موٹر سائیکل آ سوار نادرست جلہو کروکاک سم کاری آن پد نرار۔
بلوچستان نا ضلع سبی ٹی تین تالاب پولیس چوکی غا درو شام نا درست آ سلاء بند بندغ آک سم کاری کریسہ جلہو کریر ہرا نا سوب آن اے ایس آئی احمد و سپاہی مینگل ٹپی مسر۔
موٹر سائیکل آ سوار جلہو کروکاک نرار اندن ٹپی تے ایدھی ایمبولینس ئٹ سول ہسپتال آ سر کننگا۔
واقعہ نا حوال رسینگ اسکان پولیس و ضلعی کوالخواک ہسپتال آ سر مسر۔ پولیس کوالخواک پارہ کہ جلہو کروکاک ارٹ ئسر۔
کوالخواک پارہ کہ اے ایس آئی احمد نا حالت نازرک ءِ۔
بلوچستان نا دارالحکومت کوئٹہ و جھل مگسی ئٹ فائرنگ و ایلو واقعہ غاتیٹ زالبول اسیتون اوار ارا بندغ کسکر و اِرٹ ٹپی مسر۔
گیشتری حوال آتا رِد ئٹ جھل مگسی نا شار ئٹ ارغ تینا زائیفہ ءِ اُرائی چِک و تاڑ نا سوب آن لخ آن تڑیسہ کسفے و نرّا۔ زالبول نا جوْن بچا بند نا علقہ نا رہی آن خننگا۔
تحصیلدار جھل مگسی ارباب خان مگسی پِن کروک ہند آ ہنا و جوْن ءِ الّمی کاریم تیکن آر ایچ سی جھل مگسی ہسپتال آ رادہ کرفے ہراکان گڈ جوْن ءِ خاہوت ءِ تننگا۔ مُستی دابابت سرسوج برجاء ءِ۔
اندن دارالحکومت کوئٹہ نا علاقہ سریاب روڈ و قمبرانی روڈ آ سم کاری آن اسہ بندغ اس کس و اِرٹ ٹپی مسونے۔
پولیس نا پاننگے کہ جمعہ نا دے سم کاری نا اسہ واقعہ اس قمبرانی روڈ آ مس ہراڑے سلاء بند بندغاک سم کاری کریسہ رئیس گل پنی بندغ ئسے کسفیر و سیف اللہ ٹپی مس۔
سم کاری نا ارٹمی واقعہ سریاب روڈ آ طارق ہسپتال نا رہی آ مس ہراڑے سلاء بند بندغ آتا سم کاری آن شیر احمد بنگلزئی ٹپی مس ہرادے ہسپتال آ دننگا اوڑے اودے دارو درمان کننگا۔
پولیس نا پاننگے کہ ہڑتوم آ واقعہ غاتا بابت سرسوج برجاء ءِ۔ گڈیکو حوال آتے اسکان کس ئسے نا دزگیری مننگ کتنے۔
حوال آتا رِد ئٹ کیچ نا علاقہ مند مھیر ٹی تدوکا نن پاکستانی فوج اسیکہ وا علاقہ ءِ گیڑ اٹ ہلکر و آپریشن کریسہ نیاڑی و چُنا تون بے دادی کریر و اُرا تیٹی لٹ و پل کریر۔
رسینگوک حوال تا رِد ئٹ فوج اِرا بندغ ءِ دزگیر کرے و بے ڈس ءُ جاگہ ئسے آ درے۔
دزگیر مننگ آن گُڈ بیگواہ مروکاتا چاہنداری جاوید ایوب نا مار و نجیب بیری نا مار نا پن ئٹ مسونو۔
یاتی مرے اسہ دے ئس مالو دا علاقہ ٹی پاکستانی لشکر مُسہ بندغ ءِ تنگئی ھاشم نا مار، نزیر دودا نا مار و ولی محمد دودا نا مار ءِ دزگیر کریسس، فورسز داڑان مُست ہم پنجا سال نا تنگئی ھاشم نا مار ءِ اِرا وار مالو دزگیر کرینے و پین اسہ مار ئس تا عزت ءِ ہم دزگیر کننگ آن گُڈ مرگ ئنا گواچی کریسر۔
