کاؤنٹر ٹیررازم ڈیپارٹمنٹ خضدار آن تدوکا دے تیٹ زوراکی ئٹ بیگواہ مروک ورنا تا دزگیری ءِ پاش کرینے۔
اسہ ہفتہ ٹی سی ٹی ڈی نا کنڈ آن بلوچستان نا جتاء علاقہ تیٹ کاروائی نا دا چارمیکو دعویٰ ءِ اندن دا کاروائی تیٹ دزگیر پاش مروک مُسہ بندغ نا چاہنداری مالو آن زوراکی ئٹ بیگواہ مروک ورنا تیان مسنے۔
سی ٹی ڈی دعویٰ کرینے کہ تدوکا دے اسہ پک ذرائع ئسے آن سی ٹی ڈی ءِ حوال رسینگا کہ بلوچ لبریشن آرمی نا شکبر بندغ عبدالمنان و سرفراز احمد قانود ٹہیفوک ادارہ و حکومتی کاریم تیا کاروائی کننگ کن شور پارود قلات آن کوئٹہ نا کنڈ آ ہِننگ ءُ۔
بیان ئٹ دعویٰ کننگا کہ دا حوال آ سی ٹی ڈی ٹیم کوئٹہ درخشان ناکہ کوئٹہ سبی روڈ نا خڑک آ کاروائی کرے ہرا نا رد ئٹ موٹر سائیکل سوار تا ہن و بر ءِ بند کننگا، کاروائی نا وخت اسہ شکبر موٹر سائیکل ئسے سلنگ نا اشارہ کننگا ولے موٹر سائیکل سوار آک جاگہ آن نرّنگ نا کوشست کریر واہم کارندہ غاک اوفتے توننگ ئٹ سرسہب مسر ہراڑان پن کروک دوبہ دار تے دزگیر کننگا۔
سی ٹی ڈی کوالخواک پن کروک بندغ آتیان پنچ چغلی بمب، 1200 گرام C4 تراکی مواد، 2 کلو گرام پین تراکی مواد، چار الیکٹرک ڈیٹونیٹر، اسہ ریمورٹ کنٹرول کٹ، اسہ الفا فائر سسٹم ئس خننگ نا دعویٰ کرینو۔
ترجمان دعویٰ کرینے کہ بنائی سر و سوج نا وخت دوبہ دار آک آغا شکیل درانی تون اوار خضدار نا کہی حکومت تون مخ تفی کروک بندغ تے ٹک کننگ نا منصوبہ بندی ءِ منانو۔
دی بلوچستان پوسٹ ءِ پٹ و پول آن سماء تما کہ پن کروک ہڑتوم آ بندغ عبدالمنان ولد محمد موسٰی و سرفراز ولد نیاز ہند نوغے خضدار ءِ تدوکا تُوہ 30 اکتوبر آ فٹبال میچ آن بننگ وخت آ خضدار فیروز آباد آن زوراکی ئٹ بیگواہ کننگا۔ ہڑتوم آ ورناک میڈیکل اسٹور آ کاریم کریرہ۔
پن کروک بندغ تا تعلقداری زوراکی ئٹ بیگواہ رشید و آصف بلوچ نا خاہوت آن ءِ۔ تینا ایلم تا یلہ مننگ کن جہد کروک سائرہ بلوچ دا ورنا تا بیگواہ مننگ ءِ پک کریسہ تدوکا دے تیٹ چاگڑدی حوالکاری ویب سائٹ ٹوئٹر آ نوشتہ کریسس کہ کنا اِرا تاتہ مار سرفراز و منان 30 اکتوبر آ خضدار نا علاقہ فیروز آباد ئٹ فٹبال میچ کننگ کن ہنار، بننگ وخت آ سکیورٹی فورسز ایف سی نا وردی بینوک کارندہ غاک اوفتے دزگیر کریسہ نادرست جاگہ آ دریر۔
