اینو پاکستان نا بھلا شار اسلام آباد ٹی ام تینا بندغ آتا یلہ کننگ کن برانزی کیمپ خلکنو ہرا برجاء ءِ۔

خالد پرکاڑی

نوشت: زرک میر

دی بلوچستان پوسٹ

خالد پرکاڑی اسے اندن ءُ ورنا سے ہرا نا براہوئی شاعری اسہ چنکو وخت ئسے ٹی بھاز دوست تخنگا، انتئے کہ اونا شاعری ٹی خیالاک سادہ انگا لوزاتیٹ کُڑمبی تخرہ اسہ جتاؤ دروشم اس ایترہ، اندا سوب آن  خالد پرکاڑی براہوئی شاعری نا پِڑ آ ایلو براہوئی شاعر آتیتون اوار اوار تینا تخلیقی پند ءِ خلّنگ ئٹی ءِ۔ کنے ہم ایلوفتے آنبار خالد پرکاڑی نا شاعری بھاز وڑک، انداڑان ای اونا شاعری آن بھاز چس ہلیوہ خوانیوہ۔ مزہ نا ہیت دا کہ اسہ دے خالد کنا و شیتل نا زی آ ہم منہ بند نوشتہ کرے تو کنے عجب ءُ خوشی اس رسینگا کہ براہوئی نا دا گچینا شاعر کنا مہر ئنا کسہ ءِ اخس دوست تخک۔ کنے ہڑدے اندا ڈکھ اس کہ دا ورنا وا دُننگا  گچینا خیال آتا خواجہ ءِ اسہ جُوان ءُ روزگار اس رسینگے ہراڑے او تینا زیبا انگا خیال آتے آسراتی ٹی درشان کننگ کے و براہوئی ادب کن تخلیق کے، ولے شوم آ بخت کہ اسہ دے بنگُن کہ خالد جان ءِ کینسر ءِ۔ کنے ایلو سنگت آتے آنبار بھاز ڈکھ مس کہ دا ورنا داسکا تینا زند ئنا چس ءِ ہلنگ کتو کہ او دا بلّا بیماری تون اختہ مس، ولے سنگت آک اسہ بھلو جُہد ئسے نا بناء کریر و چندہ  کننگ ئٹ تمار ہراڑان مخلوق نا کنڈان اسہ بھلو جوان ءُ جوزہ اس مونا بس و بننگ ءِ۔

خالد جان نن بے بخت ءُ قوم ئسے اُن، نن داسکا چندہ کینہ و نم کونا ورناتے علاج کرفنہ، ننا دا وسائل آک نم کونا ورناتیکن کاریم بفسہ انتیکہ دافک ننا دوٹی افس۔

نے زو اس جوڑ مروئی ءِ، نے زو اس ولدا بروئی ءِ، نے زو اس ولدا براہوئی شاعری کروئی ءِ کہ دا راج ءِ نم کونا شاعر و گچین ءُ خیال تخوکو ورناتا بھاز خواست ءِ، گُڈ سرئٹ  منہ لوز نُما خذمت ئٹ پیش ءُ؛

بیماری ءِ اللہ درو
تف مُخ نی مر خالد ننا

لکھہ غزل فعلن فعل
زو ئس نی بر خالد ننا

نی سنگت اُس غُٹ شار ئنا
نیتو کسر خالد ننا

نیکن منہ خُلّاٹ لوز
اف تا  اثر خالد ننا

اف نا درک وڑپک اسُل
نن درپدر خالد ننا

 شیتل تونے زرّک سلوک
باور نی کر خالد ننا

بلوچستان نا ضلع قلات ئٹ صوبائی وزیر داخلہ نا بنماسی آ علاقہ ئٹ نادرست بندغ آک سم کاری کریسہ پنجاب آن تعلقدار مُسہ بندغ ءِ مرگ نا گواچی کریر۔

لیویز کوالخواہ تا ردئٹ تدینی کوئٹہ آن کم و وَد 130 کلو میٹر مُر قلات نا تحصیل منگچر نا علاقہ سرخ پرہ کلی خراسانی ئٹ یکشمبے و دو شمبے نا نیامئی نن آ مس۔

نائب تحیصیلدار منگچر بابو رمضان نا پاننگ نا ردئٹ کسفنگوک آک ٹیوب ویل ئسے آ کاریم کننگ ئسر ہراتم نادرست بندغ آک بسر و سُم کاری کریر۔

سم کاری نا وخت آ چار بندغ ساڑی ئسر ہرافتیان مُست جاگہ غا کسکر و اسہ بندغ اس علی رضا نریسہ تینا ساہ ءِ بچفے۔ اودے نت ئٹ سُم اس لگانے۔

