گوادر و پنجگور ئٹ بمب تراک آک

الّمی خوانبو

گوادر و پنجگور ٹی مروک ارا بمب تراک آتیٹ چار بندغ ٹپی مسر۔

بلوچستان نا دریابی شار گوادر ٹی استو جنت بازار آن خڑک اسہ ہندی کوارٹر ئسے آ چغلی بمب ئٹ جلہو کننگا، ہرا نا سوب چار بندغ ٹپی مسر۔

ایس ایس پی جواد طارق نا پاننگ ئس کہ ٹپی مروک آتیٹ صوبہ پنجاب نا علاقہ بہاولپور آن تعلق تخوک زائد انصاری پنی ءُ بندغ ئس اوار ءِ ہرا جیولری نا دکان ٹی کاریم کیک و او پن کروک کرایہ نا اُرا سیٹ رہینگنگ ئس۔

ایس ایس پی نا پاننگ ئس کہ ٹپی مروک آتیٹ ارا ہندی ورنا جواد اصفر و میار اوار ءُ۔ ٹپی مروک آتے انڈس اسپتال گوادر آ دننگا۔

ہمو وخت پنجگور نا علاقہ خدابادان ٹی بلوچستان نیشنل پارٹی (عوامی) نا راہشون اسد بلوچ نا ارا آ نادرست بندغ آک استو چغلی بمب بٹیر و نرار۔

چغلی بمب نا ترخنگ آن ترند ءُ تراک ئس مس واہم تدینی ٹی نسخان تا باروٹ ہچو شابیت حوال دوئی کننگتنے۔

تدوکا بیست و چار گھنٹہ آتا نیام ئٹ بلوچستان ٹی بمب تراک آتا چار تدینی رپورٹ مسونو۔

داکان مالو تدوکا دے بولان نا علاقہ منصور ٹاپ نا ہند آ نادرست بندغ آک پاکستانی فورسز کارندہ آتا پوسٹ ءِ دیر تروک آ ٹریکٹر ءِ تراک ئٹ ٹک کریر و اوکان گڈ ہند آ رسینگوک فورسز کارندہ آتے ہم تراک ٹی ٹک کننگا۔

کوالخواک بمب تراک ٹی فورسز کارندہ تون اوار ارا بندغ نا ٹپی مننگ نا پک کریر۔

بولان ٹی بمب جلہو تا ذمہ واری ءِ بلوچ آزاتی دوست تنظیم بلوچ لبریشن آرمی ارفے۔ ترجمان جیئند بلوچ ہرنائی ٹی موبائل کمپنی نا ٹاور ءِ ہم تراک ئٹ بھس کننگ نا ذمہ واری ءِ ارفے۔

پُوسکنا حوالک

کوئٹہ: اِرا خوانندہ پاکستانی لشکر نا دو آن بیگواہ

بلوچستان نا بنجائی شار کوئٹہ غان اِرا بلوچ خوانندہ، وہاب بلوچ و نذیر بلوچ نا زوراکی ئٹ بیگواہی نا...