بلوچستان نا ضلع کیچ ئٹی پاکستانی لشکر نا کارندہ آتیکن بیگاری و زور ئٹ کاریم کننگ آن نمن مننگ آ فورسز آک گاڑی ڈرائیور آ بےدادی کریسہ ٹپی کریر۔ اندن ضلع کیچ ئنا ہی شار ئٹ اِرا بندغ نا جونک خننگانو۔
شابیتی حوال تا رد ئٹ تدوکا دے بلیدہ نا ہندی جاسم ولد محمد علی پنی ءُ گاڑی ڈرائیور ئسے زامران وقائی نا ہند آ 126 ونگ وقائی نا ایف سی کارندہ آک بیدس پوریا تننگ آن زور ئٹ کاریم ہلنگ و بیگاری نا پاریر، نمن مننگ آ اوڑے ساڑی سیکورٹی فورسز آک گاڑی آن ڈھڑفیسہ ڈرائیور آ بےدادی کریر۔
رسینگوک حوال تا رد ئٹ بیہوشی نا حالیت ٹی اودے کیمپ ئنا تہٹی دننگا ہراکان اودے ٹپی حالیت ئٹ یلہ کننگا، اونا کاٹم و خف تیا باز ٹپ ئس۔
حق دو تحریک ہم دا تدینی نا مذمت ءِ کریسہ پارینے کہ ڈوہدار آ کارندہ آتا برخلاف کاروائی کننگ مرے نہ تو فورسز آتا دُننگا روشت نا برخلاف برانز کننگ آ بیوس مرون۔
ایلو کنڈ آن ضلع کیچ ئنا شار تربت آن اِرا بندغ نا جونک خننگانو۔
لیویز فورس نا رد ئٹ جونک تربت نا علاقہ ناصر آباد نا جنگل آن ہفتہ نا نن خننگاسر، ہرافتے چاہنداری کن ٹیچنگ اسپتال تربت آ دننگاسس، ہراڑے دو بروک جون تے اوفتا سیال آک درست کرینو۔
جون تا چاہنداری جلال ولد یعقوب و خادم ولد شاکر نودز نا ہندی تا پنا مسنے۔
خاہوت آتا رد ئٹ تومکا مسقط و دبئی آن منَہ دے مُست چھٹی آ اُراغا بسوسر، اسہ ہفتہ اس مُست ہڑتوما گُم مسوسر و ہفتہ نا نن اوفتا جشوک جون خننگانو۔