پروفیسر عبداللہ جان جمالدینی
تحریر: گل بنگلزئی
دی بلوچستان پوسٹ
خواجہ عبداللہ جان جمالدینی نا باروٹ ہمو وڑ اٹ کہ نوشتہ کننگ نا حقے ای ہمو حقے پورو کننگ نا لائخ تینے چائپرہ۔ ولے اُوڑان خڑک مننگ و شاگردی ٹی تہ شست سال مننگ نا سوب آن گِڑاس نوشتہ کیوہ۔
ای خواجہ تو 1955 نا مئی یا جون نا تُوٹی اولیکووار سردار بہادر خان بنگلزئی تون اوار مِلاٹ۔ کنا پیرہ میر مہیم خان ہم نن تو اَس۔ نن کہ نوائے وطن نا دفترا ہنان تو خواجہ جمالدینی و ایماندارا غلام محمد شاہوانی تُوسہ سُر کاریم کریرہ۔ ہمودے تیا بلوچستان نا یکو آ کالج کہ داسہ سائنس ڈگری کالج پاننگک داخلہ ہلکوسٹ۔ کنا دا اولیکو مِّلنگ، ہَمیشئی و شاگڑدی سے نا بنماس جوڑ مس۔ پدان ننا منہ سنگت دنکہ کا مریڈ عبدالحق، عبدالحمید کُرد، نور الدین بنگلزئی، اخبار نا دفترا ہنانہ یا گُڑا لٹ خانہ آ، پدان نن خننگ و ہیتاتے تا بننگ کن چلتن میڈیکل سٹور قندھاری بازار ہم ہنانہ۔ دا وڑ ای فورٹ سنڈیمن (ژوب) ٹی اسٹ یا تربت و مستونگ ٹی، اُوڑتون خط و کتابت جاری اس۔
وختس کہ او بلوچستان یونیورسٹی ٹی استاد جوڑ مس تو ننا توڷ و بش ودّا۔ او دفترا خواجہ غلام قادر لاشاری و کنتون اوڑدہ وخت نا زیا بسکہ۔ اُو وخت نا پابندی و کلاس نا ہلنگے بھاز الّمی چائسکہ۔
جمالدینی صاحب نا عُمر چاگڑد ءِ چاہنداری تننگ، روشن خیال کننگ، خواننگ و خوانفنگ، رُژن و رواداری نا سبخ تننگٹی گدرینگا۔ اُست ٹی تہ انسان دوستی و انسانی حقاتا ادا کننگ نا بھلو قدر اس ئسکہ۔ سیکولرازم نا قائل و مظلوم آ قوم آتا حقاتے تننگ نا خواہندار ئس۔ دروغ، دروہ، مُنافقت و جوفہ کروکاتے خوش کتوکہ۔ او بھاز بے مَر و وڈائی آن مُر اس۔ او مدام انسان دوستی، ایلمی رواداری و امن و ایمنی نا خواہندار ئس۔ جنگ جیڑہ مذہبی و لسانی آ تنک نظری آن پاکو اِنسان اس ئسکہ۔ اسے وار نا تہ اوڑدئی، عالمانہ ہیت آتا تہ بِننگ بندغ ءِ پارہ آتا یکا چکّاکہ۔ ای داغٹ ءِ سال تیٹی اُودے غُصہ کننگ یا خر مننگا خنتوٹ مُدام خوش تبی اٹ بیا بخیر کریکہ، تُولفیکہ و اگہ کاریمس تا مسکہ تو الّمی کریکہ تہ یا کس ءِ کاریم نا تہ کننگ کن پابند کریکہ۔ قدرت بھلو سینہ و صبر و سگ اس تسوسس تا۔
