بی ایس او نا مسکوئی چیئرمین، بی این پی نا راہشون منظور بلوچ کرونا وائرس آن کذیت کرے۔ بی این پی نا سوگ نا پڑو۔

بلوچستان نیشنل پارٹی مینگل نا بنجائی خواری کش آتا سیکرٹری و بی ایس او نا مسکوئی آ چیئرمین منظور بلوچ کرونا وائرس نا سوب آن کذیت کرے۔

منظور بلوچ گدرینگوکا ہفتہ ٹی کرونا وائرس نا جوڑی نا آماچ مس۔ بھاز ناجوڑ مننگ آن پد اودے شیخ زائد ہسپتال ٹی آئسولیشن وارڈ ٹی داخل کننگا ہراڑے اونا علاج مننگ ئس ولے اینو صوب ئتون ناگت آ کذیت کرے۔

یاتی مرے منظور بلوچ نا بنماسی تعلقداری و ڈیہہ مستونگ آن ءِ۔ ہراکان او گدرینگوک آک گچین کاری آ بی این پی مینگل نا بنجاہی اسمبلی نا امیدوار ام ئس۔ 2000 ء نا وخت آ بی ایس او نا چیئرمین ام مسونے۔ دا وختا بلوچستان نیشنل پارٹی مینگل نا بنجائی خواری کش آتا سیکرٹری اس۔

منظور بلوچ نا کذیت آ بی این پی مینگل نا سرکماش سردار اختر مینگل ڈکھ و ارمان کریسہ پارینے کہ تینا سنگت پارٹی نا بنجائی خواری کش آتا سیکرٹری منظور بلوچ نا ناگت آ کہینگ نا احوال آ کنے بھاز افسوس و ارمان بس۔

او مونی پارے کہ منظور بلوچ اسے خواری کروک جہد کار اس ئس ہرا تینا تیوی زند ٹی بلوچستان کن جہد کرے۔

بی ایس او نا مستکوئی آ چیئرمین و ساڑی وختا بلوچ نیشنل موؤمنٹ (بی این ایم) ایڈوکیٹ رحیم بلوچ دا تدینی غا تینا خیال آتا درشانی کریسہ پارینے کہ بی ایس او نا مسکوئی چیئرمین منظور بلوچ نا کذیت کنا است ءِ بھاز رنج کرے، او اسے راج دوست، مخلص و راستگو سیاسی راہشون و مہروانو بندغ اس ئس۔ بلوچ راجی جہد ٹی اونا اِلوکا سیاسی کُنڈ دیچا چو وخت پورا مرو۔

منظور بلوچ نا کذیت آ نیشنل پارٹی، نواب اسلم رئیسانی، بی این ایم نا راہشون حمل حیدر تون اوار کہی سیاسی پارٹی و سیاسی بندغ آک تینا است ہسونی نا درشانی کریسہ اونا سیاسی جدوجہد و قربانی تے یات کرینو۔

بی این پی نا پارہ غا شینک کروک بیان اسیٹی پاننگان ءِ کہ پارٹی نا پارہ غان مسہ دے اکن سوگ نا پڑو کننگانے۔

بلوچستان نا ضلع نوشکی نا علاقہ قادر آباد ٹی زمین نا زی آ اِرا قبیلہ نا نیام ئٹی جیڑہ آن اِرا بندغ مرگ نا گواچی، و اِرٹ ٹپی مسونو۔

حوال آتا رد ئٹ میر عبدالباقی بادینی و اونا مار شعیب بادینی سم کاری آن کسکر، اندن سلال احمد بادینی مار عبدالباقی نا ٹپی مسونے۔ ایلو پارہ غان غازی خان پنی ءُ بندغ اس ٹپی مسونے۔

ٹپی و کہوکا بندغ آک سول ہسپتال نوشکی سر کننگار۔ اسٹنٹ کمشنر ثوبان دشتی و ایس ایچ او نوشکی علی احمد بگٹی سول ہسپتال آ ہنار، و ٹپی تے کوئٹہ کن رادہ کریفیر۔

