افریقی ملک گیمبیا نا اسہ سرکاری ٹاسک فورس ئسے نا ردئٹ بھارت آن ہلوک جکہ نا چار جتا شربت آتا سوب کم آن کم 70 پاڷ اُڑوک چنا تا بِک آک کاریم کننگ ءِ ہلار و اوفک مرگ ئنا گواچی مسر۔
گیمبیا نا جانجوڑی نا وزیر ڈاکٹر احمدو لامین سماٹیھ اسہ پریس کانفرنس اسیٹ پارے کہ دن انگا دارو درمان تا ریگولیٹری و درآمدی جاچ ئٹ بے سہبی نا سوب مس۔ اونا گیشتر پاننگ ئس کہ او بھارتی گڑا ہلکر، ہرا دا دے کہی افریقی ملک نا میڈیکل کنٹرول ایجنسی (ایم سی اے) آن رجسٹرڈ الور۔
او پین پارے کہ ایم سی اے نا سروک ءِ کشنگانے۔ شینک مروک اسہ بیان اسیٹ خیالداری کروک ہمو فارماسسٹ آ ہم دوبہ خلنگانے، ہرا دارو درمان تا جاچ ئنا ریکارڈ ءِ اُوننگ آن بیدس اوفتا ہلنگ نا موکل تسنے۔
کم آن کم ہفتاد پاڷ اُڑوک چنا تا مرک آن گڈ تدوکا سال ستمبر نا بناء آن دائسکان گیمبیا جکہ، نزلہ و زکام نا کیہی پین دارو درمان آتیتون اوار انڈین لیبارٹری میڈن فارماسیوٹیکلز نا جوڑ کروک غٹ گڑا تیا رکھ خلکوسس۔
ورلڈ ہیلتھ آرگنائزیشن (ڈبلیو ایچ او) نا ردئٹ لیب ٹیسٹ آتا کمک ئٹ دا ہیت مونا بسنے کہ او شربت آتیٹ ڈائیتھیلین گلائیکول و ایتھیلین گلائیکول نا ناقابل قبول کچ ساڑی ئس۔ دافک اینٹی فریز نا وڑ ئٹ کاریم ئٹ ہتنگرہ و ہراتم دافتے کاریم ئٹ ہتنگا گڑا دا مرگ ئنا گواچی ہم کننگ کیرہ۔
اقوام متحدہ نا دا ایجنسی نا ردئٹ دا مادہ تے کاریم ئٹ ہتنگ آن بِک آک ہم زیمی مریرہ، ہرا مرک ئنا کنڈ آ دیرہ۔
وزیر صحت نا پین پاننگ ئس کہ گیمبیا نا حکومت زیمی مروک آتیکن نسخان تا زر ہلنگ نا ارادہ کرینے و بے رکھوک دارو درمان جوڑ کروک بھارتی کمپنی نا برخلاف قانودی کارروائی کننگ نا کسر تے پٹنگ ءُ۔