او خلقی، قبائلی و تین پہ تین نا جیڑہ آتے خوش کتوکہ۔ تینا خلق نا جیڑہ آتے ایسر کننگ کِن بھاز کوشست کرے ولے وختس کوشِس آتاتے سرسوبی ءِ خنتو تو خلق ءِ یلہ کرے۔ اونا جند سردار خیل آن ئس ولے سرداری، نوابی و ٹکری گِری ءِ بلوچ اُلس نا مونی ہننگ، شون ہلنگ کِن کُبین و خڷ اس چائسکہ۔
ننا غٹ نا دا معتبر آ اُستاد، علم ءِ نرینہ و نیاڑی تیکن الّمی چائسکہ۔ اونا پاننگ ئس کہ علم و فن ہر کس کن ءِ۔ چاگڑد ءِ بدل کننگ، شون تننگ اونا خواندہی نا گگُ و تہارمئی تے مر کننگ کن مار و مسڑ نا خواننگ الّمی ءِ۔ او چاگڑد نا ارتقائی حالت ٹی شون ہلنگے خواہاکہ، او لمئی آ بولی تیٹی علم دوئی کننگ نا وکیلی ءِ کیک انتیکہ داڑان بولی و ادب شون ہلیک، مُستی کائک۔ او اسکول، کالج و یونیورسٹی اسکا بیدس انگریزی آن، ایلو غٹ ءِ مضمون تے لمئی بولی تیٹ خوانفنگ خواہک۔ او شون حالی، خوش حالی، آسودئی و زند نا جُہد ٹی مونی دروکا عنصَر آتے تعلیم تون گنڈک۔
شرفمندا خواجہ تینا جند ٹی انجمن اس ئسکہ۔ او عالمانہ ہیتاتے تینا بھاز آسانو زبان سے اٹ کرار و آرام اٹ کریکہ۔ اونا دوست و چائندار آک اسُل بھاز ءُ۔ ایلو صوبہ آتیان بروکا ترقی پسند، روشن خیال و انسان دوست آ ادیب و شاعر آک وختس کہ داڑے بُسرہ تو خننگ کِن تہ الّمی تینے سر کریرہ۔ اندا خیال آک اودے ملک عثمان کاسی تون اوار لاہور نا شاہی قلعہ و کوئٹہ نا قلی کیمپ آتا دڑد آتا گواچی کریر۔ دا مُلک آن پیشن دنکہ برطانیہ، سویڈن و یورپ نا بھاز انگا تعلیمی آ ادارہ آک ادب و علم دوستی نا تا سوب آن بٹنگارہ۔
پروفیسر جمالدینی ءِ خوانندہ گل تون بھلو مہر اس ئسکہ۔ او ہر اسٹ تون خوش تبی اٹ اوڑدئی کریکہ۔ او بلوچستان یونیورسٹی نا جوان خوانفوکا اُستاد آتیان اسے اُستاد اس ئسکہ۔ خوانوکا ورناک مُدام گیڈ کریسہ پوہنداری ہلکرہ اُوڑان۔
بلوچی بولی و ادب نا زی آ کاریم کروکا سویڈن نا کارینہ جہانی و جاپان نا اِرا خوانوکاک ہم شاگردی ٹی تہ ئسر۔ مُدام خواہشت تہ اس کہ علم و چائست ے تینا خوانوک آتے اسکا رسیفے ولے پدان جان دروہا تہ۔ کنا خیالے کہ خواجہ عبداللہ جان جمالدینی تینا نیک و جوان انگا اِرادہ آتے اُلس اسکا رسیفنگ ئٹی سرسوب مس۔
او بلوچی و براہوئی بولی تون اوار پشتو و ایلو بولی تا شون ہلنگ کن بھلو کوشست اس کرے۔ اونا جند و سنگتاک تہ بلوچی نا متکنا شاعر آتا شاعری و ادبی آ مڈی نا پٹ و پول ءِ کریسہ زمانہ نا ناروائی آن بچفیر۔ او بلوچی اُردو و براہوئی ٹی بھاز نوشتہ کرینے۔ بلوچی اکیڈمی نا جوڑ کروکا تا سرخیل ئس۔