تدینی نا دوبہ دار آتیان دائسکان کس ئنا دزگیری نا حوال اف۔ اندن جیرہ ٹی اسہ ٹیکٹر اس ہم ہمو جاگہ غا خاخر تننگا ہرادے دوارہ ضلع نا خاخر کسفوک گاڑی بس کسفے۔

بلوچستان نیشنل پارٹی مینگل نا ترجمان تینا اسے بیان اسیٹی پارینے کہ اسے وار ولدا ڈیتھ اسکواڈ آتا سُرپُر، تاوان ہلنگ کن بیگواہ کننگ، دزی، لٹ و پل، منشیات نا بہا کننگ، اُلس ءِ دز و خونخوار آتا آسرہ آ ہلنگ، سیاسی باسک آتا خلنگ، اوفتے بیگواہ کننگ، سیاسی باسک آتے خلنگ نا تڑی تننگ، علاقہ غاتیٹی خلیس و بیم تالان کننگ، چادر و چاردیواری نا عزت ءِ لتاڑنگ، انسانی حق آتا لتاڑنگ، گواچنی و سیاسی قوم پرست، وطن دوست آ جمہوری پارٹی تا کسر آ ہڑاند شاغنگ و اُلس دشمن پالیسی تا خلاف بلوچستان نیشنل پارٹی (مینگل) 9 جون آ سہ شنمبے نا دے تیوی بلوچستان تون اوار کراچی، جیکب آباد، گھڑی خیرو، ڈی جی خان و پین چندی شار آتیٹی برانزی مچی کیک۔

ترجمان مون مستی پارے کہ حکمران آتا ڈیتھ اسکواڈ آتا مون آ بے وسی و چُپی اوفتا خلاف کاروائی نہ کننگ آن دا ہیت پاش پک مریک کہ حکمران آک دافتا مون آ بے وس ءِ۔ اینو ام بلوچستان نا معاملات آک اندا غیر جمہوری طاغت و اختیار تخوک طاغت آتا دوٹی ء ارا کہی سال آتیان بلوچستان نا معاملات آتے تینا دوٹی کرسٹ دا جاگہ نا اُلس کن ویل، سختی و فریشانی ودی کننگ آن بیدس پین ہچ کننگ افس۔

بیان نا ایسر ٹی پاننگا کہ ہر ضلع نا ذمہ وار آتے پاننگ خوانہ کہ ہر کس تینا ضلع ٹی ڈیتھ اسکواڈ نا ظلم و بیدادی تا خلاف بھاز جوانو وڑ اسیٹی سیاسی و جمہوری وڑ ڈول ٹی تینا برانزی مچی تے کیر۔

برمش نا صوب

نوشت: حفیظ شہزاد

دی بلوچستان پوسٹ

او بیرہ ہمو ضد آ سلوک ئس ہرا دا عمرٹ کُل آن گدرینگانے۔ لمہ کنے مامی استا اُراغا در، لُمہ کنے دُکان آ در، لُمہ کنکن دُتک ہڷ، لُمہ کنا سنگت ماہ رنگ کہ اونا لُمہ بلوچی او پُچ گنڈیفین ءِ ای ہم اندُنو خواوہ۔

ضد آ سلوک ہر گڑا ءِ دانگ اینگ سُرفیکہ۔ وارس پُژہ تیا مش شاغاکہ وارس کوٹی ٹی تینے بند کریکہ۔ وارس لُمہ نہ گُدے چکاکہ۔

لُمہ است تس تا آؤ گودی صوب ئنا نے دیوا دُکان آ نیکن ہر گڑا ہلیوہ، نیکن پُچ ہلیوہ، نیکن دُتک ہلیوہ، نیکن سینڈل ہلیوہ، پین انت خواسہ!

