مہر گہوش نا پن ئٹ بلوچ لبریشن آرمی نا سروک بشیر زیب بلوچ نا نوشت آتیا تالان کتاب شینک مس۔
کتاب جتا سرحال آتون چنک نوشت آتیا تالان ءِ اندن کتاب صباء انسٹی ٹیوٹ آف ریسرچ اینڈ پبلیکیشنز نا پارہ غا چھاپ مسونے۔ صباءانسٹی ٹیوٹ داڑان مالو کتاب آتون اوار ‘سمو راج‘ نا پن ئٹ رسالہ شینک کرینے۔
کتاب نا درستی راستی ئٹ نوشتہ کننگانے کہ “دا کتاب ہمو چنک نوشت آتا کتاب ءِ ہرا مارچ 2016 آن مارچ 2018 اسکان نا بھاز اہمانگا سیاسی دور ئٹ نوشتہ کننگار۔ دا اسہ اندنو وخت ئس اس ہراتم بلوچ راجی آجوئی نا جہد تون تفوک غٹ سلاء بند و وے سلاء بندسیاسی جہد کار آک اسہ اندنو شرہ اسیٹ اڑینگاسر، ہرانا ایسری خننگتوکہ۔ ایلو پارہ غا بلوچ لبریشن آرمی نا تہٹی ہم شرہ غاککاٹم ارفنگ بناء کریسر، ہرا آخر تنظیمی سروک نا بدلی آ ایسر مسر۔“
“پن کروک کتاب ہمو سیاسی حالیت و ہمو حالیت آتا باروٹ سیاسی راہشون و باسک آتا رد عمل و رویہ تا ذہنی درمان کریسہ اسہ جاچئسے و علم نفسیات نا رد ئٹ اسہ ایسری ئسے مونا ہتنگ نا کوشست ئسے۔“
پین نوشتہ کننگانے کہ “نوشت آتا دا کتاب دا خاطران ہم اہمیت تخک انتئے کہ دا ہموتم نوشتہ کننگار، ہراتم سوشل میڈیا غا سیاسیتنقید ئٹ چک تاڑ ودی مسوسس و اونا سوب تعمیری سلتو، پدا نۓد کاری نا دروشم ئٹ ذاتی جلہو برجاء مس۔ ہراڑے جہد کار تا پِن وجاگہ غاک پاش مننگ بناء کریر، ہموڑے سیاسی شرہ غاک مُری نا دروشم ءِ دوئی کریر۔ دا نوشت آتا مسخت تنقید نا طریقہ ءِ سیاسیاخلاقیات نا دروشم ئٹ تالان و منفی رویہ تا پاش کننگ اس۔ دا کتاب ءِ جوان سرپد مننگ کن الّمی ءِ کہ نم سال 17-2016 نا سیاسیحالیت آتے ذہن ئٹ تخبو۔“