کنے دا پاننگ ٹی ہچو تل ول اس اف کہ جمالدینی صاحب توڷ و بش، اخلاق، ماخولی، نیک نیتی و روشن خیالی اٹ ہرا ہد آ کہ سر مس، بلوچستان نا بھاتی تیان کم بندغ ہمو ہد اسکا سر مسنو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
سرسوب آ ٹولی نا شہیدآک
نوشت: ماجد ماجدی
دی بلوچستان پوسٹ
اینو کنے ہچ آرام بتوکہ، وارس جک مسوٹہ وا پدی ہنداڑے توسوٹہ، کنا جان بھاز کٹہ ئس، ای ہندن ئسوٹہ کہ کس پائے اینو چلتن نا مش ءِ بولان نا مش تون اوار مچان مچ کنا زی آ کس بٹینے، ای تینا دا اینو نا بے تاغتی ءِ خناٹہ تینتون استٹی سوچاٹہ اینو انت مسنے دا مچا جوْن کنتون ہمراداری کننگ اف، خیالاک سوچاک دیچا ہرافتٹی کنے پریفیسر، کنے اینو نا مونجائی بھاز فریشان کریسوس، پدی کنا دا چنکا ملی ٹی وڑ وڑنا خیالاک بسرا، واہم تاغت ءِ خنتوٹہ ایسری آ تینا مونجائی آ بھاز اوغاٹ، دیخس خاچنگ کن بٹیٹ تینے خنک لگنگ نا پنے ہلتورہ، ایسر آ اسہ ہندنو ہلہ ہلہ اس بدن ٹی کنا بنا مس ہراڑان ای ہبکہ مسوٹ، مونجائی غم فریشانی بدن نا کُٹئی بے تاغتی آرام ایشکامی کل آک کنے ہندن کریر کہ کنے و مڑدہ ئٹی اسہ فرخ اس ہم سلتوسس، پدی نا گمان ہنداڑے اسہ تہو اس چکا ہراٹی زباد و خوشبو نا گند ئسکہ ہرافتن کنا بے سیک آ جوْن ئٹی سیک اس تما پدی ای بش مسوٹ ہندا تہو انا رندے درسہ درسہ خناٹ داسہ زباد و امبر ایلو خوشبو تا گند اتون اوار اوار دا تہو ئٹی دتر نا گند بسکہ ہراٹی اسہ ارمانس اسہ گڑتی اس، اسہ فکر اس تینا مزل نا کنڈا ہنسہ ہنسہ سرسوب مسوسس، جی دا گنوگاک وطن نا عشق اٹی گنوک مرسہ دا نورا عرف پیرک احسان و شہداد اوفتا ایلو سنگت آتا مزل ءِ سر مروکا ٹولی ئسکہ۔
نورا، احسان، شہداد ئسک دیر ئسر؟ انت دا لنگڑ گنوک بے علم ئسر؟ انت دا ہچ اس پوہ متورہ؟ انت دافک تینا زند ءِ عیاشی اٹ تدفننگ کتورہ؟ انت دافک سیل و چکر بیرشت و وڑ وڑنا کننگ ءِ تتورہ؟
جی دافک اسہ فکر اس ئسرہ ہمو فکر و نظریہ ئسرہ ہراڑکن ریحان اسلم راجی ایلو ہزاراک ہر دروشم اٹ وطن کن ندر مسر، ہمو فکر ہرا تینا وطن ننگ و ناموس ءِ غیر نا دوٹی تننگ کن بش مسوسر۔ دافک ہمو ورناک ئسر ہرافک شعوری دروشم اٹ زندگی ءِ پوہ مسوسر، دا ہمو ٹولی نا باسک آک ئسر ہرانا وطن نا زی آ تولوکا نہار، ہرانا وطن نا چنا بھلا کماش زالبول تا دترتے زراغ نا ڈول کنیسہ دائسکان تولوک ءِ۔ ہمو دے دا پوہ مننگ خوائسرہ کہ آخری سیم و حد جنگ ءِ بیرہ جنگ ءِ۔،
