آئی ایس پی آر نا کنڈ آن شینک مروکو بیان ئسے ٹی بلوچستان نا ضلع نوشکی ٹی پاکستانی لشکر نا آپریشن ئٹ گمانی بلوچ آجوئی دوست سلاء بند تنظیم ئسے آن تعلقداری تخوکو اِرا سرمچار خلنگ نا دعویٰ کننگانے۔
پاکستان لشکر نا شعبہ تعلقات عامہ آئی ایس پی آر نا رد ئٹ خلنگوکا تیٹ ندیم و شہزاد عالم اوار ءُ۔
آئی ایس پی آر نا بیان ئٹ پاننگا کہ جون ئنا شش تاریخ آ بلوچستان نا علاقہ نوشکی نا خُڑک پارود مش ئنا علاقہ ٹی ڈھکوک حوال رسینگ آ سیکورٹی فورس آک اوفتا دزگیری کن آپریشن کریر۔
آئی ایس پی آر نا رد ئٹ تومکا بندغ آک خاران ئٹی فورسز آ تیا جلہو آ تیٹ تُد مسنو و اوفتیان سلاء و گولہ بارود ہم ہلنگانے۔
آئی ایس پی آر نا پاننگ نا رد ئٹ تومکا بندغ آتا تعلقداری سلاء بند تنظیم بی آر اے آن ءِ بی آر اے داسکان دا بابت ئٹ ہچو بیان تتنے۔
حوال تا رد ئٹ بلوچستان نا ضلع نوشکی و قلات نا مش تیٹ پاکستانی لشکر نا کنڈ آن تدوکا دے آپریشن بناء کننگانے و ضلع نوشکی ٹی ارٹمی دے ہم آپریشن برجاء مس۔
ہندی حوال تا رد ئٹ نوشکی نا مش دو سئے، منجرو، پاچنان و قلات شور پارود و ایب کیب ئنا علاقہ آ تیٹ فوجی آپریشن کننگا۔
فوجی آپریشن تدوکا دے بناء کننگا ہراٹی گن شپ و ایلو ہیلی کاپٹر آتتون اوار جاسوسی جاز آک ہم بشخ ہلکر۔
ہندی حوالکار آک ٹی بی پی ءِ پاریر کہ نوشکی نا علاقہ ہژدہ خول، محمدی، منجرو، دوسئے آپریشن نا زد ئٹی ءُ، تدوکا دے گن شپ ہیلی کاپٹر آک جتا جاگہ آ تیا شیلنگ کننگ آ خننگ مسوسر و علاقہ ٹی تراک آتا توار ہم بننگانے۔