سم کاری آن گڈ جلہو کروک آک نرار۔ کہوک آتا چاہنداری شاہ نواز، قاسم علی و تودا نا پن تیٹ مسونے، ہر مسٹ ئنا تعلقداری پنجاب نا علاقہ ضلع رحیم یار خان نا تحصیل صادق آباد آن ئس۔

نائب تحصیلدار نا ردئٹ دا بندغ بھازا تُو تیان منگچر نا جتا علاقہ تیٹ کاریم کننگ ئسر۔

لیویز جوْن تے ہسپتال آ سر کریسہ المی کاریم تیان گڈ ہندی علاقہ تیکن رادہ کرے۔

یاتی مرے منگچر بلوچستان نا وزیر داخلہ ضیاء اللہ لانگو نا بنماسی علاقہ ءِ۔ ضیاء لانگو تدینی نا نوٹس ءِ ہلیسہ ڈپٹی کمشنر قلات آن رپورٹ خوائسونے۔

حوال تا رد ئٹ پنجگور پروم کپ ٹی اِرا گاڑی نا ڈک لگنگ نا سوب آن ہڑتوماک خاخر ہلکر، عبدالرحمن نا مار رحمت اللہ، اللّٰہ داد نا مار ناصر ہرا بسیمہ آن تعلقدار ءُ پُتک ہلیسہ ٹپی مسونو و اسہ نادرست بندغ اس ہشنگسہ بیران مسونے ہرانا جوْن ءِ سول اسپتال آ سر کننگا۔

اندن مکران کوسٹل ہاٸی وے آ منی بس و کار نا ڈک لگنگ نا سوب آن  پی پی ایچ آٸی تربت نا ڈی ایس ایم حاجی خان تون اوار 11 بندغ بھاز ٹپی مسونو۔

پسنی ٹی ریک آن پُر ڈمپر ٹرک کارواٹ زیروپوائنٹ نا ہند آ ویل ئنا گواچی مس ہرا تربت آن گوادر آ ہنگ ئس، ویل  بریک نا کاریم ءِ ہلنگ نا سوب آن مس۔

حوال تا رد ئٹ حب ریور روڈ لال قلعہ نا رہی آ اینو سہب ئنا موٹر سائیکل آ سوار اِرا ورنا ءِ ٹرالر اس لتاڑا ہرانا سوب آن اسہ بندغ اس بیران، اسٹ ٹپی مس۔ اوفتے دمدستی وڑ ئٹ سول ٹراما سینٹر آ سر کننگا۔

گیشتر حوال تا رد ئٹ بارکان رکنی چنگ ندی چھپر آ گاڑی و موٹر سائیکل نا ڈک لگنگ نا سوب آن اِرا بندغ رحیم نا مار رمضان  بغاو آن تعلقدار و میر محمد نا مار فضو ٹپی مسونو، ٹپی آک ڈی جی خان آ رادہ  کننگانو۔

پین حوال ئسے نا رد ئٹ تربت ئٹ فٹبال چوک غلام نبی پمپ نا رہی آ موٹرسائیکل و کرولا گاڑی نا ڈک لگنگ نا سوب آن اسہ بندغ اس ٹپی مننگ نا  حوال ءِ۔

یاتی مرے بلوچستان ٹی  روڈ شکست آتا لڑ زیات ءِ ہر سال سد آ بندغ آک مرگ نا گواچی مریرہ و بھلو کچ اسیٹی مخلوق ٹپی مریک۔ ہردے ویل و کہوکا تا احوال آک لس مخلوق ءِ فریشانی تا گواچی کرینو۔

بلوچستان نا دارالحکومت کوئٹہ ئٹ کشمیر دے نا ردئٹ اسے مچی گام اس کسٹم سریاب آن کوئٹہ پریس کلب اسکان کشینگا۔ دا مچی گام آ انسکمب روڈ آ ڈی سی آفس نا رہی آ سر مننگ تون اوار تراک اس مس ہراڑان اِرا بندغ مرگ نا گواچی و چار بندغ ٹپی مسر۔

مونی حوال آتا ردئٹ دا تراک نا ذمہ واری ءِ بلوچ آجوئی خواہوک سلاہ بند تنظیم بی ایل اے ارفے۔

بلوچ لبریشن آرمی نا ترجمان جیئند بلوچ تینا بیان ٹی پارینے کہ ننا سرمچار آک کوئٹہ ٹی پاکستان نا فوج نا کماشی ٹی اڈ تروکا مچی گام آ جہلو کریر ہراٹی اِرا ریاستی کارندہ ءِ کسکر و چار ریاستی کارندہ ٹپی مسر۔