دا ورناک تینا وطن نا ہر خل، جر و بوچ، پت و پل، ہر زرہ زرہ ءِ مہر اٹ اُرارہ۔ اوفک تینے وطن تکرہ، وطن ءِ تینا جہد تینا ساہ تکارہ، ہندن دا ٹولی وطن نا چناک ہچ وخت دا خواہتورہ کہ اسہ کوزہ گیر اس اسہ غیر، چاپلوس اس اس بدر اس برے اونا ننگ و ناموس ءِ تار تار کے۔ ہر دے اونا ناموس آ دوبٹے، پدی ہندا ڈول اٹ اونا خیسن ان پر انگا ڈے ءِ زور و زوراکی اٹ تینا پنا کننگ خواہے، تینا منشا ءِ چلیفنگ خواہے۔
ہندا وڑ اٹ نن دیخس پد تاریخ ءِ ارن تو جوان سما تمک کہ دنیا نا تہٹی ہراڑے اسہ ظلم و زوراکی اس اسہ کوزہ گیر اس کرینے تینا زور زوراکی ءِ چلیفنگ خواہسنے یا اسٹ نا ننگو و ناموس ءِ یا وطن آ تینا پنا کننگ خواہسنے گڑا ہمو وخت ئنا ہر چنا بھلا کماش و زالبول آتون اوار جنگی دروشم تون اوار ہر دروشم اٹ آونا ظلم و زوراکی نا جواب ءِ تسنو اودے نیست و نابود کننگ نا کسر ءِ ایسنو، اوفک دتر تسنو ندر مسنو ولے تینا ننگ ءِ اونا دوٹی تننگ کن امنا کتنو۔
ہندای ڈول اٹ شہید احسان نورا شہدا اوفتا سنگت آک ہم تینا ننگ و ناموس تینا وطن نا رکھ و چیٹ ءِ کریسہ تینا گڈیکو ساہ تیتون وطن وطن کریسہ تینا جہد کار ٹولی، گَل و پد سلوکا ڈے ئنا ورناتے آ ہندا ڈس و گمان تسر کہ زند ہمو رنگ ہتو، جہد ہمو رنگ ہتو ہرا اسہ وطن اسینا پنا مرے ہرا اسہ فکر اسینا پنا مرے ہراٹی ننگ و ناموس اس رکھ سلے، اسہ غیر اس ہچ دا گمان کپ کہ او تینا زوراکی اٹ اوفتا ڈے ءِ تینا راجے و منشا ءِ مننگ خواہے، پدی اوفک تینا دشمن ءِ ہندا نشان تسر کہ اگہ نی ظلم کیسہ تو ظلم خنسہ زوراکی کیسہ زوراکی خنسہ، اوفک دا نشان تسر ہرستم نا ورندی ٹی نا نے ستم ملک، اوفک تینا دشمن تون فکر اسینا پنا جہد اسینا پنا اسہ منظم او ٹولی اسینا پنا جنگ کرسہ تینا دشمن نا خنتے ٹی خنتے خلسہ اودے ہندا سرپند کننگ خوائسر کہ اگہ دوبدو نی ننا چارتون ہم مون ایتس۔ نیست و نابود مریسہ نا نصیب اٹ نیست و نابودی مرسہ کاہک، اوفک ظالم ءِ داہم پوہ کریر کہ نی ہمو دتر کنوگ آ نہار اس ہرا نہار ءِ مشی آ ورناک بے سوب کرینو، بے سوب کرسہ مرور ہرانا دوا بیرہ جنگ ءِ۔ جنگ مرسہ کرو ہرا بیرہ تینکن شکست ءِ خنو، نیست مرسہ کرو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
برجاہ سال ٹی دہسکان بلوچستان ئٹ دئے چُنا پولیو آن زیمی مسونو۔
