کوئٹہ کراچی سڑک آ تولوک برانز نا سوب آن درزن آ اُلاخ آک گٹ مسر، برانزیک سیلاب آن زیمی مروک علاقہ تا بحالی و کمک تننگ نا خواست کننگ ءُ۔
قلات ئٹ سیلاب آن زیمی مروک آتے کمک نہ رسینگ نا سوب آن زالبول و چناک مغلزئی نا ہند آ کوئٹہ کراچی سڑک آ تولوک برانز کریر ہراڑان ٹریفک نا ہن و بر بند مس و کہی مسافر آک گٹ مسر۔ قلات ئٹ 26 اگست آ ترند طوفانی پِر و سیلاب آن قلات نا جتاء علاقہ غاک سیلاب ئٹ ٹُبار و کہی خلق آک بھس مسر ہرافتیان زیمی مروک آک کمک وے تننگ نا بر خلاف زالبول و چنا تون اوار سڑک آ تولوک برانز کریر۔
برانز نا سوب آن سڑک آ اُلاخ تا ہن و بر بند مس و کہی مسافر آک گٹ مسر۔ زیمی مروک آتا پاننگ ئس کہ سیلاب ءِ بروک اِرا تُوہ آن زیات وخت مس قلات ئٹ مُد بھاز یخ مسنے ولے صوبائی حکومت قلات ئٹ سیلاب آن زیمی مروک آتا بحالی و کمک ءِ داسکان کتنے۔
زیمی مروک بندغ آک دوبہ خلکنو کہ بست و بند نا کنڈ آن سیلاب آن زیمی مروک آتا کمکی سامان تا ونڈ کننگ ئٹ ہم اُست خواہی کننگک گواچن آ زیمی مروک آتے خنتیان چپ کریسہ کمک آتے بنیات آتیا ونڈ کننگک۔
برانزیک شار ئٹ بجلی، دیر، گیس ئنا بحالی و بننگ ءِ یخینی جوڑ کننگ تون اوار سیلاب آن زیمی مروک آتے کمک تننگ نا خواست کریر۔
برانزی تا پاننگ ئس کہ سیلاب آن زیمی مروک آک ترند آ یخ ئٹ خواری تا گواچی ءُ حکومت زوت زیمی مروک آتا کمک ءِ کے۔ اوکان گڈ سیلاب آن زیمی مروک آک ڈپٹی کمشنر تون گپ و تران کریسہ برانز ءِ ایسر کریر دا وخت آ ڈپٹی کمشنر و ایلو افسر آک زیمی مروک علاقہ تا دورہ کریر و زیمی مروک آتا بحالی کن گام ارفنگ نا یخین تسر۔