برمش بشخندہ کریسہ دانگ اینگ اُرا لُمہ ءِ بُک اس ہلک و ورندی تس ایلو گڑاتے صوب نہ پاوہ نے۔

ایون دا عمرٹ است خواہیک اسُل بھاز مریرہ۔ برمش ءِ تُغ ہلتو، شام ئنا لُمہ وار وارا توار تسکہ گودی خاچ نہ تو صوب ئنا سما کپیسہ ولدا دُکان آ ہِننگ مفک۔ برمش اندا خُلیس آن خنتے تر کرے ہموڑے خاچا۔۔۔

صوب ئتو انداخہ وختی بش مس کہ لُمہ ءِ ہم بش کرے۔ لُمہ اسیکہ حیران مس داخہ وختی برمش انتئے بش مسونے خیر تو ارے

ولدا مڈول ئٹ تا بس آؤ دا ہمو دُکان نا ہننگ نا گلانیک ءُ۔

لُمہ بش مس نماز خوانا۔ اُرانا کاریم تے بناء کرے۔ برمش اوکا مُست تینے تیار کریسوس۔ بس توار تس لُمہ لُمہ ای تیار مسوٹ، لُمہ مخا پارے آؤ گودی داسہ کاریم تے ایسر کین ولدا کانا دُکان آ۔

لُمہ چائے گیس آ تخا فرج ءِ ملنگ ئٹ ئس کہ پاڷ تے کشیو انداڑتو دروازہ غا ٹکا مس۔ لُمہ تا اُرا خنا منہ بندغ توفک آتون پُترینگار۔ برمش نا لُمہ ہکل تس خیرے دیر اُرے !!

اندا دیرتون لُمہ ءِ تا ہمو جاگہ غا سُم ئسے نا بشخ کریر۔ برمش توفک نا توار ءِ بنگ تو تینے کَٹ نا کیرہ غان ڈھکا۔ برمش فرشتہ اس ئسکہ اودے سما الو ظالم آک فرشتہ غاتے ہم ہلیپسہ۔ برمش گوڑینگوک ئس انتیکہ دنو ندارہ اولیکو وار خننگ ئس۔ ولے ظالم ہمو تما خناتا توفک ءِ تورے برمش نا پیشانی آ برمش ولدا پیشن ہلک نرنگ ءِ بناء کرے۔

توفک نہ سُم پیشانی ٹی لگتو ولے اُست آن زرس شیف معصوم انگا جان ئٹی پیہا۔۔۔

ہموڑے تما بے سما مس۔

ظالم آک بیرہ تینا چُناتے خوش کننگ کہ اسے مصوم ئسے نہ خوشی تے پُلار سر ہلکور۔۔۔

بلوچ آتا زند معنہ تخک

دی بلوچستان پوسٹ – سرگپ

بوسٹن، بلیدہ، نیویارک، خاران، سیئٹل، کوئٹہ، مینیسوٹا، تربت، ڈینور، خضدار دا لڑ مرغن مریسہ کائک۔ دا شار و اوفتا پن تا نیامٹ دا جہان تا مُری ءِ، ہرافتیٹ اسٹ ایلو آن جتا رنگ، نسل و راج ئنا مخلوق آبات ءِ ولے واہم دافتیٹ گڑا سینا اسٹی ارے کہ دا تیوہ غاک اسہ منظم بیدادی آ برانز ارفنگو۔

ہراتم تاریخ امریکی شار مینی پولِس ئٹ 25 ئس، گڑا بلوچستان نا ضلع تربت نا خلق ڈھنک ئٹ وخت مونی سُریسہ ایلو دے مسوسس۔ نن نا 2 بجہ اسہ لمہ ملک ناز ءِ بلوچستان ئٹ اسہ داڑیلی ئسے نا وختا کسفنگاسسس و ایلو پارہ اسہ باوہ جارج فلائیڈ ءِ صوب ہفت بجہ غا امریکی پولیس کسفے۔ برمش بلوچ و جینا فلائیڈ اسہ وخت آ چوری کننگار۔

ہڑتوما ملک آتیٹ برانز آتا لڑ اس برجاء مس، اسہ پارہ غان اسہ سیاہ فام امریکی و ایلو پارہ غا اسہ ٹپی چوری بلوچ مسڑ چنا اسیکن انصاف خوائنگا۔ ولے خوڑتی تون چمشانک اس شاغنگہ گڑا دا ہڑتوم آ برانز آتا روتہ غاک مروک واقعہ غاتیان زیات کڑمب ءُ۔ امریکہ ٹی سیاہ فام مخلوق 1960 نا وختا ”سول رائٹس موؤمنٹ” آن گڈ ہم پورو برابری دوئی کننگ کتو، و اوفک چاگڑد و، بست و بند ئٹ ہر پارہ غا نسلی بد دننگ و زیادتی تون مون تننگ ءُ۔ جارج فلائیڈ نا خون آ سوختئی نا آتش فشاں ٹکا کرے ہرا مرغنو وخت ئسے آن تعصب تخوک بست و بند نا سوب آن لاڑکننگ ئس۔

