قوم پرست یا کچکول پرست؟
نوشت: ریکی بلوچ
دی بلوچستان پوسٹ
ہیت اگہ قوم پرستی نا مرے تو ننا راج ئٹی نہ قوم پرست، میر و سردار او نہ قوم پرست پارٹی تا کمبوتی ءِ۔ ہر پارٹی نا بندغاک تینے قوم پرست پارہ۔ یعنی ننا راج ئنا نیمہ غان زیات مخلوق قوم پرستءِ۔ انتئے کہ ننا سادہ اِنگا و سیاست آن ناولد انگا مخلوق ہم ہموفتے ووٹ ایترہ۔ ہرافک بلوچ و بلوچیت نا نعرہ ءِ خلیرہ۔ بلوچ قوم پرست آ پارٹیک بلوچیت نا پِن آ گچین کاری ہم کٹاانو۔ وزیر اعلیٰ نا سیٹ اسکا ہم سر مسونو۔
پاکستان نا ار دو سرا پارلیمنٹ۔ (قومی اسمبلی و سینیٹ) آتیٹ باسک ءُ۔ بلوچیت نا پِن آ سیاست کروکاک قوم ئنا ووٹ آتے ہلنک کن ساحل وسائل ءِ تینا نعرہ جوڑ کریر۔ اسمبلی ٹی سر مننگ آن گُڈ بلوچیت نا درک متو ولے ساحل وسائل تا سودا الّم مس۔ ہرافتا پِن ئنا درشانی کن گوادر سی پیک معاہدہ، و چاغی ٹی ایٹمی دھماکہ غاک گنج ءُ۔ اوفتا خل ئنا کاروبار مخلوق نا مون ٹی ءِ۔ بلوچیت نا زیہا سیاست کروکاک وزارت نا رندا قوم ءِ گیرام کرینو۔ اگہ اوفک پارہ کہ نن قوم ءِ اُست آن دتنون گُڑا خواجہ غاک قوم ئنا سودا ءِ کرینو۔ بلوچ سیاست ئٹ ہمو بندغاک ہم اریر ہرا بلوچ نا پِنا پنچ پنچ سیاسی پارٹی جوڑ کرینو ولے بلوچ نا پِن آ اسے دے ئس زندان ئٹ گدریفنگ کن روادار افس۔
اگہ اوفک نمن ءُ کہ نن قوم ئنا سودا ءِ خلتنن گڑا او دا قدرتی غضب (کرونا) ئٹ تدوکا وخت ئٹ و روچہ نا موارک انگا تُو ئٹ بلوچ قوم آ مروکا تادی آ انتئے چُپ ءُ؟
تینا ذات آ لوز اس سگنگ کپروکاک شار آتا ہُشنگا انتئے چُپ ءُ؟ منہ ایکڑ ڈغار کن نیاڑی تے آ ایف آئی آر کروکاک قوم ئنا مال و سہدارتا لُٹ و پل آ انتئے چُپ ءُ؟ گوادر آن محمد صادق نا مسیت نا تہہ آن بیگواہ مننگ آ انتئے چُپ ءُ، زامران تگران ئٹ مخلوق آن علاقہ خالی کرفنگ نا دھمکی تیا انتئے چُپ ءُ، بولان ئٹ لشکر کشی آ فوج ءِ ووٹ تروکاک انتئے چُپ ءُ؟
اگہ اوفک پارہ کہ ننا ہیت ءِ بنوکو اف۔ اگہ بنوکو ارے عمل کروکو اف گُڑا قوم ءِ اسمبلی نا ریفنگ ئٹ انتئے بٹینو کہ نن اسمبلی تے آ کانہ نما توار ءِ سر کینہ، ۔حق آتے نُما ہلینہ۔
فلانی تو قوم ئتو غدار مس یا نالائق اس ئسکہ۔ ہیت بتوکتہ لائخ انگا تو ای اُٹ کنے ووٹ ایتبو۔ ہر بندغ تینا نعرہ ءِ خلسا قوم ئنا لُٹ و پل آ تینا بشخ ءِ شاغک۔ دافتا نعرہ غاک زیات مسر، تادیک پین ودّار۔ دافک گُنگ مسر، گُنگی نا سوب ءِ تینا جوان چارہ۔ دا ہمو بلوچ پرست آ پارٹی کو ہرافک پاٹ ئنا بندغ اس ہم بش کیر۔ عوام ووٹ کیک تا کہ دافک ننا حق ئنا ہیت ءِ کیرہ ولے راست دادے کہ سوداک وختی مریرہ۔ بیدس سودا غان دا خواجہ غاک اسمبلی ٹی سر ہم مفسہ۔ سیٹ آ تولنگ آن مُست دا خواجہ غاک سودا گری کیرہ۔ گُڑا سیٹ آ تولہ۔ مون مُستی قوم تینٹ فیصلہ کے کہ قوم ئنا غمخوار آک دیر ءُ قوم اکن کہوکاک یا گچین کاری کٹوکاک دیرو ءُ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