بلوچستان ٹی محکمہ جانجوڑی نا کوالخواہ تا پاننگے مُسہ جتا ضلع غاتیان پین مُسہ چنا نا پولیو وائرس نا کیس آک رپورٹ مسونو۔
کوالخواہ تا پاننگے کہ ضلع جھل مگسی، نصیر آباد و ژوب آن پین مُسہ چنا ٹی پولیو وائرس پک مسونے و دُن بلوچستان ٹی برجاہ سال پولیو آن زیمی چنا تا کچ دئے مس۔
محکمہ جانجوڑی نا رِد ئٹ مُسٹ انگا ضلع آتیان ہشت، سینزدہ و چار تُو نا چُنا تا پولیو ٹیسٹ مثبت بسونے۔
یاتی مرے بلوچستان ٹی پولیو وائرس ترندی ئٹ تالان مننگ ءِ تدوکا سال نا مون ئٹ دا سال نا بنائی تُو تیٹ پولیو نا 10 کیس پاش مسونے۔
چاہندار تا پاننگے اگہ دا حالیت اندن مس تو بلوچستان ٹی پین پولیو کیس پاش مننگ کیک۔
(افسانہ) طوبے نا بہیم
نوشت: عبد العزیز
دی بلوچستان پوسٹ
اڑزملک موبائل آ حوال خوانسہ اس۔
اولیکو حوال اس کہ ہنوکا دے کوئٹہ غان کراچی آ ہنوکو مسافر کوچ اس وڈھ نا مش تیٹ ٹرک اسے تون ٹکر حل کس کوچ و ٹرک انا ڈرائیور آتون اوار پنچ بندغ کذیت کریسو، دہ آن زیات ٹھپی مسوسو ایمبولینس نا وے افیٹی لیویز والا تا گاڑی و پین اسے کسری ءُ پک اپ سیٹ کذیت کروک و ٹھپی مروک آتے خضدار ایمرجنسی آ سر کننگ کن ہر فیر. ٹھپی آتان اسٹ پین پیرہ عمر آ دم تس.
ایلو خبر اس کہ پنجگور آن خضدار آ ہنوکو ڈیزل آن لوڈ زمباد اس نال نا بازار آن خڑک خاخر ہلک، ڈرائیور تینے خسا کلہ سے ٹی ہشنگ آن بچا. دا زمباد نا ہشنگان وزیر اعلیٰ بلوچستان زمباد آتیٹ تیل ڈہوئینگا پابندی خلکونے ہراڑان کئی بندغاک بیروزگار مسونو.
مسٹمیکو خبر اس کہ مستونگ ئٹ باوہ ئس تینا مارے دا خاتران اراغان کشا کہ نی انتے زد آٹس کہ ای خلق ئنا لوڑی نا مسڑنا سانگ ئے ہلیوہ.
دا خبرتے خواننگان آن پد اڑز ملک آڑسندہ اس کشیسا بش مس خاچنگ نا نیت آ برونکان بیرم دڑفے سرجہ غا کاٹمے تخسہ اس ناگمان اودے خیال بس کہ دا بیست و یک میکو صدی ٹی ہم ننے جوانو روڈ اس اف نئے ایمبولینس ئس وختا سر مریک ایلو دا زمباد آک ہم بند مسر مخلوق تینکے وام بدل آن زمباد ہلک، پین الو پک اس نُت ئنا اراغا ایسرہ انت حال مرو اوفتا خاہوت نا.
ایڑے امبل مارے اراغان کشا کہ انتے لوڑی نا مسڑ ئے ہلیسہ، کرے غزہ ءِ، انتئے لوڑی بندغ ئس اف!
دا خیال آتو اونا تغ پٹا. دا پالو مس اے پالو ہراکا تغ بریک. بش مس اراغان باغ ئنا کنڈا سر ہلک، چانڑدہ نا نن اس طوبے اسے نود آن پاش کرسہ ایلو ٹی جپ کرسہ اس. او دا ندارہ نا اوننگ کن جوئٹی توس نتے تینا جو ئنا اسے بنو آ مریفے ایلو آ پُٹی ءِ تینا خلک.