اندن بلوچ تدوکا ہفتاد سال آن ریاست نا منظم و برجاء بے دادی تون مون تننگ ءُ، دا بے دادی و تعصب پیہنا تا پارہ غان مننگ اف، بلکن پاکستانی تا پارہ غان گڈو کننگانے۔ ہمو پاکستانی ہرا امریکہ نا سیاہ فام آتا تحریک ”بلیک لائیوز میٹر” تون ہمدڑدی نشان تریسہ تینا پروفائل عکس آتے مَون کیرہ، ولے اوفتے بلوچستان ئٹ برجاء خون و بدکاری آن ہچو فرخ اس تمپک، اوفک زیمی مفسہ اگہ اوفتا ریاست نا سلاء بند کروک ڈیتھ اسکواڈ اسہ معصوم زالبول ئسے کسفے۔

ڈیتھ اسکواڈ تیوہ غا بلوچستان ئٹ تالان ہمو سلاء بند ٹولی تے پاننگک، ہرافتے گمانی وڑ ئٹ پاکستان فوج و ڈھکوک ادارہ غاک سلاء بند کریسہ دا ذمہ واری تسونو کہ او ہر آجوئی دوست تخوک بلوچ ءِ ٹِک کیر۔ بدل ئٹ اوفتے موکل ءِ کہ او داڑیلی کیر، نشہ ڈوہر یا سلاء نا سوداگری کیر، قانود برجاہ تخوک ادارہ غاک اوفتے دو خلپسہ۔

پاکستان نا میڈیا ملک ناز، و بلوچستان ئٹ ہفت دے آن برجاء مروک برانزی مچی تیا اسہ حوال اس ہم شینک کتو۔ بلوچستان نا تیوہ غا زیات بلوچ ضلع غاتیٹ یانزدہ سال آن گڈ داخس بھلو کچ ئسے نا برانز، و دپ درشانی خننگ اٹ بس۔ برانز ارفوک آک نعرہ خلنگ ئسر کہ ”داسہ بھاز مس” و دا خواست کننگ ئسر کہ ریاست تینا ٹہیفوک ڈیتھ اسکواڈ آتے ایسر کے، و اوفتے تروک لُٹ و پُل، و خون و بدکاری تا موکل ءِ واپس ہلیسہ دزگیر کے۔

دا سانحہ ءِ تینا حوال آتیٹ جاگہ تننگ آن چپ پاکستان نا اسہ پنی نیوز چینل اس ملک ناز نا ٹپی مسڑکو برمش بلوچ نا عکس ءِ ارفیسہ ”زہرہ شاہ” نشان تس، اسہ پین مسڑ چنا اس ہرادے پاکستان نا شار راولپنڈی ئٹ بے دادی کریسہ کسفنگاسس۔

بلوچ آتا بابت دا ہد ئسے اسکان بے پامی و بے حسی دا سوج ءِ ارفک کہ انت گواچنی اوفتیکن بلوچ آتا زند اسہ معنہ اس تخک؟

تربت و ہزارہ ٹاؤن واقعہ نا غٹ ڈوہدار آتے بندی کرینن – ضیاء لانگو

تربت نا علاقہ ڈہنک ٹی منہ دے مست اسے اُرا سیٹی دز آک جلہو کریر۔ دز آتا سم کاری آن ملکناز  پنی ءُ زالبول اس بیران مس اونا چنکو مسڑ ئس ٹپی مس ہرانا دائسکان ہسپتال ٹی علاج مننگے۔

