سوڈان نا حوال تروکا وزارت نا رد ئٹ جوائنٹ ملٹری فورسز آک وزیراعظم عبداللہ حمدوک و ایلو وزیر آتے دزگیر کرے۔
عرب نیوز نا رد ئٹ دوشنبے نا دے سوڈان نا حوال تروکا وزارت فیس بک آ لکھانے کہ عبوری کونسل نا سویلین باسک آک و عبوری حکومت نا بھاز آ وزیر آتے جوائنٹ ملٹری فورسز آک دزگیر کریر۔
الحدث ٹی وی پارے کہ دزگیر مروکا بندغ آتیٹ کابینہ نا چار وزیر و سوڈان نا مجلس السیادہ نا اسہ باسک اس ہم اوار ءِ۔
خرطوم ئٹ سکیورٹی فورسز ساڑی ءِ و سرکاری ٹی وی آ راجی سوت شنگ مننگے۔
العربیہ ٹی وی چینل نا رد ئٹ خرطوم نا بالی پٹ ہم بند کننگا۔
سوڈان ئٹ جمہوریت نا حامی سیاسی گروپ سوڈانیز پروفیشنل ایسوسی ایشن بندغ آتیان خواست کرینے کہ اوفک فوجی بغاوت نا مقابلہ کننگ کن پیشن مریر۔
ایسوسی ایشن پارینے کہ ملک ئٹ انٹرنیٹ و موبائل سروس آک ہم بند ءِ۔
سیکورٹی فورسز آک وزیراعظم عبداللہ حمدوک نا رہنگوک آ ہند ءِ گھیرہ ٹی ہلکنو۔
سوڈان نا فوج نا پارہ غان داسکان دا بابت ئٹ ہچو بیان ئس مونا بتنے۔
اگست 2019 آن ملک نا راہشونی سول و عسکری بست و بند کننگ ءِ۔
تدوکا ہفتہ خرطوم و ملک ئنا ایلو شار تیٹ کابینہ نا بھاز آ وزیر آک بھلو برانز آتیٹ اوار مسر۔