او اوننگ ئس کہ اینو طوبے اخس خوش ءِ گل آن بال ءِ. بندغ اگہ طوبے آ وتاخ کننگ ٹی سرسوب مس اونا ہم ہندا دھرتی نا حال مریک، اوڑے ہم بندغ اسٹ ایلو نا دتر تا کُننگ کن تیار مریک. مابت کروکا تا مہر ءِ گٹو کیک.
او ٹک خلسہ ئس کہ طوبے ہم ہڑدے خدا ءِ آہ و زاری کرو کہ کنے بندغ آن بچف ای انت کہ دھرتی آ بندغ نا کڑد ءِ خننگ ئٹ کنا وس مرے تو ای اسل پاش کپر ولے امر کیو اسٹ نا تو نا حکم ءِ ایلو اریر گڑاس مہروان کنا انتظار ءِ کیرہ، دے ئٹ اختہ مریرہ کنا پاش کننگتو او اسٹ ایلو ءِ مہر ایترہ و کنے تینا رازدان پارہ.
ہنداڑتون چم چم بناء کرے. اڑز ملک نریسہ اراغا بس چم چم آن خاک ئنا گند چرک تون اوڑدہ مریسہ اس او دلا غان دیر کنگ جاگہ غا تینا بس سرجہ غا کاٹم ءِ شیف کننگتون تنگان ہنا۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔
امریکی ریاست پنسلوانیا ٹی کووڈ-19 آ گچین پٹ و پول کروکا یونیورسٹی آف پیٹسبرگ نا چینی نژاد پروفیسر ءِ کسفیر۔
سی این این نا رپورٹ نا رِد ئٹ پیٹسبرگ یونیورسٹی نا پاننگے کہ پروفیسر کووڈ-19 ایسری اسکان سر مروک پٹ و پول کننگ ئس، ولے اودے سم کاری کننگا۔
پولیس نا پاننگے اسسٹنٹ پروفیسر بنگ لیو ءِ ٹاؤن ہاؤرس ٹی کاٹم، لخ و بدن آ سم لگنگ نا سوب آن ٹپی حالیت اٹ خننگاسس۔
سر و سوج کروکاتا رِد ئٹ اسہ پین نادرست ءُ بندغ ئسے اونا گاڑی ٹی کہوک خنانو و اوفتا گمان ءِ کہ اندا بندغ گاڑی ٹی بسونے وت کشی کننگ آن مالو لیو ءِ سم ئس خلکنے کسفینے۔
پولیس نا مننگ ءِ کہ ہڑتوما بندغ آک اسٹ ایلو ءِ چائسرہ ولے دا ہیت نا بھاز کم گمان ءِ کہ لیو ءِ چینی نژاد مننگ آ کسفنگانے۔
یونیورسٹی نا کنڈان شینگ کروکا بیان ٹی پاننگانے ‘بنگ لیو نا ناگمان آ مرگ ننے مونجا کرینے ہرا اسہ گچینو محقق و یونیورسٹی نا لائخ ءُ خوانندس ئسک’۔
لیو نا اُرا والا تیتون است ہسونی نا درشانی کریسہ پاننگا کہ ‘یونیورسٹی لیو نا اُرا والا و سنگت آتیان دا سخت انگا وختٹ ہمدڑدی نا درشانی ءِ کینا’۔
کہوک نا یونیورسٹی ٹی شعبہ نا سنگت آک تینا بیان ٹی پاریر کہ ‘بنگ لیو ایس اے آر ایس-سی او وی-2 انفیکشن و اونا اثرات آتے سرپد مننگ نا بابت بامعنی ورندی دوئی کریسوس’۔
پیٹسبرگ یونیورسٹی نا اسکول آف میڈیسن نا باسک آتا پاننگ ءِ کہ مقتول غیرمعمولی محقق و نگران ئس ئسک۔
اسکول آف میڈیسن نا باسک آک پاریر کہ بنگ لیو نا پٹ و پول ءِ ایسر کرور۔