دا واقعہ آن پد غٹ بلوچستان ٹی ہمو دز آتا خلاف و ملکناز و اونا مسڑ برمش ءِ انصاف تننگ کن توار بش مس۔ دا توار آن پد بلوچستان نا غٹ ضلع غاتیٹی برانزی ئُ مچی ہڈ تننگا۔ گوادر، پسنی، تربت، پنجگور اوکان گڈ درو نا دے خاران، دشت، کوئٹہ و خضدار ٹی ام برانزی مچی مس۔

اینو نا دے ماشکیل، آواران و سندھ ئنا بھلا شار کراچی ٹی ام دا واقعہ نا خلاف برانزی مچیک مسر۔

دا برانزی مچی تیٹی بندغ آک دز، داڑیل، ڈیتھ اسکواڈ و ریاستی ظلم و بیدادی نا خلاف نعرہ ام خلننگ ءُ بلکن ہیت و گپ ام کننگو ۔

منہ دے مست بلوچستان نا وزیر داخلہ ضیاء لانگو، زر وزیر ظہور بلیدی تون اوار تربت نا دورہ ءِ کرے۔ بیران مروکا زالبول نا سیاد و وارث آتون ام اوڑدئی کرے ہراڑے اوفتون دز آتے بندی کننگ نا سوغند کرے۔

یاتی مرے سمیر سبزل پنی بندغ ہرا اندا دز آتا بھلا پن کننگک درو نا دے تربت آن اودے پولیس ہلکنے بندی کرینے۔

اینو نا دے وزیر داخلہ ضیاء لانگو احوال کار آتون ہیت و گپ کریسہ پارے کہ اینو نا دے اسکان تربت واقعہ و ہزارہ ٹاؤن واقعہ نا غٹ ڈوہدار آتے ہلیسہ بندی کننگانے۔

یاتی مرے اندن منہ دے مست کوئٹہ نا علاقہ ہزارہ ٹاؤن ٹی امو علاقہ نا رہینگوک آ بندغ آک پیشن بروکا مسہ ورنا غا جلہو کریر ہرافتان بلال نورزئی پنی ءُ ورنا اس بیران مس و ایلو ارٹ ٹپی مسر۔ دا ورنا تا درستی اوغان قوم آن ئس ہراڈان پد دا واقعہ نا خلاف کوئٹہ ٹی بھلا وزیر نا اُرا نا مونا برانزی مچی کننگا گڑا بھلا وزیر نا پاننگ اٹ دا واقعہ نا پٹ و پول کن و ڈہدار آتے ہلنگ کن اسے کمیٹی ئس جوڑار۔

اندن وزیر داخلہ ضیاء لانگو احوال کار آتون مستی ہیت کریسہ پارے کہ نن ڈوہدار آتے کلہو ایتنہ کہ نم حکومت آن ہچ بچنگ کپیرے۔ حکومت نا کوشست اندادے کہ نن ہر حال ٹی بلوچستان ٹی امن اتین۔

انشائیہ
ہمسایہ

‏‎نوشت: ماجد ماجدی

نن ہڑدے زبرو خوراک کنگونا! وا ہر وخت سیر پڈ خاچانا۔
‏‎خلق اٹ کس اتون چکار تختون آ، تینا اُراٹی تینا زند اتون مشغول ئسون۔

‏‎اسے دے ئس خلق نا مسیت آن صوب نا وختی پڑو مس کہ خلق اٹ فلان بندغ کسکنے۔
‏‎بریرے قبرستان ءِ جہہ و جاگہ کین تا۔
‏‎تو وختس نن پڑو ءِ بنگن تیار کرین تینے تینا اولاخ ٹی ہنان قبرستان ءِ میت ءِ خلق نا باتیک اتننگ ئسرہ۔

‏ہموڑے ای اسٹ آن ارفیٹ کہ دا خلق نا ہرا میرباز ءِ و انت بیماری سے آن فوت کرینے؟
‏‎ورندی ٹی پارے!
‏‎دا نما ہمسایہ میربازء بینگنی آن بیران مسونے ،،، اٹ وختان آن اُراٹی تا ارغ اف۔