پن کروک ٹویٹ ءِ پاکستان نا پنی آ صحافی حامد میر ری ٹویٹ کریسہ سوج کریسس کہ بلوچ ورنا تیکن فٹبال کننگ ہم ڈوہ ئس جوڑ مسنے ؟
چار دے مالو کاؤنٹر ٹیررازم ڈیپارٹمنٹ قلات نا علاقہ منگچر آن ہم اسہ ورنا ئسے دزگیر کننگ نا دعویٰ کریسس پن کروک ورنا نا خاہوت ہم اونا زوراکی ئٹ بیگواہی نا بر خلاف برانز کننگ اس۔
سی ٹی ڈی بیان نا رد ئٹ قلات آن سی ٹی ڈی بلوچ لبریشن آرمی آن تعلقداری تخوک اسہ بندغ ولی اللہ لہڑی ءِ منگچر قلات روڈ آن دزگیر کریسہ اوڑان تراکی مواد خنانے۔
پن کروک ورنا نا خاہوت اونا دزگیر نا پاش مننگ آن مالو کوئٹہ وائس فار بلوچ مسنگ پرسنز نا برانزی کیمپ آ ہناسس و اوفک تینا برانز ءِ ریکارڈ کریسر۔
زوراکی ئٹ بیگواہ ولی اللہ لہڑی نا ایلم نا پاننگ ئس کہ کنا ایلم 23 سن ئنا ولی اللہ لہڑی ہند خاردان قلات، کالج ئٹ خواناکہ و اوکان گڈ قلات بازار ئ رزان بہا کروک دکان آ مزوری کریکہ۔ کنا ایلم ءِ 26 اکتوبر 2022 سئے بجہ نا وخت بیدس نمبر پلیٹ نا اِرا سرف اُلاخ بسر و مُسہ نادرست سلاء بند بندغ دکان آن تینتون اوار دریسہ زوراکی ئٹ بیگواہ کریر۔
داکان بیدس اسہ ہفتہ نا وخت ئٹ سی ٹی ڈی مستونگ آن اِرا بندغ نوروز و ظہیر، کوئٹہ آن عبدالواجد و جان محمد، حب چوکی ساکران روڈ آن دوست محمد و محمد اسماعیل ءِ کارروائی ٹی دزگیر کننگ، و اوفتیان سلاء و تراکی مواد خننگ نا دعویٰ کرینے۔
سی ٹی ٹی بلوچستان ئٹ داکان مالو کارروائی تیٹ کہی بندغ تے دزگیر کننگ نا دعویٰ کرینے واہم اوکان گڈ اوفتا چاہنداری مالو آن بیگواہ مروک بندغ تیان مسنے اندن ریڈ بک ئٹ اوار بھاز بندغ آک زوراکی ئٹ بیگواہ مروک آکو ہرا نا زی آ وائس فار بلوچ مسنگ پرسنز سوج ارفیسر۔
داکان بیدس سی ٹی ڈی نا کنڈ آن کہی کاروائیک دروغ پاننگانو ہرافتیٹ مالو آن بیگواہ بندغ تے خون کننگا۔
بلوچستان ئٹ زوراکی نا بیگواہی تا بر خلاف کاریم کروک تنظیم وائس فار بلوچ مسنگ پرسنز نا وائس چئرمین ماما قدیر بلوچ نا پاننگ ئس کہ ڈھکوک ادارہ غاک ڈی ٹی ڈی ءِ مون ئٹ تریسہ بے ڈوہدار ورنا تے برمتہ و شہید کننگ ءُ۔
ماما قدیر پارے کہ ایجنسیک اسہ پوسکنو چم ئس بناء کرینو ولے سی ٹی ڈی نا دروغ داسا پاش مسنے زوراکی نا بیگواہی و زالبول تا برمتہ نا باروٹ ریاست نا بیانیہ ساندہ دروغ مسنے۔
اونا پاننگ ئس کہ حکومت فوج نا مونا بیوس ءِ ضیاء لانگو دروغ تڑیسہ تینا خواجہ تا حق ءِ ایسری تننگ ءِ۔