یاتی مرے کہ کورونا وائرس نا تالانی آ امریکا و چین نا نیام اٹی مالو ہم پوسکنو چک و تاڑ بناء کرینے اندن امریکا دا بنماس آ پوسکن ءُ ٹیرف خلنگ نا ہم منصوبہ کننگے۔
بلوچستان حکومت نا ترجمان لیاقت شاہوانی پارینے کہ صوبہ ٹی کورونا نا ودوکا کچ خلیس نا ہد اسکان ءِ، ساڑی آ حالیت آتے اریسہ تیوہ غا بلوچستان اٹی برجاء لاک ڈاون ٹی 19 مئی اسکان شابیتی نا فیصلہ کننگانے. دا ہیت آتا درشانی ء او کوئٹہ ٹی میڈیا ءِ حوال تریسہ کرے۔
لیاقت شاہوانی پارے کہ ننتو وینٹی لیٹر نا کمبوتی ءِ دا بابت این ڈی ایم ءِ پین وینٹی لیٹر تننگ نا خواست کننگانے۔
او پارے کہ صوبہ ٹی کورونا وائرس آن زیمی بندغ آ تا کچ اٹی ہرا ترندی تون ودکی مننگ ءِ او خلیس نا ہد اسکان ءِ اندا خاطر لاک ڈاون ئٹی شابیتی نا فیصلہ کننگانے داسہ 5 مئی نا جاگہ غا 19 مئی اسکان تیوی بلوچستان ئٹ لاک ڈاون کننگو بلکن لاک ڈاون ءِ یخینی کرون و داڑان چپ ہنوک بندغ آتیا کاروائی کننگو۔
او پارے کہ لاک ڈاون ئٹی شابیتی نا فیصلہ شار والا تا رکھ اکن کننگانے۔
او پارے کرونا وائرس آن زیمی بندغ آتیکن وینٹی لیٹر آتا خواست مریک دا وخت ننتون وینٹی لیٹر آک کم ءُ اندا خاطر دا بابت این ڈی ایم ءِ پین وینٹی لیٹر تننگ نا خواست کننگانے۔ بلوچستان ٹی 2 پی سی آر مشین آتے آن ٹیسٹنگ برجاء ءِ، لاک ڈاون و ایس او پیز آ عمل درآمد وخت انا المی خواست ءِ داڑان بیدس دا جہانی دین آن وختی رکھنگ ممکن اف اندا خاطر صوبئی حکومت اولی دے آن دا بابت ئٹ کوشست ئٹی ءِ۔
بلوچستان پرائیویٹ اسکولز گرینڈ الائنس بلوچستان حکومت نا کنڈان ویل آتیا بے پام مننگ آ احتجاج نا فیصلہ کرینے۔
نجی اسکول آتا کنڈان علامتی وڑئٹ کلیت آک 12 مئی آ وزیراعلیٰ ہاؤس ٹی مُچ کننگور۔
پرائیویٹ اسکولز گرینڈ الائنس نا ترجمان نذر بڑیچ پارے کہ کوئٹہ نا نجی اسکول تا کلیت تے 12 مئی آ وزیراعلیٰ ہاؤس ٹی مُچ کرون، اندن ایلو کنڈان ضلع غاتیٹ نجی اسکول تا کلیت آتے ڈپٹی کمشنر آتا دفتر آٹیی مُچ کننگور۔ فیصلہ نجی اسکول آتے پلویڑ کروک ویل آتا و حکومت نا کنڈان بے پام مننگ آ کننگانے۔
نذر بڑیچ پارے نجی اسکول آک تدوکا دسمبر آن بند ءُ، 90 فیصد نجی اسکول کرایہ نا جاگہ ئٹی ءُ، 50 ہزار آن زیات کاریم کروک آتا روزگار ہم داڑتون تفوک ءِ، کورونا وائرس آن بھازا اسکول آک بند مننگ نا سوب آن نجی تعلیمی ادارہ غاک بد آ زرگزرانی ویل آتا گواچی ءُ ولے کس حالیت نا سوج کروک اف۔