آل پاکستان کلرک ایسوسی ایشن (ایپکا) بلوچستان نا ترجمان غلام سرور اسے بیان اسیٹی پارینے کہ ایپکا نا صوبائی کماش داد محمد بلوچ و ایلو قیادت پارینے کہ نن صوبائی حکومت نا پاننگ آن تینا برانز و مچی تے تورین کہ او ننا خواست آتے منیرہ۔ اگہ داسہ بجٹ اسکان ننا چارٹر آف ڈیمانڈ آ عمل کننگ متو گڑا نن تیوی بلوچستان ٹی برانزی مچی ہڈ تریسہ حکومتی مشینری ءِ جام کرون۔

او پاریر کہ سیکٹریٹ نا ملازم آتا پگار و آسودئی تون بلوچستان نا ایلو ملازم آک فریشان و گوڑینگوک ءُ، مستکوئی آ حکومت ٹی ایلو ضلع غاتا ملازم آتیکن ایجنسی الاؤنس کوئٹہ نا ملازم آتیکن 20% نا موکل تننگا ولے بدنیت آ حکمران آک دا الاؤنسز آتے بند کریر۔ ایلو پارہ حکومتی بیوروکریٹ آک تینا و تینا دوست آ ملازم آتا الاؤنس ءِ 20% آن 50% کریسہ اٹیچ ڈیپارٹمنٹ نا ملازم آتے اُست کُٹہ کریر۔

پگار آتیٹی پرخ و بیرہ گچین انگا تپہ نا ملازم آتیکن آسودئی حکومت نا اسے نیمئی ءِ پاش کننگے۔ اٹیچ ڈیپارٹمنٹ نا گریڈ 1 آن ہلیس 22 اسکان نا ملازم آتے دا ظلم نا خلاف بش مروئی ءِ۔

او مونی پاریر کہ مستنا بھلا وزیر قدوس بزنجو نا دور حکومت ٹی ٹیکنیکل اسٹاف نا اپ گریڈیشن نا موکل تننگا ولے دائسکان اوفتا اپ گریڈیشن متنے۔ ایپکا نا ویل آتے ایسر کننگ کن داسنا بھلا وزیر جام کمال خان، وزیر، سیکٹریز و ایپکا نا ذمہ وار آتا اسے کمیٹی اس ٹہیفنگا ولے او کمیٹی دائسکان ہچ کاریم کتنے۔

او تینا بیان نا ایسر ئٹی پاریر کہ اپیکا ملازم آتا اسے نمائندہ ءُ تنظیم ئسے۔ ننا چُپی ءِ ننا نزوری سرپد مفس، نن حکومتی سوغند و کرونا نا سوب آن چپ اُن اگہ ننا موکل تروکا خواست آک 2020 نا بجٹ آ شاغنگ متور گڑا نن تیوی بلوچستان نا ملازم آتے بٹنگسٹ بجٹ سیشن آ صوبائی اسمبلی ءِ پلویڑ کرون۔

بلوچستان ایجوکیشن فاؤنڈیشن (بی ای ایف) نا پارہ غان اسے بیان اسیٹی اسکول آتے ملننگ نا بارہ اٹ پریس کانفرنس ءِ حکومتی فیصلہ غاتا خلاف ورزی سرپد مریسہ پارینے کہ حکومتی فیصلہ نا ردئٹ غٹ اسکول آک 15 جولائی 2020 اسکان بند مریرہ۔ اندا سوب آن لمہ و باوہ غاک دا وختا تینا چناتے اسکول آ راہی کپس۔

مونی پارینے کہ اگہ امرو ام اسے اسکول اس دا وختا حکومت نا فیصلہ غاتیان چپ ہنا گڑا اونا رجسٹریشن ایسر کننگ مریک۔ او امو علاقہ نا ڈپٹی کمشنر ءِ ام معلومدار کننگ مرو کہ دا اسکول حکومت نا فیصلہ غاتیان چپ ہنانے تانکہ ڈپٹی کمشنر ام اونا خلاف کاروائی کے۔

یاتی دا وختا کرونا وائرس نا سوب آن غٹ خوانندہ جاہ آک 15 جولائی اسکان بند کننگانو ولے پرائیویٹ اسکولز ایسوسی ایشن نا پارہ غان پریس کانفرنس و برانز ام کننگا کہ نن 1 جون آن تینا اسکول آتے ملینہ ولے دائسکان ملتنو تا۔

