حوال تا رد ئٹ بلوچستان ٹی بجلی نا مرغن و بیدس پڑو ہننگ نا بر خلاف زمیندار آک برانز کریر برانز کروک آک کوئٹہ، کراچی بھلا کسر ءِ جتا ہند آتیان بند کریر، ہرانا سوب آن ہزار آ مسافر و نال دروک گاڑیک کسر نا داپار ایپار گٹ مسونو۔
گیشتر حوال تا رد ئٹ بلوچستان ٹی بجلی نا بیدس پڑو و مرغن ہننگ نا برخلاف زمیندار آک قلات شار و منگچر کے نا بھلا کسر ءِ بند کریر برانز کروک آک پاریر کہ کیسکو زمیندار آتے بیست و چار وگھنٹہ ٹی بیرہ ارا گھنٹہ بجلی تیک اوفتا رد ئٹ بجلی نا مرغن ہننگ آن بلوچستان ٹی کشت و کشار آک بھس مننگ ءُ ۔
اندن ایلو پارہ غان قلات ٹی ہم کسر بند مننگ نا سوب آن بھلا کسر نا ہڑتوما پارہ آتیان گاڑی تا مرغنو لیک اس لگوک ءِ و بھاز آ مسافر آک گٹ مسونو۔
اندن مستونگ آن رسینگوک حوال تا رد ئٹ زمیندار تنظیم آتا پارہ غان زرعی فیڈرز آ کیسکو نا پارہ غان بجلی نا بیست و چار گھنٹہ ہننگ نا بر خلاف بلوچستان نا ایلو علاقہ آتا وڑ مستونگ ٹی ہم بھلا کسر تیا تولوک برانز تریسہ بھلا کسر بند کننگانے۔
زمیندار آک کوئٹہ کراچی،کوئٹہ تفتان بھلا کسر تے لکپاس و نوشکی کراس آ بند کرینو اندن کوئٹہ سندھ بھلا کسر دشت ٹی گونڈین نا ہند آ زمیندار آک ہڑاند جوڑ کریسہ کسر ءِ بند کرینو۔
ایسری حوال تا رد ئٹ بھاز آ ہند آتیا بھلا کسر آک تیوہ بند کننگانو حکومت و زمیندار آتا نیام ئٹی مذاکرات سرسہب مننگ کتو۔