ایسری ہتم
نوشت: سفر خان بلوچ
مٹ: دُرناز بلوچ
دی بلوچستان پوسٹ
دیوال آتیا سم تا لگنگ آن بے حساب کھڑک آک، اُرا تا در و دیوال، درغ، کھڑکیک سم تے آن بُھس مسوسر۔ ڈغار آ خشت و خل تا ڈھیر اس، و خڑک ڈغار آ تموک سنگت نا جوْن و ٹپی سنگتاک بے جان تموک ئس ۔ ہر جاگہ دتر نا لپ آک و اونا نا عجب ءُ گند اس ئس۔ اونا بدن آ ٹپ آتا منہ نشان ئسر۔ ترخوکا جوڑک، ٹپ آتے آن دتر تا وہنگ آن بیدس ہم او مش ئنا وڑ سلوک ئس۔
او ہرا وخت پدی چک خلک اُرا، ٹپی سنگت زان تیا ڈغار آ تولوک ئس، اونا مون دائسکان ہم رژنا ئس، او رمبسہ جوْن و ایلو ٹپی سنگت آتا رہی آ ہنا، ہراڑے اود اونا دوتے ہلک، پدا او بے ساہ تموکا جوْن ءِ راست کرے کہ ہندا وختا او پریاد اس خلک، دا کنا سنگت ءِ، او تینا فرض ءِ پورو کرے او کنے داسکان تینا فرض ءِ پورو کروئی ءِ۔
اندا ساعت خاخر نا وڑ باسن ءُ اسہ گڑاس چیریسہ اونا بدن ئٹ پیہا۔ مونا تا بشخندہ داسکان ہم اس، خنتیٹی تا خڑینک نا جاگہ آ گروشک اس ئس، اندا پاس آ او بشخندہ کروک و نورانی آ دروشم تون اسہ پُچ ئسے نا ٹکر ءِ تینا ٹپی آ سنگت ءِ تس ہرادا دتر نا لپ ہم ئس۔
ایلو پارہ غان جانجوڑ انگا سنگت دژمن آ سم شلنگ ئس۔ اسہ پاس ئٹی سم تا توار بس کرے، ارٹمی سنگت اسہ وار وا تینا میگزین تے پُر کننگا لگا و فوجی بوٹ آتا توار پین خڑک بننگ ئس، پین فوجی ٹرک زمین ءِ چیریسہ تینا فوجی دستہ آتا رہی آ سر مسر و ٹرک آتے آن پین فوجی دستہ دھڑنگسہ دانگ اینگ تالان مریسہ کریر۔
وا پدا مُچا خلک ئٹ چُپی نا مُد تالان مس، مُر اسہ خلق اسیٹی چُنا اسینا اوغنگ نا توار خفا تمنگ ئس او اندا وخت اسہ موٹر سائیکل ئسے نا توار چُپی ءِ چیریسہ دے ٹک آن دے کہی ہلنگ نا کنڈا ہننگ ئس، منہ پاس آن پد وا چپی تالان مس ترندی ئٹ ہنوکا موٹر سائیکل و چُنکا چُنا نا اوغنگ نا توار ہم بننگ الو۔ مننگ کیک موٹر سائیکل مونی ہننگ آن پد بند مس و چُنا ءِ بلکہ اونا لمہ چپ کرفے یا دا ہم مننگ کیک کہ چُنا خاچا۔
داسا ایلو سنگت ہم زو سس میگزین ءِ پُر کرے، او اسہ وار وا سم شلنگ ءِ بناء کرے، خڑک بروک فوجی بوٹ آتا توار اسہ دم چُپ مریرہ۔
نن ئنا گُڈیکو پاس آ دا وختا تہارمئی تینا ایسری آ سر مسوسساو رژنائی مدان مدان تینا وجود ءِ ڈغار آ تالان کننگ نا کوشست ئٹ اس و خلق ئنا بانگوک بانگ ہم تننگ بناء کریسر
او دائسکان ٹپی سنگت نا رہی آ تولوک ائس و ٹپی سنگت دا زور تننگ اس کہ نی فکر کننگ ءِ ہلے ای جوان اُٹ، نی اِن دشمن خڑک بننگ ءِ، اونا کوپہ غا لگوکا سم ئنا ٹپ آن داسکان ترندی ئٹ دتر وہنگ ئس
ٹپی سنگت ہیت آ بس کہ ظلم کروکا تا دوک تڑنگ مریر و بیدادی نا بیرک آتے ماس کش کریسہ تہارمئی نا خلق نا مسافر آتے ڈیوہ نا رژنائی نشان تننگہ ۔ دا بننگ تو اوار اونا خنتیٹی رژنائی بس، اونا حوصلہ آک پین بڑز مسر، او اسہ وار وا بش مریسہ ایلو سنگت نا رہی آ کائک سنگت تون اوار دژمن آ سم شلنگ آ لگک او تینا لاغر آ وجود ءِ گر کریسہ مِزل نا کنڈا ترندی ئٹ ہننگ آ لگک
اسہ پارہ غان بروکا گوڑیفوک آ توار آک بیم تالان کریر، ولے اوفتا حوصلہ آک زیات مسر او سلوک ئسر، او آسمان آ تالان مروکا مون آ جھمر تے اُرا او مزل نا کنڈا رمب کرے
خلق پریاد کرے، مَشک پمبہ جوڑ مسر ، ڈغار اندن لڑزا کہ ایلو کنڈا تل کرے او واہم رمب کریسہ مزل نا کنڈا ہنیسہ کرے ۔ ملاسی نا زور ہچ وڑ ئٹ کم مننگ الو ۔ تلاف آتا دیر ءِ چٹفیر وا سیراب کن دتر نا جوْ تے وہیفنگا لگار ، قیامت نا اسہ دے اس تخوک ءِ ولے اوڑے قیامت بھلو ہد ئسے اسکان بسس۔
دشمن نا خنک دا وختا دلیر آ جنگجو ءِ پٹنگ ئسر ، خلق شب یلدا نا دامون ہیمون ئٹ پیری کریسہ کرے ، دا دژمن نا سوچ ئنا آخری دائرہ اس اونا وجود مش جوڑ مننگ ئس
دا وختا آسمان مون آ شال ءِ بینا و زمین خلیفوک سیخا تا زد ئٹ بس ، خلق دتر ئٹ مشیسہ چپ مس ، چرت آتا چر چر نا حالیت اسکان چپی ٹی ہنا ، ہرا وخت دشمن نا توفک آتا نلک اسہ وار آ ملنگار، او گڈیکو وار آسمان آ اُرا او پارے ۔۔۔۔ رخصت اف اوارن
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