افسانہ | خاخر

نوشت: غمخوارحیات

دی بلوچستان پوسٹ

جنوری نا یخ و نن اس ئسک….
پیشن آ برفیچ مننگ ئس….
او تینا کُڈ اٹ تنیا تولوک ئس کہ اودے ہول ہرفے ….
یکدم دا یخ اٹ اودے ہندنوباسنی اس محسوس مس کہ اونا مچ آ بدن خید اٹ اسٹ مس
اونا پُچ آک چُڑار….
ہول آن اوکُڈآن پیشن مس ….برفیچ اٹ توس ….
ولے اونا بدن اٹی بش مروک آ لمبہ غا ہچ واثر اس تمنگ اَلو بلکہ اونا بدن اے تینا پلویڑ اٹ ہلوک آ زراب دم پہ دم زیات مننگ ئس….
باسنی اخس زیات مننگ ئس، اوڑے ہموخس پین ڈغار تین مننگ ئس….
اودا رداٹ کس آن کمک ہم ہلنگ کتوکہ….
نئے بیرہ او تینا اُراٹی تنیا ئس بلکن مچ خلق اٹ تنیا….!!
خلق اٹ ہچ و جاندار اسینا دَرک الو….
غٹ داکان امپیسُر ….
اوڑتون اگہ کس ہمرا ئس تو اونا دڑد ئس…. نن نا تارمئی ئس…. اونا وجود نا لمبہ ئس….ہول ئس….ہڑزئس….بھیم ئس…. بے جاراتی ئس….
داخلق انا گیشتری باتی تے زوراکی ٹی کسفسااجتماعی قبراتے آ اَمپفنگاسس ….
ہرافک کہ بچاسُر اوفک پین جاگہ تیا تینے بدو حال اسے ٹی نرسا ، تمسا….لنگڑ، ہینار،
ہوشام ذِدہ ، ناجوڑ…. بے نپاد، نت شپاد، ٹپی ، دتر چُر…. گار وپریات اٹ …. سرکریسُر ….دا ہموفتتون اوار ئس ہرافک دا خلق اٹ قتل وکوش نا خاخر ے لگفیسُر….ہرافک معصوماتادترتا جووھیفیسُر….
ہرافک ہر وڑ اناتادی ، لُٹ وپُل ، ظلم وزوراکی تے دا خلق آ حق وناحق کریر….
اسُل ہندن دُن کہ ہلاکو و تموچن اسک تینادوراٹ ظلم وزوراکی تیٹ خلق آتے بُمبیل کریرہ….
بندغ آ تے زندہ میخ کریرہ یا خاخر تیٹ بٹیرہ….
او نا جندے ہم سمااَلو کہ اوانت آکن تینا جند انا مخلوق تون دا ڈَول ظلم کننگ اے….
آن …. دا ظلم اَنا ایوَز اودے گڑاس آسراتی، پیسہ ، جوانو گاڈی اس ایلو معنہ تیٹ عیاشی اس رسینگاسس …. ولے ……..!!!
دا ظلم وزوراکی ٹی اوفک…. نئے پیر مڑد و کماش آ تے اِلار …. نئے چنا و زالبول آتے…. نئے دافتا مال و بُزگل آتے …. نئے کشت وکشار …. مُلک و پالیز اس اِلار ….
ہامین نا مُدّاٹ دا فک تیارانگا پُر بھرم انگا مچ کدگ آتے بُن تسُر پوغ کریر ….
داظالم آک ہرہمو گواڑخ اے تینا نت تیٹ شیٹرتیفیر ہرا پوسکُن با ملاسس….
دافک نئے دا مخلوق اے اِلاّر…. نئے دافتا میراث و مڈّی تے ….
اینو اونا وجودے ناگمان بے جاراتی نا خاخر اس دُن پلویڑ کریسس کہ او حیران تیٹ حیران ئس کہ ہرانگ کاو امر کیو؟
دا مون انگانن اونا کُننگ کن نہار آنبار سلوک ئس….
او ہبکہ ئس وار دم آ تینا کاٹم اٹی ہلککہ….