او مونی پارینے کہ بی ایل اے نا سرمچار آک تراک نا نسخان آن الس ءِ بچیفنگ کن وڑ وڑ نا حکمت عملی جوڑ کریسہ دا نام نہاد کشمیر ریلی نا ٹرک آ پوسکنا چسپکی بمب ئٹ جہلو کریر۔ ننا سرمچار آک دا مچی گام ءِ ہمو وخت آ ٹک کریر ہرا وختا دا انسکمب روڈ آن ہنیسہ ئس۔ دا جہلو آن اِرا بندغ کسکر و چار بندغ بندغ ٹپی مسر۔ کہوک آتیٹی اسٹ اس سلاہ بند ئس۔

یاتی مرے داڑان مست سبی ٹی ام کشمیر نا درگت آ مروکا مچی گام آ ام چغلی بمب ئٹ جہلو کننگا ہراڑان 24 بندغ نا کچ ٹپی مسونو اوفتیٹ اِرٹ نا حالیت بد پاننگک۔

سبی جہلو نا ذمہ واری ء بلوچ آجوئی خواہوک سلاہ بند تنظیم بلوچ ریپبلکن آرمی ارفے ۔

بلوچستان نا ضلع سبی ئٹ “کشمیر ڈے” نا پن آ کشنگوک ریلی آ نادرست بندغ آک چغلی بمب جلہو اس کرینو ہراڑان پولیس نا کارندہ آتیتون اوار 24 بندغ ٹپی مسونو۔ جلہو نا ذمہ واری ءِ بلوچ آزادی خواہوک سلاء بند گل بلوچ ریپبلکن آرمی ارفینے۔

پولیس نا ردئٹ تراک سبی ئٹ میر چاکر خان روڈ آ چورنگی نا رہی آ مس۔

کوالخواہ تا پاننگ ءِ کہ تراک ہمو وخت آ مس کہ کشمیر ڈے نا ریلی دا ہند آن گدرینگ ئس۔ تراک آن گڈ دمدستی تون کمکی کارندہ غاک ہند آ سر مسر۔ ہراڑان گڈ ٹپی تے سول اسپتال آ دننگا۔

تراک آن گڈ قانودی ادارہ و بم ڈسپوزل اسکواڈ ہم ہند آ سر مسر۔ بی ڈی ایس کوالخواہ تا پاننگ ءِ کہ تراک چغلی بمب ئٹ کننگانے، ہرانا شاہدی تے مُچ کننگانے۔

تراک ئٹ پولیس کارندہ تیتون اوار ریلی نا 24 بندغ ٹپی مسونو ہرافتیان اِرٹ نا حالیت بد پاننگک۔

جلہو نا ذمہ واری ءِ بلوچ آزادی خواہوک سلاء بند گل بلوچ ریپبلکن آرمی ارفینے۔ گل نا ترجمان بیبگر بلوچ بیان تریسہ پارینے کہ جلہو ئٹ پاکستانی ڈھکوک ادارہ تا مخ تفی ئٹ بیرہ پن ئنا کشمیر ڈے ریلی ءِ ٹک کرینن۔

We did a grenade attack on a Kashmir Day rally organized by Pakistani intelligence agencies in Sibbi, injuring more than a dozen state workers.
The purpose of such rallies is to cover up the ongoing state atrocities in occupied Balochistan which is not acceptable by Baloch nation

— Beebagr Baloch (@BeebagrBaloch3) February 5, 2021

بیبگر بلوچ نا مُستی پاننگ ءِ کہ بلوچستان ئٹ بارود و آہن دسوک آک پن ئنا کشمیر ڈے ریلی کشیسہ جہان ءِ بلوچستان نا بابت ریفنگ نا کوشست ئٹی ءُ۔

پانچ فروری نا دے پاکستان نا جتا علاقہ آتیتون اوار بلوچستان نا شار تیٹ کشمیر ڈے نا مُچیک ہڈ تننگرہ ولے بلوچ آزادی خواہوک آتا ردئٹ دا مُچیک پاکستان فوج و ڈھکوک ادارہ تا کمک ئٹ ہڈ تننگرہ ہرانا مسخت کشمیر ءِ تینا بشخ اس نشان تننگ تون اوار بلوچستان نا بابت جہان ءِ ریفنگ ءِ۔

بلوچ ورنا موومنٹ تینا بیان اسیٹی پارینے کہ کشمیری اُلس نا جہد ءِ پاکستانی فوج جہادی طاغت آتا کمک ئٹ تینا دوٹی ہلیسہ کشمیری تا تاریخی حق خود ارادیت و آجوئی نا جہد ءِ اسہ دہشت گرد تحریک اسیٹی مٹ کرینے و جہانی پڑ آ کشمیری تا تحریک پاکستان نا منافقی آ پالیسی تا سوب ہند دوئی کننگ نا جاگہ غا بدنامی و ایسری نا پارہ غا ہننگ ءِ۔