حق ایتبو بلوچستان تحریک نا سر کماش مولانا ہدایت الرحمان پنج شمبے نا دے بلوچستان نا ساحلی شار گوادر نا تحصیل و ماڑہ نا دورہ کرے۔
او وخت آ او ہندی مچی الوک آتا اسہ بخیری جلسہ ئسے آ ہیت کریسہ پارے کہ بلوچستان، دانا وسائل تون اوار سی پیک ننا ءِ، اسٹ ہم طاغت ور اس داسا ننا وسائل تے الینگ کپک۔
او پارے کہ وزیراعلیٰ قدوس بزنجو بن نن مُسہ تو آن گڈ دئے لکھ آن زیات بندغ کوئٹہ ٹی مچ کننگن داسکان بلوچستان ٹی چیک پوسٹ آتا ایسری و سمندر ٹی کانود آن چپ ٹرالنگ نا ایسری مفک ننا جہد برجاہ مرو۔
او پارے کہ کانود آن چپ ٹرالنگ نا دروشم ٹی ننا مچی الوک آتا اسہ گیروں جہلو کروک مافیا اس تخینگانے ہرا ننا سمندر ءِ لٹ و پل نا گواچی کرینو تدوکا پانزدہ سال آن کلمت نا سمندر ءِ قانود آن چپ شکار نا ردئٹ ئٹ صاف کرینو و اینو پانزدہ سال آن گڈ کلمت نا مچی الوک آک اوڑے بھلو کچ اسٹ جھینگا نا شکار کننگ ءُ۔
او پارے کہ غریب آتا ارا تا چولآک یخ کننگانو اوفتے بھس کرینو ولے داسا دا بے دادی ایسر مس۔
او پارے کہ صوبہ نا وسائل ننا ءِ بلوچستان ننا ءِ، سی پیک ننا ءِ، ساحل سمندر ننا ءِ،گوادر پورٹ ہم ننا ءِ۔
او پارے کہ اورماڑہ شار داڑے نا شار ہندی مخلوق نا ءِ دا کس ئسے نا ذاتی ملکیت اف اینو آن گڈ پاکستان نیوی اگہ اسہ چاردیواری اس جوڑ کرے گڑا اورماڑہ نا مخلوق آن ارفوئی تمو نا تو نن جوڑ مروک چاردیواری ءِ دڑفون۔