اینو نا دا یخ اٹ اونا وجود اٹ اونا رَغ رَغ اٹ رُم کروک آ لمبہ اودے دُن بے جارات کریسس کہ اوڑا ڈغار کٹُاسس….واردَماآسمان آہُرسہ ہندا سوچ آکہ آسمان کنے آتمک
اودا فریشانی ٹی دانگ اینگ خلی*ئی آ ساہدار آنبار کوسی کنُسہ تینے آن تینٹ سوال کننگ اس کہ دا برف آ تا پُڑیک کنے انتئے پوغ آنبار لگنگو ….؟
انت مگہ آسمان آن پوغ انا پِھر مننگ اے….؟
ہنداڑتون او نت شپاد سر ہلک ….
سیرک انگا پَٹ اٹ دانگ اینگ جُغل ہلسا لغوشت کرسا تمسا ….
اونا جند ے درک لگنگ اَلوکہ ای ہرانگ ہننگ اُٹ و کنے ہرانگ ہنوئی اے….
دیر آ ہنوئی اے ….
ولے اونا وجود نا خاخر کم مننگ نا جاگہ غا پین زیات مننگ ئس ….
اونا نُک ملاسی آن پوتڑو ہلکوسس….
خید آتا ژپ ژپ ئس ….
داسہ اوتین تون تینٹ ربجنگ اے ہم شروع کرے….
تینے تینٹ کرینگ تننگ ئس ….
بدرَد کننگ اس….
بدّوا کننگ ئس….
پِٹنگ ئس….
وارس توسکہ تینے تینٹ چانپٹ کاری کریکہ ….
وارس پژہ تے تینا کوآکہ ….
وار اس تولہ آنبارباے تینا بڑزا تسکہ ….
گار گار آ ہوغاکہ ….
شاید….
تینے دا عذاب آن خلاسی کن خداجان اے زاری منت کریکہ ….
اودم اس سلیسکہ، دانگ اینگ ہُراکہ ہچ اس الو …. ….
ہموفک اودے دا ظلم وزوراکی تیٹ اوار شاغاسُر ….
اوفک توایہن اونا دا خاخر اٹی اوڑتون اوار الوس….
تارمئی نا سوب آن اینو اونا سیخا ہم اوڑتون تُد اَلو….
داسہ اوتینا سینہ اے ہندن ٹپنگ اے شروع کرے کس پائے دا خاخرے کسفک ولے خاخر پین زیات مننگ ئس….
او رُم اے شروع کرے….
و پَٹ ئنا کھڈ اسے اٹ سلوک و دیر اسے ٹی تما تو گَل کرے کہ داسہ کنا وجود اٹی لگوک آ خاخر کہک ولے دا خاخر زیات مننگ ئس کہنگ اَلو….
دیر آن پیشن تما وا رُم اے شروع کرے تو پٹ آن او جنگل اسے ٹی سرمس….
داڑے جنگل اٹی پیر و بابااس خاخر اس لگفیسس جُگ ا سے ٹی تولوک ئس ….
او بس جُگ انا باٹی سلیس ….
پیرانگا اودے ہُرا، اشار ہ کرے کہ بر تہٹی خاخر آ باسف تینے….
ولے او نا دوی کس پائے باٹی تے پوغ مسوسس….
ہیت کننگ کتوکہ ….
خان آباد دا یخ اٹ ہراکا بننگ اُس پھرِوبرف اٹ اسُل چُڑانس ….!پیرانگا پارے….
اوخاخر ے خنا تو اونا وجود اٹ لگوک آ خاخر کس پائے پین زراب ہلک ….
لپڑزہی ٹی پیرانگا نا دوٹی ہلک اودے جُگ آن پیشن چغل تس ….
جُگ اٹ اخس پاٹ ئسُر غُٹ اے تا خاخر نا زی آ تخا ….
خاخر پین بڑزا جمجلائی کرے ….
او تینا پچ آتے ہم جُگ آن پیشن خسا….
تینے لِغڑ کرے ….
پدا خاخر نالمبہ ٹی توس….

دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک