یک شمبے نا دے نائجیریا ٹی ریاست اونڈو نا اسہ کیتھولک چرچ ئسے ٹی سلاء بند بندغ آک عبادت ئٹی مشغول بندغ آ تیا سُم کاری کریر۔
سُم کاری نا سوب آن 50 آن گیش بندغ بیران و کہی بندغ ٹپی مسر۔
ریاست اونڈو نا گورنر اناکونرین اکیریڈولو نا پاننگ ءِ کہ اسہ کیتھولک چرچ ئسے آ یک شمبے نا دے سلاء بند ءُ بندغ جلہو کریسہ درزن آ تا کچ عبادت کروکا تے مرگ ئنا گواچی کرینو۔
گورنر سینٹ فرانسس چرچ آ مروکا جلہو ءِ ”بیہودہ و شیطانی” پاریسہ دا نا مذمت ءِ کرے و جلہو کروکا تے دزگیر کریسہ انصاف نا عزم ئنا درشانی کرے۔
گورنر چاگڑدی حوالکاری میڈیا ٹوئٹر آ تینا کلہو ئٹی پارے کہ ”ای تینا بندغ آ تیان خواست کیوہ کہ او ایشکامی و بیدار مریر۔ قانود ءِ تینا دو ٹی ہلپس۔ ای سکیورٹی ایجنسی تا سروک آتتون ہیت کرینُٹ و کنے یخین تننگانے کہ ریاست نا اونڈو علاقہ ٹی حالیت نا رکھنگ و ہڑدے ئی کاریم تے بحال کننگ کن سکیورٹی کارندہ تعینات کننگ مرو۔”
ملک ئنا پارلیمان ئٹی علاقہ نا نمائندگی کروکو اسہ سروک ئسے نا پاننگ ئس کہ جلہو نا وختا چرچ ئنا پادری ءِ برمتہ کننگاسس۔ او پارے کہ دا جلہو ئٹی 50 آن گیش بندغ مرگ ئنا گواچی مسنو۔
نائجیریا نا صدر محمدو بوہاری جلہو نا مذمت ءِ کریسہ دادے گھناؤنا ءُ عمل اس پارے۔ ویٹیکن نا کنڈ آن شینک مروک اسہ بیان ئسے ٹی پاننگا کہ پوپ فرانسس زیمی مروکا تیکن دعا کننگ ءِ ہرا ” جشن ئنا وختا بے دڑدی ئٹ زیمی مسنو۔”
ہندی میڈیا نا رد ئٹ جلہو کروکا یک شمبے نا خصوصی مذہبی اشتماع نا وختا چرچ آ جلہو کریر و عبادت کروکا تیا سُم کاری کریر۔ جلہو ئٹی تراک کروکو مواد ہم کارمرز کننگاسس، ولے رسینگوکا حوال تا رد ئٹ گیشتری بندغ آک سُم کُننگ آن بیران و ٹپی مسنو۔
اشتماع ٹی اوار مروکا تیٹ کہی چُنا ہم اوار ئس ہرا سُم کاری آن زیمی مسنو۔ جلہو کروکا تا چاہنداری داسکان متنے۔
ہندی میڈیا دا نا اشارہ ءِ کُھریا تا اسہ ٹولی سے آ کرینے، ہرانا بابت ئٹ پاننگک کہ دا خانہ بدوش ٹولی ہندی گورنر ءِ تینا کلہو ءِ سر کننگ کن جلہو کرینے۔