رحیم زہری و بلوچ زالبول رشیدہ زہری نا بیدس قانودی دزگیر و زوراکی نا بیگواہی تا برخلاف خضدار نا شاری تا کنڈ آن برانز کننگا۔
خضدار برانز ئٹ اوار مروک شاریک شہید رزاق چوک آن آزادی چوک اسکان دپدرشانی کریر ہرا ٹی بیگواہ بندغ تا خاہوت، سیاسیپارٹی تا راہشونک و خوانندہ تا بھلو کچ اس اوار مس۔ برانزیک بلوچستان آن بیگواہ بندغ تا یلہ مننگ نا خواست کریر۔
برانز ئٹ اوار مروک آتا پاننگ ئس کہ دا افسوز نا ہیت ئسے کہ بلوچستان ئٹ برجاء ریاستی زوراکی نا بیگواہی تیٹ داسا زالبول تے ہمگواچی کننگک رشیدہ زہری و اونا خاہوت ءِ دئے دے اسکان زندان ئٹ تخیسہ بے دادی آن گڈ یلہ کننگا واہم رشیدہ زہری نا اَرغ رحیمزہری دائسکان پاکستانی لشکر نا بیدس قانودی دزگیر ئٹی ءِ۔
برانزی تا پاننگ ئس کہ زوراکی نا بیگواہی کون آ بیدس بندغی تدینی تیٹ خضدار نا شاریک بھلو کچ اسیٹ ٹک کننگانو داسا ہم دا برانزئٹ ساڑی غٹ بندغ آتیٹ کس ئسے نا ایلم، کس ئسے نا باوہ تو کس ئسے نا سیال دائسکان زندان تیٹ قیذ ءُ۔
برانزیک بلوچستان ئٹ ریاست نا کنڈ آن زوراکی نا بیگواہی تا لڑ ءِ ایسر کننگ و رحیم زہری تون اوار بیگواہ بندغ تا زو یلہ کننگ ناخواست کریر۔
یاتی مرے کہ داڑان مالو ہم رحیم زہری و رشیدہ زہری نا زوراکی ئٹ بیگواہی نا برخلاف بلوچستان نا شار حب چوکی، تربت، و کوئٹہتون اوار کراچی ٹی ہم برانز کننگانے۔
ایلو پارہ غا چاگڑدی حوالکاری ویب سائٹ ٹوئٹر آ بلوچ، سندھی، پشتون، باہوٹیک و ایلو ایکٹوسٹس آک غم و سوختئی نا درشانیکریسہ زوراکی نا بیگواہی تے توننگ نا خواست کننگ ءُ۔
یاتی مرے کہ رشیدہ زہری ءِ اونا اَرغ رحیم زہری، بلغڑ و چنا تون اوار 3 فروری آ سرچ آپریشن نا وخت گیشکوری ٹاؤن، ناشناس کالونیکوئٹہ غان دزگیر کننگ آن گڈ بیگواہ کننگا، بیگواہ محمد رحیم زہری نا زائیفہ، لُمہ و چنک سن آ چنا تے یلہ کننگا، اندن رحیم زہریدائسکان بیگواہ ءِ۔